عايزة أقول حاجة بشكل عام:
-الشخص اللي يدخل البيت، أو يقابل البنت بأي شكل رسمي حتى لو مش جوه البيت بس تحت عين أهلها وبحضور حد منهم دي كدة تعتبر بالمسمى اللي الناس بتقوله رؤية شرعية
-الطبيعي والمفروض إن الشاب هو اللي يبادر بعد كدة ويكلم (والدك) مش انتِ، عشان يقول انطباعه مش العكس (مش احنا اللي بنكلمه) وده بيحصل في خلال أسبوع كحد أقصى
-لو محصلش ومردش أو مبعتش شيء لمدة تتجاوز أسبوعين أو شهر، معنى كدة حاجات كتير أبرزها قلة ذوق، والحاجات الكتير دي كلها لا تعنينا.
-محدش ييجي يقول طب ماهو ممكن يكون غايب بقاله شهر تعبان أو عنده عذر، أبسط الأمور إنه يخلي حد من أهله يتكلم بداله، أو حد من أهله من نفسهم يتكلموا ويقولوا مثلاً بنعتذر على التأخير أو أيًا كان.
-اعتياد كثير من الخطاب دخول البيوت وعدم الرد بعدها حتى لو كان الرد بالرفض سلوك شائع غريب وغير مسؤول ولا محترم.
عشان كدة الأفضل إن مش أي حد يدخل البيت، ويكون في لقاء مع حد من محارم البنت بره قبل دخول البيت.
-في أهالي (ذوقيًا) مبيستقبلوش عرسان لحد ما يستقبلوا رد من العريس المتقدم
رغم إنه لو استقبلوا أكثر من عريس في نفس الوقت ثم فاضلوا ما بينهم أو اختاروا مفيهاش مشكلة
فعدم احترام الذوقيات دي، وعدم مراعاة إن البنت قافلة بابها لحد ما تعرف رده خاصة لو كانت وافقت عليه، شيء سيء جدًا، وخاصة أكتر لو كان عطاها انطباع في القعدة إنه سعيد وموافق.
عشان كدة زي ما قلت، كحد أقصى بننتظر الشخص يتكلم في خلال أسبوع، ويعبر عن مشاعره المبدئية تجاه الجلسة الأولى
حتى لو كانت المشاعر دي انه محتاج جلسة تانية مش مشكلة
بس يكون في أي رد
لو محصلش والموضوع تجاوز أسبوعين لا حس ولا خبر، مش بنبعتله احنا ونقول ليه انت فين يا فلان ومكلمتناش ليه
هو اللي المفروض يبعت
هو اللي (طالب) بنتنا
وهو اللي ياخد خطوات تجاهها.
ومش بنستناه بعدها، وبنستقبل عرسان عادي، وبنتجاوز الأمر كله.
- متشغليش بالك بتساؤلات كتير ممكن ميكونش عليها إجابات.
يكفيكِ تعرفي إن حقك البسيط جدًا إنك حتى لو هتترفضي، تترفضي باحترام مش هروب.
والعرسان المحترمين والله يا بنات موجودين.
آلاء وجيه
>>Click here to continue<<