لطمية للعباس عليه السلام لسان حال ام البنين عليها السلام (( اخذت احچايتي ))
اخذت احچايتي ... وماخيبت ضني
براسك والزند ضحيت عفيه ابني
اعرفنك شجاع وماتضم ايدك
بروحك والعمر ضحيت لعضيدك
هالموقف حلو وبالاخره ايفيدك
بالعز والفخر ضليت متهني
اخذت احچايتي ... وماخيبت ضني
بالعز والفخر ضليت تتهنه
راسي وراس زينب بيك ارفعنه
ترهب من تگول الجيش اطشرنه
الك صوله وعزم واخبار وصلتني
اخذت احچايتي ... وماخيبت ضني
خوش اعلوم اجتني وخوش اجتني اخبار
گالولي البطل سوه الگبل ماصار
خليت اليضدك خايف ومحتار
وين اتصيح يرحون العده مني
اخذت احچايتي ... وماخيبت ضني
ترعد من تهب اعله الزلم وتصيح
لاهمك جمع لاهمك التسليح
كلمن بارزك ماراد عمره يطيح
وام حسين عنك راضيه وعني
اخذت احچايتي ... وماخيبت ضني
عنك راضيه الزهره وبعد شتريد
ياصنديد مثلك مايصح صنديد
كلشي ولاتخلي حسين اخوك اوحيد
ماكو اطروش چا وديتلك متني
اخذت احچايتي ... وماخيبت ضني
اوديلك متوني وكون تتوده
خاطر عن اخوك العسكر اتصده
يهد حيلي ودليلي من يضل وحده
عالمظلوم وني ولوعتي وحزني
اخذت احچايتي ... وماخيبت ضني
افكر بالغريب وتثگل احزاني
چني اوحيد اشوفه ينادي يخواني
عفتوني شعجب مابين عدواني
ادري اسيوفهم باچر يوذرني
اخذت احچايتي ... وماخيبت ضني
لشاعرة اهل البيت
ام هجران العمارچية
غير مبري الذمه من يمسح اسم الشاعره او ينسب الرثاء لشخص اخر
https://hottg.com/amhejran12345
>>Click here to continue<<