#قصص_القرآن_للأطفال
🔦 قصة طالوت وداوود وجالوت
🌸 كان ياما كان وما يحلى الكلام
إلا بذكر النبي .... محمد عليه الصلاة و السلام ..
🌸 اللهم صل علي سيدنا
مُحَمَّد
🌸 فاكرين يا ولاد بني إسرائيل اللي اتكلمنا عليهم قبل كده؟
🌸 هنحكي النهردة قصة جديده عنهم لأنهم عاشوا فترة كبيرة وكانوا مؤمنين وبيعبدوا الله عز و جل
🌸 وكان ربنا بيبعت لهم الأنبياء علشان يوريهم طريق الحق والخير
🌸 لكنهم نسيوا وبعدوا كتير عن ربنا وفي ناس منهم عبدوا الأصنام اللي هي حجارة لابتضر و لابتنفع
🌸 وفضل ربنا يبعت لهم أنبياء علشان يرجعوا تاني مسلمين لكنهم فضلوا كفار ومسمعوش كلام الأنبياء اللي ربنا بعتهم
🌸 فربنا زعل منهم وبعت لهم ناس كتير أوي علشان يحاربوهم ويطلعوهم من البلد اللي عايشين فيها
🌸 وفعلا اتقتل منهم ناس كتير واتسجن منهم كتير وأغلب البلاد اللي كانوا عايشين فيها خدوها منهم
🌸 مع أنهم كانوا زمان اقوياء بس علشان ربنا زعل منهم بعتلهم ناس تغلبهم
🌸 وكان عند بني إسرائيل كتاب اسمه التوراه محطوط في صندوق اسمه التابوت
🌸 والتوراه ده الكتاب اللي ربنا نزله على سيدنا موسي علشان يعلم بيه الناس الخير من الشر
🌸 وكان جوة التابوت ده حاجات تانية بتاعت سيدنا موسى وأخوه هارون
🌸 وكان بني إسرائيل أول ما يدخلوا حرب مع أي حد بيحطوا التابوت قدامهم علشان يحسوا إنهم مرتاحين ويخلي أعدائهم يحسوا بالخوف
🌸 ودي حاجة ربنا حطها جوه التابوت ده هو بس اللي بيتحكم فيها
🌸 ودي كانت نعمة من النعم اللي ربنا أعطاها لبني إسرائيل
🌸 وعلشان هما كفروا بربنا..ربنا خلى أعدائهم يخدوا التابوت ده منهم
🌸 ومكنش حد حافظ اللي مكتوب في التوراه غير شوية ناس قليلة جدا
🌸 وربنا سابهم فترة من غير ما يبعت أي نبي لهم
🌸 ومجموعة الناس اللي ربنا كان بيبعت منهم الأنبياء دول اسمهم لاوي مفضلش منهم غير ست حامل جوزها اتقتل في الحرب
🌸 وخدوا الست دي وحبسوها في بيت علشان كان أملهم الوحيد إن ربنا يرزق الست دي ولد يكون نبي لهم
🌸 وفعلا الست دي ولدت ولد وكان اسمه شمويل بعد ما فضلت تدعي ربنا كتير إنه يرزقها بولد
🌸 ومعني اسم شمويل أن الله استجاب دعائي وإنه هيكون ولد صالح
🌸 ولما كبر وبقى شاب ربنا خلاه نبي من أنبياء بني إسرائيل وأمره أن يخلي الناس تعبد ربنا لوحده بس من غير أصنام علشان تدخل الجنة
🌸 وحاول مع بني إسرائيل كتير وكانوا كل مرة مش بيسمعوا كلامه وفضل كده كذا سنة لحد ما ربنا هداهم وسمعوا كلامه وبقوا يصلوا ويصوموا
🌸 ولكنهم فضلوا زعلانين علشان التابوت اللي ضاع منهم
🌸 وقعدوا يفكروا إزاي ياخدوا التابوت مرة تانية
🌸 وملقوش غير حل واحد وهو الجهاد والجهاد ده يعني إنهم يحاربوا أعدائهم وهما مؤمنين بالله وعدوهم بيكون كفار
🌸 والجهاد لازم يجي بأمر من ربنا و لكن شمويل عليه السلام كان عارف إنهم مش هيوفوا بوعودهم لو ربنا أمرهم بالجهاد
🌸 فسألهم يعني انتوا مش هتهربوا لو ربنا أمركم بالجهاد فقالوا لأ مش هنهرب وإزاي نعمل كده و وإحنا مطرودين من بيوتنا وأولادنا عبيد عند أعدائنا
🌸 فلما شاف شمويل عليه السلام إنهم مُصريين دعا ربنا إنه يستجيب لهم
🌸 وفعلا استجاب ربنا وإختار واحد اسمه طالوت ليكون هو ملكهم وقائدهم في الجهاد
🌸 فرفض بني إسرائيل وقالوا إزاي يكون طالوت ملك علينا وهو فقير ومش معاه فلوس ومش من عائلة ملوك إحنا أحق بالملك منه
🌸 فاستغرب شمويل من رفضهم وقالهم ده ربنا إختاره وأعطاه علم كبير وقوة في الجسم والعقل تخليه ملك علينا
🌸 وبعدين ربنا بيعطي ملكه للي هو عايزه فقالوا طيب عايزين علامه من ربنا تدل على إن طالوت هو ملكنا
🌸 فقالهم ربنا قال انه هيبعت لكم التابوت اللي ضاع منكوا قبل كده وهتكون شايلاه الملائكة
🌸 وربنا خلى التابوت يرجع لهم من غير حرب ولا أي حاجة علشان يصدقوا إن طالوت ملك
🌸 وفعلا جالهم التابوت شايلاه الملائكة ووافقوا إن طالوت يكون ملك عليهم
🌸 ومرت الأيام وعرف طالوت إن أعدائم جايين علشان ياخدوا منهم التابوت
🌸 والناس دي رئيسهم كان اسمه جالوت وكان حاكم ظالم أوي
🌸 فجهز طالوت جيشه من بني إسرائيل وفكرهم إن ربنا بينصر المؤمن حتى لو كان أضعف من الكافر
🌸 ومشي بيهم طالوت في الحر الجامد وكان عددهم ٨٠ألف
🌸 لغاية ما وصلوا لنهر اسمه الشريعة بين الأردن وفلسطين
🌸 وقالهم طالوت محدش يشرب من النهر ده غير شفطة صغيرة أوي وده اختبار من ربنا
🌸 واللي هيشرب منه هيرجع و مش هيحارب معايا
🌸 تفتكروا بني إسرائيل هيسمعوا الكلام وهيشربوا ولا لأ؟
🌸 ده اللي هنعرفوا بكرة إن شاء الله
🌸 تصبحوا على خير يا حلوين
🌸 وصل اللهم وسلم على مُحَمَّد
🌸🍃🌸🍃🌸🍃
إقرأ 📚 وانشر 📬 تُؤْجَرْ
https://hottg.com/seerawqass
>>Click here to continue<<