في تجربتي الخاصة مع العادات، لاحظت لبعض النقاط المهمة اللي حاسس انها ممكن تفيدكم جدا 💛
🔸اهم نقطة بالنسبة لي ولازم تعرفها " ان العادو هي عبارة عن سلوك تم عمله بصورة متكررة بقصد او من غير قصد" والتعريف ده بساعدك جدا في انك تفهم العادة " فالكسل ماجاء من العدم العكس جاء من ممارستك المتكررة ليه، وادمان الجوال برضو ما جاك من العدم بالعكس جاك من ممارستك المتكررة ليه وقس علي ذلك .. الخ"
🔸علشان تتخلص من اي عادة لابد من انك تاخذ قرار مسؤول بانك عاوز تتخلص منها " وطول ما انت اتخذت القرار، فيبقي انت ماشي قي الطريق الصح، لكن ده برضو ماحايعني انك كدا حاتقدر تتخلص منها"
🔸بعد تاخذ القرار بانك داير تكون او تتخلص من عادة، حاتمر عليك لحظات حاتكون متحمس فيها ولحظات تانية حاتكون متكاسل فيها " وللاسف لحظات التكاسل بتكون اقوي واكتر من لحظات الحماس، بس لازم تتعلم تصبر وتقاوم لحدي ما تعدي من المرحلة دي"
🔸وعلشان تعدي من المرحلة السابقة برضو " لابد من انك تركز علي جزئية ان لازم تخلي البيئة بتاعتك متوافقة مع العادة اللي داير تكونها او اللي داير تتخلص منها، وصدقني الحتة مهمة شديد وحاتساعدك جدا في موضوع التكوين او التخلص من العادة"
🔸حاتفشل وحاتفشل وحاتفشل كتيير لمن تكون داير تكون او تتخلص من عادة، وحايجيك احساس بانك رجعت لنقطة الصفر من جديد " بس صدقني الاحساس ده كاذب جدا، وانت لا رجعت لنقطة الصفر ولا يحزنون، لان البتحرك خطوة مستحيل يرجع للصفر تاني" فالاحساس ده ببساطة انذار وهمي من مخك علشان تبطل ترهقه بالتغير اللي انت ناوي عليه " فعلشان كدا اصبر وصدقني حاتنجح"
🔸لو داير تكون عادة في طريقة بتركز " علي ان تحاول تبني العادة اللي داير تكونها بالتجزئة ودي شخصيا بستخدمها في القراءة، فكلنا عارفين ان لمن نقرر ان دايرين نكون عادة جديدة الحماس مش بدوم ولا بكون كتيير عكس الكسل وعلشان نتخلص من الحتة دي بنقوم نقسم العادة اللي داير نكونها علي اجزاء بسيطة وبنقدر ننفذها يوميا وبالتالي حانقلل من حجم الكسل"
( بس التجزئة ما بتنفع خالص مع اسلوب التخلص من عادة، لان في كل مرة حاتقلل حاتعيد تركيب تاثير العادة القديمة، وده حايقلل من فرص انك تتخلص منها)
🔸اي عادة علشان تتكون بتمر بتلاتة مراحل يمكن اساميها تكون مش واضحة ليك بس تفاصيلها حاتكون واضحة ..
- ففي البداية حاتمر بلحظات مقاومة اللي هي بتبدا من اللحظة اللي بتقرر فيها انك داير تكون او تتخلص عادة ..
_ بعد مرحلة المقاومة بتواجهك مرحلة عدم الراحة ودي بتكون اخف قدرا من المرحلة الفاتت وهنا بتحس انك شبه اتعودت علي العادة وفي نفس الوقت بتحس بان عندك الرغبة في انك او ترجع للعادة القديمة ..
_ بعديها بتصل لمرحلة التلقائية ودي المرحلة اللي بتظل فيها قادر تعمل العادة الفلانية بكل اريحية بدون اي مجهود او تفكير وكانك بتفتح في تلفونك او بتقفله ..
🔸ومن النقاط المهمة جدا " لمن تكون داير تكون او تتخلص من عادة ما تركز علي الكثرة بل ركز علي الاستمرارية، فماتخلي هدفك انك تعملها بدرجة كبيرة علشان تتعلمها في وقت ابكر، ولا تخلي هدفك انك تضع ليها عدد كبير يومي علشان تكونها، بالعكس خلي هدفك انها تكون بسيطة ومستمرة علي طول"
👈🏼 فعموما كدا ..
_ دي كانت شوية ملاحظات عن العادات " بطريقة سردية غير مرتبة، لان ماركزت علي الترتيب بقدر ماركزت علي ذكر النقاط المهمة"
_ ايضا خليك عارف الشيء الوحيد اللي ممكن يساعدك في انك تكون او تتخلص من عادة هو ارادتك فقط، بحيث تكون انت فعليا عاوز تكون العادة دي او تتخلص منها ..
_ وده بقودنا لحتة ان الارادة ما كل شي " كونك تكتفي بالقول بانك عاوز تحقق درجة عالية، او تتخلص من العادة الفلانية" ده مش حايساعدك في تحقيق الدرجة الفلانية او التخلص من العادة الفلانية مالم تقرن ارادتك دي بالفعل الصحيح اللي بخليك ماشي في الدرب الصح ..
_ ايضا خليك واثق " ان الفشل في تكوين العادات او التخلص منها، امر وارد؛ لان ببساطة انت مش حاتقدر بين يوم وليلة تتخلص من عادة كنت بتعملها لمدة زمنية طويلة، ولا حاتقدر تكون عادة جديدة بالسهولة اللي انت شايفها، فعلشان كدا الفشل مش بيعني انك فاشل، بالعكس بيعني انك قربت، وعلشان كدا زح من راسك الافكار اللي بتخليك تقيم من منظور واحد يا فشل يا نجاح ..!"
_ في نفس الوقت خليك فاكر " ان مافيش مدة زمنية محددة علشان تكون عادة او تتخلص من عادة، واي زول بديك فترة زمنية مع احترامي الشخصي ليك وليه هو كذاب، لان ببساطة حتة الزمن دي بتعتمد عليك وعلي ارادتك وعلي العادة ذات نفسها واي شخص بختلف من التاني، فالوحيد اللي بيقدر يحدد هو انت"
>>Click here to continue<<