هُيام: اي، مستغرب عشان لمن يسافر بمشي ليهم وكده
قلت ليهو احسن اكون في بيتي وكده، قلقلان عشان ما نكون برانا انا وكريم
سوسن: ي يحليلو، هو ماشي وين تاني تقول ليهو ربنا يكتب سلامتك
هُيام: مكان المؤتمر اتغير بعد ما وصل هناك عشان كده
سوسن: ايوه....
بس شكلك الليله متغير ي صحبتي
هُيام:"باستغراب"كيف متغير؟
سوسن: رجعتِ هيام حقت زمان، ضحكتك حقت زمان حتى ملامحك زاتو كانت حقت وحده كبيره تقول هسا رجعتي صغيره يختي
هُيام: "بضحكة" من يومي صغيره يختي.....
ما اكذب عليك يا سوسن بالرغم ان كلام محمد الليله كان حاد، بس بعدين لمن غيرنا الموضوع انبسطنا، اتونسنا زي زمان وحكي لي كيف بدأ شغلو دا، وعايز يعمل شنو، حسيت نفسي رجعت كم سنه للوراء
نفس التفاصيل لمن يجي يحكي لي واحكي ليهو
سوسن :الحمد لله انبسطت.... بس لازم تفكر في كلامُ طيب
هُيام: أن شاء الله
______
"بعد مرور اسبوع"
هُيام :سوسن ح اخلي كريم معاك ... ماشه ناس امي وجايه
سوسن: طيب، بس ليه ما عايزة تشيل كريم
هُيام: لو شيلت ح يقولوا لي اقعدي وعايزين نلعب مع كريم
وانا عايزه امشي سريع اديهم علاجات امي دي وارجع طوالي
سوسن :وطيب لو قالوا لك كريم وين
هُيام :ح اقول ليهم في البيت مع سوسن، وانا لازم ارجع ليهم، شوفت صحبتك بتاعة خطط إجرامية كيف...
سوسن: انت لسه زعلانه من موضوع ان كذبو عليك
هُيام: زعلانه شديد والله، ابوي الله يرحمو ويسامحَ، بس بعد عرفت الحقيقه بقيت ما قادره اتعامل معاهم عادي، وفي نفس الوقت ما عايزه انسا أن هم اهلي وربنا ح يسألني منهم
سوسن: دا ماضي يا هيام انسا
هُيام: لا يا سوسن، دا ماضي وحاضر ومستقبل لسه ح اعيش فيه... ما علينا امشي انا عشان ما اتاخر خلي بالك من كريم
سوسن: في عيوني
____
"في المكتب"
كان يجلس مع صديقه، ويقرأ بعض الملفات... ما إن أنهى
محمد: حلو، العقد مافيه غلطه، موافق انا
انت رايك شنو؟
يوسف: انا كمان موافق بس قلت اشوفك عشان اديهم ال اوكي
محمد: طوالي اتصل عليهم وشوف يوم عشان توقيع العقود
"قطع حديثهم السكرتيرة"
السكرتيرة: مستر محمد هند جات وعايزه تقابل حضرتك
محمد: خليها تدخل
هند: السلام عليكم
"محمد ويوسف": بصوت واحد وعليكم السلام
"جلست في الكرسي المقابل ل يوسف "
هند :ما يكون عندكم شغل وانا جيت خربت ليكم
يوسف: لا خلصنا، امشي مكتبي بعد دا
يلا عن اذنكم
هند: اتفضل
بعد أن خرج يوسف، ذهب وجلس في الكرسي المقابل لها
محمد: مالك ما قلت لي جايه ول دي مفاجأة؟!
هند: "بصوت مرتفع قليلا "ما انت، طبيعي مشغول وما عندك وقت لي، لمن اقول لك نتقابل تقول لي في الشغل، اجتماع، المخزن و وووو، ف قلت احسن انا اجي الشغل دا عشان اشوفك
محمد :"بعصبية" انت جايه تقول يا مشاكل من هناك ول شنو، ولا طلبت معاك نكد، وبعدين صوتك دا ما ترتفعه علي ياهند
هند:" بهدوء" طيب يا محمد، بس انا ما جايه ل مشاكل ولا نكد،عايزه اتكلم معاك اعرف حصل عليك شنو، انت ما بتكلم معاي كلمتين وبتقول لي مشغول برجع لك وما بترجع لي الا ارجع انا، فقلت اشوفك وش ل وش عشان نتفاهم
"نهض من أمامها وعاد إلى الكرسي السابق، كان يتهرب من النظر إليها، حتى لا تكشف الكذب الذي تحمله عيناه"
محمد :مافي حاجة ضغط شغل بس ما اكتر
هند :وانا ما من حقي اعرف ضغط الشغل دا يا محمد
محمد: هند انت عارفة من زمان انا ما بحب اتكلم في الشغل معاك
هند: طيب وغير الشغل...
محمد: المشكله الحصلت دي، خربت لي أي شي يا هند عشان كده بس انتِ حاسه بي متغير
هند: وقبل المشكله طيب؟
محمد: "بعصبية" هند انت جايه تحاسبني على حاجات زمان هسا، انت متعودة علي كده، الجديد شنو، اتغيرت شويه، وقلت لك بسبب المشكله ال ف الشغل، في شنو تاني
هند :ما كده
محمد: اها كيف ياهند
هند :محمد انا بحبك وعايزه ادخل في تفاصيلك زي ما انا بدخلك في تفاصيلي، فأنا بقول لك عشان عايزه اعرف اي حاجة عنك، ما قاعده احاسبك ولا حاجة... "وصمتت لحظة ودموع تملأ عينها" .
طيب امشي انا
"ونهضت من مكانها، ذهب أصبح يقيف مقابل لها"
محمد: انتظري هو انت جيت متين عشان تمشي...
اول انا بعتذر لك... تاني شي انا غبي والله مفروض من ما جيت انتِ افهم انك مشتاقه لي، وتالت شي انا عايز اطلع معاك الليله
هند :" مسحت دموعها "ما مشتاقه لك ولا شي
وبعدين خليك في شغلك ما زعلانه انا
محمد: يااخ ما مشتاقه احلفِ كده
هند :"وهي باسمه" والله مشتاقه لك
محمد :عارف عارف...بس دقائق اخلص توقع في الملفات دي ونطلع
هند :لا محمد، خلاص والله، خليك في شغلك انا ما زعلانه.
محمد :" امسك يدها" يا ستي خلصت شغل انا، وبعدين انا طالع معاك ما عشان انتِ زعلانه عشان انا جعان وعايز زول يأكل معاي
هند: "بإبتسامه" طيب طيب صدقت..
>>Click here to continue<<