Barannoo Jireenyaa Kutaa 3ffaa
BARBAACHISUMMAA MAATIIN KEE GUUTUUN FAYYUU
I. KUTAA FAYYINA WAAQAYYOO
1. "Yesuusis deebisee akkana jedheen; "Hardha fayyinni mana kanaaf dhufeera" (Luq 19:9)
==> Kun maatiin kutaa fayyina Waaqayyoo Gooftaa dhaan dhufe ta'uu mirkaneessuuf, dubbii Gooftaan Yesuus cubbamaa guddicha, Zakkewoos qaraxxuutti dubbateedha. Gooftaan fayyinni mana sanatti dhufe jedhe malee, fayyinni guyyaa sana nama dhuunfaa sanatti dhufe hin jenne. Shakkii malee, maatiin Zakkewoos cufti Isatti akka amananii fi fayyan Gooftaan ni barbaada. Jechi Gooftaa Zakkewoosiif gorsaa fi hubachiisa ture.
2. "Gadi isaan baasees, "Yaa gooftota (Ergamoota Phaawuloos fi Siilas) kiyya, ani akka fayyuuf maal gochuun qaba?" jedhee gaafate.
Isaanis deebisanii, "Gooftaa Yesuusitti amani; ati ni fayyitaa; warrii mana kee jiraatanis ni fayyuutii" jedhan (HoE 16:26).
==> Kun haasaa hidhamaa Filiphisiyuusii fi Ergamoota lamaati. Hidhamichi fayyuuf maal gochuu akka qabu gaafate; Haa ta'u malee, Ergamootni deebisaniifii isa qofa utuu hin ta'in innii fi warri mana isaatii ni fayyu jedhaniin. Kun kan agrsiisu garaa Ergamoota wangeela lallabuuf Gooftaadhaan ergaman keessa fayyinni dhuunfaaf yoo ta'u, kutaan (kan inni dhuunfatu) isaa maatii ta'uu mirkaneessa. Ammas, dubbiin Ergamootaa hidhamichaaf gorsaa fi hubachiisa; akka inni fayyina dhuunfaa isaa qofa irratti utuu hin ta'in akkasuma fayyina maatii isaa irrattis xiyyeeffatuufi.
II. DHIMMOOTA FAYYINA MAATII
A. Kakuu Moofaa Keessatti
1. Guutummaa Mana Nohii
1). "Waaqayyo yommus Nohiin, Ati warra mana kee hundumaa wajjin markabichatti gali jedheen" (Um 7:1)
"Guyyaadhuma jedhame sanatti, Nohi, haati manaa Nohi, ilmaan isaa: Seem, Kaam, Yaafetis, dubartoonni ilmaan isaa sadanis isaa wajjin markabichatti galan"(Um 7:13).
==> Asitti Waaqayyo Gooftichi, bishaan badiisaa jalaa akka oolaniif Nohi guutummaa mana isaa wajjin markabichatti akka galu abboome. Fedhiin Waaqayyoo maatii akka kutaa fayyina isaa hojiirra oolchuutti akka ta'e ni mirkaneessa. Nohi mana isaa guutuu, niitii isaa, ilmaan isaa, niitiiwwan ilmaan isaatii akka fedha Waaqayyootti gara markabaatti fiduudhaan innii fi maatiin isaa guutuun Waaqayyoon akka baraaraman nutti himameera. Kun fakkeenya nuti har'a hordofuu qabnuu dha.
2. Manneetii Israa'elotaa
1. "Guutummaa Waldaa Israa'elitti himaa, ji'a kanaa guyyaa kurnaffaatti, namni akka mana mana isaatti xobbaallaa tokko maatii tokkoof haa fudhatu! Warri mana tokko keessa jiraatan xobbaallaa tokkoof muraasa yoo ta'an garuu, namni tokko akka baay'ina namoota isaatiitti, ollaa (akkasuma maatii guutuu) isatti aanu tokkoo wajjin haa fudhatu. Xobbaalllaa sanaaf hanga namni tokko nyaachuu danda'u shallaguudhaan nama ni lakkooftu.(Bau 12:3-4).
==> Waaqayyoo hangafa Misirootaa rukutuuf yommuu ka'etti, murtii dhumiisa hangafaa jalaa oolchuuf, Israa'elotaaf faasikaa godhe. Wanti waaqayyo isaan ajajaje, xobbaallaa tokko nama tokkoof utuu hin ta'in, xobbaallaa tokko maatii tokkoof akka fudhatanii dha. Kutaan fayyina Waaqayyoo maatii akka ta'e kun cimsee mirkaneessa.
==> Caalaatti, xobbaallaa tokko fixuuf maatiin tokko muraasa yoo ta'e, ollaa isatti aanu wajjin akka hirmaatu Waaqayyo isaan ajaje. Ifaatti, ollaan sunis akka dhuunfaatti utuu hin ta'in, akka maatiitti lakkaa'amu. Caalaatti kun kan mirkaneessu, nuti maatii keenya qofti fayyina Waaqayyoo akka fudhataniif fidna utuu hin ta'in, maatiin ollaa keenyaas badhaadhummaa Waaqayyoo fi fayyina daanga-maleessa kan maatiin keenya hin fixne,akka hirmaataniif isaan qajeelchina.
#Barannoo_Jireenyaa
@Karaadhugaa
>>Click here to continue<<