" يارب أنا بس نفسي في حاجة واحدة منك ومش عايز غيرها "
" يارب أنا مش طماع ومش طالب منك كتير , ومش هاطلب منك تاني "
النوع ده من الدعوات باعتبرها سوء أدب مع الله وسوء فهم للدعاء
انت فاهم الدعاء غلط , انت مش بتطلب من فقير أو بخيل , انت بتطلب من ملك الملوك
انت بتطلب من الكريم الوهاب إللي عنده خزائن السماوات والأرض
في حديث قدسي جميل ربنا سبحانه بيقول فيه
" ..... يا عبادي لو أن أولكم وآخركم وإنسكم وجنكم قاموا في صعيد واحد فسألوني ، فأعطيت كل واحد مسألته ما نقص ذلك مما عندي إلا كما ينقص المخيط إذا أدخل البحر ... "
تخيل لو إن كل البشر من أول أدم لحد أخر بشري اتوجد على الأرض , ومعاهم كل الجن من أول ابليس لحد أخر جني اتوجد على الأرض
وكل واحد وقف يطلب من ربنا أي حاجة
" يارب أنا عايز جبل من دهب "
" يارب أنا فلوس تكفيني العمر كله "
وكل واحد منهم بيطلب بطمع وبأقصى ما أتاخت له مخيلته ونفسه
وربنا سبحانه أعطى كل واحد منهم كل إللي طلبه
ده كله كأنك جبت ابره وغمستها في بحر كبير وخرجتها ,,, تفتكر ده نقص من البحر أد إيه ؟
ولا حاجة !
...
سيدنا سليمان لما دعى ربنا سبحانه طلب منه طلب عجيب جدا
" قال رب اغفر لي وهب لي ملكا لا ينبغي لأحد من بعدي إنك أنت الوهاب "
وكانت النتيجة إن الملك سبحانه سخر له الطير والحيوانات والجن !
.
تخيل إن نبي الله زكريا كان عجوز وكانت زوجته عاقر لا تنجب , لكنه كان عارف هو بيدعو مين , فطلب منه ربنا يرزقه بولد
طلب اعجازي ,,, وربنا بقدرته استجاب
.
والدعاء مش لازم يكون لما تكون فيه مصيبة ,,, بالعكس
ده انت لازم تطلب من ربنا سبحانه وتدعوه في كل شيء مهما كان تافه في نظر الناس
السيدة عائشة قالت
" ليسأل أحدكم ربه حاجته كلها ، حتى شسع نعله إذا انقطع "
وفي الحديث
" إذا تمنّى أحدكم فليُكثر فإنّما يسأل ربّه عز وجل"
وروي أن سيدنا موسى قال
" يارب إنه لتعرض لي الحاجة من الدنيا ؛ فأستحيي أن أسألك إياها يارب "
فقال الله " ياموسى : سلني حتى محل عجينتك ، وعلف شاتك "
...
خليك طماع واطلب من ربنا سبحانه كل شيء وأي شيء
وكن على يقين أن كل شيء بيد الله سبحانه وبس
>>Click here to continue<<