السلام عليكم ورحمة الله
انا تسنيم عبدون بكتب روايات

كتبت روايه جديده
اسمها ن_أ_م_آيس للتوعيه ضد المخدرات بالأخص الآيس ترقبوها ان شاءالله🔥🔥🔥🔥

ن_أ_م_آيس

تسنيم عبدون
-1-

الحمدُللهِ على لطفهِ المتجلّي في كل تفاصيل الحياة💛



كلكم نفسكم تعرفوا عنوان الروايه ن_أ_م_ آيس؟

خلونا نخت خط تحت كلمة آيس دي أولا كلنا سمعنا عن مخدر الآيس السوشيال ميديا القنوات الفضائيه في المواصلات في اي ركن بتكلمو عن الآيس خلونا بداية قبل ندخل للروايه ناخد جوله ونبذه بسيطه عن المخدر دا أما الرموز دي( ن_أ_م) حنعرفها نهاية الرواية ان شاءالله.......

الآيس هو مخدر مكون من حمض الكلورديك_الفسفور_الكبريت_كبريتات النحاس_الليثيوم.
ممكن تعاطيها من خلال التدخين او طعنها او ممكن يحولو الحبوب بتاعتها لبودره ويتم استنشاقها او ممكن تناولها بالفم.
مخدر الآيس عنده اضرار كتيره جسديه ونفسيه وغير ممكن يضر بالقلب والكبد والكلى والمخ وغير الحمى والأرق والجلطات




انا طاهر محمد عبد الله الأخ الكبير وخريج السنه دي هندسة إتصالات وعندي أختين طيبه وهبه أبوي مدير أعمال كبير معروف وكل أوقاته سفريات واجتماعات وأمي مريم ربة منزل أخواتي طيبه في الجامعه وهبه في الثانوي


انا طاهر دا معروف في كل الحله زول دُغري وإنطوائي ومعندي شي غير صلاتي وقرآني وقرايتي واللابتوب والتلفون أينعم نحن أسره وبنحب بعض وأي حاجه ولاقين الدفء والحمد لله على كل حال بس م عندنا لمة اسره ونحكي لبعض يومنا أبوي وقته كلو في الشغل وأمي في النت طوالي بتحضر وتشوف وصفات اكلات ومن قروب لقروب في الفيس وعده وملابس وانا واخواتي بنجي من دوامنا بس متين نحصل السرير الجمعه والسبت بنقول عطله ونقضيهم نوم حنكون جزء من الروايه دي ن_أ_م_آيس


أما أنا حسام كمال معتصم ابوي منفصل عن أمي وعندي أخت اسمها زينب أما باقي التفاصيل حتعرفوها قدام لأننا جزء من رواية ن_أ_م_آيس



خلونا ندخل لتفاصيل الروايه
نبداها بلسان طاهر:
في يوم من الصباح صحيت وخلاص ماشي الجامعه وزول خريج وبتاع نزلت تحت لقيت الشاي جاهز شربت وطوالي على جامعتي كان الدوام عادي جاني صحبي حسام قال لي ياخ عندي شلتي من زمن الثانوي جوني الجامعه سلموا علي وما قصروا وانا عازمهم فطور رأيك شنو قلت ليهو ي زول قدام بس انا اصلا جعان زاتو ارح عليهم مشينا وسلمنا عليهم صراحة في البدايه شكلهم ما عجبني خالص وانا سرحان بعاين فيهم وجواي بفكر قطع تفكيري حسام:طاهر ديل اصحابي امجد ومهند وخالد دا طاهر صحبي شديد زول الطقه والحفار عكسي تماما انا بدك المحاضرات وبقينا نضحك صراحة تاني اتلفت لقيت مهند ده نظراته غريبه شديد وامجد وخالد بعاينو في بعض على بال م نزلو لينا طلبنا كنا بنتونس والكوره وكأس العالم أول م الجرسون نزل لينا الأكل حسام شغال للجرسون وهو بنزل لينا الأكل شيل شيل شيل ي طويل العمر شيل ضحكنا لمن شبعنا خلصنا وأي حاجه استأذنت منهم
شباب ياخ والله كان لحظات ظريفه شديد ونتلاقى ان شاءالله وسعدت بيكم جدا ياخ قاطعني حسام ي زول دا شنو الكلام الكلو زوق دا مستضفينك في برنامج نحن خالد قاطعو يا زول مالك ياخ والله نحن السعدنا بيك اكتر وان شاءالله الجايات احلى وأكتر
ودعتهم وطلعت منهم اللحظه ديك مهند غمز ليهم نظام زول فيكم يبدأ

كانوا اصحاب حسام في الثانوي وزاروهو فجأه ونظرات غريبه وسر غمزة مهند لأمجد وخالد شنو؟؟؟؟


#يتبععع

ن_أ_م_آيس

تسنيم عبدون


-2-

أمجد كح كُحه صغيره كدا وقال لحسام اها اخبارك والدنيا ماشه معاك كيف حسام قال ليهم والله ياخ ياهو عايش جاري بين الجامعه وافتش لي رزق طبعا الحاج انفصل من الحجه وقطع مننا لا حس لا خبر وطبعا ماف حاجه نسترزق بيها الحجه كانت عايزه تشتغل قالت لي بغسل وبكوي او ببيع ايسكريم قالت لي يا ولدي الشغل ما عيب أبيت ليها نهائي قلت ليها انا بتصرف وانا راجل البيت دا والله الحمد لله بس شايل هم وأختي زينب جامعتها قربت طبعا شالوها طب الخرطوم وطالبين مبلغ خرافي عديل بس يا زول هدا عايشين والأجر على الله خالد كان جنب مهند همس ليه المان دا تقول قلنا ليهو أحكي لينا قصة حياتك بقو يضحكو براحه بدون زول يلاحظ ليهم

امجد رد ليهو يا زول بتتجازف ان شاءالله والله نحنا كلنا الحياة عملت فينا كدا بس عايشنها
قعدوا حبه وودعو بعض وحسام اتجه لبيتهم وامجد ومهند وخالد ركبوا عربيتهم خالد كان سايق ومولع سجارتو وجنبه مهند ووراء كان قاعد أمجد خالد بقى جايط هسه جيتنا ليهو دي طلعت بدون فايده وخطتنا فشلت والمعلم ادانا ليوم بكره بس ويكون معانا رابع ومن خلال الرابع بنقدر نكبر المجموعه والموضوع دا يتوزع انتو قعدتو قضيتوها تحكو قصة حياتكم أمجد قال ليهو ي زول انت مجنون الحكايه دي عايزه ليها تكتيتك قال ليك طوالي كدا بنقول للزول عايزنك معانا في مجموعة مخدرات نحن ياداب كدا حنذكرو بينا وحنرجع نصاحبه ولمن شويه شويه حنقدر نرميه مهند قال ليهم خليكم من دا كله م شفتو صحبه داك شكلو زول مُرطب عديل خالد طفى سجارتو قال ليهم دا كمان الدور جاييهو والله انتو عارفين ي شباب صاحب حسام دا لو وقع معانا حنكسب كسبه قويه والمعلم حينبسط مننا وحيزيد لينا الضحاكات(رئيس مجموعه بتوزع مخدرات بنادوهو بالمعلم) شباب نحن راجينا كتير ولازمانا خطط وحاجات عشان نرمي حسام بعد داك من خلال حسام حنقدر نصل لصحبه
خططوا ورسمه اي شي بحصل وكل زول نزل بيته

أمجد انت بقيت تجي البيت متأخر من غير عادتك وبعدين دي شنو ريحة السجاير دي أمجد دقيقه وده شنو اللابتوب الشايله دا من وين لقيت القروش واشتريتو ونحنا برانا رزق اليوم باليوم

أمجد وهو جايط يا أمي وبعدين معاك ياخ ما ممكن انا كل م أجي داخل البيت دا تحقيق تحقيق معقوله ياخ انا راجل بشنبي ما بت انا عشان تحققي معاي قدر دا ياخ موش البيت دا خليتو ليك
طلع وقفل وراهو الباب بقوه امه بقت تصرخ مع الصرخه دي طلع ابوهو في شنو ي مره أمجد ي علي أمجد دا تعبني خلاص غلبتني الحياه فيهو ماله أمجد ي مره هااا ايوا انت فاضي عشان تخلي بالك من ولدك ولدك بقى يجينا انصاص الليالي لا والليله جاييني ريحة السجاير تجيب الطاشي وشايل لابتوب من وين يجيبه وامجد اصلا ما شغال ونحن رزق اليوم باليوم عليك الله ي مره انتي ماعندك زرة موضوع وانا راجل قدر دا م حادخل في تفاصيله وطيري من وشي دا خلعتيني تصرخي كدا قايل في شي هسه ودخل جوه وخلاها في الحوش ومساهره منتظره ولدها وهي تبكي لمن نامت للصباح في الحوش وفي برد شديد وبرضو أمجد ما ظهر

في الصباح كدا في الموقع بتاع مجموعتهم الناس بقت تصحى مهند صحى لقى أمجد نايم جنبه صحاهو ي زول انت الجابك شنو نحن موش امس نزلناك بيتكم والله متذكر وكنت واعي كمان ياخ مشيت جُطت مع ناس البيت يحققو معاي شافع انا قوم قوم طيب بلاش انفعال خلينا نمشي للمعلم ونشوف بحصل شنو


#يتبععع

كل يوم حلقه🔥

ن_أ_م_آيس

تسنيم عبدون

_3_


اسمعني يا حسام وبدون أي مقدمات ولا لف ولا دوران قدامكم يومين بس وتخلوا البيت دا عايزو واحد وبسعر سمح شديد وانتو قعد تتأخروا في الدفع هسه ليكم شهرين شهرين يا حسام م جاني غير ربع المبلغ
عارف يا عمر اتأخرنا وأي حاجه بس عايزين مُهله وانا حتصرف احتمال امشي البلد اشتغل زراعه ولا حاجه وبجيب ليك قروشك كامله بس في الوقت الراهن خلي لينا البيت بس لمن نفتش
اسمعني يا حسام دا كل العندي وقلتو ليك قدامك يومين سلام عليكم يلا
حسام بقى واقف محله ومتحير وماعرف يعمل شنو وهو بقفل باب بيتهم وسرحان وجايط جاته زينب
حسام دا منو الكان في الباب
اا زينب لالا دا واحد صحبي كان عندو عندي امانه وشالها
حسام طيب مالك شكلك ما عاجبني وزهجان كدا
ماف شي ي زينب اها التسجيل بتاعكم متين
التسجيل قرب ينتهي ي حسام وصحباتي كلهم مشو سجلو باقي تقريبا اسبوع بس ويقفل وكنت بتكلم مع امنيه صحبتي وعايز استفسر اكتر زي ما عارف تلفوني م بشتغل الا في الشاحن خربان زيته طالع
لالا بتتسهل ان شاءالله انا طالع عايزين حاجه؟

لالا سلامتك بس
طيب يلا خلي بالك على أمي واديها حبوبها في وقتها

حسام حبوب أمي خلصت ليها يومين وقالت م تكلمك عشان م تعصر عليك وانا ياداب اكتشفت الحاجه دي الليله

لاحولا ولاقوة الابالله خلاص تمام تمام بتصرف بجيب ليها يلا مع السلامة
يلا طيب

اسمعني كشف كشف داك ما حسام عاينو ماشي حزين كيف أكيد محتاج لقروش ولا حاجه اديهو بوري كدي وقف
خالد حك فرامل شديده وقال بسسسس دا الوقت المناسب البنفتش عليهو ودق ليهو بوري

ياخ دا كمان مالو الظلط طويل وعريض يدق لي بوري م يطير بجاي ياخ طوالي سمع واحد نزل القزاز وبنده ليهو لقاهم أصحابه
اركب اركب يا حسام شنو ي مان ماشي كدا
والله يا شباب قافله معاي ياخ بتاع الايجار جا قفلها معاي وتسجيل اختي قرب وأمي حبوبها خلصت والامور جايطه شديد ياخ
حسام انت م نفسك تشتغل طيب
أمجد وين كدي وريني لفيت البلد دي كلها
عاين يا حسام نحنا عندنا ليك شغل انت اتفهمنا كويس ولو فهمت طبيعة الشغل كويس وواصلت فيهو والله صدقني امورك حتظبط
اها فهموني وربنا يسهل بسس
تمام هسه نحنا في طريقنا على محل الشغل وحنوريك اي شي
وصلو الموقع حسام بقى يتلفت قال ليهم دا شنو يا شباب ودا شنو مكان منقطع كدا ومالو المبنى غريب  كدا

هششششش ادخل جوه وحنفهمك
ارح طيب
دخلوا جوه وسلمو على المعلم وكان واضح زول صعب كدا طويل عريض معضل وعندو لحيه كبيره وكان بشرب في سجاره غريبه كدا وجوه في المحل كله ملان صناديق كبيره ومُحكّمه
طيب يا حسام شغلنا دا والله يخليك تلعب بالقروش لعب بس انت افهمنا للآخر تمام
حسام كانت باينه عليهو الحيره ووشو كلو استفهامات قال ليهم تمام اها وروني
تمام ي حسام نحن كل البنعمله بنستقبل مخدرات ونوع معين اسمه الآيس وطبعا بكل سريه تامه بندخلها المحل دا بنقول ليهو الموقع شايف الصناديق دي كلها عباره عن مخدرات آيس ومقسمين الشغل جزء بوزعها كحبوب ونتعاقد مع ستات الشاي وجزء بستقبل الخضروات ويطعنها ونوزعها في السوق وجزء بطحن الحبوب دي بحولها بودره وطبعا اكتر شي بنستغل حلويات الأطفال دي عشان اكتر شي بشترو هم وطبعا القروش حاجه خرافيه تلعب بيها لعب ممكن تشتري بيت وتقري اختك وتعالج أمك


يا ترا حسام اداهو فرصه يتم كلامه عادي هل وافق على العرض المغري دا ولا رفض؟حنشوفو الحلقه الجايه

حوقلوا💛
#يتبعع

ن_أ_م_آيس

تسنيم عبدون

_5_


ماشي على وين يا طاهر

أمي والله حسام صحبي دا ليهو يومين لا حس لا خبر وبتصل تلفونه مغلق ماشي بيتهم اشوف الحاصل شنو
تمام الله معاك يا ولدي

طاهر وصل بيت ناس حسام لقى البيت جايط وفي دفار بنزل في عفش وامه واخته ماسكين بعض ويبكوا طاهر جرى عليهم
خالتي زينب مالكم خير في شنو ودي شنو الجوطه دي وحسام وين
ام حسام كانت قاعده في كرسي وتبكي يا ولدي حسام كنا قايلنو معاك يا ولدي حسام وين لا حس لا خبر عليك الله شوف ولدي وين
زينب قالت ليهو وهي مكسوره يعني يا طاهر حسام ما معاك
طاهر قال ليهم زينب دقيقه ارح بعيد حبه وفهميني
يا طاهر حسام دا اخر شي كان الباب دق وبعد الراجل طلع وشه كان مخطوف وانا حاسه م وراني الحقيقه بس قال لي دا صحبي عندو امانه شالها ووصاني على أمي وطلع وتاني م جا والليله من الصباح جانا بتاع الايجار ومعاهو الراجل العايز يأجر البيت والراجل جاط فينا وقال الا يطلع عفشنا الشارع الا الحمد لله الراجل المعاهو ثبتو وقال ليهو اديهم فرصه يا عمر وهسه كمان خلي عفشهم لمن يلمو في اخوهم ممكن يقعدو في الصالون وانا عشان البيت الساكن فيهو طلعوني منو حأجيب اولادي وزوجتي وعفشي وحنختهم في عيونا والناس للناس يا عمر ياخ بعداك عمر خجل وسكت ساي حاليا انا وامي م بنبكي عشان البيت بنبكي عشان حسام يا طاهر نحنا تاني م عندنا سند باقي لينا غير حسام يا طاهر
طيب يا زينب امشي جنب خالتي وان شاءالله م بحصل الا الخير
طاهر مشى على الرجال وبقى يحدر لي عمر يخس دا كلو عشان قروش عمر جاي عليهو يضربو مسكو الراجل التاني قال ليهو فكني فكني ليهو يطلع منو هو ولدهم هرب خلى البيت هارب من المسؤوليه طاهر مشى عليهو قايل كل الناس عادمين رجوليه زيك حسام اخر من يهرب من المسؤوليه
عمر بقى يقاوي في الراجل عشان يفكو ويمشي يضارب طاهر
ي جماعه كدي اهدو الموضوع دا بتحل بالهداوه انا م عندي مانع يقعدو معاي لمن اخوهم يجمع
مشيت وين يا ولدي انت كمان عايز تهرب مننا زي ابوك انا واختك زنبنا شنو م نلقى راجل يسندنا لشنو يا ولدي الحاصل عليك شنو واااا حرقة حشاي عليك يا ولدي
زينب ماشه وجايه وتبكي زي الرايحه ليها حاجه حسام تعال يا حسام ان شاءالله م قعدنا في بيت بس تعال ي حسام نحنا محتاجنك م عايزه جامعه انا يا حسام بس عايزه اخوي انا ااااخ يا حسام يا جامع يا رقيب يا جامع يا رقيب
وهي ماشه وجايه جاهم طاهر قعدهم الاتنين يا خالتي ويا زينب انا حامشي وافتش حسام هسه لمن يرجع حسام بالسلامه عندكم خيارين يا اما تمشو تقعدو معانا في بيتنا او تقعدو هنا مع زوجة الراجل المؤجر البيت دا زي م قال وانا بوعدكم كل يوم حأمر عليكم
خلاص يا ولدي نحنا بنقعد معاهم وشكلهم ناس طيبين مرتو هسه كانت جنبنا بتواسينا مشت بيتهم القديم تجيب حاجات وجايه بس عليك الله يا طاهر يا ولدي جيب لينا حسام
ان شاءالله يا خالتي انتي م تشيلي هم ولو حسيتو نفسكم م مرتاحين اديني تلفون بس انا بوديكم بيتنا
ودعهم وهو ماشي زينب جرت وراهو نادتو على جنب بعد اتلفت عليها تاني اترددت حسا بيها زي العايزه تقول حاجه ومتردده
ايوا يا زينب قولي العايزه انا محل اخوك ناقصاكم حاجه؟
زينب بقت تبكي وتتكلم طاهر أمي حبوبها قطعت وانا خايفه عليها
اسمعيني يا زينب الروشته في عربيتي حسام ختاها هناك وم تشيلي هم انا هسه بمشي اجيبها واجي طيب
طيب ان شاءالله شكرا ليك يا طاهر وبوعدك اول ما حسام يصل ان شاء الله بنرجع ليك القروش
عيب عيب عليك الكلام دا يا زينب امشي يلا اقيفي مع امك على بال اجيب الحبوب واجي  ...
#يتبععع

ن_أ_م_آيس

تسنيم عبدون

_4_


حسام وقف على حيله وكان قابض كف يده قوي وباين عليهو الغضب اخر الزمن انا عشان ما لقيت قروش افتش بالحرام صح عشان انا أربح أضر غيري واقتل غيري واحرق حشا أمهاتهم م اتوقعتها منكم بذات ي أمجد وخالد ومهند خالد ههه تتذكر يا خالد لمن اخوك اتوفى تتذكر امك تتذكر حالتها كانت كيف وانت كنت بتبكي عشان حالة أمك ليه بس ليه بسببكم تحرقو حشا امهاتهم وتدهورو أسر وبيوت

عاين يا حسام غلطانين نحن العايزين مصلحتك واسمعني يا مان انا جبتك عشان تشتغل ما عشان تعمل لي محاضره هنا ظط وصدقني لو طلعت من الموقع دا حتندم وم حتضر الا نفسك

انا حأطلع والعايز تعمله أعمله

حسام طلع وراسه جايط ويفكر معقوله معقوله الدنيا دي بقت كدا عشان مصلحتهم يعمله في الناس كدا معقوله اصحابك وكانو اكتر من اصحاب يبقو بالبشاعه دي كله عشان يكون عندهم قروش يضرو الناس بالمخدرات والناس تموت لا بس اتخيل بس أم فرحانه بولدها ربنا رزقها بعد سنوات سنوات عديده يمشي يشتري حلاوه بين يوم وليله تفقده؟ لا حسام انت لازم تحصل الموضوع دا

ايوا نحنا وراهو م تشيل هم لسه م دخل على المدينه

ايوا سريع حصلوهو الولد ده الليله يبيت في الموقع هنا  انتو عارفين لو حصل المدينه امرنا بنتهي وممكن يبلغ الشرطه واي شي حيتهدم

خلاص قربنا عليهو

دي شنو العربيه دي محل اقبل ماشه وراي
السواق نزل القزاز ودق بوري وقال لي حسام سلام عليكم يا شاب
اهلا مرحب بيك
داخل على المدينه
ااي
اركب اركب
حسام في الاول جاهو شك انه دا تبعهم بس تاني قال سوء ظن وركب
فتح ليه الباب القدام
السواق عمل يوتيرن للعربيه
دا شنو يا زول رجعت مالك موش قلت ماشي المدينه؟
قبل السواق يرد عليهو واحد كان راكب ورا لصق منديل في وش حسام خلاهو طوالي تدريجيا بدا يغض عيونه ورقد

وصلو الموقع......

من جانب آخر♤♤♤♤♤♤♤♤♤

الكل هسه بفكر انه انا طاهر  ليه ما ظاهر كتير سلفا قلت ليكم اني انطوائي حسام دا بس يمكن صحبي وبلاقيهو في الجامعه ومره مره نطلع سوا
في حلقات جايه حاظهر ليكم بس كيف وحتكون حياتي كيف تاني هل حاكون طاهر زاته ولا حاتغير؟؟

فلاش باك○•°
هاهاهاهاهاهاهاها قلت ليك يا حسام تطلع من الموقع دا حتندم وم حتضر الا نفسك هاهاهاهاهاها عامل لينا الشريف الرضي وم بتاع مخدرات وكلام زي دا انت حتدمنو تاني خليك من انه توزعه وتبيعه هاهاهاها
أمجد ومهند يلا على المعلم عايز يدينا قروشنا عشان جبنا ليهو واحد جديد هاهاهاها
شيخ الشيوخ قلت لي هاهاهاها كفك بالله
دخله للمعلم سمعوهو بتفق مع زول في التلفون وكانت المكالمه

ااي يا زول اسمعني كل العليك بمجرد ما لوري الطماطم دا يصل اديني تلفون انا حأرسل الشباب ديل يشتروهو كله ولسه عندنا خضروات تانيه وغير حلويات الأطفال دي جايانا الاسبوع الجاي اتفقنا مع زول

ايوا ي معلم انت عارف لو نجحنا في الحاجات دي حنكسب كسبه قويه وحنكافئ شباب الموقع كلهم

يا زول دا كلامك هاهاهاها

من جانب آخر°°°°• في إحدى الداخليات للطالبات دخلت على الداخليه بعد الزمن بكتير فيروز بت حلوه شديد واهلها على قدر حالهم  متوسطة الطول وكانت لابسه بنطلون وفاكه شعرها نزلها واحد بالعربيه ومشى بعد جوطه مع المشرفه دخلتها
دخلت فيروز وهي تخربط في الكلام وعيونها مطفيه وعندها هالات تحت عيونها وصلت غرفتها وجدعت شنطتها ورقدت في سريرها وهي بتبكي من الألم وتصرخ
بنات غرفتها اتلمه وكانوا شاكين انها بتاخد مخدرات
بنات انتو عارفين فيروز مما قالت عامله علاقه مع الأسمه خالد داك انا قنعت منها ما عارفه لكن حاسه خالد دا زول ما كويس
لكن يا جماعه فيروز دي حتفضل كدا لمتين اتكلمنا معاها لمن فترنا
بنات افضل حل نكلم المشرفه وهي تتصرف  مع اهلها
لالا ياخ واهلها زنبهم شنو ما شفتي ابوها لمن جابها اول يوم يقطع القلب اظن حق مواصلات الرجعه ما كان عنده فيروز دي م كانت كدا ي جماعه فيروز دي بت بلد وشفتوها براكم لمن جات برلومه كانت كيف كانت في الداخليه بتلبس طرحه
كان ي جواهر بس حاليا الوضع اختلف لا وشفتي القروش دي بتجيبها رُزم كيف؟انا وانتي وكلكم عارفين فيروز دي اهلها على قدر حالهم
جات وحده تصفق ليهم وكان واضح انها صحبتها اهاا ي حريم الحله خلصته نميمه الحُشريه دي لمتين ان شاءالله فيروز دي حياتها وماف وحده تدخل فيها تمام زي م كل وحده لازمه حياتها لنفسها
وحده همست للتانيه في اضانها يختي عشان ضاربه من قروش فيروز ي بت فيروز قعد تديها ربع المبلغ ليها الحق تدافع ليها
●○•الكاتبه•○●(صاحب وقف معاك في الغلط دا ولا تقول عنه صاحب  واقفلوا معاكم القوس دا لأنه قفلت معاي خلاص انا من مجتمعنا دا


#يتبعععع

ن_أ_م_آيس

تسنيم عبدون

-6-


يااا أمجد أ أ أديني تاني جيب جيب يا زول

هاهاهاها وقعت يا حسام وقعت يا الشريف الرضي هاك هاك امسك

اسمعني يا علي فتش بأي طريقه شوف حسام دا انا بحاول افتش المستشفيات وانت شوف ناس مخابرات ولا حاجه
ان شاءالله يا طاهر خلي الموضوع دا علي وان شاءالله يرجع بالسلامه

♤♤♤♤♤♤♤♤♤♤♤♤♤
،،،،في إحدى العيادات النفسيه،،،،،،

واي يا دكتور انا ما كنت كدا ليه انا بقيت كعبه كدا انا كنت زوله طموحه وعايزه اقرأ وامتحن تالت دي وادخل الجامعه الله يجازي الكان السبب دي (معالي برضو ضحية آيس كانت بتشكي وهي محروقه معالي دي كانت زوله معروفه بشطارتها وزوله مميزه بأخلاقها) شوف يا دكتور انا صحتي اتدهورت كيف شوف عيوني يا دكتور اااخ
بسم الله مالك يا معالي
بطني جاتني طعنه يا دكتور انت عارف يا دكتور ابوي لمن وصلو ليهو الكلام وهو في السعوديه انو بتو بقت مدمنة آيس ورسلو ليهو فيديو ناس كانو بتجسسو عارف حصل شنو طوالي نزل السودان وجاب لأمي ورقتها قال ليها م عرفتي تربيها عارف يا دكتور بسبب الادمان اسرتنا اتفككت بقينا مشتتين انا جيت قعدت داخليه وامي اتبرت مني وابوي م عارفين تاني مشى وين وحاليا قروش الداخليه بسددها لي الراجل البجيب لي المخدرات قال لي اي شي خليهو علي دكتور انا عايزه ارجع معالي الزمان بسببي اسرتي اتفككت لهسه انا متذكره جدي كان بحكي لي بفرحة امي وابوي بي لمن اتولدت وكانو ببكو لأني ثمرة حبهم وجيتهم بعد انتظار وعلاج وسفر وصبر انا مسحت فرحتهم بالواطه بقت تُكح ونفسها بقى يقوم تاني واصلت وهي بتبكي  ربنا ياخدني ان شاءالله اموت ارتاح من الدنيا دي
الدكتور بقى يتكلم معاها خلصتي يا معالي؟امممم عندك حاجه تاني نفسك تتكلمي عنها
لا
معالي طيب اولا تفتكري لو انتي قلتي تحلي مشكلتك دي بإنك تموتي تفتكري حتكوني جاهزه انك تقابلي ربنا؟ماف مشكله بتتحل بالموت حتمشي تاني تلاقي حساب عند ربنا وعذاب صح ولا م صح؟

صح

طيب يا معالي حاليا عشان انك تقدري تعالجي الادمان دا قبل علاج الحبوب والحاجات الكيميائيه دي عايزك تكوني جاهزه نفسيا وعندك الرغبه التامه عشان تساعدينا تمام
تمام
■□●○•°•○●□■■□●○•°°•○●□♤

فيروز تعبت شديد وبقت تصرخ وتتألم ساقوها صحباتها للمستشفى والدكتور طلب تتطعن حقنه مهدئه اولا عشان يقدر يكشف طعنوها هدت وبقى يكشف وطلب منهم فحوصات صحصحت حبه مشو ودوها المعمل والنتيجه طلعت جابوها على الدكتور وهو بقرأ ملامحه كانت متغيره قال ليهم فيروز دي في دمها في مخدر وفي فحص البول برضو في مخدر ودا بدل على انها مدمنة مخدرات مما أدى لأنو يتم تعطيل كِليه وحدا ولازم نستأصلها وحنحدد موعد للعمليه وطبعا مبلغها حيكون م شي ساهل يعني ولازم يجي ولي أمرها لأنه دي استئصال عضو م شي ساهل الا يجي ولي أمرها بزات نفسه ويقوم بإجراءات العمليه

يا دكتور طبعا زي م عارف نحن طالبات وبعيدين من أهلنا م ممكن نعمل ليها الاجراءات برانا والقروش الله كريم بتتجازف

طبعا لا  وهسه دي علاجات مبدئيا حتاخدها لمن زمن العمليه وطبعا مستعجله حتكون للاسبوع الجاي ان شاءالله
تمام شكرا يا دكتور
ودوني بيتنا اااااخخ انا تعبت يا جماعه والله تعبت انا جسمي كلو بطعن فيني دبابيس بس عيوني ماقادره افتحها م تعملو لي اي عمليه خلوني اموت بس ابوي لو عرف بته كانت مدمنه حيحصل ليهو شنو ماف زول يكلمه ما عايزه عمليه انا
فيروز لازم تعملي العمليه عشان تقدري تواصلي باقي حياتك
م عايزه حياة عايزه اموت شغفي للحياة راح راح والله راح يا جماعه
♤■□●○○●□■♤♤■□●○
من جانب آخر

سجمي طاهر يا ولد شكلك دا مالو كدا عيونك دي مالها كدا في شنو
ماف شي يا امي
يا ولد انت متخلف كيف يعني مافي شي
طاهر بنهره:قلت ليك مافي شي يا امي مالك ياخ تقفليها معانا بعدين من متين عاملين مهتمين فينا كدا م كل واحد عامل فيها مشغول كأنكم م عندكم زفت جايبنهم للدنيا دي

سجمي لالا من متين كنت بتتكلم معاي بالأسلوب دا لا في شي طاهر حلفتك مالك
ياخ قلت ليك مافي شي وكدي زحي خليني ادخل ولا بخلي ليكم البيت دا



زينب يا بتي اتصلي لي لطاهر اسأله من حسام
يا أمي الولد عزبناهو ياخ كفايه جاب الحبوب تاني نكرهو تلفونات
زينب يا بتي طاهر راجل ضكران انا عارفاهو اتصلي بس
كويس يا أمي كويس

طاهر اتغير مالو والحاصل شنو حنعرفو قدام

#يتبععع

ن_أ_م_آيس

تسنيم عبدون

_7_



ياخ ديل كمان مالهم عايزين يقفلوها معانا ياخ
طاهر كان بصمت التلفون

امي م قعد يرد
يا ربي ولدي مالو وين انت يا جناي معقول قربت تقفل الاسبوع م اشتقت لأمك م اشتقت لحضنها وتجي تقول لي اااخ يا امي الحياه صعبه بس مجازفها بيك وينك يا ولدي تعال جهزت ليك الغداء يا امي انا والله جعان ههه وينك يا ولدي كنت بتقول لي انا زاتو عايز اعرس ومرتي م بتخليني جعان كدا وكنت بضحك فيك واجدعك بالحجر وانت تجري تعال يا حسام بنقعد ان شاءالله في راكوبه تعال بس يا جناي
زينب بقت تبكي وقلبها محروق وهي بتسمع في أمها

°•°•°•°•°•°•°•°•••°•
حسام بقى يعمل شهيق ويمرر يده على وشه ويمشي ويجي واقع تاني يقوم ههه والله يا أمجد الشغل دا ظابط جيب تاني
هاهاهاهاهاهاهاها بس لحدي هنا كفايه مجان يا الحبيب تاني بمقابل هاهاهاهاهاهاهاها
مقابل عايز شنو بس وريني
تشتغل معانا
جدا طوالي بس تدوني
بنديك يا زول قروش ونديك الكميه العايزها
هاهاهاها قدام وماشي لأمي لكن امي عرسوها هاها ها زينب اختي ماتت
هاهاهاها السان دا بقى يخربط في الكلام

طاهر بقت حالته قاسيه جدا لمت فيهو شله خلته بقى مدمن مخدرات طاهر الكان عمره كله طاهر وياداب حنبدأ قصة طاهر طاهر نسى دراسته ونسى موضوع صحبه البفتش عليهو والراجل الكان متابع بفتش على حسام طاهر حظرو بحكم انو بقى م واعي لمن يتصل ليهو عشان يوريهو لو في جديد طاهر بقول ليهو انت منو انا م بعرفك في الآخر حظرو

يا أمي طاهر دا بقى غريب خلاص طوالي جايط قبيل مشيت ليهو يشرح لي مسأله في الرياضيات جدع فيني الكتاب وطردني من غرفته
امي انا كمان لاحظت طاهر دا حتى شكله اتغير يا ربي ماله
والله يا امي انا لمن شكيت بقى مدمن ولا حاجه
هبه جنيتي كيف يعني تقولي اخوك مدمن متخلفه انتي
يا بنات عليكم الله الفيني مكفيني طيروا من جنبي بلاش نقه في راسي ياخ
كل وحده مشت غرفتها وخلاص وابوهم اصلا من الشغل ما جا

●○•°°•○●●○•°°•○●●○•°°•○●


انت يا ناصر يا ربي هسه الولد دا بكون وين يحليلها المره دي قطعت قلبي

ماعارفه والله يا سميه والله انا برضو حنيت عليهم بس م في يدنا شي غير نخليهم قاعدين لمن اخوهم يجمع وم تقصري معاهم انتي

ايوا الحمد لله الصباح بشيل صينيتي بمشي بفطر معاهم والله الاتنين يقزقزو ساي

°•○○•°الكاتبه°•○○•°(رغم الجوطه والتخلف واي حاجه كعبه بس بكون في ناس بجد بتخليك تتفاءل انه الحياه ما زالت بخيرها) ههههه المره دي قفلت القوس براي لأنهم فرحوني والله


طاهر كان في غرفته وبتوجع من الألم وحايم في غرفته ويجدع في حاجاته ويضرب يده بالتربيزه شديد

طبعا ماف زول جايب ليهو خبر كل زول مقفول في غرفته

طولنا من فيروز صح؟؟حنشوف الحصل ليها شنو الحلقه الجايه
حوقلوا💛

#يتبععع

ن_أ_م_آيس

تسنيم عبدون

_8_


فيروز الممرض الاداك الحقنه شكله قريبك انتي م اظن تكوني لاحظتي ليهو بس لمن المعاهو عايز يكتب اسمك في الورقه ملاهو اسمك

لا دقيقه م يكون دا محمد ود عمتي شغال ممرض هنا بس ما عارفه في ياتو مستشفى اااه م قادره جنبتي

كدي خلينا من جنبتك قلتي شنو ود عمتك

واكيد حيوصل الكلام لعمتي وهي حتكلم ابوي يا علا واااي يا علا وريني انا اعمل شنو في دنيتي دي ابوي م حيرحمني يا علا

م تشيلي هم بتتسهل اها يختي مافي قروش كدا ولا كدا الفلس يختي م طالعه مع خالد تاني قبل العمليه
لا م اظن وخالد اليوم داك اتصلو ليهو البنات لمن عايزين يودوني المستشفى وانتي قلتي تعبانه م بقدر امشي وهو اتخيلي يا علا قال ليهم فيروز دي منو م بعرفها انتو خاشين غلط وحظرني من اليوم داك الحقير الوسخ كلو الحصل معاي بسببو الله ينتقم منه حسبي الله ونعم الوكيل فيهو

علا ودعتها وطلعت منها وقفلت باب الغرفه

اها يا علا يختي مصدر رزقك وقف عاد تاني البت دي مالي عليها تاني بكره بعد بكره يقولو جيبو صحبتها معاها في الشرطه لقيت مصلحتي واشتريت العايزاهو تاني انتي زاتك اعملي عمايل خالد هيييييييههيهييي

●○•°°•○●●○•°°•○●●○•°●○•°

فلاش باك○•°°•○•°
(بلسان طاهر)

كلكم بتفكروا انا اتغيرت كدا ليه زي تاني يوم من قصة زينب وخالتي اهل حسام ماري كدا نزلت شارع النيل وكنت لافي وبفكر  في الدنيا دي بذات جذب تفكيري وانا في المستشفى بفتش الدفاتر لو لقيت اسم حسام جايبين بت بتصرخ وتتألم وانا لسه واقف وافتش كل التقارير جا ممرض جايط اظن بتكلم مع امه بت اخوك اخر الزمن يا امي بقت تدمن مخدرات هسه جابوها تصرخ الا اديتها حقنه مهدئه والحمد لله انا شكيت فيها عشان كدا عملت فيها ما بعرفها هسه انا حاتصل لخالي اكلمه يجي يلم بتو دي ولسه بفكر بفكر وختيت اخواتي محلها ونحنا اسرتنا م نوع المهتمين بعيالهم خفت يوم اخواتي يجيبو بلوه زي دي وقعدت افكر انه لازم انا اكون قريب منهم وعايز اقوم اركب عربيتي جاني واحد بورا تاني ما حسيت بحاجه الا اني في محل مغزز كدا ومن داك بقيت طاهر مدمن المخدرات واتحولت من طاهر الدُغري لطاهر الطريقه كله شمال  وبقيت بحوم مع شباب مدمنين وبجي البيت متأخر

من جانب آخر○•°°•○○•°

سجمي يا طيبه يا هبه يا بنات تعالو الحقوني يا بنات انتو وين

في شنو يا امي هبه اجري حصلي امي مالها
امي في شنو مالك

يا بنات دهبي كان هنا في الدولاب وينو

امي قولي بسم الله البيت مقفل البدخل يشيل دهبك منو

ي بت طيبه اقسم بالله كنت خاته في الخزنه دي والمحيرني داسه محل المفتاح ما لقيتو زول فتح الخزنه وشال الدهب واصلا عرف محل المفتاح كيف لالا اتصلي لي ابوك سريع ابوك حيكون في اجتماع اتصلي لطاهر اخوكم سريع يجيب الشرطه ويجي


#يتبععع

ن_أ_م_آيس

تسنيم عبدون

-9-


طاهر هاك تلفونك بتصل يا مان يكون دي اللقويه
صمت صمت يا زول لقوية شنو ديل بكونو ناس البيت يشغلوها لي هاك ولع لي دي

حسام عايز برضو

ارمي ارمي


●○•°°•○●●○•°

امي طاهر م برد
لا حولا ولا قوة الا بالله يا جماعه كدي فكرو معاي لكن انا متأكده الدهب ده بختو في الخزنه دي بودي وين يعني

امي انتي كنتي لابسه يوم عرس نور بت خالتو فائزه تتذكري؟

يا طيبه انا متذكره يوم جيت من العرس بتذكر دخلت لقيت طاهر في غرفة النوم حتى اتخلعت يا طاهر الجابك هنا شنو

فلاش بااك●○•°°•○●●○•°°•○●

عاين يا مان عايز تاني تجيب قروش والمبلغ دا كبير جدا

انا م معاي قروش قدر مبلغكم دا لكن في دهب ينفع

هاهاهاهاهاهاهاها دا الزيت زاتو جيبو وتعال اي دهب في بيتكم جيبو وليك ١٠ سيجارات

بلسان طاهر: العرض كان مُغري جدا فتحت دواليب امي كلها م لقيتو وانا بقلب في دولاب ابوي امي فتحت الباب اتخلعت لمن شافتني يمكن عشان اول مره تشوفني دخلت غرفتهم بدون إذن لا وهم بره البيت كمان قالت لي طاهر؟؟مالك في،شنو
وانا بقلب في دولاب ابوي قلت ليها مافي شي يا أمي بس ابوي اتصل لي تلفون قال نسى بطاقتو بتاعة ATM قال اجهزها ليه محمد السواق بجي يشيلها
هزت لي راسها بمعني تمام
وعيني تقع في يدها لابسه اربعه غويشات كبار وتلاته خواتم خاتمين في يد الغويشات وخاتم لابسه في يدها الفيها الاسوره وسلسل كبير وانا بقلب في الدولاب بقيت براقب فيها لمن طلعتهم وشفت محل المفتاح وفتحت الخزنه عادي ودخلت الدهب وقفلتو ورجعت المفتاح في نفس المكان

طاهر طاهر ي ود طاهر

اااا اي اي يا امي في شنو

يا ود انت مالك سرحان كدا وزي الشايل هم حاجه مالك في شنو

مافي شي يا امي قلت ليك انتي م بتفهمي
امي طوالي جات علي وادتني كف وجاطت فيني

يوم متين ياطاهر وريني يوم متين بتتكلم معاي بالأسلوب دا تقول لي انا م بتفهمي اختك انا كدي وريني

انتو فاضين عشان تعلمونا الاسلوب م كل زول منشغل من قمنا صغار نحنا ربينا نفسنا برانا اجتهادات شخصيه انتي حياتك كلها تلفون ومطبخك والصندوق والقهوه والنسوان وابوي جاري مافي جري لدرجة ينشغل عن أولاده انا هين ولد اتحملو نتيجه بناتكم بكره يلقو ماف زول جايب خبرهم لمن يجيبو ليكم بلوه هنا في البيت
تاني ادتني الكف وهي بتجوط
طاهر قلت ليك اتكلم بأسلوب انت متخلف
سكت ساي هي طوالي طلعت من الغرفه وعيونها فيها دموع بسيطه كدا زي العايزه تبكي
طوالي مشيت على الخزنه وفتحتها ولميت الدهب وقفلت الخزنه وطلعت طوالي برا البيت وم رجعت تاني يومين

●○○°°•○●●○•°°•○●●○•°°•○●


يا أمي خلاص نبلغ الشرطه بس

الا نشوف ابوك ولا اخوك يبلغو لينا
تمام يلا انا ماشه الغرفه عندي قرايه عايزه حاجه

لا
وانا برضو ماشه الغرفه ارح

#يتبععع

ن_أ_م_آيس

تسنيم عبدون

_10_

مقتطفات في بعض البيوت السودانيه


واااي يا بتي مشيتي احييي يا بتي م تميتي الكم سنه احييي يا بتي صبرت وولدتك بعد ١٣سنه في لمح البصر تفوتي تخليني الله ينتقم في الكان السبب الله لا كسب الاخترع الآيس واخدك من حضني واااي ي بتي تعالي يحليلك كنتي بتقولي لي لمن اكبر ببقى ليك دكتوره وبعالجك وكنت بقول ليك الله يحيينا انا حييت وانتي متي م معترضه على حكمك يا رب بس بتي ماتت بطريقه بشعه احييي

استغفري يا مشاعر اتصبري بتك خلت الدنيا وناسها الوحوش دي مشت جنب ربنا

احييااا يا منى الله لا ضوقك وانتي بتشوفي بتك بتتمردغ بالتراب جنب عيونك وتتألم وم تلقي ليها صِرفه غير انها تموت وتموت قدام عيونك بتي كانت أملي الوحيد في الدنيا دي يا مني احييي يا حشاي

لا حولا ولاقوة الابالله العلي العظيم

●○•°°•○●●○•°°•○●

ولدي صغير ياداب في تانيه اساس واول الفصل ولدي يتيم الأب كنت بلقط وبغسل وبكوي في البيوت عشان اقريهو واكبرو عشان ينفعني بعدين ولدي قتلوهو بالآيس ولدي كان اول الفصل كان بقول لي يا امي لمن اشتغل حأوديك الحج احييااا يا ولدي الله ينتقم من البدخل المخدرات في البلد دي الله يحاسبهم على قطع امل لكل أم فقدت حشاها احييااا يا ولدي ربنا يصبرني يا رب تصبرني لا حولا ولاقوة الابالله العلي العظيم

°•○●●○•°°•●●•°°•●●○•°°•○●

بتي مشت وين جيبو لي بتي بتي براها كانت عيانه وبتغسل كلى هدي والله قروش الغسيل جمعتها عشان اعالجها وتكبر لي يقتلوها لي بالآيس حتى المريض م بترحم في البلد دي احييي يا بتي استغفر الله العظيم يا رب تصبرني وتصبر كل أم شالو جناها زي دا يا رب تصبرنا وتجعل كيدهم في نحرهم يا رب


●○•°°•○●●○•°°•○●●○•°●○•°°

يعني يا زينب يا بتي حسام حيكون مشى وين يا بتي انا تعبت خلاص يعني حتى ولا حيحضر اخرتي في الدنيا دي

زينب وهي بتبكي امي انتي هسه بتبقي كويسه دا كلام شنو دا وحسام حيجي

م اظن زينب اخوك لو رجع قولي ليهو امك عافيه وراضيه عنك زينوبه بتي خلي بالك من نفسك وجاهدي واتعلمي الحياه عايزه كدا عشان تكبري وتنفعي البلد دي انا وصيت عليك مرت جيرانا

امي قولي بسم الله دي اوهام ساي

●○•°°•○●●○•°°•○●●○•°°•○●


اديني وحده يا أمجد

حسام انت كترتها والله والليله نهائي م وزعت مافي ليك
طاهر سلفني وحدا طيب
انت مجنون ولا شنو بعرفك من وين انا


اها يا معلم الدهب دا حنختو وين

لا الدهب دا م تهبشو خلوهو هنا بس في الصندوق دا على جنب حنحتاجو يوم

●○•°°•○●●○•°°•○●●○•°

يا محمد خلينا من الدهب وكلتو لرب العالمين بس طاهر دا قرب يتم شهر م دخل البيت طاهر وين يا رب

يا مرا بكون وين يعني ولد ماف زول بسألو وقت يجي يجي يلا انا طالع عندي إجتماع عايزين حاجه؟

لا م عايزين

يلا سلام

يعني حتكون مشيت وين يا طاهر يا ولدي انت ليه اتغيرت علينا كدا ليه يا ولدي ايوا صح كلامك انا وابوك اهملناكم نحنا م زي اي اسره بتقعد مع عيالها ويدوهم وقت ولا عندنا قعدات في صينيه وحدا كل زول ياكل بطريقته في صحنه وفي غرفته تعال يا ولدي وانا حاجمعكم من جديد


هيهات يا أمي بعد دا بعد شنو بعد طاهر خلاص بقى مدمن مخدرات

ط ط طيبه انتي من متين هنا وطاهر كيف بقى مدمن مخدرات يا بت انتي مجنونه تقولي عن ولدي كدا
مشت عليها وادتها كفف

ايوا اديني كف بس م بسكت عن الحق هاك يا امي

دي شنو دي سجاير ل ل لقيتيها وين دي وده شنو

اول شي امسحي دموعك يا أمي لانه م هان علي اشوفك تبكي كدا بس لازم تعرفي عشان تشوفو انتي وابوي انشغلتو عننا بطريقه بظيعه طاهر م لقى حياتو وهو واعي قال احسن يشوفوها هو م واعي عرفتو ليه طاهر كان متغير علينا ليه

لا لا لا يا طاهرررررر لااا انت م كدا يا ولدي لااااااا
لا وابشرك يا امي السرق الدهب هو طاهر ولدك

ايواا ولدك الطلع من احشاء بطنك دي

انتي كذابه طيري من وشي

اها يا امي تعالي اديني كف تاني طبعا م حتصدقي بس كلب البوليس لمن شم ريحة المفتاح بتاع الخزنه طوالي جرا غرفة طاهر لانه الريحه مطابقه
#يتبععع

ن_أ_م_آيس

تسنيم عبدون

_11_


هبه يا هبه تعالي حصلي يا هبه

طيبه مالك بتبكي في شنو

امي اغمى عليها اجري البسي عبايتك تعالي نوديها

طيب طيب اتصلي لي ابوي
طيب طيب
ايوا يا طيبه برجع ليك بعدين عندي meeting ضروري ودي صفقه قويه برجع ليك برجع ليك

بس قبل تتكلم لقت الخط قفل
طيبه طيبه انا حامشي انادي احمد ولد جيرانا يجي يرفعها معانا
طيب في المسافه دي حألبسها توبها

على بال يصلو المستشفى ارح لناس طاهر وحسام●○°•

طاهر وحسام صحو كأنهم كانو نايمين نومه طويله ولقو نفسهم مجدوعين برا الموقع في الشارع والكدايس جنبهم
حسام؟
طاهر ؟
مسكو بعض وحضنوا بعض شديد وقعدوا يبكو نحن الودانا الطريق دا شنو يا صحبي
طاهر انا اشتقت لأمي وزينب انا ماشي بيتنا
حسام نحن حنمشي لأهلنا بس اول شي لازم نشيل حقنا منهم
طاهر جرا على جهة الموقع
طاهر طاهر تعال اصبر م كدا حنمشي الشرطه
لا حاخد حقي بيدي
وفتح باب الموقع م لقى زول

ههه تفتكر يا طاهر بعد يطلعونا حيكونو قاعدين لسه م اكيد حيفكرو اننا حنجيب الشرطه وشكلهم رحلوا من الموقع كلو كلو


●○°°•○●●○°°•○●○•°•○°○•°
زينب
حسااااام
مالك يا زينب كدا وامي وين ودا شنو العفش دا ودي منو المره دي
كنت وين حسام خليتنا ومشيت العفش دا بتاع الناس الرحلو البيت ودا م بيتنا
خلينا من الكلام دا امي وين
امك هه امك ماتت يا حسام لا وقالت ليك عافيه وراضيه عنك انت لمن هربت وخليتنا دي كانت النتيجه حسام بدل تهرب كان توريني عادي اصلا كدا كدا خليت الجامعه وكنا قعدنا في خيمه عادي بس نكون ملمومين (وهي بتبكي) عارف يا حسام انا في لحظه لا لقيتك لا لقيت ابوي لا لقيت امي خليتوني وحيده

لاحولا ولاقوة الابالله العلي العظيم لا حولا ولا قوه إلا بالله العلي العظيم

تبكي تبكي لشنو يا حسام م تبكي دي طبخت يدك

●○•°°•○●●○•°°•○●●○•°

طاهرررررر كنت وين يا طاهر يا ولدي

امي اشتقت ليك يا امي (وهم حاضنين بعض ويبكو)

طاهرر
طاهرر
هبه وطيبه تعالو تعالو حضن اخوكم (برضو مسكو بعض يبكو)

#يتبععع

ن_أ_م_آيس

تسنيم عبدون

_12_ والأخيره



أمي حسام صحبي دا أمه اتوفت قال

متين لا حولا ولاقوة الابالله انا لله وانا اليه راجعون

تمشي معاي

ااي ارح


ماتت متين يا زينب

والله يا خالتي  كانت مابيه الاكل ومنتظرة حسام ماتت على حسرتها
لا حولا ولاقوة الابالله ربنا يرحمها ويغفر ليها وحسام اخوك كيف

والله ياهو متجرس بس نعمل شنو غير نصبر
خالتي اعمل ليك كم ملعقه سكر
م تعملي لي يا بتي انا عشان السكري

سكري؟ انتي جاك سكري متين

برضو على حسرتك يا ولدي بس الحمد لله جات على السكري

بعد اخدوا قعدتهم طلعوا على بيتهم على بال م يصلو طاهر وامهم البيت●○•°

حسام جاهو تلفون انه ابوهو اتوفى ومفروض يجي يستلم التركه ابوهم كتب ليهم بيت باسم حسام ومفترض يستلمه
●○•°°•○●●○•° بعد مرور زمن

زينب دخلت الجامعه وحسام لقى شغل في مصنع ورحلو بيت ابوهم

فيروز  بقت مجنونه وبتدخل جلسات ومافارزه ابوها من اخوها من امها بس تضحك براها وتنكش شعرها وتجرو ومره تبكي وطوالي تهلوس وطبعا خلت الجامعه

طاهر عمل مبادرة شبابيه اسمها(ن_أ_م_آيس)
الآن ماسك المايك في مؤتمر شبابي قايمه بيهو المبادره

انا واحد من ضحايا المخدرات وقدرت احصل نفسي ومعاي صحبي دا المؤتمر دا غير انه توعيه للشباب برضو عشان اقول ليكم انه صح انا ضحيه مخدرات لكن برضو باب التوبه مفتوح ومافي مبرر م يخليني اعيش حياتي من جديد انا واصلت جامعتي واتخرجت بامتياز هندسة إتصالات وصحبي القدامكم دا لظروف جامعة اخته خلى الجامعه لكن الان هو رجل بزنس كبير مشهور وقرا اخته اليتيمه والان قربت تتخرج
الناس بقو يصفقوا ليهم ويصفروا

كلكم نفسكم تعرفوا لي سمينا المبادره بتاعتنا دي (ن_أ_م_آيس) عارفين يعني شنو انا حأدي المايك لحسام يوريكم يعني شنو الاسم دا
حسام مسك المايك والناس صفقت ليهو
احمم السلام عليكم شباب انا حسام واحد من ضحايا المخدرات واتعالجت الحمد لله وقدرت اواصل الحياة دي من بعد امي بفضل اختي العزيزه شديد الدكتوره زينب واتلفت عاين ليها كانت قاعده في الكراسي القدام وهي بتصفق بقوه وتعاين ليهو بفخر وعيونها ملانه دموع

طيب شباب  ن_أ_م_آيس

ن: نحن  أ: اقوى   م: من    (نحن أقوى من الآيس)

ليه اخترنا الآيس بذات لانه دا اكتر انواع مخدرات منتشر ونحنا كشباب اوعى واقوى من الآيس واي مخدر حنقدر نقفل الباب ونرجع لحياتنا الطبيعيه ونحن قدرها ونحن اقوى من الآيس شباب

صفقوا ليهو وصفروا وزينب اختو وقفت على حيلها وبقت تصفق بحراره

●○•°°•○●●○•°

دي كانت روايتنا لفينا وشفنا احداث من وحي الخيال بس مثلت واقعنا بالحرف ورتنا قدر شنو الدنيا دي تافهه ورتنا اننا بنضر نفسنا بنفسنا وبنضر غيرنا وبناكل في بعضنا زي الوحوش بنبكي بعضنا وورتنا قدر شنو المخدرات بتفكك أُسر وبتشيل طفل من حضن امه وبتشيل شاب كان امل أهله الوحيد نحن محتاجين شبابنا لأنهم أملنا #محن أقوى من الآيس

#النهاية

الخطة الرمضانية لاقصي إستفادة من شهر رمضان المبارڪ 🌙..

1. حافظ/حافظي على وردك، ختمتك خلال الشهر تڪون واحدة خفيفة لطيفة، وإنت بتقرا لازم تقرأ الآيات بتمعن وتدبر. (عقب ڪل صلاة تقرأ أربع صفحات بتمعن و تتدبر) ❤️😌👌.

2. الذڪر المعروف و الأدعية (سبحان الله - الله أڪبر - أستغفر الله - لا اله إلا الله).

3. تقرأ ڪتب، تسمع بودڪاست أو تسجيلات (حسب رغبتڪ ويا حبذأ لو في سيرة النبي ﷺ أو الصحابة) ❤️.

4. ما تضيع صلاة التراويح في المسجد لأي سبب ڪان .. (تصليها ڪلها و تدعي مع الإمام ❤️)

5. تحافظ على صلاتڪ الفرض في وقتها، أوعك تأخرها (جهزي مصلاڪي و قرائنڪ قبل الأذان بعشر دقائق و أجلسي و إطمئني بالذڪر📿🧕 ) .. إتانى وإنت ماشي للمسجد و تذڪر إنو ڪل خطوة للمسجد محسوبة ليڪ أجر )

6. صلاة السنة قبل الصلوات و عقبها برضو فحاول حافظ عليها 💓.

7. القيام .. القيام .. القيام 🥹❤️ ...
لازم تنظم نومڪ من هسي عشان تصحى قبل الفجر بنص ساعة على الأقل تصلي رڪعتين قيام و تقرأ ما تيسر من القرآن الڪريم❤️

8. إتذڪر الصيام ما لي ربنا سبحانه وتعالي ، الصيام و القيام والطاعات دي عشانڪ إنت/إنتي ؛ فاوعى تتذمر من السخانة، العطش، التعب، الڪهرباء، الشغل أو اي عمل انت بتعمله مهما ڪان بسيط.
خلي نيتڪ حاضرة إنو ربنا سبحانه وتعالي يحسبه ليك أجر 😮‍💨

9. إتذڪر إنڪ ما حتصوم من الأڪل و الشرب لأنو ده ما الغرض الأساسي من الصيام .. حتصوم قلبڪ، بصرڪ، سمعڪ، رجلڪ، يدڪ وڪل جوارحڪ، ڪلها لله في الله ❤️


وڪل عام و جميعڪم بخير وعافية ، مبارك عليك حلول الشهر المبارڪ ✨🎉
ربي يجعلڪم من الفائزين الغانميين من فضلة و إحسانة و المعتوقين من النار يا عزيز يا رحيم يا جبار..

و ڪل عام و جميعڪم و الامة الإسلامية بخير 💙💙💙


#غيث_السيد
#رمضان_مبارڪ 🌙