مشاهدة "إفطار يوم ٢٣ رمضان مع مسلمين غواتيمالا بأمريكا الوسطى" على YouTube
https://youtu.be/IZbHuqjzKEQ

مشاهدة "الدعاء بيغير القدر 🌛٢٩ رمضان🌜نصيحة في دقيقة" على YouTube
https://youtu.be/MN8UA15oWfY

مشاهدة "طاعتك لله ليست شطاره منك...👌 نصيحة في دقيقة 🌛٣٠ رمضان🌜" على YouTube
https://youtu.be/7ov60ImzPuA

مشاهدة "سنن وآداب عيدالفطر على هدي النبي صلى الله عليه وسلم" على YouTube
https://youtu.be/q8FXibtGXmI

. تقبل الله منا ومنكم صالح الأعمال 💖

عيدكــــم مبـــــارك....

_كل عـــام و قلـــوبكم تُزهـــر بالخـــير و

العطــاء ، كل عــام و قلوبكـــم عـــامرة

بالــنقاء و الصــفاء ، كــل عــام و الـــسعادة

تطــرق بابكـــم . ، و تقبل الله طاعتكم_


اعـــاده الله تعــــالى عليــنا وعليـــكم

بالخــير واليــمن والبـــركات.

وكـــل عـــام وانتـــم بخـــير..... 💖

مشاهدة "فضل صيام الست من شوال" على YouTube
https://youtu.be/9K5JgWz6Dpw

الحلقة الثانية عشرة👇💛

#قصص_الأنبياء(٢)
#السيرة_النبوية_إيمان_شلبي
#الحلقة_الثانية_عشرة
#إسلام_زيد_بن_حارثة
#إسلام_أبو_بكر_الصديق

كنا واقفين المرة إللي فاتت عند إسلام علي بن أبي طالب وعرفنا إزاي أسلم مع إن كان عمره عشر سنين وكان هو أول من أسلم من الصبيان،
كان في شخص ثاني عايش مع رسول الله ﷺ في بيته، هو مولاه زيد بن حارثة أو كان في الوقت ده اسمه زيد بن محمد،
المَوْلى يعني شخص كان عبد وسيده حرره،
خلّونا نرجع بالزمن كده قبل بعثة رسول الله ﷺ بسنين طويلة، لما كان زيد بن حارثة غلام صغير ،
كانت أمه واخداه وخرجت معاه عشان يزوروا قومها،
وهم في الطريق أغار عليهم ناس من قبيلة ثانية، يعني هجم عليهم ناس وأخذوا زيد من أمه عشان يبيعوه في سوق العبيد ويقبضوا ثمنه😳
واحنا قلنا قبل كده إن العرب كانوا عايشين على الإغارة على بعض،
أخذوا زيد وراحوا سوق العبيد وباعوه وقبضوا ثمنه😑
طبعا متسألوش عن قلب أم انفطر قلبها على ابنها إللي اتخطف قصاد عينها،
ولا تسألوا عن مشاعر الأب لما عرف إن ابنه اتخطف وعارف إنه هيتباع، وهيبقى عبد بعد ما كان حر،
والعبيد بيتعاملوا أسوأ معاملة وبينضربوا وبيشتغلوا،
فمجرد التخيل إن ابنه يحصل معاه كده أكيد كان حاجة صعبة على نفسه،
وهو مسكتش ومستسلمش حاول يدور عليه في كل مكان بس مكنش لاقيه😞
في الوقت ده كان زيد بن حارثة اتباع في سوق عكاظ،
وسوق عكاظ ده كان سوق مشهور في الجاهلية بيبيعوا فيه كل حاجة ومنها العبيد،
فاشترى زيد بن حارثة واحد من أهل مكة اسمه
《حكيم بن حِزام》
وكان حكيم بن حزام ابن أخ خديجة زوجة محمد رسول الله ﷺ، فاستوهبت زيد من حكيم ابن حزام،
يعني طلبت منه إنه يوهبها زيد،
ويقال إن حكيم بن حزام اشتراه من الشام وجاء به لمكة وطلبته منه خديجة فأعطاه لها كهدية على اعتبار إنها عمته،
فخديجة لما أخذت زيد راحت لزوجها محمد بن عبد الله وأعطته زيد بن حارثة، فكان زيد بيخدم سيده الجديد محمد بن عبد الله، فأحبه حب شديد جدا،
وشاف منه الصدق والكرم والمعاملة الطيبة وكل ده كان قبل البعثة بسنين،
في يوم من الأيام كان في رجل جاء للحج فشاف زيد بن حارثة فعرفه فهو كان من قبيلته،
رجع الرجل من الحج وعلى طول راح لحارثة أبو زيد إللي كان بيدور عليه،
وقال له إنه شاف ابنه زيد في مكة عند رجل اسمه محمد من قبيلة قريش،
فأبوه فرح طبعا، أخيرا لقى ابنه فراح واخد أخوه وسافروا مكة وتحملوا مشقة السفر عشان يوصلوا لابنه،
ولما وصلوا لمكة قعدوا يدوروا فين محمد بن عبد الله ؟
لما وصلوا له حكوا له قصتهم وإزاي إن ابنهم كان حر والناس سرقته منهم وباعوه،
فقالوا له: احنا عايزين ابننا ..احنا هنشتريه منك عادي، بس متزودش علينا في السعر لدرجة إننا منعرفش نشتريه😥

فقال لهم : طيب أنا عندي اقتراح تاني..احنا نجيبه ونخيّره، لو عايز يروح معاكم هسيبه يروح معاكم،
لكن لو اختارني فأنا مش هسيب حد اختارني👌
فقالوا : والله أنصفت وزِدت في الإنصاف😮

فنادى على زيد وسأله : إنت تعرف مين الناس دي يا زيد؟
فقال زيد: أيوة ده أبي وده عمي 😕
فقال له :
طيب هم عايزين يأخذوك معاهم ترجع لأهلك وتبقى حر وتعيش حياتك..إيه رأيك؟
فقال : والله لا أختار على محمد أحد😤
فأبوه اتصدم😳
إزاي تقبل بحياة العبودية والذل على إنك ترجع مع أبوك لأمك وأهلك😳
فقال لهم: والله أنا شفت منه حاجة ..مش موجودة في غيره ..يعني أنا لو وسط أهلي مش هيعاملوني زي ما هو بيعاملني😤
حاول أبوه وعمه يقنعوه يرجع معاهم مفيش فايدة 😅
والكلام ده كان قبل البعثة بسنين، فلما شاف محمد بن عبد الله الموقف ده قام وسط الناس وكلها وقال:
أنا أشهدكم جميعا إني قد أعتقت زيد بن حارثة وتبنيته ..يعني أنا حررته من العبودية واتبنيته فهو ابني يرثني وأرثه👌
فلما شاف حارثة إن ابنه بقى ابن لرجل من قبيلة قريش واطمن إنه عايش حياة كريمة ومبسوط رضي وتركه في مكة ورجع لقومه😊

زيد بن حارثة أو هنقول زيد بن محمد زي ما اتعرف بين الناس ، وكل الناس كانت بتناديه زيد بن محمد عاش مع محمد بن عبد الله لحد ما جاء له الوحي،
وبقى محمد رسول الله ﷺ، فدعاه رسول الله ﷺ للإسلام،
وقال له إنه رسول من عند الله، ربنا أرسله عشان يأمر الناس بعبادته هو وحده،
فزيد بن حارثة كان بيحب رسول الله ﷺ وكان بيثق فيه لدرجة إنه مرضيش يرجع لأهله،
ورسول الله ﷺ كان بيحبه هو كمان،،
فكده بقى متوافر فيه نفس الشروط إللي كانت في خديجة وعلي إللي أسلموا 💁‍♂️
فأسلم زيد بن محمد وآمن برسول الله ﷺ ،
وكان عمره في الوقت ده حوالي أربعة وثلاثين عام👌

خذوا بالكم إن الموضوع مش سهل...ده واحد هيغير دينه كله، هيسيب دين أبائه وأجداده..هيواجه مجتمع بحاله،
مش عارف الناس إزاي هتتقبل فكرة الإسلام👌

لكن هو بسبب حبه لرسول الله ﷺ ،
وكمان تفكيره بعقله إن الرجل ده صادق وعمره ما شافه بيكذب ،
فمفيش واحد هيسيب الكذب على الناس ويكذب على الله💁‍♂️
وشايف إنه طول عمره بيساعد الناس بدون مقابل ، فهل هييجي بعد ما عدى الأربعين من عمره يطلب مصلحة لنفسه🤔
وشاف إزاي الرجل ده كان عفيف وبعيد عن كل الفواحش والمعاصي خصوصا في فترة الشباب إللي تعتبر الفترة إللي الشباب بيعملوا ما بدا لهم فيها،
فإزاي رجل زي كده هيلعب في عقيدة الناس ودينهم🤔

ثم الرجل ده لو كان عايز ملك ولا يبقى سيد مكة، مكنش ييجي بدين جديد ، بالعكس ده كان سهل إنه يأخذ طريق أسهل وهو اللات والعزى زي باقي أهل قريش🤷‍♂️
فاجتمع لزيد حبه لرسول الله ﷺ وكمان الكلام المقنع👌

☆فزيد بن محمد بيعلمنا نقطة مهمة جدا وهي إننا نشغل عقلنا شوية، يعني إن مش بس نتبع الشخص ونسمع كلامه عشان بنحبه ، لأ...لازم كلامه يكون كلامه مقنع ومعاه أدلة 👌
لأن ممكن عشان انا بحب شخص معين زي مثلا أمي ..أبي ..زوجي..صاحبتي..أسمع كلامهم من غير ما يكون كلامهم مقنع وممكن يكون غلط😑
فلازم مع الحب يكون في دليل وكلام مقنع💁‍♂️

فزيد بن حارثة آمن بقلبه وآمن بعقله، وإللي يؤمن بقلبه وعقله صعب أو خلونا نقول مستحيل حد يقدر يغير رأيه أو يزعزع إيمانه،
لأن ساعتها الإيمان بيكون راسخ وبعيد عن أي شبهة،
وهنشوف مع بعض إزاي ربنا كان بيكلم الكفار بطريقة عقلية،
عشان يفكروا ويطلعوا هم الإجابة ويؤمنوا بعقولهم👌

يبقى عندنا دلوقتي ثلاثة من الذين آمنوا برسول الله ﷺ : خديجة بنت خويلد ، علي بن أبي طالب، زيد بن محمد.
الرابع بقى ده حكايته حكاية 😁
فاكرين لما كان زيد بن عمرو بن نفيل قاعد عند الكعبة وحصل حوار بينه وبين أمية بن أبي الصّلت عن نبي آخر الزمان وكان في واحد قاعد قريب منهم سمع الحوار ده،
وكان اسمه عبد الله بن عثمان🙊
وكان صغير في السن ساعتها فهو اتولد بعد عام الفيل بسنتين وستة أشهر،

☆يعني أصغر من رسول الله ﷺ بسنتين ونص تقريبا🤔

ومكنش بيعبد الأصنام زي قومه، فهو كان دائم التفكر في الكون ، وكان بيفكر بعقله ،
إزاي حجارة لا تسمع ولا ترى هي تكون إله، فمكنش مقتنع بها أصلا ، فلم يسجد لصنم أبدا👌

¤فيذكر أهل التاريخ إنه بعد ما سمع الحوار إللي كان بينهم ده قال إنه كان أول مرة يسمع عن موضوع الأنبياء والحاجات دي😮
فراح لورقة بن نوفل وكان مشهور بينهم إنه تنصر وكان عنده من علم أهل الكتاب، وكان على طول بينظر للسماء ويدعو،
فحكى له عن الحوار إللي سمعه وحب يتأكد منه فقال له ورقة إن فعلا الزمن ده زمن نبي وإنه قرب يظهر،
وعدت الأيام ولما كبر كان بيعمل في التجارة،
فكان بيسافر للشام للتجارة، في مرة وهو مسافر شاف رؤيا،
فكان في صومعة لراهب في المكان ده، يُقال إنه كان بحيرى إللي اتكلمنا عنه قبل كده،
المهم عبد الله بن عثمان راح للراهب ده وسأله عن الرؤيا إللي شافها لأنه عارف إن اهل الكتاب عندهم علم مش موجود عند أي احد تاني،
فلما حكى له الرؤيا سأله إنت منين:
قال له من مكة🤔
فقال إيه هو عملك ؟...قال له : بشتغل تاجر🤔
فقال له الراهب:
لو صدقت رؤياك فهيخرج في بلدك نبي وإنت هتؤمن به وهتكون وزير له وهو حي وخليفة له بعد موته👌

◇القصة دي 👆فيها كلام هل هي صحيحة ولّا لأ، أنا قلتها بس من باب العلم بالشيء وإن الرؤيا دي هتتحقق زي ما هنشوف إن شاء الله😅

وكان عبد الله بن عثمان صاحب محمد بن عبد الله بن عبد المطلب طول عمره، فكان عارف أخلاقه،
وطبعا كان بيحبه لأنه كان شبهه، يعني هم الإثنين مكنوش بيعبدوا الأصنام،
ومكنوش بيشربوا الخمر، كانوا كرماء،
وكان عبد الله بن عثمان من سادات مكة زي محمد بن عبد الله،
☆زي بالضبط لما تلاقي حد شبهك ومتفق معاك في كل التصرفات، وخصوصا لو كنت بتعمل حاجات محدش تقريبا بيعملها فتحس إنك غريب،
فلما تلاقي حد شبهك؛ بتحبه أكثر من غيره وتحس معاه بأُنس😊

فكان بينهم هم الإثنين توافق كبير جدا وكانوا على طول مع بعض، وكان عبد الله رجل غني ،
وكان عنده علم واسع بالأنساب ، يعني كان عارف ده ابن مين وده ابن مين في الحقيقة،
فاكرين لما قلنا إن كان بيحصل اختلاط في الأنساب بسبب أنواع الزواج إللي كان داخل فيها زني😅
أهه هو كان عارف أنساب الناس كلها، ومع ذلك عمره ما عاب أي أحد،
عشان كده وعشان باقي أخلاقه كان محبوب جدا بين الناس،
عدت الأيام وجاء وقت بعثة محمد رسول الله ﷺ 👌
بعد ما رسول الله ﷺ عرض الإسلام على الثلاثة إللي اتكلمنا عنهم من أهل بيته وآمنوا،
كان أول واحد يدعوه رسول الله من خارج بيته هو عبد الله بن عثمان أو عبد الله بن أبي قحافة أو أبو بكر الصديق😊
أول ما قال له رسول الله ﷺ :
يا أبا بكر أنا رسول الله ..ربنا أرسلني عشان أدعو الناس لعبادته وترك عبادة الأصنام.
فقال له أبو بكر : أنت رسول وأنا أؤمن بك ☝️
آمن بدون ما يسأله عن اي تفاصيل ولا حتى أي حاجة ..أنا رسول ..أنت رسول😮
ماهو مش لسه هيعرفه النهاردة...ده طول عمرهم مع بعض وهم الإثنين فاهمين بعض كويس😁

فكان أول من آمن الرجال الأحرار عبد الله بن عثمان إللي كنيته أبو بكر الصديق وكان عمره سبعة وثلاثين ونصف تقريبا 😊
أبو بكر الصديق بعد إسلامه مباشرة عمل حاجة غريبة أوي منه لنفسه كده من غير ما أي حد يطلب منه🤨
كان له أصحاب بيحبهم وبيحبوه وبيثق فيهم،
راح لهم وقال لهم على رسالة الإسلام وقعد يدعوهم لحد ما أسلموا،
يعني أصلا محدش طلب منه حاجة، مجرد ما عرف الصح تحرك على طول وكأن رسالة الإسلام دي بتاعته هو 👌
خلونا نشوف مين الناس إللي أسلمت على يد أبو بكر الصديق:
الأول: 《عثمان بن عفان》كان ٢٨ سنة 😮
الثاني: 《الزبير بن العوام》كان عنده ١٥ سنة😳
الثالث: 《سعد بن أبي وقاص》كان عنده ١٧ سنة😦
الرابع: 《طلحة بن عبيد الله》كان عنده ١٦ سنة😯
الخامس:《عبد الرحمن بن عوف》 كان عنده ٣٠ سنة😧

متخلين ثلاثة منهم كان سنهم سن المرحلة الثانوية في عصرنا دلوقتي😳
شوفوا الشباب في السن ده حواليكم بيفكروا إزاي ولّا دماغهم في إيه 😞
الثلاثة شباب دول ميغيروش أكل ولا شرب دول غيروا دين 😶
البنات والشباب لما بييجوا يلتزموا بيقولوا أهلنا والمجتمع وأصحابنا والظروف و..و...
دول غيروا دينهم في لحظة من غير ما يبصوا لمجتمع ولا أهل ولا أي حاجة..أول ما عرفوا إن ده الحق خلاص اتبعوا فورا😦
إنتم متخيلين الشباب الصغير ده هيواجه إيه...هم مفكروش في إللي أهل ممكة ممكن يعملوه فيهم؟
مفكروش في أهلهم ..مفكروش في حياتهم إللي هتتقلب رأسا على عقب😳
إزاي قدروا يأخذوا قرار زي ده في لحظة😶
سبب بسيط جدا وهو إنهم عرفوا إن هو ده الحق فآمنوا بقلوبهم وبعقولهم، ومكنش عندهم اتباع الهوى 👌
عرف إن ده الحق خلاص مش هسيبه مهما حصل😤

فهل نتعجب من الشباب دي ولّا نتعجب من أبو بكر إللي راح دعاهم، إنتم متخيلين إن الخمسة دول بأعمالهم كلها في ميزان حسنات أبي بكر الصديق🙊
تخيل إنك لو دعيت حد إنه يعمل حاجة صح ويعملها عمله هيكون في ميزان حسناتك🙊
وفي نفس الوقت لو دعيت حد إنه يتفرج على أغنية ولّا فيلم ولا شجعتِ صاحبتك إنها تحب شاب ولا شجعتيها على لبسها الغلط ولا...ولا... فهو في ميزان سيئاتك😞

أبو بكر مقلش أنا مليش دعوة محدش قال لي ادعي الناس، فكان ممكن يكتفي إنه يؤمن وخلاص،
لكن هو معملش كده راح وبدأ يدعو والغريب إن الخمسة دول من قبائل متفرقة وفيهم واحد هو ابن عمة رسول الله ﷺ 😳
إللي هو الزبير، كان ممكن يقول هو قريب رسول الله ﷺ فهو يدعوه، لأ ...مكنش بيفكر في كده..كان بيفكر إنه عايز يُدخل في الإسلام كل إللي يقدر عليه،
كان بيسارع إنه يكون سبب في هداية الناس ، كان زي ما بيحب الخير لنفسه أحبه لأصحابه،
كان حاسس إن الدين ده مسؤوليته وإنه لازم يوصله لكل واحد يقدر يوصله له👌
وأبو بكر الصديق موقعش في خطأ بعض الدعاة في عصرنا ،
بيدعوا الناس وسايبين أهل بيتهم بدون دعوة😞
راح أبو بكر لبيته وكلم زوجته أم رومان ودعاها للإسلام فأسلمت وأسلم كل أبناء أبي بكر الصديق ما عدا ابنه الأكبر عبد الرحمن أسلم متأخر زي ما هنشوف بعدين،
ودعا عبد له اسمه 《عامر بن فُهيرة》 للإسلام فأسلم راح مُعتِقه😳
إيه الحركة والنشاط دي والجهد لنشر الإسلام من أول يوم إسلامه دي😦
أمال بعد كده هيعمل إيه😶
ثم إيه إللي خلى الناس دي تسمع كلامه كده على طول من غير حتى ما تروح تسأل رسول الله ﷺ وتتأكد هل الكلام إللي أبو بكر بيقوله ده صحيح ولّا لأ😳
ورسول الله ﷺ في الوقت ده عمل إيه ...و دعا مين تاني من الناس 🤔

كل ده هنعرفه الجزء الجاي إن شاء الله😊

♡ملحوظة:
أي حد عايز يأخذ القصص وينشرها يتفضل أنا معنديش مانع نهائي.

#Eman_Shalapy

https://m.facebook.com/story.php?story_fbid=532765561724018&id=100049717356242

رسالة لقلبك👌

مشاهدة "أجواء عيد الفطر بمسجد الفتح بدولة غواتيمالا أمريكا الوسطى" على YouTube
https://youtu.be/fZVov7WCm60

الحلقة الثالثة عشرة👇💛

#قصص_الأنبياء(٢)
#السيرة_النبوية_إيمان_شلبي
#الحلقة_الثالثة_عشرة
#الدعوة_السرية

كنا واقفين المرة إللي فاتت عند أبي بكر عبد الله بن أبي قحافة لما راح دعا خمسة من أصحابه للدين الجديد وكلهم أسلموا وكمان دعا أهل بيته فأسلموا همّ كمان،
وكنا بنسأل لماذا استجاب الشباب لدعوة أبي بكر من غير حتى ما يروحوا يتأكدوا من محمد بن عبد الله إللي هو المفروض إنه صاحب الرسالة🤔

يجاوبنا على السؤال ده واحد من إللي أسلموا هو طلحة بن عبيد الله، وخلينا نركز كده مع كلام طلحة عشان نتعلم إزاي ندعو الناس عشان تستجيب لنا زي أبي بكر 👌
بيقول عن أبي بكر
◇ أولا:
كان لين الكلام يعني بيختار الكلمات الرقيقة وأسلوبه بسيط ومُقنع،
◇ثانيا:
كان تاجر صاحب أخلاق عالية واستقامة، كان بيكسب الناس من خلال تجارته بعكس طبيعة التجار تخسر الناس بسبب التجارة😑
كان تاجر صادق كريم ورحيم بيرأف بأحوال الناس،
كان بيعطيهم أكثر ما بيأخذ منهم وبيحسن لهم،
والقلوب ربنا طبعها على إنها تحب إللي يُحسن لها وتكره إللي بيسيء لها👌
◇ثالثا:
كان متميز في علم الأنساب ومع ذلك كان أي أحد يقعد معاه، والناس بتألفه بسرعة ويكلم أي أحد سواء الطبقة المثقفة وأشراف مكة،
أو حتى الشباب الصغير والعبيد يعني كان متواضع لا يتكبر على أحد،
وعمره ما طعن في نسب أحد من الناس مع إنه عارف النقائص إللي في أنساب كل واحد فيهم يعني من الآخر نقطة ضعفهم في إيده ومع ذلك لم يُعيّر أحد منهم أبدا👌
تخيلوا أحد بالأخلاق دي إزاي الناس متحبهوش،
فهو أصلا كان باني الثقة دي عند الناس من البداية 😊

الواحد يتوقع إن أبو بكر بعد مجهود أول يوم ده يريح بقى، ويقول أنا عملت إللي عليّ وزيادة 💁‍♂️
لأ...هو معملش كده😮
تاني يوم من إسلامه ودعوته للخمسة إللي قلنا عليهم ، راح دعا أربعة غيرهم وأسلموا😳
《أبو عبيدة عامر بن الجراح》
《عثمان بن مظعون》
《الأرقم بن أبي الأرقم》
《أبو سلمة بن عبد الأسد》
كل الناس دي أسلمت وصدقت أبي بكر لما كلمهم😮
هو كان بيأخذهم لرسول الله ﷺ بعدين عشان يعرفهم أكثر على الإسلام،
لكن هو إللي دعاهم من البداية مكنش مستني من رسول الله ﷺ إنه يقول له روح ادعي الناس،
وخصوصا إن الإسلام كان لسه في البداية يعني مكنش فيه تحفيز على الدعوة ولا كان لسه رسول الله ﷺ قال إن إللي يدعي أحد هيبقى له نفس الأجر،
بدون أي محفّزات وده كان نشاط أبي بكر 😯

☆لازم نقف هنا وقفة مع نفسنا👌
أبو بكر الصديق جاء للإسلام بالناس دي في أول يومين من إسلامه ومكنش لسه في معلومات كثيرة ...احنا جئنا بمين؟
هل علمنا أحد معلومة ولو بسيطة؟
هل دعينا أهلنا وأصحابنا ومعارفنا ؟
هل ساعدنا أحد إنه يتخلص من ذنب عايش عليه سنين؟
هل علمنا الشباب الصغير التائه من هو الله؟
هل حتى بنتحرك للدعوة إلى الله بنفس حماس أبي بكر؟
هل احنا حاسين بالإنتماء للدين وإن هو قضيتنا وإني أنا المسؤوول عنه فأنصره وأنشره بكل قوتي؟
ولّا الإسلام على هامش حياتنا...والله الظروف سمحت كان بها، مسمحتش فأنا مش هقطع نفسي يعني 😑
أسئلة كثيرة محتاجة إننا نجاوب عليها بيننا وبين أنفسنا👌

أعداد المسلمين بدأت تزيد واحدة واحدة..عندنا أهل بيت رسول الله ﷺ زوجته وبناته ومن يعيش معه في بيته،
أهل بيت أبي بكر الصديق وتسعة من أصحابه، وكل واحد من التسعة دول بدأ يدعو إللي يعرفه ويحبه ويثق فيه،
لحد ما وصل عدد الذين أسلموا إلى أربعين مسلم،
منهم سبعة وعشرين من الأغنياء وثلاثة عشر من الفقراء،
يعني مكنش الإسلام ثورة من الفقراء على الأغنياء زي ما بعض الناس بتقول😀
فزي ما شفنا... الإسلام لكل الفئات ..الصغير والكبير ،
الحر والعبد ،الغني والفقير، الرجل والمرأة
أي إنسان يقدر يدخل في الإسلام، بدون تفرقة عنصرية؛لأن المفاضلة في الإسلام مختلفة👌
إزاي😁
احنا كلنا مختلفين عن بعض، فهنلاقي الذكي والأقل ذكاء ودي حاجة مش بإيدنا إننا نغيرها،
وفي إللي بشرته بيضاء وإللي بشرته سمراء ودي برده حاجة مش بإيده يغيرها وهكذا💁‍♂️
فلأن الإسلام جاء بالعدل الكامل، فإزاي هيفاضل بين الناس على حاجة هم مش بإيدهم يغيروها🤷‍♂️
عشان كده معيار المفاضلة بين الناس هيكون بحاجة كلنا نقدر نعملها،
كلنا نقدر نكتسبها.. الصغير والكبير والغني والفقير والعربي وغير العربي وهي 《التقوى 》
يعني فلان أفضل من فلان بسبب التقوى...فكل واحد يقدر يكون تقي💁‍♂️
فاللي عايز يتحول من إنه غير تقي ليكون تقي بكل بساطة هيتبع الدين👌
وبرده الأخلاق الحسنة...إللي بيكذب وعايز يكون صادق يقدر إنه يكون صادق،
فكل الحاجات دي مُكتسبة.. يقدر أي إنسان إنه يحصل عليها، وده من كمال عدل الله لأنه لا يحاسِب الناس على حاجة مستحيل يغيروها😊

رسول الله ﷺ كان بيدعو الناس رجل رجل بيختار ناس معينة يكلمهم،
وكان بيعلم الناس إللي يسلموا إنهم يعملوا كده،
☆خلّوا الموضوع سر🤫
واستمر رسول الله ﷺ يدعو هو وأصحابه بين أهل مكة في السر لمدة ثلاث سنين😳

◇ممكن حد يسأل ليه رسول الله ﷺ يقعد يدعوا الناس في السر ثلاث سنين،
ماهو كان ممكن يقوم في مكة من أول يوم ويدعو الناس للإسلام،
وخصوصا إن دعوة الإسلام مُقنعة ومع شوية معجزات الناس هتقتنع وهتؤمن 🤔

¤أولا:
هنحط قاعدة كده عشان هتمشي معانا في السيرة كلها وهي إن رسول الله ﷺ《 رسول》 يعني بشر حامل رسالة ..بيوصل إللي ربنا بيقوله له،
مش بيجيب أي حاجة من عنده ..كل خطوة بيعملها هي بأمر من عند ربنا👌
¤ثانيا:
مش كل حاجة مُقنعة وجميلة الناس هتتقبلها😑
فهو عارف إن دعوة الإسلام مهما كانت مقنعة فهي هتواجه محاربة شديدة جدا،
لو مش من عوام الناس فمن السادة إللي الدين هيوقف لهم مصالحهم 😶
فتخيلوا كده لو رسول الله ﷺ من أول يوم نزل عليه الوحي وقف وسط مكة وقبل ما يدعو أي أحد وقال يا جماعة أنا رسول الله وبدأ يشرح لهم الإسلام،
وعارضه السادة وعملوا معاه مشاكل وبدأوا يؤذوه، ويشوّشوا على دعوته كان إيه إللي هيحصل😬

إللي كان عنده نية إنه يسلم هيخاف ويرجع في كلامه،
وإللي اقتنع وعايز يُسلم هيفكر ألف مرة قبل ما يسأل حتى،
عشان ميتعرضش للأذى،
وهتلاقوا ده بكلمة وده يقول كلمة وده يطلع شبهة وده يسأل سؤال،
ورسول الله ﷺ بشر مش هيعرف يرد على كل ده في وقت واحد وخصوصا إن في ناس هتجادل وتسخر منه،
فكده هيضيع الحق وتضيع هيبة الرسالة 👌
وربنا قادر على فكرة إنه يحمي رسوله من كل أذى😅
لكن ربنا بيضع لنا قواعد عشان نقدر نبني عليها في أي زمن لو تشابهت الظروف مع الظروف في عهد رسول الله ﷺ 💁‍♂️

☆عارفين زي إيه🤭
زي لما تبقى البنت لسه ملتزمة جديد ولبست النقاب مثلا وراحت تزور أقاربها وكلهم متجمعين ، وده يقول كلمة وده يسخر وده يسأل سؤال،
فالبنت هتلاقي نفسها ضايعة في النص وبتواجههم كلهم لوحدها لا عارفة ترد على ده ولا عارفة تشرح لده،
وكمان هي نفسيا هتتأثر وعزيمتها تضعف وفي ناس بترجع عن طريق الإلتزام بسبب مواقف زي كده😞
بعكس مثلا لو الأم أو الاب واقفين في صفها وبيدافعوا عنها،
والأب بيرد على إللي بيسخر، وأختها بتشرح للي بيسأل،
وأخوها بيشجعها وبيقول لها ميهمكيش إنتِ صح👌
أكيد الوضع والنتيجة هتبقى مختلفة💁‍♂️

فهو ده إللي عمله رسول الله ﷺ الأول،
قبل ما يواجه الكل بدأ يجمع حواليه إللي يساعدوه ويقفوا معاه👌
خدوا بالكم إن السيرة دي مش بنعرفها للتسلية 😀
ده منهج، ربنا منزله لنا عشان نطبقه في حياتنا👌
بيقول لنا لما تيجوا تدعوا اختاروا الأشخاص المناسبين،
لما تيجوا تلتزموا متواجهوش أهلكم في البيت كلهم مرة واحدة،
شوفوا مين في البيت إللي تحسوا إنكم تعرفوا تدعوه وكلموه وخذوه في صفكم،
واعملوا كده مع واحد ورا الثاني، عشان لو حصلت مواجهة بالكلام تلاقي إللي يساعدك ويقف جنبك👌

◇ثالثا:
ربنا بيقول لنا بالطريقة العملية إننا لما نكون عايزين نبني دولة وكانت ظروف حياتنا زي ظروف رسول الله ﷺ لما بدأ الدعوة يبقى نعمل زيه وندعو في السر،
وكان حصل أيام الاتحاد السوفييتي زمان، إن المسلمين كانوا بيدعو في السر، لأن مجرد إن الواحد يشيل مصحف دي كانت جريمة يعاقب عليها القانون😑
وإللي بيصلي كانوا بيعذبوه ويقتلوه😐
فكان لازم يكون في سرية في الوقت ده عشان يحافظوا على استمرار الإسلام وإلا اختفى من المناطق دي تماما👌

☆والاتحاد السوفييتي زمان إللي هو روسيا والمناطق المحيطة بها.

◇وفي قاعدة مهمة جدا رسول الله ﷺ بيعلمها لنا وهي إن الداعية مطلوب منه إنه يحافظ على حياته وعلى نفسه من الموت،
مش عشان هو خايف من الموت 😀
لأ..ده عشان يحافظ على الدين وعلى استمرار رسالة الإسلام،
تخيلوا كده معايا لو كل العلماء قُتلوا ومتبقاش في الناس غير الجُهّال إللي بيضلوا الناس بفتاويهم الضالة،
الناس هتكون مصيرها إيه😑
هتعرف الدين الصحيح إزاي لو كل العلماء ماتوا في سبيل الله👌
ورسول الله ﷺ قال:
"إِنَّ اللَّهَ لَا يَقْبِضُ الْعِلْمَ انْتِزَاعًا يَنْتَزِعُهُ مِنْ الْعِبَادِ وَلَكِنْ يَقْبِضُ الْعِلْمَ بِقَبْضِ الْعُلَمَاءِ حَتَّى إِذَا لَمْ يُبْقِ عَالِمًا اتَّخَذَ النَّاسُ رُءُوسًا جُهَّالًا فَسُئِلُوا فَأَفْتَوْا بِغَيْرِ عِلْمٍ فَضَلُّوا وَأَضَلُّوا"

يعني ربنا مش بيأخذ العلم من قلوب العباد، لكن العلماء لما يموتوا مش هيبقى في حد يعلم الناس فالناس هتضل،
ويضيع الدين، فمن أسباب الحفاظ على الدين وجود العلماء إللي يعلموا الدين ده،
لااااااكن مش معنى كده إن العالم يحرّف في الدين عشان يحافظ على حياته🙃
الإمام أحمد بن حنبل اتعرض للتعذيب الشديد عشان يحرف في الدين ويقول إن القرآن مخلوق،
ومع ذلك كان صامد واتحمل التعذيب وكان مستعد للموت ولا إنه يحرّف في الدين وثبت على القول الصحيح وهو إن القرآن كلام الله غير مخلوق 👌
فالعالِم بيحافظ على حياته عشان يحافظ على الدين ، لكن لو عشان يحافظ على حياته يحرّف في الدين يبقى يموت أحسن😀
عشان كده رسول الله ﷺ كان بيدعو الناس في السر لمدة ثلاث سنوات كاملة،
عشان يحط قواعد تكون أساس له لما يواجه أهل مكة بعدين👌

يعني رسول الله ﷺ مكنش جبان خدوا بالكم👌
لأن الفرق بين الحكمة في الحفاظ على النفس عشان الرسالة تستمر وبين إن الإنسان بيعمل كده عشان هو جبان خطوة😅

لو الشخص ده قاعد كده في بيته لا بيدعو ولا بيحاول يصلح ولا بيحاول يوصل الدين ولا يقول كلمة حق،
يبقى ده كده جبان😑
وده عكس إللي رسول الله ﷺ كان بيعمله،
رسول الله ﷺ كان بيدعو في السر وينشر الإسلام بين الناس وفي نفس الوقت واخد بالأسباب عشان يحافظ على حياته👌
رسول الله ﷺ كان بيدعو الناس للإسلام وبيعرفهم به كان بيقول لهم:
إن الكون ده له إله واحد هو الخالق وهو الرازق والمحيي والمميت ليس له شريك، وهو أرسلني عشان أوضح لكم إزاي تعبدوه،
إله الكون الله بيأمركم بالصلاة والزكاة والصيام وصلة الأرحام والصدق والعفاف،
وفي أول سنة من البعثة كانت صلاة الليل فرض،
يعني كانوا بيصلوا قيام الليل ركعتين قبل طلوع الشمس ،
وكمان كانوا بيصلوا ركعتين قبل غروب الشمس،
" وَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ الْغُرُوبِ"

ومن أول يوم من البعثة بعد فتور الوحي ونزول سورة المدثر ، نزلت أول آيات سورة المزمل عشان تأمر رسول الله ﷺ بالصلاة:
"يَا أَيُّهَا الْمُزَّمِّلُ. قُمِ اللَّيْلَ إِلاَّ قَلِيلا. نِصْفَهُ أَوِ انقُصْ مِنْهُ قَلِيلا. أَوْ زِدْ عَلَيْهِ وَرَتِّلِ الْقُرْآنَ تَرْتِيلا"

فكان أي أحد بيُسلم في السنة الأولى كان يجب عليه الصلاة،
وهي كانت مختلفة عن الصلاة بتاعتنا دلوقتي ،
لأن الصلاة إللي احنا عارفينها دلوقتي اتفرضت بعدين زي ما هنشوف إن شاء الله👌
خلال أول ثلاث سنوات من البعثة أسلم حوالي ستون رجل وامرأة،
وكان من إللي أسلموا: بلال بن رباح وسمية وزوجها ياسر وابنهما عمار،
خلال الثلاث سنوات دول أهل مكة كانوا بيشوفوا رسول الله ﷺ وهو بيصلي، وكان أهل المسلمين إللي أسلموا بيشوفهم برده،
لكن محدش كان بيعلق 😕
كانوا سايبينهم عادي ولو حد سأل كانوا بيشرحوا لهم الإسلام وخلاص،
والسبب في إن أهل مكة مكنوش بيتعرضوا للمسلمين دول ولا بيؤذوهم،
إنهم كانوا مفكرين إن الناس دي متبعين نفس منهج ورقة بن نوفل، وزيد بن عمرو بن نفيل وأمية بن أبي الصلت،
إللي احنا اتكلمنا عنهم قبل كده،
ميعرفوش إن رسالة الإسلام دي رسالة جديدة أصلها التوحيد أيوة لكن شرائعها مختلفة عن الشرائع السابقة 👌
فكانوا سايبينهم،
كانوا ماشيين بمبدأ ما لقيصر لقيصر وما لله لله، يعني بالبلدي كده الدين لله والوطن للجميع😀
مادام إنت بتعبد الإله بتاعك في بيتك ولّا في مسجدك خلاص اعبد براحتك💁‍♂️
يعني الدين ده في الجامع بس، تطلع من الجامع تسيب الدين وراك🤓
لكن تقولي دين يتدخل في كل صغيرة وكبيرة وتقولي إله واحد إللي يحكم وتقول حلال وحرام....لاااا هنا تقف بقى😏

عشان كده مكنش في أي أحد بيعترض على المسلمين ولا على رسول الله ﷺ لما كانوا بيصلوا أو بيشرحوا الإسلام لأي أحد بيسأل هم بيعملوا إيه😅
رسول الله ﷺ خلال الثلاث سنوات دي كان محتاج مكان يعلم فيه المسلمين الإسلام،
لكن مينفعش يطلع يقعد وسط أهل مكة كده ويعلمهم،
المسلمين كده هيتعرفوا🤔
واحنا بنرتب إننا هنعلن الدعوة دي في يوم من الأيام، فلو أهل مكة عرفوا كل المسلمين ممكن يقتلوهم كلهم ويقضوا عليهم كلهم😑
يبقى لازم نتعلم في الخفاء من غير ما أي أحد يعرف وكمان عشان يبقى ده المكان إللي هنجتمع فيه دائما،
مين الشخص المناسب إللي يقدر يجتمع عنده المسلمون🤔
أبو بكر🤨
لا مش هينفع ده أول مكان هيتعرف وهيكون متراقب ،
طيب بيت رسول الله ﷺ نفسه 🤔
برده مش هينفع، طيب مين الشخص المناسب 🤔
اختار رسول الله ﷺ دار الأرقم بن أبي الأرقم إللي أسلم على يد أبي بكر الصديق👌

احنا لما نسمع إن رسول الله ﷺ اختار الأرقم للمهمة الخطيرة دي،
ييجي في دماغنا إن الأرقم ده رجل كبير قوي له مَنعة ويقدر يدافع عن نفسه وعن المسلمين لو أي أحد عرف إن بيته هو مقر اجتماع أتباع الدين الجديد صح💁‍♂️
طيب خذوا المفاجأة دي🤭
الأرقم بن أبي الأرقم لما أسلم ولما كان المسلمين بيجتمعوا في بيته كان عمره ثلاثة عشر سنة 🙊
١٣ سنة...متخيلين🙊
يعني إللي في سنه عندنا دلوقتي في إعدادي😅
إزاي طفل زي ده يكون بيته هو المقر الرئيسي لاجتماع المسلمين😳
يعني هو مش ممكن لسانه يفلت بكلمة هنا ولا كلمة هنا😐
هو أه طفل لكنه بقى رجل بالإسلام👌
وصغر سنه ده كان سبب مهم في اختياره دونا عن أي أحد غيره👌
هو مين إللي يفكر إن رسول الله ﷺ وأصحابه مجتمعين في بيت طفل😈
وكمان الأرقم كان من قبيلة بني مخزوم والقبيلة دي بتنازع بني هاشم إللي هي قبيلة رسول الله ﷺ على الشرف،
يعني في بينهم منافسة ،
فهل من المعقول من وجهة نظرهم إن محمد الهاشمي يكون في بيت واحد من بني مخزوم😅
والسبب الثالث:
إن بيت الأرقم كان بعيد عن الطريق يعني مكنش في وسط مكة، الناس رايحة جاية عليه،
كان في حتة مطّرفة كده فمحدش هياخد باله من البيت ده👌

شايفين رسول الله ﷺ إزاي بيعلمنا طريقة الأخذ بالأسباب 👌
أيوة ربنا هو الحافظ لكن لازم أبذل ما في وسعي عشان أحافظ على نفسي😊

الدنيا كانت ماشية تمام خلال الثلاث سنين دول،
لحد ما جاء الأمر من الله لرسوله إنه يجهر بالدعوة😮

إزاي جهر رسول الله ﷺ بالدعوة ؟
وكان إيه رد فعل أهل مكة مع الصادق الأمين؟

ده إللي هنعرف الجزء الجاي إن شاء الله😊

♡ملحوظة:
أي حد عايز يأخذ القصص وينشرها يتفضل أنا معنديش مانع نهائي.

#Eman_Shalapy

مشاهدة "كل رجل يسلم على بنت أنصحك إسمع الفيديو ده" على YouTube
https://youtu.be/EaRC-yUJ4O4

الحلقة الرابعة عشرة👇💛