“Kinokarvon” ijodiy safarini Xorazmda davom ettiradi
Kinematografiya agentligi hamda Respublika Maʼnaviyat va maʼrifat markazi “Maʼrifat” targ‘ibotchilari jamiyati hamkorligida "Biz bir bo‘lsak — yagona xalqmiz, birlashsak — Vatanmiz!" shiori ostida o‘tkazilayotgan “Kinokarvon” tadbiri 30-aprel hamda 1–2-may kunlari Xorazm viloyatida bo‘lib o‘tadi.
“Kinokarvon” doirasida xorazmliklar uchun “Yakshanba”, "Abdulla Oripov", "O‘zbek qizi", “Samuray”, "Doktor Abdullayev", "Sudya", "Ishq va anduh" kabi qator filmlar namoyishi o‘tkaziladi.
Tadbir davomida O'zbekiston xalq artisti Tesha Mo'minov, O'zbekistonda xizmat ko'rsatgan artistlar Matyoqub Matchonov va Boir Xolmirzayev hamda Ra'no Shomirzayeva, Husan Musaboyev, Boltaboy Toshmatov, Barno Qodirova, Ali Niyazembetov, Umid Iskandarov kabi taniqli kinoijodkorlar bilan ijodiy uchrashuvlar tashkil etilishi rejalashtirilgan.
Kinematografiya agentligi tashabbusi bilan har yili o‘tkazilishi anʼanaga aylangan “Kinokarvon” aksiyasi bu yil ham respublika bo‘ylab viloyatlar hokimliklari ko'magida davom etadi. Yaqinda Abduhalil Mingnarov, Shohida Uzoqova, Feruza Saidova, Ilmira Rahimjonova, Shohruh Hamdamov, Shavkat Komilov, Ali Niyazembetov, Xurshid To‘xtayev, Egamberdi Rahimov kabi ijodkorlar Farg'onada bo‘lib, xalq bilan ijodiy uchrashuvlar tashkil etishdi.
Kinematografiya agentligi Axborot xizmati
>>Click here to continue<<