قبل أيام لاقاني فيديو غريب جِدًّا..
بنت جات داخلة على دكتور، وأول ما قعدت والدكتور سلم عليها، قال ليها اتفضلي، مشكلتك شنو.. ؟
وبدأ الحوار التالي:
-أنا عايزة مساعدتك.
=طيب اتفضلي وريني مشكلتك وأنا ح أساعدك إن شاء الله..
-والله يا دكتور أنا عرسي الأسبوع الجاي..
=طيب دي حاجة كويسة أفتكر، مش مشكلة ولا إيه؟
-أيوه يا دكتور، بس للأسف خطيبي ما معاو حق الميكب والشبكة والدهب والأمور ديّ..
=طيب معليش يا ستي، بس أنا لسه ما عرفت أساعدك كيف؟
-طيب أنا عايزة أجيب أبوي وأجيك بكرة تفحص لي، بس عايزاك تقول لأبوي إنو عندي حساسية عالية من الميكب والدهب وأنواع مختلفة من المعادن لمن ألبسها بتأذيني، عشان أبوي ما يسأل عن الدهب والقروش وكدا من خطيبي.
=معليش بس أنا في مهنة ما أنفع أكذب فيها.
-والنبي يا دكتور دا حب عمري، أنا ما عندي حل غير كدا، ما بتهمني القروش ولا الدهب زي ما بهمني هو، هو بس، أنا نفسي نكون مع بعض في الحلال، يا ريت ما تكسفني يا دكتور، وح أكوم ممتن ليك مدى الحياة.
=طيب أوك، ح أعمل كدا جيبي أبوك بكرة وح اقنعهُ إن شاء الله.
اليوم البعده جابت أبوها وعملو الفحوصات وأول ما قعد مع أبوها قال ليو
-بنتك يا حاج ظهر عندها حساسية عالية من المعادن والميكب والحاجات دي، بس بتتعالج لكن محتاجة زمن.
= كيف الكلام دا، البنت ح تتزوج الأسبوع الجاي؟
-وين المشكلة تتزوج من غير دهب وميكاب.
= لا كيف ما يجوز كدا..
-إيه الما يجوز يا حاج معقول تأخر أو توقف زواج بنت عشان حِتة دهب، دا غير إنو ح تكون سهلت للراجل وكسبت ثقتهُ.
= والله صدقت، ربنا يسهل وعلى بركة الله.
وفعلًا تم العرس بدون تكاليف أو خسائر كتيرة..
المبهر في الموضوع إنو البنت دي عملت عملية خيالية، ما تتعمل في الأفلام (القصة حقيقة).
هي ببساطة كسرت حاجز المستحيلات، واتجاوزت أصعب الحاجات بسبب حبها..
ودي فعلًا بتوصل رسالة إنو البحبك ح يعرف يصل ليك كيف، ما دام إنتَ وهو متفقين مع بعض رغم أنف الظروف والمجتمع والعادات.
#أمين_عبدالماجد
>>Click here to continue<<