سـت اشـهر دم ايـطـلبونة
ابنبلة اطول منه يذبحونه
نشغاته اتعثر اعيون
گـبـالة الماي يـبدون


ياجرح بالي،، ابياذنب چنك علگ بالطف يوزعونك
فطرت حالي،، من شفت برماحهم گامو يهزونك
انته اعز غالي،، بالضمة شمسوي خاطر من يلاگونك
ياهوة العالي،، فال اگماطك واجيت امبدل ابلونك

لونك احمر ابدمك،،،لورسم جنك،،،ينحري الذبحته
اعيونك،،تزعل ابنبلة،،،اهوايه تندله،،،حناني ابشبكته

مايـرهـم انـــذر كـاروكـك
بلكي تفز وتحجي اعيونك
عطشان ابكد الكون
گبالة الماي يبدون
٭٭٭٭٭٭٭٭٭٭٭٭٭٭٭٭٭٭٭

عصبت راسي ،،واعگدت لم البنين الشيلة بالحومه
ادعي بانفاسي،،كون عبدالله يردلي وهذا مو يومه
اسمع احساسي،،يالرباب ابنچ اجاچ وناگعه اهدومه
هدمت ساسي،،ليش بس انته رگبتة ابنبلة مفطومه

هظمة من شفت دمعك،،واصل لصبعك،،،يليلي وصفنته
لمة مابقت عدنه،،شو تطشرنه،،يضهري الكسرته
والماصاعدلة ابمرجوحه
لازم بالطف تطلع روحه
عبدالله احله ازغيرون
گـبـالة الـمـاي ايـبـدون
٭٭٭٭٭٭٭٭٭٭٭٭٭٭٭٭٭٭٭

يادلال امك،، الماسمعت اليا صباح الخير من شفته
ماشفت ضلك،، امنيات الام لبنهه تصير سالفته
ياحلم چنك،، والشهور المارضن يتعدن الستة
يازغر نعشك،، البلمهد مالة ربع وتشيل فاتحتة


نعشك مارحم حالي ،،مايل اگبالي والحسين خطية
مهدك ريحة الغالي،،،خالي مو خالي،، تهز بيه رقية

متعودة وماتغـفه ابدونه
زغير وحاظنته ازغيرونه
عـطـشانـيـن ايـفزون
گـبـالة الـمـاي ايـبدون
٭٭٭٭٭٭٭٭٭٭٭٭٭٭٭٭٭٭٭

يااعـز دامي ،،يالچنت كـل شوفة لمك انته عيناها
ياضوه اخيامي،، درة بيضه ومن ضواك الخرزه نلكاها
ضَلـملت ايامـي،، يانوارس هايه رايـح تمشي وياها
ياجـرح ضـامـي،، بالـحـرب ازغـر مسافـر امه عافاها

رايح الياگبر يرضه،،،،يحضن الفضه،،،والَرمال ثگيلة
صايح ماخذ اجروحي،،،وياكل ابروحي،،،اضنها العليلة

گلتلهه انتظرينه اهنانه
يكبر ويرد يمشي ويانه
عبد الله احله ازغيرون
گـبـالـة الـمـاي ايـبـدون

٭٭٭٭٭٭٭٭٭٭٭٭٭٭٭٭٭٭٭

ياهوة الشهگه،،صورته من نومة يگعد يفرك اعيونه
مووكت فرگه،،يالي اخوته واهله ماشبعو يشيلونه
راحت الرفگه،،بالحرب مثل الخرز رادو يطشرونه
كلمن وصدگه،،شلون باچر بالحوافر من يسحگونه

باچر ،،كلشي بيه ذكرة،،لازم انخسرة،،تجي الناس تحوفه
عاشر،،عشرت الونه،،نشبه الحنه،،والجفوف تدوفه

محد عدنه يصيح اصمله
لوعـثـرو اهـلك عــبـد الله
عليك الگوم ايدورون
گـبالة الـماي ايـبـدون



حسين الگرغولي

وداعـك هـذا مـو وكـته
الـعـدل ما يقرة فاتحته
يحيلي يحيلي
يل معودني عالملگه
هـذا مو وكـت فرگـه
يحيلي يحيلي



الغريب المالة ديرة صعبه خويه يعوف بيته
منـيـلـنـه غيرك يلـمنـة خاطر انطيح ابثنيته
اليفگد اعزاز اعله گلبه يموت يوميه ابمسيته

ياسكتت اوداعك،،،تتيتم اعيالك
غير البچي شيسوي المفارَگ
اليكسر الخاطر،،،من تحضن امسافر
مستعجل ومايبطي المشابگ

العزيز ابروحته عثرة
تـعـدل الميت ابگبرة
يويلي يويلي
سـهـم تايـه المـتانة
يلوح الماكو خوانة
يويلي يويلي

٭٭٭٭٭٭٭٭٭٭٭٭٭٭٭٭٭٭٭

خوية والله روحي عندك تمشي عني ياهو الية
انـتـه بـيـه هـواي عايـش شلون من تبعد علية
تـكسر الـخـاطر مـشيتك تشبه الدمعة ابرقية

ياحسرة الغربة،،،والمختنگ گلبة
عايفني ياهو الي اعزمني
يملوحة العشرة،،،ياريحة الزهرة
من تتبتعد دلالي يلچمني


اخـذني ويـاك اتـجـيــلك
العطش ماخله من حيلك
عويلي عويلي
كثر وني وشماته اتعد
تطيح انته وعلينه اتهد
عويلي عويلي

٭٭٭٭٭٭٭٭٭٭٭٭٭٭٭٭٭٭٭

وحدك انته وهايه غربة عميه عيني الماتظمك
انـتـه فـيـنـة البية ربـيـنة ياهوانة خل اشـمـك
هذا صدرك بس الية باچـر الخيل اعله صدرك

لوكسرو اضلوعك،،،شينشف ادموعك
لا انه يمك خاطر امسحهن
والحافر اشثگلة،،،كل ساعه اخذ وصلة
اركظ وراهن انه المنهن

السهم يم منحرك كاعد
وحـيلـة حـيل المواعد
ابدليلي ابدليلي
حرت وشلون اعتنه
اكسرة هم يضل منه
ابدليلي ابدليلي

٭٭٭٭٭٭٭٭٭٭٭٭٭٭٭٭٭٭٭

تـكسـر الـمـالح دمـعـتي مـن الخيم لگراب عابس
هناكة لو باگو محبسك من عمت عين المحابس
الناس طـمعانه ابقميصك چي كشختك كلها واهس

باچر يبوگونك،،،منالجدم لعيونك
ثوبك ركظ ركظو يسلبونة
المشهد اليسطر،،،ياهظمت الخنصر
لزمو سرة خاطر يگصونة

خذو من خنصرك حصه
وحجر كاسر ضوة الگصة
يجيلي يجيلي
اركظت له خنصرك اني
العنده يشمره للثاني
يجيلي يجيلي

٭٭٭٭٭٭٭٭٭٭٭٭٭٭٭٭٭٭٭

شلون من نشيل عنك وانته جسمك عالترابه
وشـيـسكـتـها رقـيـه مـن تَــصــيـح بابا بابـه
بيـك حـيل تـگوم ليها لو امواعـدها ابخرابه

درب السبي وحالة
نمشي ويه جتالة
نستهظم ومحد فزع لينه
كل ناگـة تـتعـثـر
وازغر طفل ينجر
ماندري وين اصير تالينه


شَگل لعيني لو شـافت
رقية عالطشت ماتت
يليلي يليلي
راسك هذا يابختي
هوة يصير سالفتي
يليلي يليلي





حسين الگرغولي

وين اليوجعك حاچيني وارتاح
يـبن امـي شـشد وكـلك اجراح


أبــدي مـنـيـن شَــبـدي وكـلك مـوذر
امسح دم رگـبـتك شـو عـظـم ينـجر
شسوي وزينب الگامت تلچمك حيف
امد ايدي اعله صدرك چفي بيه يعثر

الحوافر فوگ صدره شلون تنزاح
ويـن الـيـوجعك حاچـيني وارتاح

٭٭٭٭٭٭٭٭٭٭٭٭٭٭٭٭٭٭٭

اعله ريحت امي خويه حسين شميتك
عــثـرة ابـعــثـرة گـــــوة وانــتــدلـيـتـك
مـطـشـرينك بـحيث الدرب كلـه حسين
ابـعـباتـي وخـوتـك يـحسـيــن لـمـيـتـك

جسمك ماكمل منه شكثر راح
يبن امي ششد وكلك اجراح
٭٭٭٭٭٭٭٭٭٭٭٭٭٭٭٭٭٭٭

ويـن اهـدومـك الحـلوات يـمسـلب
مگـطع وانته ميت ليش چـا تنسب
وجفك بيه نقص عبد الله لوخنـصر
ترة خلافك بچت زينب على زينب

بالطف كلشي صار ابعيني ذباح
يـبن امـي شـشد وكـلك اجـراح

٭٭٭٭٭٭٭٭٭٭٭٭٭٭٭٭٭٭٭

مو مـن عـاتك خـويه تجـافيني
اجـيت اركـض الك يالماتلاگيني
حيلك ذاكه ويـنه باكـتـه ياخيل
واحچي وياك وانته ماتحاچيني

صوت ضلوعك ابأذني شكثر طاح
يـبـن امـــي شــشد وكـلك اجـراح

٭٭٭٭٭٭٭٭٭٭٭٭٭٭٭٭٭٭٭

لا غـيـمـة الـتـفـيي فـوگـك ولا ضــلّ
وجـرحـك من نزيفـه شو رمـل ينـزل
رگد كلشي ابحلاتك حته شيبك طاح
سـمـوم الـضـهـر خوية وداعتك تكتل

حـته ابنومتك ماضنه ترتاح
يبن امي شَشد وكلك اجراح

٭٭٭٭٭٭٭٭٭٭٭٭٭٭٭٭٭٭٭

يالمثگل الرمح من فيظ دم راسك
شـيـال الرمـح ماشـايـل احساسك
كل ساعه تطيح امنالرمح يحسين
مـن تـشـوف طـايـح راس عباسك

تـعـبـان اشـثـكر من گـد الارماح
يـبن امـي شــشـد وكـلك اجـراح


الخادم حسين علي الگرغولي

انـخـامـن وخـواني ميتين
دفان ماكو اليدفن حسين
ابحصيرة لازم انجمعة
ضايع بالـرمل صـبـعـة



هاي تاليت الهوى شـمة صعب
عاليـدورلة هـلة ابـنـص الغرب
تسافر اصملّة وترد كلك حرب

الهيمه مابيهه حصيرة يابسه اخدود السعف
ضــال عـالـتـربان اخيي وبـكـثر لونـه نزف
ياگلب ديرة عمامي حسينكم دمــه نـشف
وصدرة من كثر الحوافر انه گدامي انخسف

ابـكـثر ما بعلـوگـنه احگوك
ابن امي ياهلناس مسحوگ
الخيل تـودي وتـرجعة
ضــايـع بالـرمل صبعة

٭٭٭٭٭٭٭٭٭٭٭٭٭٭٭٭٭٭٭

ياضـوه كاتل شـكو ظلمه ابصبح
الطول طولك بايگك ليش الرمح
انـتـه مـالـت الـلـه مـو مالت ذبح

ياسمـار الـهـيـمـة نعشك وانـتـه بضلوعك وطـن
خيلهم متروسه حيل ومن وجع صدرك خذن
تـفـرش ابـصـدرك حـوافـر صايـر ابكبر الصحن
الـهـضـيـمه امـدلـلاتـك بـيك خـويـة اتـعـثرن

خفت اعله روحك بينة تنجاس
تـــگـعد تـدور اعـلـينـه عالراس
شحلات اوياكم الجَمعة
ضـايـع بـالـرمـل صـبعـة

٭٭٭٭٭٭٭٭٭٭٭٭٭٭٭٭٭٭٭

ياحرز صدرك يفتحونه عجـب
هذا قانون الطمع شافك ذهـب
للـثواب اعلـيك ياچـف الكـتب

ٍذكـرياتـك من عفتها راحـت ابلمحة بـصـر
محبسك ماخوذ سالم خنصرك وين انشمر
دورت صـايغ يردة وترجع الروحي الصـور
شفـت امي الزهر تركظ شايلة وصلة نحر

تلم بيك شفت امي الزچية
وصـلـة شـفـت چنـها لرقيه
ابتراجيها خذو قطعه
ضايـع بالـرمـل صبعة

٭٭٭٭٭٭٭٭٭٭٭٭٭٭٭٭٭٭٭
فشلة ليـش النعمة يمـك تنسحگ
الركظ فوگك فزعة چنها لمحترگ
الـيـنـحـل ابـعـمـرة بـعـد ماينشبگ

رمـل لـمـيناك خاطـر تـنـدفـن خويه ابرمل
سهامهم ماترضه تطلع چنها مقفولّة ابقفل
الشيخ اذا مات ابعربنه فوگة تنذب العگل
وانته ذبو فوگ جسمك خيل والحافر ثگل

وبكل مكان اتشوفك الناس
تزحـف تـريـد تبوس عباس
تطيح الدمعة عالدمعة
ضـايـع بـالرمل صـبـعة
٭٭٭٭٭٭٭٭٭٭٭٭٭٭٭٭٭٭٭

وين نمشي وبعد ماعدنه خيم
شله بچفوفة الـيـضيـعـلة عـلم
الهيمه صفرة ولبست لموتانه دم

صوت زينب خويه عگبك جيشهم كله سمع
شـــافـو الـعـباس بـيـه والـزمـن كـلـه رجـع
چان همي الماي اجيبه لنحرك وكلبي اندفع
هـواي شـربـتـك يخوية تره امنصفاحك طلع

مـلــت رقـــيـه تنـگـل الـمـاي
ابلاصوت سكته وكلنه حفاي
الدرب شو محد يكطعة
ضـايـع بـالرمـل صـبعــة



حسين الگرغولي

شور

ترست الهيمة امن النزيف اجروحه
بعيني شفت بالخيل طلعت روحه

هاي الخيل اجت گوم
ماخلولك اهدوم
الحوافر مدري شتريد
تاخذ منك النوم

هوة شضال بيك وردو لجسمك
لاراسك وصبعك يالنشف دمك
هاي. الخيل راح تطشرك وكلي
ياهوة اليجي يبن امي ويلمك

يالـسـاكـت انه ابسـكتتك مذبوحه
بعيني شفت بالخيل طلعت روحه

٭٭٭٭٭٭٭٭٭٭٭٭٭٭٭٭٭٭٭

شگد ماترحم الناس
اخت ماعدها عباس
صحت حيهم للاطفال
هذا حسين ينداس

لتمينه اعله جسمك انه وضعونك
ترجينه العساكر مايسحگونك
ادافع خيل گمت وماطلع بيدي
المّك ساعه بس ساعه ويطشرونك

گـد الـسحـك ياناس صايـر لوحـه
بعيني شفت بالخيل طلعت روحه

٭٭٭٭٭٭٭٭٭٭٭٭٭٭٭٭٭٭٭

ياخوية الضعن طاح
وراسك شالته ارماح
لاخيمة ولا ماي
گلي شلون نرتاح

يبن امي الخيم ياوسفه حرگوها
وزينب بالسياط الگوم ضربوها
لا انـتـه ولا عـبـاس شـنـســـوي
وتـرجـيـة رقـيـه اگبالي جروها

المالاحه سهم السوط خوية ايلوحه
بـعـيني شـفت بالخيل طلعت روحه

٭٭٭٭٭٭٭٭٭٭٭٭٭٭٭٭٭٭٭

نـســوان وغـدت ويـن
ابهيمة وماكو الحسين
الـعسـاكر هـاي شـتريد
تـروع بــالـنــسـاويـــن

شسولفلك يبـو السـجـاد عـن حالي
ضعن متروس چان وهسه رد خالي
تـفـرهدنـة الضهر مـو ليـل يبن امي
وبـيـرغ بـنـي هاشـم طـايح اگبالي

ظلـت جـنـايـزهـم هـلي مطروحه
بعيني شفت بالخيل طلعت روحه

٭٭٭٭٭٭٭٭٭٭٭٭٭٭٭٭٭٭٭


شعدنه وننطلب ثار
وذبحو حته الازغار
العطش مايخمد ابماي
اذا گلبي اشتعل نار

نهيم امن العطش والرمل يچوينه
ودرب الـمـشـرعـة مـحـد يـدلـينـه
اريد امشي لبو فاضل واگلة ايگوم
احشمه وخل يذب السهم من عينه

عگبك صفت كلمن يحـير ابنـوحه
بعيني شفت بالخيل طلعت روحه



حسين الگرغولي

ها ياطشت شمسوية وتـيـتـمني
أحضن بابوي شمالة مايحضـني
معقولة اليروح ابسفر،،،ينسه ابطشت راس ونحر




گـالـولـي سـافـر مايـرد وانــه غــصـن وانـتـظـرة
حــسـبـت صوغـه يـودي الـي ماحسبيت النحرة
طاحن ارموشه امن السحك لوطاح بالطف عمرة
ابحضن الطشت راسة غفه چاوين حضن الزهرة

تانيته بلكي يبوسني وبسته
بيمن يبوس الطشرو شفتة

اصعب جرح البنيه و اليمردها
ماتلگه ابوها تلگه نص والدها
والبلغرب شيبة كُبر،،،ينسه ابطشت راس ونحر

٭٭٭٭٭٭٭٭٭٭٭٭٭٭٭٭٭٭٭

يل طولك امغطي الضعن چاوين جسمك عفته
ياسـالـفـة الـلـه الــــذي مـاتـنـگـطـع سـالـفـتـة
مـيلـوگـلـي بـويـة الـبـچي ثـوبـي تـرة نگعدته
گـالـولي ابـوچ ابـكـربلـة خـيــل وزلـم ماخـذته

من عمتي صاحت هالخذو صبعه
حـزة الـخـنـچر عـالـتـل نــسمـعـه

وتشكگـت كل الصـور بالهيمة
ياذكرة تبقه من تشب الخيمة

ومن الطفل ينزف سهر،،،ينسه ابطشت راس ونحر

٭٭٭٭٭٭٭٭٭٭٭٭٭٭٭٭٭٭٭

كسرة خواطرنه الحرب مثل الخرز طشينه
نـگـاط دمـك ماركـد ضـيـع الــگـاع اعـلـينه
دمـك بـخـت ماينـسحگ والخاطـرة تحفية
نار ابـعـبـينه ويـه الركظ سلاب يلحگ بينه

شاف التراچي وحــيل جـراهـا
وصلة امن اذاني راحت وياها

حشمتك وماادري ماتسمعني
ابلايه راس شلون چاتـندلني
شيكحل المالة نضر،،،ينسه ابطشت راس ونحر

٭٭٭٭٭٭٭٭٭٭٭٭٭٭٭٭٭٭٭

متاع الرمـح راسـك صفه بالدرب لمن شالك
يـتوچـه راسك عالـرمح ياحيل باقي ابراسك
كـلـمـا اشـبـه بالـوجـه تـنـدار مـثـل الـخـافـك
وجـه وگفه ماتنـعـرف موهيه ذيچ اوصافك

صحتك يبوية ابهظمة اصـيـاحي
زغـيـرونـه انه وايـدي بـصـفـاحـي

تـكـتل الماي الـغـربة تمشي ابحالي
مـديـت اديـة بـس رمـحـهـم عـالي
والعاف لبنيتة القهر،،،ينسة ابطشت راس ونحر

٭٭٭٭٭٭٭٭٭٭٭٭٭٭٭٭٭٭٭


ثگلت اچفوفي ابشبكته من شفته ناشف دمه
شـلون الضوة من منحرة ينـباگ لاخر جدمه
اذكـر ابـوي ابكـل وكـت بـمـتونـه گاعد هدمه
هسـه الـحـجارة ابگصـتـه كـسرت فياي اللمه

مديت اديه وردته يشبكني
ساكت بقه معقولة زاعلني

كل ساعه اموت واختنگ بالحسرة
مـن شـفـته يتنفس هـوة من نحرة
والحچي ابنص راسة عثر،،،ينسة ابطشت راس ونحر





حسين الگرغولّي

الزهرة امنه والحنينه من طبعها،،،خافت علينه ولاگت الباب ابضلعها
وحترگت الدار،،،نگع من دمها بسمار





حسد عيشه خذاها الناس وبيت المرتضى حضرة
الغثهم شافو ابكل ليل ضوة الله تخضر الزهرة

كل واحـد يـضـم سـره ابثقه لازم
والله اختار كل هاي الثقه ابفاطم

للوجود اتصير ام امنه الزجية
حـطمت اراء شـيـخ الجاهلية
من زمرة اشرار،،نگع من دمها بسمار

٭٭٭٭٭٭٭٭٭٭٭٭٭٭٭٭٭٭٭


ابوكت من هجمت الوادم علينه الدار حرگوها
گـمـنـه نـلـوذ بالـزهـرة يـضـربونه ويضربوها

ركظ نركظ لبونه ياعلي صحنه
تلگانه وعـثـر واحـنـه تـعـثـرنـه

فزعة صارت والغرب يمنه وجزونه
هنانه حيرة نروح لمنه نشيل ابونه
منو يتحمل الصار،،،نگع من دمها بسمار

٭٭٭٭٭٭٭٭٭٭٭٭٭٭٭٭٭٭٭

سهر ليل وجفن مفتوح ابحنان الله تغطينه
ابـكـثـر مـاتـعـبـت اليمه يبعد امـكم تسمينه

شگد حنينه امنه واحن من الدمع
لامـتـنـه ابـأيـد وايـد اعـلـه الضلع

تشبكنه سكته وتنزل الاخ ابدمعها
نبتعـد عنها نـخـاف لانلچم ضلعها
صعبه شلون تندار،،،نگع من دمها بسمار

٭٭٭٭٭٭٭٭٭٭٭٭٭٭٭٭٭٭٭

ترد الروح شوفتها ام اخبيزة العشرة
عدنه الزاد مايحله اله ابگعدة الزهرة

امنه فطرة وسالفة اتونس الفقير
لودعــت للـشــايـب اتـردة زغــيـر

تدعي ربها ابكل فرض ترفع الچفين
ربي احفظ كل يتيم ابجاه الحسين
اليتيم اهوايه يحتار،،،نگع من دمها بسمار

٭٭٭٭٭٭٭٭٭٭٭٭٭٭٭٭٭٭٭

نحيلة والالم بيها بده يكبر عليها ايدور
بله شلون يتنفس البصدرة ضلع مكسور

ام فـگـدت ولـد عـنده الحـلم كاروك
الذنب شافو علي ميربي غير الحوك
خلها بينه شما بقت تتشمت الناس،،،يروح محسنه ويجينه الغالي عباس
اهواي ابيتنه اسرار،،،نگع من دمها بسمار





حسين الگرغولي

المحسن ع يخاطب امه الزهراء ع وهوه في جنينها




يمه هالباب،،،ضم الي اصواب
خايف البسمار يكسرلچ ضلع

ياجـنـيـني الدافـي،،وانه يـمـچ غـافـي،،كل حياتي
عيوني مامفتوحه،، الباب صاير لوحه ،،چن مماتي

يمه هالباب يضم نار يطشر اللمه
ومايـخـلـي نسيم الـهـوى اشتمه

من الجذوع،،،بحيله مدفوع
بدمچ البسمار يگشخ بالدفع

٭٭٭٭٭٭٭٭٭٭٭٭٭٭٭٭٭٭٭٭

العصره تاخذ عافيه،،،ودار تصبح طافيه،،ياهظمته
عـمـرچ الـمـاكــامـل،،،ليش دمـعـچ نازل، ،من سطرته

نـشـلت عـيـونه چـاليـش اذا مايقـرة
الله من گال انه ارضه لرضاها الزهرة

ذاكه شيطان،،لافلى انسان
مصاحب ابليس وبعد قيس الربع

٭٭٭٭٭٭٭٭٭٭٭٭٭٭٭٭٭٭٭٭

ثمنطعش كل عمرچ،،شيب حاظن دمچ،،مغربيه
بين باب وحايط،،وسيف حيدر باشط،،يالزچيه

لاتصيحين علي گوم ولتنه الوادم
مايضل غير التراب وحـگـچ سالم

ابحيله انفاس،،،ابظهره عباس
غيرة شالت غيرة والحگ ينسمع

٭٭٭٭٭٭٭٭٭٭٭٭٭٭٭٭٭٭٭٭

بالمغيسل صوره،،،ظلوعچ المكسوره،،علي حاضر
غسلاچ ابعينه،،،ويبچي يمه حسينه،،بـس يكابـر

علي مو ذاك علي الچان ابحيلة وشاله
ياشـهـر كـسـر الا ضـلوع وهــوة هـلالـه

بلايه عيناچ،،،ميت وياچ
انتي رحتي وبس بقه عنده الدمع

٭٭٭٭٭٭٭٭٭٭٭٭٭٭٭٭٭٭٭٭

امنياتي الماتت،،،والنوايب صاحت ياليالي
دونيت احزاني،،،وماشفت خواني يالغوالي

بالـقـدر ماحـظـيـت ابـعـمـر مـن اكـبـر
وافدي الحسين اخيي بحياتي ومنحر

هاي الاحلام،،،مثل الاخيام
تحترگ كلها مثل عمر الشمع





حسين الگرغولي

علي وحيلة انكسر ظهرة
ابـكـثر اماعصرو الزهـرة
القلع بزنودة خـيبر
حبل بچفوفه ينجر

علي وذاك الشجاع الحيد الخلك والكل يشهدولة
ابرة انكسرت اعله ابساط هيـچي منكسر طـولة
مـاسـامــع انـه ابـعــمـري الكـلـف حيدر يتجولة
الـبقه ابـعمرك جرح بسمار عـلـي گـامـو يـگلــولـة

الحياة ابعينة جن صحرة
دفـنـهـا امـلـوحـةالعـشرة
ابمشيته تشوفة يعثر
القلـع بچفوفة خيبر

٭٭٭٭٭٭٭٭٭٭٭٭٭٭٭٭٭٭٭

ابوكت چان الصديق الزين مايـتـحـصـل ابرفگـة
عـلـي مـحـد فـزعـلـة ابماي دارة اهوايه محترگة
الـيـشـيب رمـشـه عالزهراء لاتـحـجيـلة عالفرگة
الضـهــر لمن يصـير اهلال. كلشي ايموت بيه شبكه

العزيز الراح مـنعـندة
دفنها ثمنطعش بيدة
لــفگـدهـا لا ميگـدر
القلع بجفوفه خيبر

٭٭٭٭٭٭٭٭٭٭٭٭٭٭٭٭٭٭٭

وحــشـة الـدار بـعـيـونــة ماتـنـطب عجب سكتة
راحــت زهـــرة ايــامــــة جانـت واللـه سـالـفـتـة
اللـه ايـعــيـنـة يــــومـيـة تـلـومة اهـواي طـايفتة
شعجب ساكت علي گبالة يــمـر جـتـال فـاتـحـتـة

الوصية ابروحة جن حربة
مـطـيـع ومـاخــلـــف ربــة
ثارة ابروحه يسعر
القلع بجفوفة خيبر

٭٭٭٭٭٭٭٭٭٭٭٭٭٭٭٭٭٭٭

بـقــه كـل مـايصد للباب والدخـان كـل هـمـة
باب اجـذوعـهــا صــارن سبـب ويطشر اللمة
العصرة فـطـرت حـايـط بس حيدر فطر دمة
المحسن من وگع عالگاع عـبـالـة ابـحـظن امة

الماوصـلـة سـت اشهـور
هظيمة ادفنة بين اگبور
حلم عند امة يكبر
القلع بچفوفة خيبر

٭٭٭٭٭٭٭٭٭٭٭٭٭٭٭٭٭٭٭

الوجع لمن يصيب الروح ابعـين الناس ماينشاف
بـس حـيـدر وجع روحـه كعبه امبينة مـن تنطاف
الـمـغيسل هـدم حـيـلـة منارة ومنهه طايح ساف
ايدة اعلة الـضـلع مـرت و كـسر الضلع مـايـنـراف

وكع ونفل دمع عينـة
وكلشي فزز اونـيـنـة
اليربـي ابـيـته قنبر
حبل بجفوفه ينجر





حسين الگرغولي

يابسمار انه الخليتك،،،،،،،،ابابي وبچفوفي الدگيتك
ياهو ايعرفك لو ماصيتي،،،،وتالي اتصوب ضلع ام بيتي



فرزن دفعك يابسمار،،، دفعة عايل لو خطار
مبينه الناس التچهب داري
بصوابك تدري شسويت،،،تتنگب كل اهل البيت
وتگوطر بالشيب ازغاري

انه الـي چـنت رحـال وانـدل بالـسمـه دربـي
وهسه انه ابسبب بسمار مااندل درب حربي

چان المفروض ابهالحالة تصفي الراي
تفتر كل حيلك وتـصوب ضـلـع الجاي

يالراكظ گدام العصرة،،،ليش امثلم ضلع الزهرة
هيه الخير وكل عافيتي،،،وتالي تصوب ضلع ام بيتي

٭٭٭٭٭٭٭٭٭٭٭٭٭٭٭٭٭٭٭

ليش عزازي تروح ابساع،،،سفرة غربة ابدون اوداع،،، وتاخذ واحد گايد واحد
لمن صوبت ام حسين،،،رفت روحي موش العين
وحيلي يشبه خيط وراگد

امـحـني بابـي يابسـمـار مـوحنه ابدمه سايل
انعواجك ليش مثل هلال وصلة امن الضلع شايل

ارجف واركض لـمـن شفتك يمك ناس
طلعت روحـي ورادهـا لضهري العباس

راحت روحي ابذيچ الحرگه،،،الرافسهاامهدم الطبگه
نسمه الزهرة وتفتح ريتي،،،وتالي تصوب ضلع ام بيتي

٭٭٭٭٭٭٭٭٭٭٭٭٭٭٭٭٭٭٭

غبشه المحسن راح شلون،،،لاحاضي ابصحبه ولا لون
شتاگيت لبزري الماشلته
ياعتبت بابي المحروگ،،،والمحسن طايح مسحوگ
گبل امه انمدت فاتحته

الـعـصـرة فطرت حيطان مـن فـز فزت النايم
طلعت روحه طلعت عيد ماطاح ابحضن صايم

يـكـبر ريـتـه وللـطـف عمره حزام يدير
شمحلاها لعبد الله المحسن عمه يصير

عبد الله الماي اليبچيلة،،،المحسن عمه هناك يشيلة
بسمار وسهم ابتاليتي،،،،وتالي تصوب ضلع ام بيتي

٭٭٭٭٭٭٭٭٭٭٭٭٭٭٭٭٭٭٭

تمنيت لدلالي الموت،،،انه الانشال ابتابوت
ولايثگل متني ابكل ونه
شيضل ابعمرك لوراح،،،الچان ابشوفه اشگد ترتاح
بيدك راح اتروح ادفنه

شماله الموت بس وياي يستنگي التريدة الروح
نزيفي الترس حظن الگاع وانه ابعمري مامجروح

هنيالة المامـاشـي ابخلة ودفن اعزاز
شمايكبر شيبة البيه عمرة يضل جناز

مثل الفي البدم طايح،،،اسود ثوبة ابلون الصايح
دافن عمري الوي غاليتي،،،وتالي تصوب ضلع ام بيتي

٭٭٭٭٭٭٭٭٭٭٭٭٭٭٭٭٭٭٭

حچي الوادم والينگال،،،حيدر ماكاتل كتال
ويمر من يم بيته ابطولة
فقارة البگرابه يبات،،،كل يوم تزيد الشمات
وذاك ابهالحاله ايهنولة

انطبگ چفي اعله ثاري الباد مثل محراب المصلّه
امد ايدي اعله سيفي شلون وعد خليته يم الله

لوما بيها الله يوصيني وروح الخير
ماخليت ابعتبت بابـي ايعدي الطير

كل ثار لهاشم والهيبة،،،موش اكبار ازغار اتجيبه
وعالدم لا ماتبرد نيتي،،،وتالي تصوب ضلع ام بيتي



الخادم حسين الگرغولّي

لـو رفــعـتْ فـاطـمـةُ الـحـجـابي
لا يبقى في الكونِ سوى الترابي
ما صــنــعــتْ فـــاطـمــةٌ لـربـهـا
مـن دونِ أنْ تـدعـوَ الإلهَ يُجيبُها



حـادثـةٌ الـيـمـةٌ وثـقــلـوهـا كــانَ كـمـن
دارُ عليِ قد اُحرِقتْ وفاطمةٌ هي الثمنِ
ياسائلاً عـن ذنبـها فاالذنبُ معروفٌ لأن
فقـد رأوا فاطمةً إِلى اليتامى كاالوطنِ

فـعـلاً جـبـاناً مـن يدِ السقيفةِ
تـبـاً لــخــمـارِ ادعـى الـخـليفة
حــقــدٌ وبــغــضــاءٌ بــهِ لبعلها
من دونِ أنْ تدعوَ الإلهَ يُجيبُها

°°°°°°°°°°°°°°°°°°°°°°°°°°
عَـظِـيمةُ فـي خَلـقِـها واللهُ كـانَ يشهدُ
الشمسُ أسمتْ نورُها من فاطمةٍ توقدَ
امـرأةُ مـن بـيـتها الوحيُ كانَ يـصـعـدُ
مِـن اجلِها قـد خُلِـقـا عليٌ وطـه أحمـدُ

عــــــــابـدةٌ زاهـــدةٌ كــالــقـدرِ
وجــدتُـهـا مـستــودعــاً لــســرِ
كـلُ الـبحـاري قطرةٌ في علمِها
من دونِ أنْ تدعوَ الإلهَ يُجيبُها

°°°°°°°°°°°°°°°°°°°°°°°°°°

أضلاعُها قد كُسرتْ لَما انحنى المسماري
فـقـد هـوى يُـقبـلـوا أعـتـابَها في الداري
دارٌ يفـيـضُ جـمـلُها خُـبـزاً إلى الاشراري
كانَ الـجـزاءُ لـفـاطمٍ جـزلاً بشـبِ الناري

عصراً ولطمَ الخدِ قُربَ العيني
فأسـقَـطَـتْ طفلاً أخَ الحسيني
لـم يكـتـملْ عـمـرٌ لـهُ شـوقاً لها
من دونِ أنْ تدعوَ الإلهَ يُجيبُها

°°°°°°°°°°°°°°°°°°°°°°°°°°
اللـهُ قـالَ لوحـيـهِ جـبـريلَ تــلكَ الـحـاسـمـة
مـا بــيــنــنـا عــلامـةً ارُيـدهـا كـالـقـاصـمــة
إنْ كـشـفــتْ فـاطـمـةٌ عن رأسـهـا تـشـكو لمَ
أطوي السماءَ على الثرى تحتَ اقدامِ فاطمة

خـــذْ امــــرَ زهــرائـي وماتراهٌ
مـن صفـعَ الـنـورِ فـقـصْ يـداهُ
ام الـوجـودي لـو يفيضُ دمعُها
من دونِ أنْ تدعوَ الإلهَ يُجيبُها

°°°°°°°°°°°°°°°°°°°°°°°°°°

أيامٌ تُخفي كَسرَها في ما جرى عن حيدرٍ
تـعـلــمُ لـو قـالتْ لـهُ مـاتَ بـقــلبٍ مـقـهـرٍ
لـمـا رأى قـد أنـحـنـتْ في المشي أُم شُبرِ
عيـنـاهُ فاضـتْ حفرةً تشبه حوضَ الكوثرِ

ساخـطـةً ماتـتْ عـلى مايجري
فـي غُسـلِها علـي رئآه الكسري
كـيـف تخـفي وعــليٌ قـلــبُهــا
من دونِ أنْ تدعوَ الإلهَ يُجيبُها


حسين الگرغولي

ياطـف خـذاها وتوهـه مـاتت بيـن العيون
يم ذبح اخوهه فوگ جسمه ماتت ام عون
عين وضيعت عين،،، تموت المالهه حسين


افراگ الاخو الماينگدر،،،،يوم الوجع ذاكَ الظهر،،،زينب تلم اخوتها
تغبش اعيونك عالدمع،،،وبنص اخوتك تندفع،،،كلشي انتهى ابركضتها

الصعبه لمن انته واگف تندفع مالك سنـد
لاعـمـام الـحـمـت زينـب الااخوان ولا وَلَد

الـتـلـم باهـلـهـا مـن يـلمـها ويـه العـيال
المضيعة كلشي ضل باديها بس الاحبال
كضتها وين يم وين، ،،،تموت المالهه حسين

٭٭٭٭٭٭٭٭٭٭٭٭٭٭٭٭٭٭٭

من كربلة لگطع الهوة،،،كلشي يبس حته الضوة
والغيمة گامت تنشف
شايف عزيزك ينسحگ،،،يم الشريعة وتحترگ
ماتطفه چي مالك چف

اشيبقه بيها ام عـون گلي غير دخان الخيم
كل غريب اهناك يعطش لازم ايلوحه السهم

المو ماي اهلها منين تطلب غربة هالناس
يامــاي يـــرهــم للـعـقـيـلة ابـغـيـر عباس
لچن طاحتلة چفين،،،تموت المالها حسين

٭٭٭٭٭٭٭٭٭٭٭٭٭٭٭٭٭٭٭

چم مرة ماتت بت علي،،،من شافت حسين الولي
عالرمح راسه اتعلگ
چم حافر ابصدرة عثر،،،،وحسين بالهيمة كثر،،،شافت قميصه اتشگگ

كلشي ماضل من اخوها اجروح وسهام وذبح
والبقه امن حسين ذكرة ذاكه راسه اعله الرمح

دم اعـله عينه ورمـل فوگه ضايع الشوف
من يمسح الدم رمح عالي ابگصر الچوف
اخوتي اهواي عالين،،،تموت المالها حسين

٭٭٭٭٭٭٭٭٭٭٭٭٭٭٭٭٭٭٭

ضيم السبي ونوگ الهزل،،،وضعن الحرم لمه الحبل،،،ذاري الدرب تعبهن
مابيه علي غربة الدرب،،،والضايع يردة الضرب،،،زينب تجي اتعددهن

الشمس ماخلت ملامح سمل كلشي ابهالضعن
والـهـوة الـعـالي يـذبهن وحدة وحدة اتعاگـبـن

امدللات حـسـين شبـعن ضيم وفراگ
والمالة گمرة ابظلمة لازم شوفه ينباگ
اشيضل بيها النساوين،،،تموت المالهه حسين

٭٭٭٭٭٭٭٭٭٭٭٭٭٭٭٭٭٭٭

شام الوجع ياخذ عمر،،،زينب تطب ذاك القصر،،،وحچي الشماته ايتعب
ماتت ابغربتها وگضت،،والفاتحه ابشام انقرت،،،،ماطولت چن مُغرب

عيش غربة اتموت سكته هذا حال الماله اخو
اندفنت ابشام الشماته كلشي بالغربة عدو

والماكو اخوته ابين غربة اهواي يندار
وعـيـون زيـنـب تـنـتظـرنـه تـريد زوار
زينب ونة البين،،،،تموت المالهه حسين




حسين علي الگرغولي

عايف زينب ليش،،،وهناك الطف امتانيها
نارالخيمة تريد،،،جف فزعة ابماي ايطفيها




مثل وجــه النهر طبعك تروي البيه عطش بايت
يالـتـرد السـلام ابـغـير ماتـنـدار عالـفـايـت
رحيلك شتلة مالت ياس. شو بيها الهجر نابت
الي يفارك عزيز ابصوم يعيدلة ابوجـه شامت

مثيلك مايصح،،،يالمعيش الصبح
زعل وجهك حرز مقري وتريدة يموت
علي وكلك دلال،،،يوجه الله الحلال
السفر مكروه اذا صايم مثل تابوت

سودة اهدوم العيد،،،بتراب اگبور اتحنيها
نار الخيمة اتريد،،،جف فزعة ابماي ايطفيها

٭٭٭٭٭٭٭٭٭٭٭٭٭٭٭٭٭٭٭

مثل وجه الشمس ينشاف. الطمع بالناس اذا نازل
ترة ثلمة ابعشيرة تصير. اذا شيخ العرب شايل
بعد انته علي وتدري. . لزينب ياضهر كافل
لذالك خـلـفـت عباس. لزينب صار ابو فاضل

ابرسم وجه الگمر،،،،نهر شايل نهر
شبيهك ياعلي الكافل اذا يزعل
ولاكن بالسهم،،،طفت عين الخيم
وبدونه الحرة تتعثر ولاتندل

غيره ابهاي شلون،،،الكافل ياهو ايضويها
نار الخيمة اتريد،،،جف فزعة ابماي ايطفيها

٭٭٭٭٭٭٭٭٭٭٭٭٭٭٭٭٭٭٭

يمن هامت كيانك باب. ماردت شكو دگـة
لمن اجـه ذاك السـيـف. فشلة كالت الطبگة
اخ الوجـع مـن يـصـير عين ابن ادم ابفرگة
ياخذ شكو انسان يصير. نسمة ورايد تشهگة

الطمع بيك ابتدة،،،وعله زينب سدة
وبدت رحلتها علناگة وبلى محمل
العطش مثل الحبل،،،ابقحط ماينهزل
السبي اعمة وخذة الحرة ولا يندل

والمايسوة يصير،،،حادي وللشام يوديها
نار الخيمة اتريد،،جف فزعة ابماي ايطفيها

٭٭٭٭٭٭٭٭٭٭٭٭٭٭٭٭٭٭٭

علي يدري ابشكو محبس ابن ادم لمن يفرة
وشـكـو طاسـة يتيم تبات بيضة ابوجه كل فقرة
سـراب الـمـلـح مـن ينـباگ لاتحچيلة عالعشرة
عـلي زيـنـب وحـيدة ابليل نريدك انته والزهرة


اذا كلشي انفرش،،،طلع ليل اهدعش
اليدور بالظلام اهلة ابهوة يعثر
رقية ابلا وطن، ،وتراجيها انخذن
بدون الكافل اهناكة الدمع ينچر

لا ماسامع يوم،،علويه وغــربـــــة اتبچيها
نار الخيمة تريد،،،چف فزعة ابماي ايطفيها

٭٭٭٭٭٭٭٭٭٭٭٭٭٭٭٭٭٭٭

علي باچر نهار الـطـــــف مايرحم شـكو لــــمـــة
سـلاماً عالضعن لوصـــار صياح اطفال ياعــمــة
زيــنـب تـــــــطـلـــع ادور عـطر الحسين تشتمة
تلگة حسين اخوها انباگ من راسة لحد چـدمـة

وذا غاب الشبگ،،،يجي فصل السحگ
الحوافر كلها تتحنة ابصدر الحسين
ابكثر دمع الزغار،،،الخيم متروسة نار
واهل زينب عله الغبرة ابذبح ميتين

والدم ويه ارماد،،،بحبال الطف شَد چَفيها
نار الخيمة تريد،،،چف فزعة ابماي ايطفيها




حسين الگرغولي

لسان حال الامام الحسين عليه السلام عند وفاة ابيه الامام علي عليه السلام

جرف اعيوني ايشيب
يـابــويـة امـنـتـغــيـب
ماتـرهـم تــرة ابـدونك
ليــش اتغمض اعيونك


من طبرتك ضاع الهوة ياراينه الماينحل
ياغبشة الله ابكل حچي البـياعلـي يتوكل
غيرك بعد ياهوة الذي للفقرة من يتشچل
الـعـوز اخـذ شكل اليتم والعين ماتتحمل


يابـويـة يـصــيـحـون
زغــار وتدري شـلــون
عـدل گامو يرسمونك
ليش اتغـمض اعـيونك

٭٭٭٭٭٭٭٭٭٭٭٭٭٭٭٭٭٭٭
ربيـتنـه ابـذاك الـتـعب ياحـيلـنـه ولمـتنه
يلـعـايف افراكك وجع كاسر گلب عتبتـنه
تـخـنـگ الـدار ابكـل وكت وتلولح ابونتنه
والبيت ماينطب بعد انته الچنت عشرتنه

مــــــا اگــــــدر انســاك
يالـمـــنـطـيــنـــي اربـاك
حصرة اعليه الاشلونك
ليـش اتـغمـض اعـيونك

٭٭٭٭٭٭٭٭٭٭٭٭٭٭٭٭٭٭٭
ياخـيـمـة والـخيـمه ستر انته التفيي اعلينه
لـمـن طحت طحـنه تـره وياحـيل يرهم لينه
حچيك غموس ابكل وكت وعلية ترة تربينه
لوبـيـدنه لـگـبرك ركـظ شلنه وصدگ حطينه

بويـة اعلـيك انصـيح
يم رجـلــيك انـطيـح
اولادك يـنـاغــونــــك
ليش اتغمض اعيونك

٭٭٭٭٭٭٭٭٭٭٭٭٭٭٭٭٭٭٭

رايح عله اجتاف الهجر ومخلي هدمك عله
والـوجـع بس راعي الوجع هوة الذي يندلة
هـاي الـحـياة ابـلى طعـم وبلا علي ماتحلة
الـمـضـيع اعـزازة غـفـل يافرح ياخذ شكلة

رايــح عـنــه ابـــعـيــد
مـاخـــذ حـتـه الـعـيـد
ابثوب اسود يعيدونك
ليــش اتغمض اعيونك

٭٭٭٭٭٭٭٭٭٭٭٭٭٭٭٭٭٭٭

ردنـاك للـطـف ياعـلي وتـدري المواقف كـثرة
بـيـن الخـيم بـيـن العطش بين اليشد ابنحره
تـدري الـضـلـوع الـتـنكسر تاخذ اولاد الزهرة
غربة وذبح رمح وسهم والخيل ذيچ العشرة

واحســـينك عـطـشان
نايـــم عــالـــــتــربـان
واعـيـالة يحشـمونـك
ليش اتغمض اعيونك




حسين علي الگرغولي

خدام الحسين الله يحفظكم
اليحب يتابع حسابي على فيس بوك من خلال الرابط يسعدني تواجدكم
https://www.facebook.com/profile.php?id=100031101276670&mibextid=ZbWKwL