ياشجرتي جفت عروقك وجيت بـ سماي
أمطرتك احساس خايف لا السنين تحطبْك
من بعد اخذتي مُرادك ما لمحتي ظماي
يوم انتظرتك على غيري تساقط رطبْك
ولا طلبتك مع الايام .. رد لـ عطاي
يكفيني آشوف عينك خاليه من تعبْك
كنتِ السهر كل ماضاق المدى في فضاي
عن زحمة الناس واوجاعي أجي واغتربْك .
وانا آتورّد شعر .. ويفوح منّه شذاي
وانتي الندى كل مايبْست عروقه شربْك
يومك بحضني تردّين القصايد معاي
وتغازل عيونك الدمعة ويرمش هدبْك
قلتي تحبين : لكن كيف أحس بـ غلاي
اذا غرامك غلبني ليش أجل ماغلبْك ؟
جيتك من الشوق تارك لك قبيلة وراي
مع ان اذا ماني أعلى ما أقل عن نسبْك .
ماني بتعبان من عُمق الجروح بحشاي
متعبني ان التعب كلّه يجي من سببك !
ياما لبس وجهي لتلميح وجهك غباي
لو انّي أعرف وش الدافع لـ حدّة عتبك
ردي كلامك قبل يجرح ضميرك وفاي
اذا خسرتك ماهو فارق من اللي كسبك
أنا الى الحين ماني قادر أردع بكاي
من قلت مخنوق من ضيقي وقلتي لي إبْك !
>>Click here to continue<<