ماضي
#زواج عادات وتقاليد "الحلقة الثامنة"
"نحن نلمع بشكل استثنائي حول من نحب وننطفئ لو كنا حول الشخص الخاطئ، أنت لست شخصاً واحدً انت دائما نتيجة تفاعل ما " أحمد خالد توفيق
________
تجلس في مكانهم المعتاد، التوتر يملأ كامل جسدها، كانت تحدث صديقتها على الهاتف
هُيام :
ما عارفه ياسوسن إذا صح او غلط القاعد اعمل فيه دا، حاجة تقول لي قومي امشي بيتك وما تخربها على نفسك، وحاجة تانيه تقول لي اقعدي انتظري وشوفي حياتك ما كفاية ظلم اهلك زمان، ما تظلمي نفسك تاني
دخل المكان بهيبته المعتاده، وطوله المناسب مع جسمه، وبعض من اللحية الغير مرتبه، ولونه الاسمر الذي يميز السودانين
محمد: نهارك سعيد، معليش اتاخرت عليك بس الطريق زحمه، واتاخرت في المكتب كمان مع الشباب كان عندنا اجتماع عشان مشكله امبارح دي
هُيام: ولا يهمك، طيب ليه قلت نتقابل مدام مشغول
محمد: عايز اشوفك وتاني انا حتى لو مشغول بخلي اي حاجة في يدي عشان اشوفك واتكلم معاك
"ابتسمت و دارت وجهها الجهه الأخرى"
محمد: " قال وهو باسم" لسه ما خليت حركتك دي لمن تخجل تقابل الجهه التانية.
الهاتف يرن كان موضوع على الطاوله المتصل هند، وضع الهاتف صامت وقبل أن يبدأ حديثه قالت....
هُيام :رد عليها يا محمد
محمد: برجع ليها بعدين
هُيام: انا من وقت اتقابلنا المره الفات قلت لك غلط نفكر نتكلم مع بعض اول عشاننا احنا وتاني عشان هند وسيف
محمد:" وهو يحدق بها" وجاية ليه طيب؟!
هُيام: جايه عشان اقول لك كده ولازم نسمح أرقام بعض ونوقف القاعدين نعملوا دا
محمد:" ابتسامه ساخره" طيب انا صدقت، مدام كده وانا جاي عشان اقول لك للمره التانيه انا مستعد افسخ خطوبتي وانتِ اطلبِ الطلاق ونتزوج عادي، والله والله ولدك ح يكون في عيوني هُيام
هُيام: محمد اول ما صح نفكر بأنانية كده، لأن في أطراف تانية في الموضوع، هل انت فكرت مره هند دي ح تكون كيف بعد انت تخليها؟ وكيف ح تكون حياة سيف بعد انفصل عنُ
محمد: طيب وانتِ ليه ما تشوفِ نفسك وتشوفني انا كمان، مشاعرنا دي شنو، حياتنا ال ما عندها معنى من غير بعض، واحنا كل واحد يشوف التاني مع زول غيرو، لو انت شايفه دي أنانية مني، طيب انا زول اناني، بس انتِ كمان قاعدة تظلم نفسك وقاعده تظلمني انا معاك، وهند وسيف كمان
"وضعت يدها على خدها وهي تنظر الجهه الأخرى حالة من الصمت دامت خمس دقائق، خرج يدخن وعاد"
محمد: طلبت لك عصير برتقال
"نظرت إليه لم يفهمه"
مالك بتعاين لي كده؟!
هُيام: ولا حاجة
محمد: ما عايزه برتقال عايزه حاجة تانيه طيب
هُيام :لا ما كده
محمد: طيب مالك..... ول النظرة دي لكلامي حق قبيل
عموما انت فكري وصلى استخاره عديل
هُيام:" بسخرية واضح في كلامها"
استخاره في خرب بيتي
محمد: يعني انت يا هُيام شايفه كلامي دا خرب بيتك
شكرا لك والله
هُيام: يااخ ما كده ما عرفت اقولها لك كيف، ما تزعل
محمد: هُيام عايز اقول لك حاجة، الكلام الأنا قلت لك دا لا خرب بيوت ول انانية مني.... لو استمر اي واحد مننا في حياتو ال هسا دي دا ظلم لنا احنا الاربعه، احنا اتظلمنا الاربعه بسبب زواج العادات دا.....
العادات دي طلعها منُ مش زول بشر زينا معناها احنا البصنع العادات، فخلينا احنا نصنع عادات جديده تقول ان ممكن الشباب يعرس من قبيلة غير قبيلتهم، وممكن البنات تختار هي شريك حياتها، ما شريك حياة بالعادات... ود عمها ول ود خالتها و...... ال من صغار قالوا ديل لبعض....
______
"المساء"
هاجر: سرحانه وين؟!
هند :لا مافي حاجة
هاجر :قول قول مالك مافي حاجة دي تقولها ل خطيبك الغياظ
هند : "بإبتسامة حزينه" هو قاعد يسأل عشان انا اقول ليهو زاتو
هاجر: مالك متشاكلين؟
هند: لا، بتصل عليه ما يرد وما يرجع لي، ضربت ل يوسف امبارح قال لي خليتو في الشركة، قال حصلت مشكله في الشغل
هاجر: طيب ما قال في مشكلة في الشغل، احتمال ضغط الشغل وكده
هند: قبل المشكله دي هو متغير، متأكده في حاجة انا، تكون في وحده جديده في حياتو
هاجر: عليك لله عليك لله بس هند معليش يعني محمد الغياظ دا في وحده بتوافق بيهو غيرك
هند: "رمت المخده على اختها"
غياظة ما تقول عليه كده، مالو حلاتو وفيه كل المواصفات ال اي بت تتمناها
هاجر: لا ما اختلفنا في الشكل والكلام دا، انا قصدي لك التعامل حق دا، هو انتِ الخطيبتو دي ما قاعد يتكلم معاك، وطبيعي سرحان أو يشرب السجاير دي، وكئيب كده...
المهم ما علينا هسا انت خلي في بطنك بطيخ صيف عديل حبيبتي، مافي بت بتعاين ل محمد بتاعك دا، وما تنكدي على نفسك باقي الليل...
يلا تصبح على خير
______
هُيام: لا يا سيف ما غيرت رأي
....
مرتاحة والله، سوسن قاعده معانا والجيران في ما تقلق
.....
طيب ربنا يكتب سلامتك
.....
مع السلامة
سوسن: مالو سيف قال لك تاني تمشي تقعد مع ناس امك
>>Click here to continue<<