🇺🇿 Toshkent shahar hokimi Shavkat Umurzakov boshchiligidagi ishchi guruh Mirzo Ulug‘bek tumaniga tashrif buyurdi

Tashrif davomida “Bog‘imaydon”, “Bahor”, “Alisherobod” va “Turon” mahallalarida infratuzilmani yaxshilash, xavfsizlik darajasini oshirish, obodonlashtirish, aholi uchun qulay va yaqin manzillarda yangi ish o‘rinlarini yaratish, uylarga tutash hududlarni avtotransport vositalaridan ozod qilib, katta-yu kichik uchun qulay maskanlarni yaratishga e’tibor qaratildi.

Xususan, “Bog‘imaydon” mahallasining 367-sonli maktabgacha ta’lim tashkilotida bolalar uchun yaratilgan imkoniyatlar, muammolar va kamchiliklar o‘rganildi. Shu jumladan, bolalar uchun ovqat tayyorlanadigan oshxonaning shart-sharoiti, sanitar-gigiyenik holati, mahsulotlarning sifatiga e’tibor qaratildi. So‘ngra Sh. Umurzakov Respublika Olimpiya zahiralari Tennis maktabidagi rekonstruktsiya jarayoni, binoning bugungi holati va kelgusidagi qiyofasining taqdimoti bilan tanishdi. Shu bilan birga, mahallada amalga oshirilishi ko‘zda tutilgan, dastur doirasidagi ishlar bilan tanishildi.

“Qizil” toifadan chiqarilayotgan “Alisherobod” mahallasida MFYning yangi binosi bilan tanishilib, u yerda tashkil etilgan kutubxona, binoning yerto‘lasida faoliyatini yo‘lga qo‘yib, yangi ish o‘rinlarini yaratgan tadbirkorning ishiga ijobiy baho berildi.

Shu bilan birga, “Turon” mahallasiga tashrif chog‘ida hududdagi noqonuniy qurilmalar, avtotransport vositalari bilan egallab olingan maydonlar tanqidiy baholanib, mahalla ma’muriyatiga tegishli ko‘rsatmalar berildi.

YouTube | Facebook | Instagram | Web-site | Twitter | Linkedin