سيدي أنت بحياتي صرت عاده
عاده توصلني لـ حد .. الاباده
أنا خايف انها تكبر وانها تكثر
لين امارسها معك مثل العباده !
وجاي تتطمن على نفسك بقلبي ؟
والله إن قلبي ... قديماته جداده
مو خيانه لا رحلت و جاو غيرك
أنا مثل اللي خلص حزنه وعاده !
ايه .. أنا يوميا ابدل حبايب
والله انك جرح وابدل ضماده
عادني مجنونك اللي ما تغير
وعاد هذا حبك وهالشوق عاده !
مو مصدقني امانه جرب اضحك
شوفني وشلون ابضحك لا اراده
وجرب ازعل وشوفني من كثر ما ازعل
تصبح الدنيا .. كبر عين الجراده !
وناد أسمي وشوفني وشلون البّي
لك تلبيّات ماهي ... يالله ناده
ليه ساكت ؟ ناسي أسمي ما يخالف
جل من لا يسهو بسهوه عباده !
مابقى في هالزمن خير ونعيشه
وين خيره وأجمل اشياءه جماده
لان اسامينا ماهي نفس الاسامي
السعاده ماهي لاصحاب السعاده
وما هي لاشكالي البسطاء الغلابه
اللي ماهم لا رقيق ولا قياده ..
شي ماعرفه .. ولا ضني بعرفه
لو أني أعرف عكسه وأعرف تضاده
يمكن أنها أنت .. ويمكن شي ثاني
كل ماقرب له أحس ببعاده !
إني إغرق ، إني اغرق ، إني اغرق !
أرمي لي من مجمل أشيائك : قلاده
بذكرك فيها وأنا اللي مانسيتك !
من حرارات الوعد إلى : براده
يوم أمرك وأنت في باص المدارس
شايل لشوقي كشاكيل وشهاده ..
يوم لا قالت لك عيوني : أحبك !
قلت لي بعيونك أحبك / زياده
يوم لا من قلت لي ليه تعشقني ؟
قلت لك والله من زود : القراده !
شاعرك ما راود التكرار نفسه
ما يبي ميلة هنوف ولا اشاده
جا وهو قلبه نظيف .. وراح منك
حر ! لكن حر مسلوب : الإراده !
لا تقول انك تحبه / لو تحبه
ما عطيته كل شي الا مراده ..
كل ما مريت في باله تألّم ،
وابتسملك بسمه ماهي من فؤاده
وكل ما خيّر على فرقاك جرحه
شافه المنحاز لك رغم حياده
أنت ازعاجي وفوضى ارتياحي
كنك احساس التعب على وساده
كل ما قل اتصالك / زاد حبك
كيف صار النقص نوع من الزياده ؟
ليت لي في قلبك اشياء مثل مالك
في مساحاتي مساحات وسياده !
والله اني في هواك العف راضي
مثل ما يرضى المواطن عن بلاده
ينتهي حبك وأنا كل يوم اعيده
دايم اللقطات احلى بـ الاعاده !
كل يوم تمرني فرصه سعيده
مالها اي ايت علاقه بالسعاده !
- لـ سعد هندي ..
>>Click here to continue<<