香港人唔會忘記三年前嘅612

當日族人赤身包圍立法會，阻止送中惡法通過。由此揭開2019年嘅抗暴之戰。

612三週年之際，某D海外港人組織嘅活動，引發民間爭議海外港人應該點樣看待抗爭日子。

有人提出，香港人應該喺海外建立新群體，於海外延續香港人身分

例如英國有個活動名為「重建香港公民社會 市集X研討會」，內容卻係圍繞「新移民的挑戰與機遇」、「拓展海外香港人族群」、移民港人的身分認同等。活動主辦者一直大談建立所謂「新香港」，自己實是籌劃海外「香港城」嘅地產商。此等人士趁著612，假借「重建香港公民社會」為名目，實質為自己嘅地產項目粉刷包裝。佢地聲言建立海外特約城市，一直冇外國政府理睬。敢問喺外國，何以重建香港公民社會？香港人喺外國可能擁有自治嗎？

而實際上，提出海外延續香港族群嘅講法不只於此。

不論離開香港係為勢所逼，定係尋求更好生活，海外嘅我地能夠享受安穩，背後都係因為無數手足代香港人承受控罪。

多個國家推出嘅救生艇政策，亦係手足血汗與犧牲促成。

我地搭上手足嘅順風車，但係呢架順風車唔會係免費，車費他日一定要俾。

而海外延續族群，係香港民族嘅出路嗎？

民族需要土地承載，海外可能有一片讓700萬香港人一齊移居嘅地方嗎？

海外香港，必然只有少數人能夠移居。無力移居嘅香港人，包括身陷牆內嘅手足，以及數百萬冇錢、冇身分、冇途徑移居嘅香港人，難道就可以置之不理？

拋棄數百萬同族嘅「新香港」，仍然係香港嗎？

香港民族係由香港嘅土地、歷史、文化孕育而成。民族與土地，密不可分。

香港人之為共同體，係因為喺同一片土地上，過著共同生活，面對住同一個政體，遭受共同嘅命運。

離散海外，即使我地堅持講粵語，堅持自己仍然係香港人，分散各地，就再唔係共同體。

乃至到下一代，香港人身分必然能夠傳承落去嗎？

某些人所謂嘅新香港，只屬於去得到外國，買得起「香港城」樓盤嘅上流人士。尚喺真正香港入面受難嘅同族，完全唔喺佢地嘅新香港之中。新香港論者，拋棄大多數香港人，沉醉於自己嘅新生活，此等君子遠庖廚者，竟敢自居站喺抗爭陣營一方，而不覺羞恥。

如果大家良心未泯，尚會因歲月靜好而心有愧疚，理應團結力量，支援香港堅持革命嘅義士，而非與香港切割，忘記政權惡行。

香港人要選擇拋棄滯留同族，保住自己於海外嘅安穩，

定係承認海外延續香港民族之不可取，繼而背水一戰，奪回國土？

香港民族嘅未來，係由我地親手編寫。