نەوەد و یەک
🌸 غونچەدڵ بوونم لە حەسرەت لێوی تۆیە، غونچەدەم!
غونچەکەی تۆ مەر شیفا دا غونچەکەم، ئەی غونچەکەم!
واتە : ئەی یاری دەم وەک خونچەگیراو کە قسەیەکت لە دەم دەرنایەت! من لە داخی بێدەنگی لێوی سووری تۆیە، دڵم وەک خونچەی سوور گوشراوەتە یەک و خوێناوی بوە و بە وتەیەکی خوچەی نەپشکووتووی دەمی تۆ نەبێ خونچەی دڵی وشراوی من چاک نابێتەوە.
🌸 سینەچاکم وەک گوڵ و، دڵ پڕ لە خوێنم غونچەوەش
بێ گوڵی ڕوخسار و غونچەیی لێوەکەت، قوربانی بەم
چاک: لەت.
غونچەوەش: وەک خونچە.
واتە: هەر بە قوربانی گوڵی ڕوخسار و خونچەی لێوت بم، من بێئەوان سینەم وەک گول کرایەوە و دڵم وەک خونچە پڕە لە خوێن.
🌸 غولغولی بولبول لە عیشقی گوڵ نەبوو لەم سوبحەدا
شەعشەعەی ئەو غەبغەبە کەوتبووە سەر ئەم باغە هەم
غولغول: هەرا.
شەعشەعە: پڕشنگ.
غەبغەب: گۆشتی ژێر چەناکە.
واتە: بولبول کە ئەم بەیانییە کەوتبووە هەرا و ئاواز خوێندن، وەنەبێ بە هۆی عیشقی گوڵەوە بووبێ ئەوەی کردبێ، بەڵکوو بەهۆی ئەوەوە بوو کە تیشکی ژێر چەناکەی یار دابووی لە باخیش.
🌸 لاڵە بێ لالەی ڕوخت مەحوی، وەکوو مورغی خەمۆش
مەر بە چاکی سینە وەک گوڵ شەرحی دووری کا، سەنەم
خەمۆش: کپ و بێدەنگ.
واتە: بێ لالەی ڕووی تۆ، ئازیز! مەحویی وەک باڵدارێکی کپ و بێدەنگ وایە. بۆیە ئەم بتە بێدەنگە -کە مەحوییە- مەگەر چەشنی گوڵ بە لەتلەتی سینەی بتوانێ ڕازی دڵیت بۆ لێک بداتەوە.
لە دەسنووسەکانی بەردەستماندا لەنێوان ئەم بەیتە و بەیتی پێشوودا، جێگەی بەیتێک بە بۆشیی ماوەتەوە؛ دیارە فەوتاوە.
شێخ موحەممەدی مەحوییش نووسیویە زۆرمان هەوڵدا، دەستمان نەکەوت.
شێعری مەحوی لێکدانەوەی مەلاعەبدولکەریم مودەڕیس
@chamochya
>>Click here to continue<<