كيف يكون يومي ايجابي؟
طرق بسيطة ممكن ننضف بيها يومنا من الطاقات السلبية ونبتدي وننهي يومنا من غير ما نخلي اي حاجة تعكنن علينا وحتى لو حصلت نستقبلها بهدوء
من اول الطرق ديه (عقد النية)
عمرك سألت نفسك قبل ما تعمل أي حاجة نيتي إيه ؟
أي حاجة في الحياة طاقتها محايدة بتستمد طاقتها بالسلب او الإيجاب من نية اللي بيعملها زي ما يكون عملك متوصل بسلك كهرباء لقلبك ونيتك شحنته خير جابلك الخير شحنته شر جابلك الشر وضربك بيه
وعلى نياتكم ترزقون
"إلا من أتى الله بقلب سليم"
خطوات شحن اليوم بطاقة ايجابية نبدأها سوا:
- اول حاجة تعملها الصبح انك تصبح على نفسك وتقولها صباح الخير انا باحبك وتطبطب عليك
- الامتنان ليوم جديد وتعديد عشر نعم من اللي عندك والحمد والشكر عليها
- عقد النية لليوم واختار واستعين باسم من اسماء الله الحسنى تبدأ بيه يومك وتسبح بيه اليوم بحاله
- التنفس بعمق شهيق وزفير 3-5 مرات
- الابتسامة وتمديد الجسم وفرده
- مسامحة النفس على اخطاء امبارح
- الاستحمام او الوضوء او غسل الوجه والذراعين والقدمين عشان تغسل كل الطاقات السلبية اللي كانت متخزنة جواك وجسمك تخلص منها وهو نايم فتنظف هالة طاقتك منها كلها
- تصلي صلاتك ايا كان ديانتك وتدعي لنفسك ولحبايبك
- شرب كوب ماء متوسط الحجم حسب مقدرتك (وانت في وضع الجلوس) ممكن نضيف معلقة عسل ابيض وديه خطوة مهمة جدا عشان تشحن جسمك بالحياة وتخلي جسمك قلوي { وَجَعَلْنَا مِنَ الْمَاء كُلَّ شَيْءٍ حَيٍّ أَفَلا يُؤْمِنُونَ }
- تاكل من 3-7 وحدات تمر (عدد فردي) يمدوك القوة ويحموك من كل الذبذبات الكونية المضرة وتعملك هالة حماية من كل حاجة وحشة ده غير انه يديك طاقة تخليك تشتغل وتتعامل بمنتهى السلاسة والهدوء
- تتصدق حتى لو بابتسامة او كلمة حلوة أو بشق تمرة
- تخلي معاك بخاخة فيها مية ورد اول ما تتعكنن او تتعصب ترش في الهوا حبة منها وتخش جوة الرزاز ده هاتلاقي نفسك بتهدي وبرضه ما تنساش تطبطب على نفسك وتحضنها صدقني هاتحس بالفرق واهم حاجة التنفس العميق بعد الانفعال عشان نحرر الذبذبة اول باول قبل ما تتخزن جوانا
- ما تنساش تشرب شوية مية كل ساعة او بالكتير ساعتين عشان المية هي اساس الحياة تشحنك وتنضف جسمك من السموم والاحماض اللي بتجذب الطاقة السلبية طول الوقت
- كل ساعتين او تلاتة بالكتير تسيب مكتبك او مكان شغلك وتخرج تشم هوا بعيد عن اي تكنولوجيا اخرج البلكونة اطلع الشارع شم هوا ان شاء الله خمس دقايق تتنفس بعمق وترجع للطبيعة خمس دقايق بس ما تقولش نسيت ولا تقول مافيش وقت الخمس دقايق دول هايفرقوا معاك كتير اوي جرب مش هاتخسر حاجة بالعكس هاتكسب كتير
- زيت النعناع بقى من أقوى الحاجات اللي ممكن تشمها في وسط يومك تجدد نشاطك وتشحنك من اول وجديد
- الاهم تصلي الصلاة في مواعيدها وتسبح خلال اليوم وتقول كلام حلو لنفسك ولغيرك
- نص ساعة بعد الشغل بقى شوية رياضة تمشي تجري تعوم ترقص شوية ايروبكس اي مجهود عضلي يجدد الدورة الدموية واذا تقدر تعمل الخطوة ديه الصبح قبل الشغل أو في وسط النهار يبقى احسن واحسن
- تروح تريح وتاخد دشك وتاكل لقمة حلوة خفيفة بالليل خفيفة ها عشان ما تديش نفسك طاقة وتتشحن المفروض انك عايز تسترخي وتنام
- الخطوة المهمة اوي جدا خالص بقى عشان هاتفرق في يومك وكمان هاتخليك تقوم مختلف تاني يوم انك تحط رجلك في مية سخنة وملح وحبة بيكربونات الصوديوم او خل تفاح او جنزبيل بودرة المتاح عندك زي سي السيد زمان لمدة 15 دقيقة وياريت بقى لو عندك بانيو وتقعد كلك في مية سخنة وملح وتسترخي ولو عندك زيت ريحان او لافندر او ليمون تحط نقطتين من اي حد فيهم على المية وشوية مية ورد
- اذا تقدر تكتب اللي ضايقك على ورقة وتحرق الورقة من غير ما تقرأها ده هايفرق معاك كتير اوي وفي نفسيتك بمرور الأيام
- تعمل تمارين اطالة وتربيت على جسمك كله قبل ما تخش سريرك
- اخر حاجة بقى تتعمل وانت في السرير تحط نقطة زيت لافندر على المخدة تعمل جلسة تأمل (ميديتاشن) وتنفس عميق للاسترخاء وانت بتعدد كم نعمة من نعم يومك وتحمد ربنا وتمتن له عليهم وبعدها تستغفر كتير وتقرا اية الكرسي وخواتم سورة البقرة والاخلاص والمعوذتين وتنام بهدوء وسلام
وعليكم بالعافية
#احبكم_في_الله
#حنان_زينال
>>Click here to continue<<