Дехар
Воа-а Даьла!
Нагахь санна тхо шиъ
Вlаший къаста дезаш нийслой,
Со цол хьалха дlаэцалахь.
Из сол хьалха дунен чура дlайоде,
Могаргдац сона из ла,
Из йоацача вахарца та,
Цу lоажала сатохаш хила.
Ер вахар, воа-а Даьла!
Воккхагlвар хьалха а водаш,
Дlавахавезаш ма кхеллаьдий lа!
Ма йигалахь из сол хьалха дlа.
Ма къоастаелахь безарех,
Дукхабезаш хьийстарех.
Шийна эшар лоаттадечоа
Баркал оалаш яхийталахь.
Хов сона, кхетаду аз,
Воа-а Даьла.
Дезала да эшалга.
Даь хьехам боаца дезал
Харц балар кхерам болга а,
Сай доал эшаш аргlа йоагlаргйолга а,
Соцара вахар царна
Дуненна нийсса долга а.
Воа-а Аллахl!
Хьо ва-кх со кхеллаьр!
Из аз дегаца бакъдеш да,
Меттаца мукlаралдеш да.
Хье воацачоа мутlахьа ца хила
Хьайгара низ ба lа сона,
Воа-а со кхеллаь Даьла,
Садоала сахьат даькъала де lа са.
Ше йоккхагlъяр аьнна,
Духьала харц дош аьннадац цо сога,
Из Хьона гу, Хьона хов.
Сесаг, йиша, нана санна
Из даимлен хиннай соца.
Из Хьона гу, Хьона хов.
Воа-а Аллахl са Даьла.
Йоахае lа lайшет-нана.
Тхо къасте а мичча хана,
Сайца моттиг долаш цхьана,
Ялсмале хилийтар тхоашта
Дех аз Хьогара, Веза Даьла.
Тха дезал Ӏа Ӏалаш белахь,
Хьайна мутӀахьа уж белахь,
Дех аз Хьога, я АллахӀ,
ПаргӀатдаккхалахь са са.
Хамхой Ваха
Саькура бетта 2-3 деношка, 2014 шу.
>>Click here to continue<<