باب الحوائج ادري عنك
والخير كله البيه منك
ياسيدي موسى ابن جعفر
        ########
ياسيدي كل حاجه تكضيهه
ولهذا يمك حاجتي احجيهه
روحي التجيك بكلشي ماذيهه
ادريهه ترجع كلشي مابيهه

هذا اعتقادي وما ابدله
والنيه عندي وياك عدله
هاي العقيده وبيهه افخر
ياسيدي موسى ابن جعفر
          #########
ياسيدي ويا مالك احساسي
من خير شخصك باقيه انفاسي
جيفن احبك مرتفع راسي
فضلك عليه هواي ما ناسي

من اختنك واكصد واجيلك
تشرحلي صدري المعتنيلك
صدري بضريحك من تعطر
ياسيدي موسى ابن جعفر
           ########
ياسيدي واتنخه انه بأسمك
وبساعة الشدة اجي يمك
والعاقل الي رايد يفهمك
يالوحة بس ياهو الفهم رسمك

يالوحه مرسومه بنضرتي
يادمعمه مفهومه بعبرتي
ياعشكي لجلك يبقى يكبر
ياسيدي موسى ابن جعفر
       ########
ياسيدي موضوعك شكبره
مو ياهو جاي ويفتهم كدره
كل العلم يمك صبح فكره
قران حكمة غلافك الحضره

ياموسى يا قران ناطق
ياحجة الله اعله الخلائق
اسمك كبر والكون يزغر
ياسيدي موسى ابن جعفر
        #######
يامالك الكون و ياابو الديره
مالكني حبك عايش بخيره
من ادخل بشدة وتضل حيره
اتنخه باسمك مو اسم غيره

ها ياابو طلبه لمن ادعي
لمن احير ويجري دمعي
يامن يجيب الجايه مضطر
ياسيدي موسى ابن جعفر
        ########
ياسيدي ومتنومس بحبي
وبحبي الك يرضى علي ربي
يامالك الروح ونبض كلبي
بفركت ضريحك عيني بس تربي

وهنياله اليموت بحضرتك
ها ياابو طلبه لاحه بختك
تبقه بضريحك روحه تفتر
ياسيدي موسى ابن جعفر
         #########
#بقلم _حسين_علي_الياسري
الحمد لله
تمت بتاريخ  
ليلة ٢٢ رجب ١٤٤١ هجريا
١٨ /٣/ ٢٠٢٠ ميلاديا
المصادف الأربعاء

عظم الله لكم الأجر والثواب بذكرى استشهاد الامام موسى بن جعفر الكاظم عليه السلام

متباركين بيوم المبعث النبوي الشريف
اللهم صل على محمد وآل محمد وعجل فرجهم الشريف

عظم الله لكم الأجر والثواب بذكرى خروج ضعن الإمام الحسين عليه السلام من المدينة

قصيدة وياك اسافر
مولاتي عليلة الحسين عليه السلام
ترسل احساسها لوالدها عليه السلام
بعد رحيله عن طريق بريد القلب
المكان : منتدى الشعله الثقافي

للمشاهدة عبر اليوتيوب بدقة افضل
على احد الرابطين
https://youtu.be/YLLqH0mBbsg
https://youtu.be/zd2GZC4oNzY

القصيدة :

بيه واهس مال ملگه
وازدحام من المشاعر
وصوت لاچن صوت اخرس
وصوره من كل ذكره حلوه
تملي بعيوني بالنواظر
وهوسة افكار وتشضي
تاخذ بعقلي وتودي
وجيش من كسران خاطر
ودمعة عيوني العزيزه
تسافر اعله خدودي سكته
بدون ما تگطع تذاكر
والخيال الواسع ترسمه صفنتي
وياك اسافر
وزحمه من تخلص صفنتي
الگه اثر يشبه طريقك
دمعي فوگ خدودي حافر
والگه وحشة موت بيه
والگلب مابي يصابر
ها يالمخلي انتضارك يمي يبقه
انه بس لأجل انتضارك كمت اكابر
انه بس لاجل انتضارك عمري باقي
والأمل ترجعلي باچر
هسه لو باقي خيالك
يمي يضوي
چان يم خيالك اكعد ليك اناطر
انه تارسني غيابك
وبخيالك ردت اسامر
ريت ترجع ليت اشوفك
انت وخيالك وريحك
بكل كتر بالبيت داير
وترجع لشوفي نقل حي ومباشر
وكل اداة تفيد في معنى التمني
استخدمتهه البلكي ترجع
الليت الزمك الريت اقبلك
ماليه اوراق الدفاتر
وگلبي گال ارجع واطشلك
للفرح نبضاتي ناذر
هذا حالي شلون حال
مثل غبشة ثكله صاير
مغربية ليل شاعر
وفوضوية حزني تنطق
عن ضجيج بداخلي
اعله عيوني ظاهر
وعيني من كثر الدمع
رسمت ضباب كبال شوفي
وشوفي حاير
والضلام يدور حولي
والحزن وياي ساهر
والوجع البروحي يكتل
چنة هندس ليل عاشر
وصوتي من يصرخ اريدك
محد يسمعه ولكن
هزله دين من الضماير

#حسين_علي_الياسري

ها يرايح عني يدواي وياعلتي
اليوم الم كل ذكرياتك
ارد اگعدهن واعاتب
من غيابك تارسه الدنيا وحدتي
شلون لمن يگبل الليل بغيابك
ياهو اليسدلي وحشته
وچانت عيونك تسد خوفي ووحشتي.
وتدري بعيونك كشختي
وصارت الكشخه بعد مافاركتني
دموع تترسلي وجنتي
يالجنت يمي واريدك
تدري مااحمل فراگك
وادري ماتحمل فرگتي.
وانه بس لعيونك اشكي
وهسه عينك فاركتني
ياهو اليسكت عبرتي
وعلگت صورة رجعتك
الرسمتهه من خيالي.
بالخيال الماتحده
تطول لوتكصر نضرتي
ووسط هاي الفوضويه
يفز ضجيج شچم سؤال
ليش راحت عني جفينك يغالي
وَكلهه حاجه
لحضنة جفوفك دمعتي
وهم اشوفك جايني وجايب ضحكتي
ياوطن روحي وغربتي
ياراحتي السكنت حسرتي

ها يالحنين اترجاك.  بقيلي عطرك ذكره
            ___
بقيلي عطرك ذكره الي بقيلي
مني اخذت البويه شمخليلي
انه العليله وفگدك ايهد حيلي
بقي قميصك يابوي  حيلي يرد بعطره
             ___
حيلي يرد بعطره من اشتمه
تشفيني منك لو تمر بس نسمه
وجهك ضوه وفراگ وجهك عتمه
وجهك اساس الكل نور.    يالعاكس اعله الگمره
            __
يالعاكس اعله الگمره وجهك نوره
نورك اساس الكل ضوه المعموره
بفراگك اقره وماترد چم سوره
بفراگك اقره القرآن.    بالساعه مية مره
              ____
بالساعه مية مره اضل اشتاگك
من انت يمي شلون اجاني فراگك
كل لحضه اموت واحتيي باشواگك
روحي يعت بيهه الشوگ.    يردهه انتضارك جمره
               ___
يردهه انتضارك صفره من گد الشوگ
كل لحضه تتبده بدرب مشيي النوگ
وگلبي احسه بهالدرب کن مسحوگ
تخيل اجيت اسرع ليك.   وطلعت سراب النضره
               _____
طلعت سراب النضره وگلبي احتام
رايد يشوفك منكسر كسرة جام
يالتدري بجروح الفگد ما تلتام
شيضمده جرح المشتاگ. والفرگه تچوي جمره
_____
#حسين_علي_الياسري

طفله تنادي بحس مبحوح
كلبي وياكم خلي يروح
___
طفله وعالضعن نادت        وحدي لا تعوفوني
ما معترضه بس كلبي.      صاح وياكم اخذوني
كلبي الوحده يتعذب .      نادت يالتسمعوني
بس ما افارك انه حسين.    ويه حسيني خلوني.

صاحت صيحه تطلع الروح
كلبي وياكم خلي يروح
___
نادت ياكلب يحمل.              فركة واحد يحبه
شلون الي يحب حسين.      وبس حسين البكلبه
حنين هواي ابو السجاد.      حنان الماي عالجربه
واليفكد حنان حسين.          يعينه اعله الفكد ربه

الله يعينه يعاشر نوح
كلبي وياكم خلي يروح
___
عن ياجرح اريد احجي.       ما ينعدن جروحي
نادت يال اودعكم.              راحت بالضعن روحي
اضل بلا خواتي شلون.        ياهو اليستمع نوحي
اضل اتخيل انه حسين.       كلي ويانه هم روحي

هذا الرايح ضعن جروح
كلبي وياكم خلي يروح
____
رحتوا وعفتوا طفلتكم.        غريبه وعايشه الحسره
اسمي فاطمة وكلبي.           بي من فاطمة الزهره
ضلعهه بعصره متهشم.      وانه بكلبي جم عصره
من سافر ضعن اهلي.        احس ضلوعي متكسره

طفله وحلمي اصبح مذبوح
كلبي وياكم خلي يروح
____
نادت ياهلي رحتوا.           ما اضن يحتمل صبري
وروحي ورده ذبلانه.           بعدكم ما يضل عطري
شلون بكلبي ياحبابي.        وضايك بالنفس صدري
دلوني اعله حل وارتاح.      بقيت محيره بامري

امشي وياكم ما مسموح
كلبي وياكم خلي يروح
_____
يهنيال المشو وياك.             طريقك ماشي للجنه.
يحسين المشه بدربك.         مشه لدرب الله واتعنه
كون كليبي يمشي وراح.     وياكم انه اتمنه
كلب طفله وبقه متانيك.       وشايب صاير بحزنه

من حزنه يصير بكد نوح
كلبي وياكم خلي يروح
______
حسين علي الياسري

ودعتهن حجره حجره ورايح
وليش دمعك يم حجرتي طايح
يعني الي متعود
     ___
ودعت الحِجر كلهه. ودمعاتك تحاملهه
بس يم حجرتي تهلهه. يعني الفرگه اليه
مامنك بعد جيه. يضي عيني وهوه الريه
تروح وتعرف البيه. مااحمل اذيه

عليله انه ودوه العله.....صوتك يترس اسماعي
ماانام إلا اشم عطرك..... من اشمه تهده اوجاعي

تروح وانه يروح بعدك حيلي
بويه منك لو عطر خليلي
بي احس موجود
___
بويه ودعت هالدار. وخلاني الدمع احتار
ليش ويم حجرتي شصار. ودمعوع بحضنهه
بويه الحيره تاذيني. ناوي انت تجافيني
المن باقيه سنيني. ويتغرب وطنهه

والمدمع احس اثبات....ناوي انت تفارگني
قبل لا اسمع انت تروح.... احسن حزني سابگني
بالجفه چوه الحزن دلالي
الغالي يعرف شنهي نيت الغالي
والگلب ممرود
____
لمن شاهدت دمعك. بيهه انه اعرفت وضعك
لازم دمعتي تودعك. وتحضنهه دمعتك
موادع دمعه وي دمعه. وكون الله الذي شوسعه
متضل بي ولا وسعه. تتحمل فرگتك

تضيگ الوسعه بگليبي..... تصبح جن ثقب ابره
وگلبي انه العليله شلون..... يهد حزنه جبل صبره
ابقى يابويه عليله بدارك
شلون اتحمل بعيده اخبارك
العله بيه تزود
_
يامن ودعت كلشي. بعدك بويه من تمشي
يصيرن دمعتي ورمشي. من بعدك رفاگه
عرفته حالي من بَعدك. من غرگ دمع خدك
على صبري نصر بُعدك. ومابعده انتلاگه

من بَعد البُعد اعرف..... مايبقه امل ترجع
واضل بحسرتي وحزني... وعليله وگلبي يتفجع

شلون بويه يصير بعدك حالي
وانت من تروح تشده بالي
بكل اثر مشدود
__
يا حل الشكو حيره. منك طلبتي ازغيره
بس وجهك علي ديره. لمن يسري ضعنك
آخر نضره من عينك. بيهه اتذكر اسنينك
تترس چلمة الوينك. بس بنضره منك

بالتضره الاخيره وداع..... كل ذكره قبل الفراگ
تشرح كل حچي الگلوب..... تترس صفنتي من اشتاگ

بيهه افهم كل حچي البعيونك
وهي التصبرني وانه بدونك.
والصبر مريود
____
#حسين_علي_الياسري

حضر يا جفن دمعات العيون
وابچي ويه الينوحون
گرب حزن اليحبون
انت ودمعتي ما الكم حساب
للغالي ترخصون
اكداً مو بالضنون

ترجم ياجفن دمعات الجروح
من تنزل حزن ويأذن النوح
مايغله البچي وشهر الحزن جاي
شهر بيه الحسين اتسمه مذبوح

ادخل عالم العشاگ.   من ابچي اعله معشوگي
شهر فگد العشگته جاي.    اريدن ينفضح شوگي
دمع ياجفني ابچيله.     ودمي يچوي بعروگي
       __
وحضر ياگلب بجروح الاحساس
خلي جروحي تنجاس
والطم صدري والراس
گرب شهر المحرم ياگلب هاذ
شهر بي يصفر الياس
بمصاب الماله مقياس

شهر بيه الحزن واجب للأحباب
شهر بمصابه ابد ماشابه امصاب
شهر بيه الحسين تحضنه الرمال
وغريبه بلا وطن عايلة الاطياب

غريبه بلا وطن تصبح.     اصل كل الوطن واهله
وسفه الغربه تاخذهه.     بسبي لا بعده لا قبله
لا تبرد ولا ترضى.         جرح من عندك تقله
         __
ادعيلك يگلبي بالحزن دوم
واذا ابرد علي لوم
خل دمعاتي كل يوم
اريدن بس حزن اگضي العمر كون
واريدك كلبي مالوم
طبع ماريده تعلوم

اريدك ياگلب تتطبع احزان
وتصبح للحزن ياگلبي ميدان
ومااريدن حزن دنيا يطب بيك
وبس لأجل الحسين احزاني عنوان


احزانك فقط لحسين. لاتقبل حزن غيره
وتترس كل جزء منك. اصبح للحزن ديره
ديرة تسكنك الاحزان. حتى اتمسك الغيره
__
وتحضر بادمع عيني للالام
كرب شهر السبي وشام
معدودات الايام
احرگني السبي عايلة الحسين
وعفة دين الاسلام
اريدك دمعة الايتام

انزل بادمع لاجل السبيات
لاتبرد اذا تسمع غريبات
اريدك حار كون تچوي الاخدود
احر من الجمر من تجري دمعات

يادمعي مصابك هاذ. بمصابك فلا تبرد
ماريدن احشم بيك. وحدك يادمع تنهد
بالك لا تقل بيوم. شماتنزل اريد ازود
_
#حسين_علي_الياسري

دماعتي طاحن لمن جفاني
بونين..حسين.. عنّي يهاجر
ادريه يطول مابيه اتاني
بجروح...انوح..حزن المشاعر

راح حسين بضعن جروح
بمگفاه گلبي باقي ينوح
صح ما اخذني بضعنه وياه
لاچن دزيت انه الروح

دزيت انه الروح تمشي ويه الضعن
وگليبي كلساع باحزانه انطعن
من راح الحسين دمعاتي تصب
واصوره بالعين. مابد ينسن
__
رايح انيسي وضليت انادي
بنين..سنين.. فدوه الرجعته
ماهمني ولدي فلذة فؤادي
يعود..يزود.. عمره وضحكته

فدوه اتروح اربع اقمار
بس حسين يرد للدار
كلشي افديه بس سالم كون
و بيوم الطف ما يحتار

كلهم فده اتروح. اولادي اله
بس كون الحسين. ميصيبه بله
انه ام البنين. بس فدوه الولد
بس سالم يعود. من طف كربله
____
سالم يردلي امنيتي يرجع
دعيت .. يريت.. يرجعلي سالم
ادعيله وابچيه وعيوني تدمع
بچيت _ نعيت بس ادري لازم

ما يسلم ضعن الماشين
بالطف يوگع ماي العين
بالطف ايصير اللي يصير
وما يرجع سالم الحسين

ما يرجع الراح من هذا السفر
وتغدره الاوغاد. ويخونه الدهر
والاربع اولاد. يفدونه النفس
محني الظهر لين. يفگدله گمر
_
آ ياحسرتي وگلبي بفرگته
جريح ..يصيح .. كل نبضه باسمه
آ يا جراحه وآ يا دمعته
الحبيب..بنحيب....فارگني رسمه

وبگلبي وحسراته شلون
من يحزن وين الگه العون
چان بحزنه يصبره حسين
وهسه فراگه يبچي عيون

يامن يصبر. گلبي بهالجفه
ودمعي انه كل ساع. عالخد انچفه
شينشف الدموع .. والرايح نظر
عيني ونضرته.. معنى العاطفه
_
من الهم دليلي مشتعله ناره
الدليل...ويميل.. كل لحضه حالي
لني ادري ضعنه يرجع باساره
عجيب..غريب. وفاگد غوالي

ضعن البي قائد مهيوب
انه ادري يرجع مصيوب
يرجع فاگد قائد حيد
ويتسمى ضعن المسلوب

ضعن الكلافه..يمشي للأسر
الراح بنسيمه..يغطي كل عطر
راح شحلاته..والقائد كلف
وسفه وحسافه..يرجع منكسر
____
#حسين_علي_الياسري

يالهواشم    حملوا ضعني.
هذا ضعن اموادع لهاي المدينه
وخلوا ذكرى.    بكلشي بيهه
حتى تذكرهه اذا تشتاگ لينه
ومن دمعكم.    شربوهه
بلكي بيهه تخضر الرحمه اللي بينه
من نودع.      ما نجيهه
ورايحين الديره بس متحن علينه

رايحين الديره ما تعرف حنان
ورايحين الناس ماعدهم امان
ودعوا ضحكات التلاقي الماترد
راح ياخذنه بعد جور الزمان


هذا النداء    يا آل هاشم
لكربلاء.         بلغوا الفواطم
لاهل البغاء.      لا ما نسالم

حان الوداع .        حان الوداع      
___
يالهواشم.        ودعوا كلشي
هذا الوداع الاخير الما يردنه
وهايه آخر.      مره بيهه
نودع الگاع اللي بيهه اندفن جدنه
وراح نمشي.     عنهه غربه
ومانردهه نغرب الديرة لحدنه
راح نگصد.       ناس گالوا
وادعوا حبنه ولكن همه ضدنه

حتى القي الحجه عالگالوا تعال
يالهواشم حضّروا نوگ وجمال
وخل تركب زينب بهذا الضعن
خلوا تركب زينب وباقي العيال

زينب اجت     ولبست حزنهه
بهيده نعت.   .   عاليمشي عنهه
واتعاتبت.           ويه متنهه

حان الوداع.        حان الوداع
    _
خيتي زينب.     هذا هودج
بي يصعدچ كافلچ عالناگه بيده
من تسمه          كافل اخته
هو اللي يكفلچ يزينب انه اريده
ذو الكفاله       وگد مهمته
هو اللي يوافي الكفاله بدم وريده
ومايرجعچ.      من نسافر
من نروح الديرة الموت البعيده

هو راح ايكفلچ بهذا المسير
ومايرد وياچ ومصابچ چبير
هالضعن يرجع بلا اخوه بعد
هالضعن طالع عزيز يرد اسير

هذا المصير.      وهاي المصيبه
وصوت البچي.   يكثر نحيبه
عيلة امير.          ترد غريبه

حان الوداع.       حان الوداع
     __
وكلنه نمشي.    وتبقى مِنّه
ام البنين الوفيه تراعي داري
يمهه تبقى.       العليله
تمسح المدمع لون من عدهه جاري
ويانه دزت.      كل ولدهه
يعني دزت كل بختهه بضعني ساري
وبالكفاله.         هي تكفل
من بقت ويه العليله تضل تباري

راح يتخلد ذكرهه ويه الطفوف
وتنذكر كلما يذكرون الچفوف
هي صح متروح ويانه وتضل
بس گلبهه اعلينه كل لحضه يطوف

تبقى بحزن.      تنطر خبرنه
بليل اليجن.       تسبح بسمنه
وتطبگ جفن.     وتحلم رجعنه
  
حان الوداع.     حان الوداع
      ____
يالعليله.         خل اكلمچ
بويه ماترحين يبنيتي الحبيبه
گلبج انتي.       لا ميحمل
يموت من ايشوف گطره من المصيبه
وانه اعرف.      من نسافر
گلبچ اعله الفرگه مايبرد لهيبه
بس يبنتي.       هذا الافضل
وهذا امر الله وبعد كلمن نصيبه

بويه الفراگ اهون بهذا المصاب
بويه متحملين شوفي اعله التراب
بويه سوط اعدانه  ميحمله متن
عد عليله وماتحملين العذاب

سب وضرب.    ميحمله گلبچ
وماي الشرب.     محد يشربچ
وشام وغرب.      وسوط اليضربچ


حان الوداع.          حان الوداع
___
#حسين_علي_الياسري
تمت بتاريخ
ليلة ٢٩ رجب ١٤٤٢
ليلة يوم الاحد
١٤/٣/٢٠٢١

بويه لو تاركلي من ثوبك خليل
يمسح دموعي لون عالخد تسيل
__
بويه لو تاركلي من ثوبك ذخر
لريحتك اشتاگ واشتم بي عطر
قطعه من ثوبك اشمهه وانتظر
خاطر تصبرني لو طال الرحيل
____
گلبي اخذته وياك من عني رحت
وانه راحت روحي لمن ودعت
من بعد فگدك احس روحي متت
بويه گلي شيحمل گليبي العليل
_
بويه وتفارگني ابد ما حسبت
ايجوز تبعد بس ترد انه گلت
بويه دمعاتي اعله فگدك وزعت
ودمعي صار بفرگتك ماي السبيل
__
بويه لمن ودعت عندي شبگه
گلبي بس الهم يغالي رافگه
انه متعوده اعله حضنك اشبگه
وتالي حضنك عافني وحيلي يميل
__
رحت عني وانه اصرخ يا حسين
شلون عفت ابنيتك بهذا الونين
ياحنين وكلشي منك بي حنين
حتى لو عايفني هم فعلك جميل
_
گلبي اخذته وياك يالغالي ومشيت
انه لوداعك حزينه شگد نعيت
بويه اخذني كتلك ادخيله ونخيت
خذت گلبي ماترد انت الدخيل
___
بويه من گلبي اخذته يواسي بيك
وخاطر يخبرني لو شر مر عليك
والله لو اگدر زحف انه اجيك
من اجه بروحي حزن فگدك دليل
__
#حسين_علي_الياسري

انت علمني احبك
گلبي قاصر
َوانت بس الحاء منك
مرجع لكل محب طاهر
ومن ضياع الروح اخذني
انه ذاك الجان شاعر
يكتب الغيرك مشاعر
وهسه هذا الردت اعبدك
شلون اعبدك والله حاير
وانه لمن جنت ازورك
جنت اگولن انه زاير
وانه مامكسور خاطر
شلون اعبدك والله حاير
انه مو ذاك اليعرفك بس مناير
هسه هذا الباع روحه
واشتره دموعه عليك
العايش لثارك اناطر

#حسين_علي_الياسري

يا عشگ العمر. مهدي
ومفتاح الصبر. مهدي
لنورك منتظِر. مهدي
وبهاي افتخر. مهدي

الك ابقه امناطر
عمري لاجلك ناذر

_
ياسورة حمد. مهدي
موتني البعد. مهدي
امنيتي ترد. مهدي
ولوجهك اصد. مهدي

وعيني تشبگ عينك
وانسى چلمة وينك
___
ياذخر العلي. مهدي
يا اخر ولي. مهدي
باسمك اعتلي. مهدي
يافارس علي. مهدي

ابقه باسمك عالي
چيه سكن دلالي
___
يافخر الفخر. مهدي
يالعمك الكمر. مهدي
يانور النظر مهدي
گلبي انتظر. مهدي

منتظر اخبارك
يمتى تطلب ثارك
___
يالتصلب جبت. مهدي
يمتى ما گمت. مهدي
تلگاني صرت. مهدي
انت شما ردت. مهدي

ارد اصيرن عبدك
بكترك وما اهدك
__
#حسين_علي_الياسري

مر بينة تراهة الناس محتاجة الطورايك
مر بينة الهجر حراگ خل نلبد حدر فيك
يمهدينة دكافي فراك خل نلفظ اساميك
دكافي الضلمة يامولاي خل نشوف من ضيك
مر بينة قصيدة شوگ وكت الفرحة تتغنة
مربينة يفرحة شاب ينطر ليلة الحنة
مربينة اعلى الگد الشوگ لو بس طيف نتمنة
مربينة يجنك ريح هبت من هوة الجنة
واليشتم عطر ملكاك تيه كل عطر وردة
يأترف انت من كلشي الهوة المر بيك يتندة
ترة خد اليتيم اشتاگ تمسح دمعة من خدة
والحگ‌ الصبح مبيوگ ينطر منك تردة
مربينة تراهة الناس ماتتأمل بغيرك
يمهدينة تراهة الناس تنطر نظرة من خيرك
يالچنك سمة المشتاگ والروح اصبحت طيرك
يوسف واحنة جن يعكوب وغيابك صبح بيرك
يمتى تمر على الحبوك حيل گلوبهم ضاگت
يمتى تمرنة يامولاي حتى انفاسنة اشتاگت
يمتى ترجع البسمة تدري بفگدك انباگت
ذيج الضحكة يامولاي يم غيرك ولا لاگت
يمتى تصلي بالجمعة يمتى نروحلك فدوة
يمتى نشوفك ويانة ومن الشوفة نتروة
لازم نترك الموزين حتى تهزنة الك نخوة
ونرفض كل ضلم عالناس ونهيئلك القوة
#بقلم_حسين_الياسري

يمهدينة يمهدينة يمهدينة
######### ##########
يمهدينة اليحبك كون يعرف شنهو درب الله
يمهدينة الیعشگگ حيل عاشگ تربة ومصلى
يمهدينة درب ملگاگ بممشى حسين يتصلى
يمهدينة يمهدينة يمهدينة
######## #########
يمولانة تراهة الناس مشتاگة الطواريك
مو تدري الهجر حراگ خل نلبد حدر فيك
كافي الضلمة يامولاي خل انشوف من ضيك
يمهدينة يمهدينة يمهدينة
######## #########
يمهدينة الهوة المر بيك كل صبحية يتندة
والمشتم عطر ملگاگ تيه كل عطر وردة
يغالي يالعشت بالروح وصفك گلي شيعدة
يمهدينة يمهدينة يمهدينة
######## #########
يغايبنة بدرب فرگاگ هاي الشيعة تتأمل
من تگصد لسامراء بالسرداب تتوسل
يرب بجاه نور حسين خلي الفرج يتعجل
يمهدينة يمهدينة يمهدينة
######## #########
يمهدي الفارگ احبابة يضل كل عمرة بس انياح
كل ما يذكر الغالين يصفگ راح فوگ الراح
شحال العاشگگ مولاي ما اضنة ابد يرتاح
يمهدينة يمهدينة يهدينة
######### ##########
للغايب اشوف العين كل ليلة علية تربة
يليش اگليبي ياهلناس عاشگ بس درب حبة
كل جمعة اتيه الروح والگاهة بدُعة الندبة
يمهدينة يمهدينة يمهدينة
######### ###########
هو انت عشت بالروح للما حب ابد غيرك
صرت انت سمة المشتاگ والروح اصبحت طيرك
يايوسف وانة يعگوب وغيابك صبح بيرك
يمهدينة يمهدينة يمهدينة
######### ###########
#سيد_حسين_الياسري
@hussainalyasry

الفرحة بهالشهر تنعد عباده
گلب الشيعي يتنعم سعاده
بشهر الفرحة شعبان
گلب الشيعي فرحان
بس كون بأدب يحي الولاده
__
هذا شهر الفرحه هذا
بي ولادات الاطايب
خيرة من نسل الهواشم.
خمسة من آل ابو طالب
زينه للدين الألهي.
ابدور ونجوم وكواكب

حسين و ابو الغيره الگمر. والبيه للسجده فَخَر
وبالاكبر الشهر ازدهر
المهدي خامس حسره غايب

غايب عالنظر لاچنه حاظر
بگلب الشيعي اذا ضل گلبه طاهر
بي باقي إله امچان
گلب الشيعي فرحان
بس كون بأدب يحيي الولاده
_
اليحب انسان نعرف.
يفرح لخاطر فرحته
واليحب طه محمد.
يفرح لجية عترته
لاچن المولود الأول.
الذكر اسمه تصب دمعته

وحسين من للدنيا اجه. النبي فرحان وبچه
خلي الحچه والماحچه
الشيعي من طه اخذ حجته

فرحه وحسره في مولود الحسين
اللي يريد الفرح واللي بچه العين
ما اضن احد غلطان
گلب الشيعي فرحان
بس كون بأدب يحيي الولاده
____
اي يشيعي حقك افرح.
لچن بالفرحه تهذب
فرحتك للدين واهله.
وبتعاليمه تأدب
الشيعي كون يصير زيناً
كون بالفرحه مؤدب

والتاخذه الحان الطرب. . والياخذه هز الرگب
هذا تره دينه خرب
هذا يبعد ما تگرب

اليسمع للطرب دينه يبيعه
واليطرب حرام بهالشريعه
ما تطربه الالحان
گلب الشيعي فرحان
بس كون بادب يحيي الولاده
_
وكون من انشودة يسمع
للفرح يعرف اصلهه
مطربة لو لحن عادي.
والشرع كونه قبلهه
موش عالياهيه تصعد.
والترند يصير إلهه

والحكم واضح بالشرع. كل الغنه حرمه ومنع
ولو لحن مطرب للسمع
هاي ويه الغنه يخلهه

مو مقياس اذا مليون عبرت
بس مقياس اذا بالملهى گعدت
يقيس بهاي تبيان
گلب الشيعي فرحان
بس كون بأدب يحيي الولاده
___
كون كل ملا بفرحته.
ما يهمه يوتيوبه
يبقه بي ديدن حسيني.
ما خضع لترنده نوبه
ابو الديجي والموسيقى.
لعب والله بدينه طوبه

والمابقه بيهه حذر. شيجاوب بيوم الحشر
لحسين شيقدم عذر
واهوه باسمه مخلي ثوبه

كونه يخلي هالموقف امامه
من يسأله شيجاوب امامه
الصح ما يبقه حيران
گلب الشيعي فرحان
بس كون بأدب يحيي الولاده
_
#حسين_علي_الياسري

متباركين بولادة مولانا صاحب العصر والزمان عجل الله فرجه الشريف