^

يارب صدري شال من مر الاحساس
‏مالا يشيلنّه متون البواخر

‏ماودي إن الضيق يفطن له الناس
‏ويْطيح بين ايدين عاذل وساخر

‏يارب أنا لي قلب طيب وحساس
‏ليت الشعور الي حَضَنهْ يْتباخر

‏ولأنك الرحمن مايدخله ياس
‏وعنده أمل تجبرهْ عشر الأواخر

^

ياجميله ترانا ،، كلنا ،، مسلمين
‏كل شي يجوز ،، الا طريق الهجر

‏الوصل ضني انه يجوز للصايمين
‏من بعد ساعة الافطار لين الفجر

‏حددي وقت من ساعه اللى ساعتين
‏بعدها عاد سوي للمشاعر حجر

‏انتي تدورين الاجر وانا حزين
‏صدقيني ليا كلمتي ان في اجر )؛

^

عاجز عن الشكر ياليل رمضان القصير
‏مايمدي الحزن ياكل فيك كل جسدي

‏من قبل لاوادعك لابد تذكر بخير
‏ياللي مزاياك لاموحش ولا سرمدي

‏لو ان الانسان عن حزنه مايقدر يطير
‏لكن بك القلب يخشع والنفوس تهدي

‏عساك باعمارنا مانت رمضان الاخير
‏ويقبل بك الله دعاي وطاعتي وجهدي

^

تتابعت خلف الشهور !.. الأسابيع
‏والشوق واقف .. و الحنين متركّي

‏خل السكوت يسود كل المواضيع
‏أنا أكبر من اللوم .. ومن ، التشكّي

‏من أبسط حقوق الكلام إنّه يْضيع
‏الواقع أصدق !.. من يقيني وشكّي

‏لا تنتظر منّي !.. ( عبارات ) توديع
‏ما عندي ألّا الضحكة .. اللي تبكّي

^

كل لحظه كانت بقربك عظيمه
‏عيّا يكررها الزمن بعد ممشاك

‏ما عاد لـ التاريخ معنى و قيمه
‏عدّا على قلب عجز ما تعدّاك

‏مشاعري بين إنتصار و هزيمه
‏من ليلةٍ فيها عرفتك لـفرقاك

‏ممنون لكل الليالي القديمه
‏اللي بها صوتك ووجهك وملقاك

^

وحيد لكن ماشعر أني فعلا وحيد
لو كان منتم معي لكن ربي معي

على فراش النعي احيان يولد قصيد
ياللي تحتاجون القصيد انا بحاجة نعي

كل مايطيب وجعي جيتو تبون الجديد !
تدرون بأن الجديد اللي تبون ، وجعي !

^

الشيخ ساعة قرأ بالفرض طمّني
‏قرأ وراء الفاتحة "والليل إذا يغشى"

‏أمّنت سري بصدر الليل لكني!
‏نسيت أحرّص نهاري والنهار أفشى

‏من هو يشيل الحظوظ المايلة مني؟
‏كل ما تمنيت وقفة ، طول الممشى

‏ما للأماني طريق لواقعي كنّي
‏أطرم تمنى يقول ( أحبك ) لـ طرشى

^

يافاقدين أحبابكم وش تسوون
‏لا مدت الذكرى الحزينة يديها

‏كيف نتجاوز حزننا ماتعرفون
‏بعض الطواري موجعة مانبيها

‏دايم على بال المواجع يمرون
‏مافيه ضحكة مالهم صوت فيها

‏ياليتهم عن ضيقة الفقد يدرون
‏ودروبهم وشلون دايم نجيها

‏من كثر ماصاروا على البال يطرون
‏حتى خطاياهم ولهنا عليه