#نعي
هدّو علينا وانسلبنا
واتسابگ الجيش بنهبنا
وماكو غيور اللي يحبنا
يفزع يردهم عن الخيام
•
من الخيم گوّه طلعنا
لصوب النهر نصرخ فزعنا
عباس وينك يا سبعنا
استسبعو عگبك يضرغام
•
حرگوا گلبنا يا ولينا
وحرگوهن اخيمنه علينا
وتستحي ما تطلع اسكينه
واللي اطلعت غصبن متنلام
•
يبن امي ترضى يروعونا
وحفّاي نركض طلّعونا
تچوي البراري وضيّعونا
نسوان هجّت ويّه أيتام
•
لميتهم والعگل مذهول
خايفة اعليهم من الخيول
شي ما لگيته وشي المچتول
وشي ينچتل وياي بالشام
•
شدّوّنا بحبال واغلال
و رچبونا اعله النوگ الهزال
حدر الشمس ذرية الآل
بالغربة وي الغرب ايام
•
گلنالهم مرّو اعلى الاجساد
واتگربينا والوجع زاد
وصحنا ولطمنا اوجوه وافّاد
ومن الهزل طحنا اعلى الاجسام
•
وضلينا ننعى بصوت مبحوح
يا جدنا هذا حسين مذبوح
عاري وعلى التربان مطروح
وما نگدر انشبگه امن السهام
•
كل عدو بچيناه وصديج
وخلّص دمعنا وناشف الريج
ياهو المثلنا طايح بضيج
ويصبر على كل هاي الآلآم
•
جرونا ما خلونا انوح
وغصبن علينا وياهم نروح
بس روس نمشي وياها مسموح
وينزل دمعنا ابرفعت الهام
•
ذبحوا القربى وما بگه اعضيد
ابنايبة احنه واهمهْ أبــ عيد
بروس أهلي يتگربون ليزيد
وباهلي انعرف وانرفع الاسلام
•
ضلت زلمنا عالترايب
وطبينا كوفتنا غرايب
راوونا انواع المصايب
تموّت اعيون وحتى أحلام
•
ما چنّ ابوي وجدي معصوم
يسبونه وچنّه يهل گوم
اولاد ترك وكابُل و روم
ويدرونه سادة الأگوام
#الخادم_علي_خيري_العبادي
https://hottg.com/AliAliAlabady
>>Click here to continue<<