誰是李山？起底紫荊黨主席
近日南華早報一篇報導突然爆出一個新建制政黨「紫荊黨」，創黨成員李山、黃秋智、陳健民，表面上睇係三個來自內地嘅金融精英，但係咪真係咁簡單？睇下黨主席李山先。
人脈直通天庭
李山1986年畢業於清華大學管理學院，時任院長係朱鎔基，可以話係朱鎔基嘅學生。1993年，李山畢業後來到香港，任職瑞信第一波士頓。同年，王岐山主持籌建中金公司，1994年會唔李山。而1996年，朱鎔基長子朱雲來，同樣任職瑞信波士頓，當時李山已經離開瑞信，任職高盛。1998年，朱雲來加入中金公司，王岐山為當時中金董事長。香港金融界高層中來自中國嘅圈子有幾大，呢幾個人是否相識，你可以估下。1997年，朱鎔基親自會唔李山，李山向朱鎔基交出一份籌建國家投資銀行嘅方案。隨後李山連同汪潮湧成立國家開發銀行-投資銀行籌建組。項目最後因法規限制擱置。李山回到香港，加入雷曼兄弟。
可見李山嘅人脈唔係一般金融精英咁簡單，但值得留意嘅係，朱鎔基及其長子朱雲來似乎都同習近平唔啱牙。朱鎔基搞國企改革，習近平就國進民退；朱雲來更加公開批評習嘅經濟政策。咁李山係咪左右逢源？假如紫荊黨嘅目的真係成為中共嘅白手套，習難道就唔驚佢「擁兵自重」，成為黨內改革派嘅籌碼？（開放大灣區投票同理）
不是港漂
有大陸媒體形容李山係「資深港漂」，唔好傻啦，睇下時代背景先。「港漂」呢個字2000年先興起，衍生自「北漂」、「上漂」，喺中國形容到北京上海等地求學工作的非本地年輕人。之所以話「漂」，係因為呢班人未獲得當地戶籍。而李山八十年代已經出國，其後喺美國工作，九十年代來港，取得永久居民身份已逾20年，擔任上市公司及國際投行董事，財力厚，人脈廣。佢喺香港可以動員嘅資源，絕對非新移民、港漂咁簡單，而係包括本地及外籍金融精英。當媒體聚焦佢嘅黨章提到要動員新移民時，其實後面有一句係「包括取得香港永久居民身份的外籍人士」，亦即係嗰班以保障自己經濟利益為先嘅國際資本家。
另外就係港漂一代係經過網絡、全國性娛樂等等載體被灌輸民族主義的一代，李山則是八十年代國家公派留學生。八十年代，係中國自共產黨執政以來思想最自由的年代，而呢個年代嘅結束就係六四。雖然去大陸做生意，該講嘅說話都係要講，但李山絕對唔係小粉紅式愛國，更加唔係何君堯式「愛國」。李山呢班人係當年黨內改革派寄予厚望嘅接班人，但同樣嘅人亦可以為倒行逆施者所用。反正，將佢當成港漂就太輕敵喇。
政協會議前後兩個人
睇返李山關於香港嘅言論，有兩個現象：一，對香港媒體同中國媒體講嘅嘢唔同；二，今年五月全國政協會議前後唔一致。對住香港媒體，李山不停強調香港嘅獨特價值、獨特地位，甚至話香港可以為中國政治改革提供藍本。對住大陸媒體，就話香港要融入大灣區，擁抱一帶一路嘅機遇。今年五月前，李山曾經喺報章提出「香港係東方的佛羅倫斯」，可以孕育文化復興；又形容香港不僅是「五十年不變」，五十年後也不應變；人權法後更提出倘若香港引入內地式管控，只會令香港失去寶貴的國際金融中心地位，不應忘記「一國兩制的初衷」。五月紫荊黨成立，其後李山赴京參加全國政協會議，會上會後提出嘅香港觀點簡直判若兩人，包括成立兩院制，上院由特區政府委任；通過人大釋法建立23條過渡制度，建立「基本法法庭」及「基本法檢察官」；甚至話「香港未來應向內地的協商民主借鑑」「英國人建立的制度已不合時宜」。一個海歸，缺席八九後中國，在香港享盡制度的好處，究竟要有幾厚顏無恥先講得出呢句話。
李山路線嘅盡頭，就係保障既得利益者，write off香港人，將香港變成一個只剩下經濟功能嘅地方。向一個喪心病狂、不惜攬炒嘅暴君獻計，推別人出去犧牲，以換取自保。
而紫荊黨如果要成為中共白手套，一要睇習近平是否信任「李山黨」，因為隨時backfire燒到自己；二就係，李山呢種本來有退路嘅海歸，點解要賭咁大？定抑或佢退路已早被截斷。如果係的話，其他類似嘅金融精英都可能係呢個處境。當佢哋全部投誠，未來係一場點嘅戰役，國際線都真係要諗掂先。
>>Click here to continue<<