ربنا عالم إنو نفسك تدي شهوتك راحتها شوية، وإنك تعبتي من الحجاب وسط موجة البيبي هير والأوف شولدر الحلوين شديد ديل ونفسك تعملي كدا برضو، وإنك زهجت من انك تحرم نفسك من الأغاني الزابطة اللي بتطلع كل يوم دي، إنك حارم نفسك من الحفلات والبنات، وانك ما لاقية فستان شرعي تحضري بيهو عرس صحبتك في السوق وإنك أصلا بتفكري ما تحضري العرس عشان الاختلاط والأغاني،
ربنا عالم إنو عبادتو صعبة في آخر الزمان، وانك حاسس نفسك لوحدك وغريب عن الناس وما شبههم، وتعبت من الوِحدة دي والصراعات النفسية دي، جزء منك بيقول ليك "تعيش حياتك" زي ما الناس عايشة، والجزء التاني بيحب ربنا وما هاين عليه يغضبه.. دا كلو ما فايت على ربنا -حاشاه-
عشان كدا النبي صلى الله عليه وسلم قال: "إن من ورائكم أيام الصبر، للمتمسك فيهن يومئذ بما أنتم عليـه أجر خمسين منكم" - صححه الألباني.
جهادك لنفسك في زمن الفتن، بأجر جهاد نفس خمسين صحابي! وأجرك زي أجر خمسين صحابي!
الصحابة شافوا الرسول عليه الصلاة والسلام وعاشروه وعاشوا في زمن كلو فضائل.. وانت بتحاول تعبد ربك في زمن كلو فتن، لا شفت الرسول، ولا عشت في زمن يعينك على طاعة ربك، وما لاقي الوسط المعين، وكل يوم بتصارع..
ربكم رب قلوب، عادل ورحيم،
احتسبوا واصبروا وابشروا❤
>>Click here to continue<<