Тумандаги “Оқ олтин” насос станцияси жорий йил январдан “Навоий универсал гроуп - 999” кластер ташкилоти бошқарувига берилган эди. Насос станциясида 7 та агрегат бўлиб, 1250 гектар майдонни суғоришга хизмат қилади. Бу ерда ўзгаришлар энди бошланаяпти. Инвестиция киритиш бўйича ҳали натижа бўй кўрсатгани йўқ.
Айнан инвестиция шартлари бажарилмагани учун “Эски Учқора” ва “Чиғатой” насос станциялари бўйича битим бекор қилинди.
Вилоят Насос станциялари ва энергетика бошқармаси бўлим бошлиғи Алишер Муртазоевдан олинган маълумотга кўра, “Хатирчи агро экспорт” кластери 2021 йилда ушбу насосларни ўз бошқарувига олган эди. 2021-2023 йилларда инвестиция шартларини бажармади. Насосларни ишлата олмагани учун экинлар, узумлар қуриб қолди. Аҳоли мурожаатларидан сўнг 2023 йилда “Эски Учқора” ва “Чиғатой” насос станцияларини хусусий бошқарувга бериш бўйича битимлар суд тартибида бекор қилинди.