أي شخص بيقع تحت فتنة الشهرة، حتى لو شهرة محدودة، بيكون مُعرَّض على طول لفتنة الكلام
وكل واحد وسياقه، في ناس بتتفتن بالكلام في الدين، أو العلاقات، أو الجوانب النفسية، أو غيره من المجالات
المشكلة مش في الكلام في حد ذاته، المشكلة في شهوة الكلام لأجل الكلام، أو لأجل إنك مطلوب منك تقول حاجة، أو في ناس متابعاك منتظرة ردك على تريند أو موقف، فتحس وكأنك مدفوع ناحية الكلام حتى وإن كنت عارف إنك معندكش علم، أو في أبسط الأحوال معندكش شيء تضيفه..
بيحفز ده أكتر فكرة السؤال، صراحة وآسك وما شابه، في سائل، وحضرتك المسؤول، إذن مطلوب منك تجاوب..
تجاوب على إيه؟
على أي حاجة وكل حاجة..
دين ماشي.. سياسة ماشي.. كورة ماشي.. علاقات ماشي.. أمور نفسية ماشي.. هو حد هيدور ورانا يعني؟
أكتر سياق مؤلم بالنسبالي وجود العشوائية والجرأة فيه هو السياق الديني، لعظمته وشرفه.
أنا عارفة إن اللي جاي ده قد يبدو غريب أو غير شائع، بس انت مش مطلوب منك تكون داعية بالتصوّر اللي السوشال ميديا بتدفعك إليه ده..
وبطبيعة الحال انت مش شيخ، وفي كتير من الأحيان انت مش طالب علم وإن ظنيت، وكل ما بتعرف قَدر المساحات دي أكتر كل ما بتكتسب الصمت بدون تكلّف وبتظهر ليك ضآلتك أكتر.
الشعارات الرنانة بتاعة عايز أفيد الأمة، أخدم الإسلام، أعمل محتوى دعوي، أنصح الناس، أكتب بوستات، كلام جميل وشكله حلو من بره، لكن من جوه فيها شهوة خفية محتاجة تزكية، وفي نفس الوقت محتاجة علم!
علم حقيقي مش بتاع درسين على هامش الأسبوع ولا كام موقع خدت منهم فتاوى وحفظتها..
عايز تخدم الأمة؟
إذا كان معندكش صبر على الوقوف مع والدتك شوية في المطبخ ولا القعدة مع اخواتك وبناء علاقة عميقة معاهم
يبقى الأولويات محتاجة تتضبط.
ويبقى الشيطان برضه داخل ليك من مَدخل شكله لله لكن جواه خسارتك.
>>Click here to continue<<