القاسم ع (محرم)
يايمه..بجفونچ اقريت الدمع..يا يمه
يايمه..المفارگ ايفت الضلع..يا يمه
الجمال......الدلال.......يروح
.....................
وجودي وعمري مُلك حسين اموت ولا يضل ضامي*
والتذّ بالعطش وارتاح واكشخ لو طحت دامي*
وين الگه براد ايلوگ مثله الجمرة ايامي*
سعادة عمري واسنيني**
اذا سمع يناديني**
هلا ابن اخوي
اختصار الدنيه بس هوه**
اموت ابنظرته الحلوه**
شبيه ابوي
يا روحي..اطشهه الخاطر اخيامه.. ياروحي
يا روحي..اروحن فدوه لجدامه.. ياروحي
بسهام.......السلام.......يروح
............................
هلا بكل نبله ويه الريح عطشانه اشتهت دمي*
اسيل اعله الترب فرحان گبل لا شي يمس عمي*
ولو حلم العرس اي راح وعله اجفونچ يبس يمي*
اعله حيرة عمي بالغربه**
النهر شمره ولا اشربه**
چواني بنار
عله اخيامه يفر عينه**
ولا واحد اجه ايعينه**
اشوفه احتار
بعيونه..سراب الطف شغل باله.. بعيونه
بعيونه..الشماته اگباله چتاله..بعيونه
بعذاب........الشباب.........يروح
........................
اضمن كل عطش بالروح واطشر عمري عالخيمه*
بعد ساعه وتغير الخيل وتطش اضعونه بالهيمه*
اريد انكث سماري افياي واصيرن للخدر غيمه*
ولا اتخيل وافرض**
عله التل عمتي من تركض**
بديهه اجروح
اموت امن الذبح احسن**
ولا اشوفنهن ايركضن**
عله المذبوح
بالهيمه..معقوله عمي ابلا نعش.. بالهيمه
بالهيمه..وايفطر اشفافه العطش.. بالهيمه
وداع.........ضياع........يروح
...........................
العرس والحنه كلهه احلام ضاعن يمه بالغربه*
اريد اشبع ذبح بحسين ولا اعوفن فرض حبه*
سمعت امحظرين الخيل يدلوهن عله گلبه*
اريد اضلوعي متكسره**
اذا حافر سحگ صدره**
ويه عمي حسين
اريد استشعر آلامه**
واريد امتد عله اجدامه**
واشب جرحين
بسنيني..يا يمه اغطيله الجسد.. بسنيني
بسنيني..عمرين اهديله بعد..بسنيني
اصير.......حرير.......يروح
..........................
نيشان العرس ضميه باچر يم علي نلتم*
واضن عمي الگمر يحتار يضل يچويه المخيم*
القهر ياكل شبابه اهناك ضعن كامل ترى اتيتم*
اذا حنّو الي چفي**
دموع الدنيه شتّكفي**
عمود الراس
الخجل يلچمني چف عندي**
احير ابنينوى شهدي**
لابو الاحساس
للجنه..اخذي دمي حنتي..للجنه
للجنه..بلامة حربي زفتي..للجنه
اريد.......اعيد.......يروح
علاء المياحي
الفاتحه لروح والدي
>>Click here to continue<<