Локи - йил сериали
Бугун Локи сериалининг 1-фасли ўз ниҳоясига етди. Сериал ўзи билан Марвел оламидаги кўп саволларга жавоб бериши билан бирга, янада кўп саволлар тақдим этди.
Сериал 6 қисмдан иборат бўлсада, мифология ва комиксларни, вақтлар аро саёҳат, мулти-коинот, эркин танлов, нигилизм, экзистенциализм, детерминизм, ва вақт ҳалқаси (таймплуп) парадокслари каби улкан мавзуларни қамраб олган.
Сериалдаги воқеалар “Қасоскорлар: Интиҳо” (2019) фильмидаги 2012 йилги Локининг тессеракт билан қочиб кетишидан бошланиб, унинг ноъмалум вақт, замон ва маконга тушиб қолганлиги билан якунига етади.
Сериал ҳақида спойлерларсиз ёзиш деярли имконсиз бўлгани учун олдинда спойлерлар.
Огоҳлантириш: СПОЙЛЕР!
Сериал билан Марвел олами ҳақида нималарни билиб олдик?
Вақт ўзгарувчанлиги бошқармаси (Time Variance Authority, a.k.a. TVA) “Барчасини билувчи” олим томонидан 31 асрдан сўнг ташкил қилинган. Ушбу бюрократик ташкилотнинг асосий вазифаси - вақт оқимини назорат қилиш. Келажакда мулти-коинотлар ўртасида уруш бошлангани учун, олим ўз коинотини сақлаб, бошқа оламларни вақт ҳалқасига жойлаган.
TVA’да вақт бир маромда ҳаракат қилмагани учун, улар бир вақтнинг ўзида ҳам бугун, ҳам келажак, ҳам ўтмишда яшашади. Олимнинг ўлимигача бўлган давр эса абсолют детерминистик бўлган, ундан кейинги даврда эса ҳатто ёндош оламлар ҳам ўз эркин танловини қўлга киритди. Бу ўз навбатида улкан хаосга олиб келиши кутилмоқда.
Локини Марвелнинг янги - тўртинчи фазасига ҳақиқий старт берган сериал дейиш мумкин. Катта қизиқиш билан кутилаётган(мулти-оламлар тўқнашган) “Ўргамчак-одам 4” ва (мулти-олам даҳшатлари ҳақидаги) “Доктор Стрендж 2” фильмлари сериал воқеаларига чамбарчас боғлиқ. Қолган фильмлар сериалга қай даражада боғлиқлиги бу вақт масаласи.
Сериалдаги бир вазият алоҳида эътиборимни тортди. Мобиус Локини Леди Сифнинг сочини кесиб олган вақт ҳалқасига қамаб қўйган вазият мени бошқача ҳайратга сола олди деса ҳам бўлади.
Оригинал мифологияда Леди Сиф Торнинг умр йўлдоши ҳисобланади. Мифологияда ҳам Локи Леди Сифнинг сочини кесиб олганида, бутун Асгард маъбудлари ғазабга келади. Локи сочларни ортга қайтаришга, бошқача қилиб айтганда чин дилдан узр сўрашга, киришганидан сўнг, якунда ўзининг энг оғриқли жазосини олади - гапириш қобилиятидан айрилади. Бу жараёнда эса, Локи сабаб Тор Мьёлнирга, Один Слейпнир ва Гунгнирга эга бўлади, буниси энди бошқа мавзу.
Сериалда ҳам Локи вақт ҳалқасидаги Леди Сифдан чин дилдан узр сўраганида, “Сен ёлғизликка маҳкумсан, ҳеч қачон ҳақиқий яқин инсонинг бўлмайди.” қабилидаги энг оғриқли жавобни олади. Бу лавҳа мифологиядаги Локи учун жазони идеал алтернатив билан етказа олиши яна кўпчиликка манзур келса керак. Ёлғизликка маҳкум қилинган Локи учун кейинчалик, ягона қадрли инсон унинг бошқа таймлайндаги ўзи бўлади.
Мервел кино олами ҳақидаги назариялар
Менимча, вақт бўшлиғида жойлашган TVA ва бўшлик (Void) аслида квант оламида жойлашган. Марвел илмий асоси бўлмаганки псевдоилмий нарсаларга “квант” ёрлиғини ёпиштириши билан яқиндан таниш)
Сериалнинг якуний қисми Марвел оламидаги машҳур фразаларни қайтарилиши ва оламнинг Марвел талқинидаги “катта портлаши” билан бошланди. Бу вазият ўша квант оламига ишора бўлиши ҳам мумкин. Марвел фильмларининг, айниқса “Чумоли одам” франшизасининг асоси саналган квант олами билан турли вақтлар ва ўзга оламлар аро саёҳат қилиш мумкинлиги кўрсатилган. TVA’нинг вазифаси ҳам шундай ҳолат асосида яралган.
“Барчасини билувчи” олим ишларини келгусидаги “Чумоли одам 3: Квантомания” фильми билан, ёки катта эҳтимол билан Доктор Стрендж орқали тўлиқроқ тушуниб олармиз, балки..
@UzIMDb
>>Click here to continue<<
