#المنظورات_الحسنية
#تسلسل_القصيدة_١٠
#وصية_الحسن_للحسين_عليهما_السلام
«النص ميمر»
هاشم شبـاب الهمه وإلجاسم ايزفّونه
والحسن چان ابزفته اموصيها
* * *
هالخبر وارد عن لسان الحـاله
بالشعر جايز ينضرب امثاله
للحسن حين اللي دنت آجاله
سادات هـاشم دونه ولحسين دار اعيونه
گصده الوصيه وگام إله يبديها
* * *
من عگب ما وصاه بسرار الدين
صد إلعزيزه وناده يصبي العين
سلم يمين القاسم إبأيد حسين
طفلي وديعه بيدك لتفرزه عن وليدك
بجاسم والاكبر چبدتك سليها
* * *
يحسين خدر اعيـالي خدر اعيالك
واطفالي لا تفرزها عن اطفالك
انچان الاكبر گطعه من دلالك
جاسم ثمـر دلالي ولطفالك لطفالي
تكفل حماها وبالربه ساويها
* * *
يحسين اخبرك بالمگدّر جدَّم
وادري بوجودك طفلي ما يتيتم
لاچن جمر عرس اولدي ابگلبي تم
يشهد لي محضر هاشم زفـة عزيزي القاسم
يحسين حسره ابگلبي لتخليها
* * *
من عگب ما وصه وتـدارك أمره
رف گلبه عالقاسم وضمّه إلصدره
يودعه ويوصيه ويشمه ابنحره
يبني ذخرتك سـاعد للدين كون اتجاهد
وبين إيد عمك روحك اتضحيها
* * *
وصيت عمك ياعزيـزي ايربيك
من عگب عيني وتنهظم ميخليك
آنه الحسن والنوب إلك ارد أوصيك
هاللةٍ هالله ابعمك يوليدي لتعزدمك
والعمك احگوگ الربه اتأديها
* * *
وصيت يبني ابكربـلا ايعرسونك
وهاشم شباب الغانمه ايزفونك
بصيوان عرسك ما تنام اعيونك
اسمع شگلك يبنـي صيوانك ايظل مبني
وشمعة شبابك كربلا تطفيها
* * *
يبني اريد ايكون ليلة عرسك
تتچفن ودرعك وطاسك لبسك
يبني ولعد عمك تجود ابنفسك
ابچـاس الشهاده اتهنه يبني وبدال الحنه
لچفوفك ابدم رگبتك حنيها
* * *
وهذي الوصيه ابگلبه جاسم صرها
ومن وصل وادي كربلا اتصورها
بليلة زفافه وحنته اتذكرها
مدرع تعنه العمه والسيف يگطر سمه
چنه علي وهمّة علي حاويها
* * *
سلم على حسين ابكمال الطـاعه
شمر اسم الله اووگف مسفر باعه
ناده يعمي هذا حين الساعه
والموت لابـد منه وميعادنه بالجنه
إرخصني أذب السافل إبعاليها
* * *
صـد أبو اليمه الجاسم بعين الريف
ناداه عندي ودعك مأوى الضيف
وشان الوديعه متّسلم للسيف
بعرسك ينـور إعيوني أتهنّه وإيهنوني
وگصدي الوصية والدك إجريها
* * *
جاسم ندب مبني يعمي الصيوان
وزفافتـي سبعين ألف بالميدان
وإشموع عرسي السمر وإنثاري الزان
وحش الفله إبحد سيفي والطيـر أمسه إبضيفي
الحومه العروس وحگ جثث أنطيها
* * *
وحسين نـاده يبن أخوي إتهنه
إبهذا العرس وإنشغ هبوب الجنه
وجاسم فرح گلبه وبجح وإتچنه
بالكون مـد عسّاله وثگل الحرايب شاله
سدر الخيل وكبّر إبتاليها
* * *
من شـاف ما فارس گرب لحدوده
إبسوگ المنايه بذل سوم أو جوده
وإبهاي تدري القاسم إشمگصوده
مگصوده يوفي الذمه إبحد الجهـد والهمّه
ويرضي الحسن ووصيته إيلبيها
* * *
الشاعر الشيخ كاظم المنظور الكربلائي
>>Click here to continue<<