لمولاتي العليلة عليها السلام...

قسمت اعليكم اخذوني .. بِيّداي
مشيتو وكبرت آلامه .. بِيَه الداي
تركتوني وبگيت اومي .. بيّداي
اعله ضيم الشفته ما ظل صوت بيه

بين الزهراء والمجتبى عليهم السلام ...

مو مِن طَبعه وشانه
ابني يسِد بيبانه
ويفارگ ديوانه
يا يمّه
°°°°° °°°°° °°°°° °°°°° °°°°°
اجيت بكسر ضلعي الما لگه ضماده
لديوان الحسن ابني على العاده
خالي وموحش ومگطوعه وفّاده
وبداره اسمعت تتصارخ اولاده

رحت الداره بحزني
والگيت حسين ابني
وعباس وخوّانه
يا يمّه
°°°°° °°°°° °°°°° °°°°° °°°°°
مطروح الحسن وحسين يبچيله
لحد ما طاح مغشي اعلي وهد حيله
الحسن صبراّ يگلّه وصار يحچيله
عن عاشور وامصابه وتفاصيله

ناداه اخفي همومك
يومي اهون من يومك
ميحِل مثل احزانه
يا يمّه
°°°°° °°°°° °°°°° °°°°° °°°°°
اتذكرت النبي ومصعَبهه من ذِكره
من قَبّل احفاده وخنگته العبره
من فمّه الحسن وحسين من نحره
وسألته وگالّي مأجوره يالزهره

واحد جعده تغدره
و واحد شمر ينحره
وتتسلّب نسوانه
يا يمّه
°°°°° °°°°° °°°°° °°°°° °°°°°
بحِجْر حسين راسه وچبده بالسم ذاب
بطشت ضم چبدته حس زينب اعله الباب
ادخلت تنعه اعله اخوهه والدمع سچاب
وتصيح بحسره آه يا فرگة الأحباب

تگله شتخفي وباچر
عيني تشوف الحافر
وصدر الأخ ميدانه
يا يمّه
°°°°° °°°°° °°°°° °°°°° °°°°°
سمعته يوصّي اخوه وچانت اوصيته
يم گبر النبي يتوسد امنيته
وصوت النايحه لزينب عله ابيته
وبچه حتى مضيفه المنعرف صيته

طايح عم الساده
وابناته واولاده
طاحو يم جثمانه
يا يمّه
°°°°° °°°°° °°°°° °°°°° °°°°°
بدون اعمامه شفت حسين بالآلام
يمشي اويه الجنازه ويلطم اعله الهام
يويلي ونعش اخيّه چان كلّه اسهام
ورفضو دفنه يم المصطفى الظلاّم

حسين تخوصر يمّه
وظل يصرخ يا يمّه
حضري وسمعي ابچانه
يا يمّه
°°°°° °°°°° °°°°° °°°°° °°°°°
سهام النعش اهون من سهام العين
الباچر بالسبي يصوبن خوات حسين
يبو الديوان عن الطف غبت لا وين
اختك باچر يوگفوهه بدواوين

يشتموهه وتنخاني
يضربوهه وترجاني
اتحشّم گومي اويانه
يا يمّه
°°°°° °°°°° °°°°° °°°°° °°°°°


ياسر حسن
صفر ¹⁴⁴⁴



https://hottg.com/ysrhs

بابك .. مصدر راحه لگلوب الحياره
بابك .. آخـذلـه كــلام بـكـل زيــاره
بابك .. احچيله ودِليلي تطفه ناره
~•~•~•~•~•~
إعله بابك ،، اوگف ونهرين دمعي فوگ خدّي
إعله بابك ،، بالحچي دمعاتي گبل لساني تبدي
وبرحابـك ،، استراح واطمئن والرّوعي اهّدّي
وبرحابـك ،، لنحرك وراسك عشگ قُبلات اودي

ادري .. تسمع صوتي وتعاين مقامي
ادري .. لو اسلّم عليك اترد سلامي
ادري .. والزارك كَمَن عرش الله زاره
~•~•~•~•~•~
اهدي قُبـلـه ،، من اقبّل بابك اهديهه لجبينك
واهدي قُبله ،، لعينك وصدرك وجِدمك ولإدينك
دمعي اهلّه ،، وابقه اسولف بالحچي البيني وبينك
دمعي اهلّه ،، الزم ابابك وچَن لازم يمينك

غيرك .. ياهو التخشع الروح اعله بابه
غيرك .. ماكو التلگه روحيه بترابه
غيرك .. منهو المثل ابو فاضل جواره
~•~•~•~•~•~
وبعتبتك ،، اسجد واغمض عيوني وچنّي يمّك
وبعتبتك ،، خدّي امسحه وچنّي ماسح اثَر جِدمك
يالحضرتك ،، ليل ونهار الملائك حَول جسمك
يالحضرتك ،، دوم بيهه المنتظَر والزهره امّك

زحمه .. املاك وبشر يمّك سويه
‏زحمه .. اليجفي الحضره زحمه من الزچيه
‏زحمه .. واليجفي تَره عُمره خساره
‏~•~•~•~•~•~
‏يا ضريحك ،، بي حزن بي فرحه من اوصل واشبگه
‏يا ضريحك ،، انحني اعليه وابچي وبأنفاسي شَهگه
‏بعَبره اصيحك ،، حسين آه يحسين وبدلالي حِرگه
‏بعَبره اصيحك ،، وابقه انوحك طعنه طعنه وسحگه سحگه
‏
اسأل ،، عن اجروحك تلچمك بعدهه ؟
اسأل ،، وصَح الف وتسعميه عددهه ؟
اسأل ،، صدرك لِسّه ما طاب انكساره ؟
~•~•~•~•~•~
‏علي الاكبر ،، بدمعي اطوفنه واحيّيه واحيّيك
‏علي الاكبر ،، ابنك المدفون جسمه قرب رجليك
‏بجفني الاحمر ،، عالرضيع ابچي واسلم اعليه واعليك
‏بجفني الاحمر ،، امشي اطوف جسوم الاندفنو حواليك
‏
امشي .. عالسبعين اطوفن بالمشاعر
امشي .. لجاسم ولحبيب ابن مظاهر
امشي .. وسجلوني اگلهم يالغياره
~•~•~•~•~•~
على المذبَح ،، انظر ويسرح خيالى ودمعي اجريه
على المذبَح ،، حسين اشوفه نايم ومتوسد ايديه
هواي تجرح ،، زينب اتشوف الشمر متربع اعليه
هواي تجرح ،، من تگله يا شمر بله دخلّيه

زينب .. كل ما زورك استشعر قهرهه
زينب .. من گبرك احييهه بگبرهه
زينب .. الطاريهه بصدرنه تظَل حراره
~•~•~•~•~•~



ياسر حسن
صفر ¹⁴⁴⁴




https://hottg.com/ysrhs

لحن قصيدة ...
بابك .. مصدر راحه

جــــديد للامام الحسن المجتبى عليه السلام 👇👇👇

عن مقتلك عَشر سنين .. مَرّت وزينب كِل حين
تبچي اغيابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
بعد ما دفنت رقيه والگلب منهه انفطر
وگِضَن من مجلس عزاهه وشِكَن هَمهن للنحَر
بِدَت تعزيّه جديده ليوم سابع من صَفَر
لـ اللَطم آثار سوّن وبيهن من السوط اثَر

تنادي بگلبهه المالوم .. آ يالحسَن يا مسموم
بگلبي اصوابَك
يالمجتبه وبذكراك .. بوسط الخَرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
ويّه راس حسين تِحچي وراس حمّاي الضَعَن
شلون اگله البقه براسه الراسه فصلو عالبدن
عظم الباري اجركم يخوتي بيوم الحسن
بمثل هذه اليوم اخونه بغرقد الآه اندفن

اختك وابد ما تنساك .. تتذكر ارباهه اوياك
تحن لترابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
وي راس القاسم ابنك تحچي مخنوگة نفِس
اليوم سبعه بصَفَر عمّه وتذكر شصار بأمِس
امس حرموك من ابوك و هسه حرموك العرس
وذِبل لونك يا وسافه بتُرب وبدَم وشمس

تواسي الحسين وجسّام .. وكل بني هاشم الاكرام
وكل احبابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
للحَرَم صدّت ونادت بالدموع اللاهِبه
گومن نواسيهه رَمله على امصاب المُجتبه
لا إبن لا والي ظلّت باليسر متعذبه
بين كوفه وشام تمشي وراس ابنهه تعاتبه

عفتوني لا خِل لا بيت .. انتّ وكريم اهل البيت
شنَفعَه إعتابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
ها يخويه يبو محمد بالخرابه اتذّكّرِت
من اجيتك بالمنيه وعنّي ضمّيت الطشِت
بطشِت هذا راس اخويه شُوف خافن ما شفِت
وعالرماح اهلي واشوفن غالي كل صوب التفِت

بمذبح حبيبي اتعنيت .. وبنحري گتله ياريت
دم خضابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
حسين ظل يالحسن وَحْده وچان حيل بعازتك
يحشّم بهَل من مُناصر وصحبك وكل اخوتك
موذرين اعله الوطيه ونار حرگو خيمتك
وخوف نِص الهيمه ركضن فُرجه صارت عيلتك

الما شافو الهن اخيال .. يتعثرن بين ارجال
هَم بحسابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞
من بعيد بكل شجوني للبقيع ابعث سلام
من عذاب الشام اوّدي اشواگ ودموع هيام
راح ارِد للغاضريه شگد اكو بصدري كلام
اربعين من الليالي امرافگه اولاد الحرام

راح اشتكي للخوّان .. وامنيتي اوصلّك چان
واشكي ابابك
يالمجتبه وبذكراك .. بوسط الخرايب تنعاك
وتحيي امصابك
∞∞∞ ∞∞∞ ∞∞∞ ∞∞∞


ياسر حسن
صفر ¹⁴⁴⁵

نعي للأربعين السيدة زينب عليها السلام ...

جينه باربعينك خويه زوّار
على گبرك گعدنه ازغار واكبار
خطارك يمن تكرم الخطّار
شوف بحالنه من السبي شصار
اويه ذباحك مشينه ليل وانهار
لِسّه من الحبل بچفوفنه آثار
وعبينه اتمزگن بالسوط والنار
شكثر طبينه بولايات وامصار
شبعونه شماته وشتم واحجار
جار الزمن حيل بعيلتك جار
فوگ الرمل نمنه والرمل حار
بخرابه لا سگف بيهه ولَه استار
كلهه اعلينه دارت مامش انصار
بدواوين ومجالس صرنه نندار
شسولفلك يجسم حسين احتار
جبت راسك وعنده كل الاخبار

يندار كون العمر للزين
چا درت عمري لعمر الحسين
وتردله روحه ويفتح العين
يسأل علينه وين ما وين
ويمّه تچِن كل النساوين
ترتاح من ضيم الدواوين


كون العمر يندار يا ناس
چا درت عمري لعمر عباس
ايرد والفواطم ترفع الراس
ميته عساني وگاطعه انفاس
وبـ الأعوجيه ضلوعي تنداس
ولا فرجه اصير الوادم انجاس

هجركم والسبي الچبدي .. مردهه
واخذ عافيتي يخواني .. مردهه
رجعت بروسكم موعد .. مردهه
الروس اوياي هم چانت سبيه


ياسر حسن
صفر ¹⁴⁴²

من كلام سيد الشهداء الامام الحسين عليه السلام....

ويلي اعله زينب ويلي .. ويلي اعله زينب
ويلي اعله زينب ويلي .. ويلي اعله زينب
--- --- --- --- --- ---
جبريل ينزل عالنبي ويگله يا طه
سمّيهه زينب خالق الاكوان سمّاهه
والوحي ظل يبچي لَمَن سولف بطرواهه
يگول المصايب والمتاعب عِشره ويّاهه

لون الحزن جِبريلي .. ويلي اعله زينب
ويلي اعله زينب ويلي .. ويلي اعله زينب
--- --- --- --- --- ---
فُگدت الهادي من الزغر والعوض چان امهه
وعصرو الزهره وانطبر حيدر و يتّمهه
انسَم الحسن وحسين چان يخفف بهمهه
بعاشور من اهل الكساء محد بقه يمهه

عيني اعله زينب سِيلي .. ويلي اعله زينب
ويلي اعله زينب ويلي .. ويلي اعله زينب
--- --- --- --- --- ---
وگفت على التل عاينَت لن جسد واليهه
چن شجره صارت جثته گد ما نَبِل بيهه
(ان كُنتَ حياً) نادته اِدركنه يحاميهه
عيالك تره خيول وزلم هل غارت اعليهه

ويلي بنهاري وليلي .. ويلي اعله زينب
ويلي اعله زينب ويلي .. ويلي اعله زينب
--- --- --- --- --- ---
عافت گلبهه اعله الترب وبلا گلب راحت
ودعتك الله للسبي بظَهر الهِزل صاحت
من ابعيد ممشه اتوادِعَه شگد ونت وناحت
مرّت عليه ومنّه ريحة فاطمه فاحت

تگله العطر هَد حيلي .. ويلي اعله زينب
ويلي اعله زينب ويلي .. ويلي اعله زينب
--- --- --- --- --- ---
بمجلس ابن ازياد ادخلت مو هينه لا ياناس
يسأل رَباب الطاغي المن گلهه هذا الراس
راس الحسين احتضنته وتبچي بدمع الاحساس
بضرب السياط اخذوه وزينب حشّمت عباس

تحَشمه انتهض يَچفيلي .. ويلي اعله زينب
ويلي اعله زينب ويلي .. ويلي اعله زينب
--- --- --- --- --- ---
ايزيد اعله كرسيّه وتزين للفرح قصره
ودخلت اسيره ياحسافه زينب الكبره
راس الحسين بخيزرانه ينكِت بثغره
وام الخدر مچتوفه وبعبراتهه تنظره

ما يُبرد الهه اغليلي .. ويلي اعله زينب
ويلي اعله زينب ويلي .. ويلي اعله زينب
--- --- --- --- --- ---
من الشام گصدت كربله مهضومه مشتاگه
بس عاينت گبر الاخو الماذيهه بفراگه
شمرت نفسهه بلا وعي طاحت من الناگه
بيهه اربعين من الليالي دموع حراگه

بگَبره ويگلهه اشكيلي .. ويلي اعله زينب
ويلي اعله زينب ويلي .. ويلي اعله زينب
--- --- --- --- --- ---
ظلن ثَلِثة ايام يم گبور اهاليهن
ناحن لحد ما جزعن ولا صوت ظل بيهن
هاي اعلى ابوهه وهاي عمهه اتضج نواعيهن
وهاي اعله اخوهه وهاي ابنهه الشوگ سابيهن

مشاي انه وترتيلي .. ويلي اعله زينب
ويلي اعله زينب ويلي .. ويلي اعله زينب
--- --- --- --- --- ---
امشي ومواكب عامره حيهم تناديلي
بالبرد تفزعلي دفو وبالحر تفييلي
مو مثل زينب ويلي زينب آه واويلي
تعثر وتندب يخوتي وينه اليتچيلي

لنوحچ يروحي ميلي .. ويلي اعله زينب
ويلي اعله زينب ويلي .. ويلي اعله زينب
--- --- --- --- --- ---




ياسر حسن
صفر ¹⁴⁴⁵


https://hottg.com/ysrhs

استشهاد الرسول الأعظم صلى الله عليه و آله ....

چِلمة بويه تهضمني
من احچيهه تلچمني
وشَي ضايع احِس مِنّي
بغِيابك
--- --- --- --- --- ---
نعشك محمول وآنه سيول فاضت عيني
كل الآهات والدمعات ما تِكفيني
انهار البيت وانهاريت يَمجافيني
عالفرگه انويت يالطفّيت كل سنيني

بغيابك يبو الزهره
بچلمة بويه الِف حسره
بگلبي ومحّد يفسره
عذابك
--- --- --- --- --- ---
يا سور احماي يا رجواي يَمْبَعد الشر
ياسيد الكون گلي شلون بيش اتصبّر
وانظر بالدار حامي الجار ظل يتحسّر
گابلني وصاح فاطم راح سلوة حيدر

ها عايفنه يا خيمه
الليل فراگك وضيمه
المأتم بعدك انديمه
المصابك
--- --- --- --- --- ---
الوجهه يشع نور دنيا الزُور تخطف لونه
شلون بتربان يا دفّان تخفي عيونه
وكل الاوطان والاكوان غربه ابدونه
كل الاجناس من الناس يحتاجونه

احتاجيتك يعافيتي
ظَل ما ينحمِل بَيتي
يضمني چانت امنيتي
ترابك
--- --- --- --- --- ---
مرّت الايّام والظلّام ما رحموهه
من اتحِن اعليك لو ترثيك ما خلّوهه
گامت للباب دون احجاب واتولوهه
لاذَت وبنار وبسمار اي عصروهه

بالعتبه سگَط محسن
وأمه من ألمهه تون
الحالتهه الحجر يحزِن
اعله بابك
--- --- --- --- --- ---
بالطف تنخاك تترجاك دمعة زينب
وتندبك وين هذا حسين جسمه اتسلّب
يا جدي الخيل ترفس حيل وصدره الملعب
يكسرن الضلوع واحنه نلوع يمّه وننحب

صوت الكسر الـ بضِلغه
من اخيمنه ونسمعه
ننخه وعالترب صرعه
شبابك
--- --- --- --- --- ---
وبهذا اليوم كلّه هموم ضعنك عاود
وحشه الاوطان والنسوان همهه اتجدد
صاحن يا حيف يابو الضيف دارك تنسد
من كوفه وشام نسوه ايتام ضيفك يا جَد

ما واحد تلگّانه
ولا رد والي اويانه
ضعنك هاجت احزانه
برحابك
--- --- --- --- --- ---



ياسر حسن
صفر ¹⁴⁴⁴


https://hottg.com/ysrhs

أنا مدينة العلم 📚 وعلي بابها 🚪