ناس كتير بتدعي في الأيام المفترجة دي بحاجات كتير في حياتها نفسها فيها .. وده مش عيب .. ليك مين يعني غير ربنا تطلب منه ؟!
لكن قولت أفكرك بس إنك مهما طولت هنا فانت مش قاعد كتير .. وحياتك الحقيقية لسه هتيجي بعدين .. فاوعى تخلص دعائك كله على الشيء الزائل وتنسى الشيء الباقي !
ادعي براحتك بالدنيا لكن الآخرة خلي ليها الأولوية والنصيب الأكبر من دعائك .. ولو مش بتعرف تدعي بإيه تحديداً وبتتلخبط هقولك على طريقة تسهل عليك الدعاء وتفتكره بيها :
امسك حدث حدث في الآخرة وكل حدث خصص ليه ركعة في صلاتك تدعي فيها
امسك من أول الموت .. ادعي إن ربنا يرزقك حسن الخاتمة وتموت وهو راضي عنك ويكون أحسن أعمالك خواتمها وآخر كلامك في الدنيا لا إله إلا الله محمد رسول الله ويخفف عنك سكرات الموت واستعيذ بيه من موت الغفلة وموت الفجأة
ركعة تانية خليها للقبر بأحداثه .. ادعي إن ربنا يثبتك عند سؤال الملكين ويجعل قبرك روضة من رياض الجنة ولا يجعله حفرة من حفر النار واستعيذ بيه من عذاب القبر وانه يبشرك بمكانك في الجنة
ركعة تالتة خليها ليوم القيامة بأحداثه .. ادعي ان ربنا يظلك في ظل عرشه يوم لا ظل إلا ظله ويسقيك من حوض النبي بيده الشريفة ويثبتك على الصراط ويسترك يوم العرض عليه ويحشرك مع النبيين والصديقين والشهداء ولا يحرمك لذة النظر إلى وجهه الكريم ويدخلك الجنة بغير حساب ولا سابقة عذاب
ركعة رابعة خليها بس للدعاء بإن ربنا يرزقك الفردوس الأعلى
ركعة خامسة خليها بس للدعاء بإن ربنا ينجيك ويعتق رقبتك من النار
ركعة سادسة خليها للدعاء لكل المسلمين بالمغفرة واحتسب ان ربنا يديلك بكل مسلم حسنة
وركعة سابعة وتامنة ادعي يا سيدي بكل اللي نفسك فيه انت وكل حبايبك في الدنيا وروق على نفسك
"يَقُولُ يَا لَيْتَنِي قَدَّمْتُ لِحَيَاتِي"
حياتك الحقيقية لم تبدأ بعد وهي أكثر ما يستحق دعائك حالياً
>>Click here to continue<<