مهما كبرنا ف العمر وانتقلنا ل أماكن ودول كتيره، ماف مكان هيبقى زي الخرطوم.
الخرطوم كانت ولا زالت وهتكون للأبد بلد الجميع، والمكان الكبروا واتربوا فيه أغلب السودانيين، ومسقط رأس جزء كبير منهم.
انا شخصياً لو مشيت أي مكان حتى لو خارج السودان م ح اصنع ذكريات قدر اللي ف الخرطوم ومستحيل ألقى مكان مريح وبحس فيه ب ريحه الوطن والأمان غير "الخرطوم".
حرفياً ف كل مكان ف الخرطوم الواحد عنده مواقف وذكريات جميله شديد ومحفوره ف القلب قبل الذاكره.
الخرطوم جميله ب "هواها وهمبريبها، شوارعها، مواصلاتها، زحمتها الشديده، جوها الحار، مسارحها، صالاتها، نواديها، مطاعمها، كافيهاتها، حدائقها ومنتزهاتها، جامعاتها ومدارسها، دكاكينها وأكشاك الرصيد، وسندوتشات وعصائر الشارع"، الخرطوم جميله ب ناسها "أهلنا، أصحابنا، جيران الحِله والمواصلات، زملاء العمل والدراسه، الباعه المتجولين والأطفال اللطيفين اللي بلاقوك ف كل استوب او موقف مواصلات ويدعو ليك عشان تشتري منهم لبان او مناديل وجُملتهم الشهيره "ان شاءالله تعرسي حبيبك ي حِلوه😂".
الخرطوم وريفه وحنينه شديد والله، الخرطوم حبيبتنا وأُمنا والحضن الدافئ بالنسبه لينا.❤️🩹
ربنا يرجعنا ليك ف القريب العاجل ويعافيك من الألم والمرض ده، ويردنا ليك سالمين لأنو والله الحُب ظهر والشووووووق فتتتر والوِلف قتااااااال ي الحبيبه ❤️🩹
>>Click here to continue<<