لسان حال امير المؤمنين علي عليه السّلام عند دفن مولاتنا فاطمة الزهراء عليها السلام
يا فاطمه گبلچ تمنّيت
ميت ولارد وحدي للبيت
يا حيلي يا عافيتي
يا روحي يا أم بيتي
ميت ولارد وحدي للبيت
...............................
هذا العمر عشناه سوه. نتنفّس بنفس الهوى. يا محله عيشتنه
حسدونه يا أم الحسن. وايامنه ما طوّلن. ما شفنه راحتنه
بعد النبي وذاك العهد. ظهروا حقدهم والحسد نكروا كرامتنه
انتي يا ريحانة الجنة وعطرها
بياذنب أنهوا حياتج من زغرها
شمعة حياتي ونطفت ليش
اليفگد انفاسه بيمن يعيش
نكبر سوه تمنّيتي
يا روحي يا أم بيتي
ميت ولارد وحدي للبيت
.................................
لمّن دفنتج بالگبر. ما ظل بعد حيل وصبر ونهدمت اركاني
يا فاطمه وبعدج علي. ظل بالمصايب مبتلي وجروحي وحزاني
رديت مكسور الگلب. صدكيني تيّهت الدرب. رحت بدرب ثاني
شلون اطب للدار وحشه ومضلمه الدار
من يواسيني بغيابج حيلي منهار
كلما اصد بعيوني للباب
ضلعج اذكره وگلبي ينصاب
من ضلعج تأذّيتي
يا روحي يا أم بيتي
ميت ولارد وحدي للبيت
..................................
ايامنه الحلوه مضت. بلمح البصر عني ختفت شبسرعه عفتيني
فراگج جرح ما ينحمل. لا آني ميت لا عدل فگدج يأذّيني
يالعشتي بعروگي نبض. مو سهله ادفنج بالأرض ياشمعة سنيني
الله يلعن كلمن السبب أذيتچ
الثاني والأول سبب حزني ومنيتچ
يا فاطمه يا سلوة الروح
بعدج علي عايش بلجروح
لآخر نفس وفّيتي
يا روحي يا أم بيتي
ميت ولارد وحدي للبيت
.................................
ودعتج وحيلي انهدم. وبغيبتج زاد الألم. ما ينوصف حالي
دنيا بغيابج مگبره يا فاطمه وبعدج تره ما ظل بعد غالي
شلّي بحياتي ودنيتي من بيتي گطعوا زهرتي. بيت العلم خالي
ياوكت للدار اطب من غير ملگه
وين اروح ليامكان الدنيا خنگه
بمحرابج اكعد لو اجه الليل
اشتاگلچ والمدمع يسيل
لولادي ما ظليتي
يا روحي يا أم بيتي
ميت ولارد وحدي للبيت
.................................
رديت بجروح الدفن. يا فاطمه ابچي واون متوجّه لداري
شلون ادخل بدونج حرت. گوه عله دمعي كابرت. ما تنشف اعباري
تلگتني زينب باكيه. وين الرضيّة الراضيه. بالمدمع الجاري
بيش اصبّر زينب مصابج هضمهه
اغله شي بالدنيا عد كل طفله امهه
عفتيها طفله شلون تنساچ
ما شبعت وداع وحچي وياچ
حنّتلچ وحنّيتي
يا روحي يا أم بيتي
ميت ولارد وحدي للبيت
سيد زيد الفحام
............................................................
>>Click here to continue<<