عارف نقولك حاجة:- غاااالبا مشكلة الي ما يصلّيش أو يأخر في صلاته ومتهاون فيها #مش انه ميعرفش أهمية الصلاة أو إنها أهم عبادة بعد التوحيد وأجرها العظيم وإنها أعظم قربى لله عز وجل، #ومش_مشكلته كذلك إنه ميعرفش إن فيه وعيد مخيف بالنار لمن يتهاون فيها وحديث نبوي صريح إن الي ما يصليش حيكون في النار برفقة هامان وفرعون وأمية بن خلف.. هو يعرف الكلام هذا كلّه..
لكن مشكلته غالبا إنه مش متصوّر فكرة الموت القرييييب، مرات يموت صاحبه، والده، قريبه، فلان الي أصغر منه.. لكن هو حيموت؟!.. لالالا أبدا ياااما مازال قدامي فالدنيا! هكي والله نفسه تمنّيه وتغرّه ولو ما اعترف بهالحقيقة!
ونعطيك الدليل..
كل واحد عنده مشكلة في الصلاة، نسألك سؤال واحد بس:- لو جاك ملك الموت توا وقال لك:- الليلة #حتموت، هل حتصلي وتتوب على طول ولا لا؟! قطعًا وبالتأكيد كل مسلم حيجاوب:- نعم، نتوب ونرجع لربي.. باهي شن يمنع إنك فعلا تموت بعد لحظات؟! هل عندك ضامن انك مازلت حتعيش لغاية بكرة أو لغاية رمضان عشان تتوب؟! كم واحد توا في المقابر في جيلك وأصغر منك لو سألتهم هل كنتوا ناويين تتوبوا:- حيجاوبوك نفس الجواب.. نعم، لكن والله ما كنا متصورين اننا حنموتوا .. متصورين ان الموت للناس الأخرى مش لنا ولو ناخذوا فرصة بس في الحياة والله حنتوبوا ونصلوا .. لكن هيهات!!
الخلاصة انت يا غالي مازلت عايش ومازال عندك الفرصة تتوب وترجع وتتمسك بصلاتك.. مهما كنت عاصي وعندك صغائر أو حتى كبائر الذنوب، صلّي وما تقطع صلاتك لأنها هي الّي حتعينك وتساعدك على ترك المعاصي..
تاب الله عليّ وعليك وثبّت الله قلبي وقلبك على الصلاة🤲
>>Click here to continue<<