نصائح في التعامل مع الاصابات:
⭕مراعاة عدم التدافع العفوي نحو المصابين و ترك من لديهم قدرة لحمل المصاب بصورة سليمة فقط.
⭕التعامل بحذر في نقل المصابين أياً كان مكان الاصابة، في الرأس ولا الصدر، احتمالية الوفاة ليست ١٠٠٪.. وأقل حركة ممكن تصنع الفرق بين الحياة والموت للمصاب.
⭕️ لو زول اتضرب جنبك أول حاجه حركوا من مكان ضرب النار لمكان امن.
⭕️ حاول تحافظ على المصاب ثابت قدر ما تقدر وما تحركو كتير.
⭕️ حافظ على الرأس في نفس مستوى الجسم إلا لو كانت الإصابات في الرأس أو الرقبه، في الحاله دي أفضل يكون المريض قاعد أو واقف لانو لو اتمدد ممكن يزيد عليهو النزيف.
⭕️ حاول تتكلم مع المصاب وأساله عشان تتأكد اذا كان واعي ولا لا. لو كان ما واعي حاول تفوقه.
⭕️ لو ما فاق حاول تتأكد أنو بيتنفس عن طريق انك تقرب اذنك لخشمو وتحاول تسمع صوت التنفس او تحس بيهو في نفس الوقت عينك على صدره عشان تتأكد بيتحرك ولا لا.
⭕️ اذا كان المصاب بيتنفس لكن ما واعي افتح خشمه اتأكد إنو لسانه ما سادي مجرى التنفس لو كان ساديهو حرك الرأس يمين أو يسار. بعدها أرفع ذقنه لفوق، لو كان خشم المصاب أو أنفه مليانه بالدم فنحاول نفرغه عشان ما يتخنق.
⭕️ و أنت بتنقل في المريض حاول تثبت الرقبه بطريقه صاح عشان ما يحصل اختناق بالدم أو اللسان ( تسند الراس وتخلي مجرى التنفس فاتح )
⭕️ لو المصاب ما كان واعي حاول تقلع ليهو ملابسه عشان تتأكد اذا في أي إصابة أو رصاصة تانية م كانت ظاهرة ليك.
⭕️ إذا لقيت اي مكان بتاع نزيف اضغط عليه بقوة بقطعة بتاعة قماش نظيفة.
⭕️ لو القطعة الوقفت بيها النزيف اتملت بالدم ما تغيرها بواحده تانية. خت فوق ليها قطعة جديدة عشان لو شلتها ممكن تشيل التجلط الحصل و النزيف يزيد.
⭕️ لو كنت في حته فيها تلج، أربطه في كيس و خته فوق الجرح عشان يقلل الدم.
⭕️ لو كانت الإصابة في اليد أو الرجل و بدأ المريض ينزف أربط الحته المصابه من فوق مكان النزيف وانقله لأقرب مستشفى فورا .مهم في الحاله دي ترفع اليد أو الرجل أعلى من مستوى القلب مثلا أسندها في الحيطه أو ارفعها في مخدات عشان تقلل النزيف.
⭕️ لو كانت الإصابة في الراس ما تضغط على الجرح شديد بس اضغط بشكل جزئي . خلي جزء بسيط من الدم يطلع عشان ما تزيد ضغط الرأس.
⭕️ لو كانت الإصابة في الرقبة انتبه وانت بتوقف النزيف عشان ما تضغط شديد لدرجه توقف التنفس او حركه الدم.
⭕️ لو كانت الإصابة في الصدر أو البطن غطي مكان الإصابة كويس و قلل النزيف بإنك تضغط عليه و تنقله لأقرب مستشفى.
⭕️ في حالات الحريق أقلع ملابس الشخص المصاب واذا شعر بالبروده غطيه ببطانيه أو قماش تقيل.
⭕️ أعمل حسابك من علب القنابل الصوتية لأنو بتشبه علب البمبان وممكن تنفجر و تسبب فقدان الأطراف.
⭕️ في حالات الإصابة فتش علي اقرب كادر طبي معاك في الموكب عشان يقدر يتعامل مع المصاب و افسحوا المجال للكوادر الطبيه تشتغل شغلها وممكن حتى تحديدهم وتوجيههم قبل انطلاق الموكب.
⭕لو المصاب بالرصاص حالته خطرة، وانت ما قادر تتعامل مع اصابته بطريقة سليمة و ما عارفين تشيلوهوا كيف خلوهو في مكانوا و استدعوا ناس قادرة انا تشيل المصاب بصورة صحيحة.
ربنا يلطف بالجميع ويحميكم ويحمي البلد
#نتاكتف_نتعاون_نسندبعض
#افتح_قلبك_للسودان
>>Click here to continue<<