س : ليه بنقرأ سورة الكهف؟
ج / مبدأيًّا قراءة سورة الكهف ملهاش أي علاقة بـ ردم سور يأچوچ ومأچوچ ، قراءتها مابتعِدش بناءُه و لا حاجة ، ولا ليها أي ارتباط بالسور أصلاً ، دي كلها أحايث مغلوطة و ملهاش أصل من الصحة ، و مُعتقدات كلنا طلعنا عليها لكن في الحقيقة ملهاش سند ، لأن ربنا حسملنا أمر السور في الآية رقم ( ٩٨ ) في سورة الكهف ، وقالنا ان سبحانه وقت ما هيأذَن لـ خروج يأجوج ومأجوج هيأمُر السور انه ينهار ، و هيسوي بيه الأرض ،
{ قال هذا رحمة من ربي فإذا جاء وعدُ ربي جعلهُ دَكاءَ وكان وعدُ ربي حقّا } .
نرجع تاني للإجابة على سؤالنا :
إحنا كمُسلمين بنقرأ سورة الكهف لأن نبينا صل الله عليه وسلم أخبرنا إنها نور بين الجُمعتين ، و النور ده يعني هداية ، بيهديك لإختيار الصح من الغلط ، بيدُلك على العمل الصالح اللي يوصلك لـ رضا ربنا ، و دي هداية إسمها هداية إرشاد ، كل اللي محافظ ع قراية سورة الكهف عارف كلامي ده كويس ، عشان هو عاشُه و حسُه بنفسه بين و بين ربه .
و إشمعنا سورة الكهف عن باقية سور القرآن ؟
لو ركزت و انت بتقرأ فيها هتلاقي ٤ قصص ، و الـ ٤ قصص فيهم أربع فِتن ، و هي دي الفتن اللي اتحصرت فـ دُنيتنا دلوقتي ،
' قصة فتية الكهف ' = و فيها فتنة الدين .
' قصة أصحاب الجنتين ' = وفيها فتنة المال .
' قصة موسى عليه السلام و الخضر ' = وفيها فتنة العلم .
' قصة العبد الصالح ذي القرنين ' = وفيها فتنة السُلطة .
و طبعاً كل قصة فيهم فيها دروس وعِبر ومواعظ مُهمة جداً .
كمان الرسول صل الله عليه و سلم قالنا ان اللي هيحفظ منها أول عشر آيات ربنا هينجيه من أكبر فتنة هتيجي للبشرية على الإطلاق و هي فتنة المسيح الدجال .
و كمان قرايتها سُنة عن نبينا صلوات اللَّه و سلامُه عليه.
متنساش تقرأ الكهف🖤
- مقتبس
>>Click here to continue<<