تقول في راسي ضريس المحاحيل
و دلوٍ يميح مْن القصيد ، و يزوعه
تسري بي الليله ، و انا احط ، و اشيل
من البيوت النادرات البتوعه
مثلي ليا منّه عطا يوفي الكيل
واليا كتب جات القريحه بـ طوعه
و اليا سمع صوت الحدى ، و الهوابيل
ينشدّ له باله ، و يرخي سموعه
ذاق العنا البهذله ، و الغرابيل
ولا حدرت من موق عينه دموعه
رقى بـ شعره فوق روس الأقاذيل
لو ان راس الضلع عسرٍ طلوعه
واصدري اللي ما بقا به نوازيل
شدّو هله عنّه ، و خليت ربوعه
ماعاد باقي به زروع ، و محاصيل
جفّت ينابيعه ، و يبست زروعه
يالله عسى بعد السنين المماحيل
وسمٍ تباشير الحيا في رجوعه
يامنشيٍ غرّ السحاب المحاميل
اللي من القبله تقادح فروعه
تمطر على صدري صدوق المخاييل
والوسم يادوبه ماكمّل سبوعه
حبّة بردها كبر حجم الفناجيل
لاوقّعت في قاع زادت صدوعه
يالين تروى منْه جرد "الدهاتسيل"
اربع ليالي مايوقّف وقوعه
واقلبي اللي كلّ مادلهم الليل
خطرًا عليه انه يكسّر ضلوعه
على فراق ام الرموش المضاليل
يشعل من اطراف القصايد شموعه
إنّ اقبلت قبًا من اصايل الخيل
قامت على همي ..، و فضّت جموعه
محنيّة العاتق ، و مركوزة الذيل
لا صاح صياح الضحى في فزوعه
تقول فالغرّة سنا نجمة سهيل
و الخصر متضمّر ، و طاويه جوعه
عامين ماجا من جهتها مراسيل
ماني بعاذرها لو انها قطوعه
انا على الفرقا ، و قطع المواصيل
لي قلب مايصبر ، و نفسٍ جزوعه
لا روّحت حيل الله اقوى وتسد قيل
ابو طبايع مايخلي طبوعه
بحفظ غلاها لـ السنين المقابيل
وبقنع .. يا لو النفس ماهي قنوعه
_
>>Click here to continue<<