عدم الرضا بين الازواج رغم العطاء الكبير !
ممكن زوج أو زوجة يبذلوا عطاء كبير عشان يكسبوا رضا بعض ، بس في الاخر تلاقيهم مش راضين ، السر هنا انهم بيبذلوا عطاء كبير في توفير الاحتياجات الحياتية اللي الطرف التاني محتاجها ، ومقصرين في الاحتياجات النفسية اللي الطرف التاني محتاجها بصورة أكبر
مثال ١ :
زوجة بتعمل كل حاجة في البيت ونظيفة وبتعمل احسن اكل وبتربي اولادها كويس ده عطاء كبير جدًا ، بس اسلوبها مع جوزها مش حلو ، وبتعامله بندية ومش بتقدره
هل عطائها في البيت زوجها هيقدره ؟ طبعا لأ ، لان جوزها احتياجاته المعاملة الحلوة اللي ترضيه اكتر من اهتمامها بالبيت ، ولو قصرت في البيت معاملتها الطيبة وتقديرها ليه هتخليه يستحمل ويساعدها كمان في الشىء اللي مقصرة فيه
مثال ٢ :
زوج بيصرف على البيت كويس ومش مقصر في بيته ولا حارمهم من حاجة ، بس قاسي مع زوجته وبيتعامل بشدة معاها ومش بيقدر تعبها
هل عطائه ده زوجته هتقدره ؟ طبعا لأ ، لان زوجته مستنيه منه الحنية والمعاملة الحلوة اكتر من الفلوس ، ولو قصر في الفلوس هتستحمل لانها بتحبه من معاملته الطيبة ليها
يبقى العطاء عشان يتقدر محتاج تعرف احتياجات اللي قدامك إيه ، لان ممكن تكون احتياجاته ابسط بكتير من اللي بتقدمه
اوقات الإنسان سواء راجل أو ست مش محتاج غير المعاملة الحلوة وحسن العشرة والتقدير وهتلاقي عطائه ليك مضاعف .
>>Click here to continue<<