العباس ع (محرم)


ما اشوف واحس شابگني واحد
اسمع بس شهگته ويمي گاعد
يعباس حاچيني سمعته
عالتراب طايح خويه انته
بالدموع.....بالدموع
..........................
من كثر السهام المزگت جسمي*
كلي اجروح من راسي لحد جدمي*
انه اعله المهر بس وشلن دمي*
ما اشوف اليجي يطعني واليمي*

سهم عيني..يچويني.. ودمه يحجب عليه الشوف*
صرت حاير..ظهر كاسر.. اطيح اشلون ماكو اچفوف*

ملت امن المهر ما نيتي اوگع
ماخذني النزف بس شامت اسمع
الگمر طاح كسرو گلب اخته
عالتراب طايح خويه انته
بالدموع.....بالدموع
.......................
الضمه ياكل ابحيلي ويبّس الشفه*
الاگف بالنفس واجروحي ما تشفه*
سهمي ابكفه احس وطيحتي ابكفه*
يطيح اشلون بالله المنبتر چفه*

دمه اجري..وطعن ظهري.. واحد گلي حيلك وين*
ودفع رمحه..عله الصفحه.. شغت بس فكري يم حسين*

ماكلني الوجع والحيره حيره
يا كسرة اخوي اشگد چبيره
عطش بيه آخر مره شفته
عالتراب خويه طايح انته
بالدموع......بالدموع
.......................
طحت من المهر بيهّ الله بس يدري*
السهام ابصدري عبرن كلهن الظهري*
الرمل يچويني واشعر يشلع ابصدري*
واحد بالرمح ضل يطعن ابخصري*

گطع نفسي..خنگ حسي.. ويمي أسمعهم ايضحكون*
طحت وحدي..ولا عندي.. عشيره اعليه وايفزعون*

طاح البيه اخوه گالو يباهي
ردت انهض واگوم اچفوفي ماهي
انه ابماي ارجعله وعدته
عالتراب خويه طايح انته
بالدموع.....بالدموع
.......................
مچفي اعله الترب واتلاگف انفاسي*
حسيت العمود ايهشم ابراسي*
وانه ابزينب احچي والوجع ناسي*
اخيچ راح والمصرع صدگ قاسي*

طحت دامي..وچنت ضامي.. ومن زينب چنت خجلان*
يضل بالي..عله الغالي.. وطفل بالخيمه ضل عطشان*

وداعآ يا اميره آخر وداع
اخوچ امگطع ومچفي عله الگاع
عالفراك زينب ابچي سكته
عالتراب طايح خويه انته
بالدموع.......بالدموع
......................
وانه اعله الترب اتگلب ودامي*
واحد ضمني بس ما قبلت اسهامي*
حرورة صدره تشرحلي اشكثر ضامي*
خويه ايگلي گوم امشينه لخيامي*

وانه اشبگته..اخوي انته.. وگعد يمسحلي بيده ادماي*
يگلي امشي..يبو كلشي.. واگله جودي ما بيه ماي*

يا بعد النظر خليني طايح
زينب لا تشوف ابدمي سابح
يمولاي گلهه اهناكه عفته
عالتراب خويه طايح انته
بالدموع......بالدموع


علاء المياحي
الفاتحه لروح والدي

استقبال محرم (الخدام)


مو عطشان.. انته ابكل نهر تجري
مو عطشان.. يالحبك صدك عذري
يا ابا عبدالله
....................
اعمه الخنجر وفك عينه يم صبعك*
الحافر من عطش شربته من ضلعك*
كلهم عطشو ونحرك يوزع ماي*
تطش خيرك رذاذ وناسي اليوجعك*

تكتل ركضت النسوان*
بين الخيل والعطشان*
الخيل اتعرف بس الدوس*
وماكو ابصدرك الهه امچان*

يا ابا عبدالله
.....................
طحت ومن طحت فزّ الورد يمك*
ضيفت الحجر بالجبهه من دمك*
انته اول ذبيح اللبس ثوب ادماه*
طحت وچانت الخيمات كل همك*

من چان البخت مذموم*
اكشخت ابجرحك الملچوم*
خجلت الذبح يحسين*
وفشلت النهر لليوم*

يا ابا عبدالله
.......................
مات الماي وانته ابكل وكت خالد*
الهذا اليوم اخوك اعله النهر گاعد*
حليت العطش من طاح فوگ اشفاك*
والشط يم جروحك خامل وراكد*

(لائك) خرست اليحچون*
واترست الصحاري اعيون*
رغم اشكثر بيك اجروح*
معبد صرت لليهوون*

يا ابا عبدالله
......................
الما عنده عرف بالجرح ما يندل*
الما تچوي الخيم دلاله يتبهذل*
زلمه اليم مصابك عنده مدت ايد*
وبس اليشعر ابأحزانك امعدل*

هنياله اليحس مكسور*
شايل جمرته ابعاشور*
واتكحل اعيونه ادموع*
من يسمع صرت منحور*

يا ابا عبدالله
.......................
مبخوت ابهواك وگمت اتشيم*
واتگلب اذا مرّ طاري المخيم*
خليني ابعزائك كون اضل للموت*
ويم خدامك ابرحلة حزن ألتم*

الجرحك ماكو اي حدود*
اعله حسين الجزع مريود*
بكل مأتم لطم ارتاح*
ولطفك بيّه احس موجود*

يا ابا عبدالله


علاء المياحي
الفاتحه لروح والدي

ليلة الوداع (محرم)
تقول الرواية ان الحسين ع قد خرج ليلآ ليبعد الاشواك عن طريق حرمه فأنهم يفرون خوف النار يوم العاشر



باچر يركضن بالشمس..وعندي شكثر عزيزات
الچانن حدر فيّي أمس..وعاشن مثل اميرات
يتطشرن بالهيمه
ماكو بعد فيّ خيمه
بديرة احزان
....................
عاشن ابحضني عمرهن وما يعرفن بالصحاري*
مو ضمه اليحرگ دليلي ركضت ابنياتي ناري*
الچنت اضمنهه ابردائي باچر ايغطيهه ذاري*
هايه آخر ليله عدنه وباچر ايبّس خظاري*

الليله خيمه عدنه واتلم البنات*
ولو من كثر الضمه متغيرات*
باچر اتروح الخيم ويه الدلال*
وصعبه بالهيمه الخدر لمن يبات*

الداريتهن مثل الورد..ما عدهن افياي اخيام
كلهه عله اخيامي تهد..واعيالي بالهيمه اتنام
گلبي يفيض ابضيمه
ماكو بعد فيّ خيمه
بديرة احزان
.........................
خوفي من شوك البوادي باچر ايعثّر ركضهن*
لو تشبّ نار المخيم ايفرن اعله البيده كلهن*
وين اكو علويه تركض عالجمر بالله گبلهن*
ينّچون لو من جمرهن لو سياط اتشبّ متنهن*

ركضت النسوان تشعل گلبي نار*
شلون يرهم عالجمر سحگ الزغار*
وزينب الما طالعه اتشبعني موت*
وانه چنت امن الهوه اعليهم اغار*

الما شايفه واحد گبل..ركضتهه يا ناس اشلون
حيرتهه بالخيمه تضل..لو تطلع وكلهه اعيون
اعله اختي شكثر حريمه
ماكو بعد فيّ خيمه
بديرة احزان
.....................
الليله كلنه اهنا گعدنه وهايه اول مره حاير*
التستحي امن الچلمه چانت تصعد اعله التله باچر*
فشلت التعثر چبيره وتنظر اعليهه العساكر*
يا اخو اليلحگ عليهه كلهه موته ابيوم عاشر*

عثرت العلويه صعبه اعله التراب*
تخيلت تركض واحس ابرمشي شاب*
شلون بالله وزينب اعزيزة ابوي*
والكفيل اعله النهر من عدهه غاب*

الچانت اويانه امخدره..بكل خطوه تعثر وتطيح
باچر اهلهه اعله الثرى..ألمن بعد اهيه اتصيح
العاشت گبل عظيمه
ماكو بعد فيّ خيمه
بديرة احزان
........................
شلون بأطفالي العطاشه وكل أملهم هسه بيّه*
باچر انه اعله الترابه وكلهن ايركضن عليّه*
بالصبح ينفل شملنه اجروحي الف وتسع ميه*
يفرهدون اخيامي وانه اتطشرت بالغاضريه*

شلون اگوم وافزع اعله اخيامي بيش*
وانه فاگدلي أخو اليسواله جيش*
شنهي بخيامي يضل غير الحريم*
وماكو خيّر يسأل اتحرگوها ليش*

ما تبقى للفزعه زلم..بمصباح عاشر ميتين
وزينب ابأيتامي تلم..واتطفي بالمحترگين
صوره اشكثر أليمه
ماكو بعد فيّ خيمه
بديرة احزان
.........................
يوجع ابگلبي نظرهن والوداع اجروحه صعبه*
واليودع اهلهه كلهم سهم وايصوبله گلبه*
الچانو ابحضني ألمهم باچر ايضلون غربه*
هيه بس هالليله عدنه وكلمن ايروح اعله دربه*

أنه دربي الموت وارماح وسهام*
واعله وجهي اهناك بالعاشر انام*
واهمه درب الشام واجروح وسياط*
وآه يا جرح السبي وكسرة الشام*

أشويه وايصير الصبح..وابطلعته تبدي اهموم
وايبّين ابگلبي جرح..للمذبح انروح اليوم
وداع الاهل جريمه
ماكو بعد فيّ خيمه
بديرة احزان


علاء المياحي
الفاتحه لروح والدي

نزلة القاسم ع (محرم)


هلا ابحيله جسام
هلا ابحيله
................
لبس لامة الحسن*
العرك عند الساده فن*
بريشاته..اشمحلاته..ايهزهه الهوه**
طلع خظره اعمامته*
ثنه اردانه ابيمنته*
للملگه..الطف حگه..وكل نينوى**
بده موعدهه الگنص*
الگمر گله اتركلي نص*
والاكبر..يتحسر..گلبه انچوه**
ابن عمي ويبتسم*
يگله اشويه الزلم*
والحيلي..خلّيلي..وهزّ اللوى**

هلا ابحيله جسام
هلا ابحيله
...................
فطن للعيله استعد*
لوه خصر الي شرد*
ذبّ گلبه..ابنص دربه..وعاف الهدم**
يلف بجناحه الهوه*
خنگ بیهه نينوى*
واتهابه..السلابه..وضل يبتسم**
حصرها السبعين الف*
سطر جايبهه وزحف*
ابخياله..ورجاله..تاه الفهم**
علي هذا لو منو*
الشرد يسألهم شكو*
الغطانه..وذلانه..شنهو الاسم**

هلا ابحيله جسام
هلا ابحيله
....................
تشربك كل الغزل*
گعد بالوادم يذل*
والجاسه..انفاسه..اتهدّ ريته**
كسر خشم المشرعه*
النهر چفه يصفعه*
الشط لاحه..وبصفاحه..ايدگ رايته**
حچه ومملوح الحچي*
عله الشدات انتچي*
وشد حيله..اعله العيله..وما هزته**
بطل راعي المقدره*
مثل جده حيدره*
شرايه..الكل غايه..الطف غايته**

هلا ابحيله جسام
هلا ابحيله
........................
مشه وهوسله الگمر*
هلا ابدواس الخطر*
ضل دائم..بس قاسم..عرسه بده**
يبن اخوي اعله اليهد*
علی أهله ما يرد*
بس لوحه..وجرّ روحه..هنا رگده**
اليجي ويريد الحرب*
تجر من حدره الدرب*
شب ناره..وبالغاره..ماكو ابهده**
الرگب الگطها لگط*
صگر عالصيده تحط*
المنهم فرّ..عالعسكر..تتصيده**

هلا ابحيله جسام
هلا ابحيله
......................
بعد حيلي نخوته*
عله جده شمرته*
ايذب يوله..بالجوله..وبيهم يگص**
الحچه ابسيفك گله أس*
سلت تسلتهه النفس*
العادانه..الحظ خانه..بيعه ابرخص**
شرط تخسفهه الارض*
طلابتنه اهنا تفض*
كل واحد..ضن شارد..گنصه گنص**
شيطفيهه جمرتك*
تشبّ بيهه نخوتك*
بالهده..الحگ رده..ماكو نقص**

هلا ابحيله جسام
هلا ابحيله


علاء المياحي
الفاتحه لروح والدي

مقدمه الاكبر ع(محرم)


هذا الطف يدور الشاب
شارب كل جماله اتراب
........................
رايح يالولد واتأملك ترجع*
صاحو طاح گالو امه خل تسمع*
وانه ابخيمتي گمت اوگف واوگع*
يلي فگدك عامي شوف اعيوني*
..................
مو مال الترب صدرك الي وحگي*
حسبالي حلم هجرك طلع صدگي*
صاحو عالولد يم الولد لحگي*
ما يرد گالو واحس يچووني*
...................
تتمايل عطش لمن رحت شفتك*
ها تونه بدينه وگضت سالفتك*
اگبالي ذابل وبات الضمه ابشفتك*
بجرحك النازف ترى لچموني*
...................
جابك للخيم بس منكسر عمك*
يبني وچم سهم يا سلوتي ايلچمك*
يمخّظر واحس امنشفك سهمك*
يمه بفراگك رمح طعنوني*
...................
راجع مختلف لا چن هذاك انته*
أول مره اندهك وانته شو سكته*
شو صوتك عطش لو نبله بايگته*
انه ميته ابسكتك خلوني*
...................
ما أدري ابحلاتك هيچي تتطشر*
يا كلشي ابحياتي ويبني تتوذر*
يابس راجع وانته اطلعت اخظر*
  بفراگك احسهم ايموتوني*



علاء المياحي
الفاتحه لروح والدي

عبدالله الرضيع ع (محرم)


شمحلاها يمه نومتك
عبدالله ارسم شفتك
شبعت ماي
ساعه ويجي يبني الگمر
جايبلك ابجوده النهر
تبقى وياي
...................
أهز كاروكك واحلم نمت عبدالله مو ضامي*
ينرجس روحي واتخيل ترست ابصوتك احلامي*
واعدل نومتك بيدي اضل يا تچوت ايامي*
حلم بللّ ضمه روحي شبعت وتغفى جدامي*

فراشك ايديه اتعدله
وما عدنه يمه كربله
وما عطشان
يناغيني صوتك وانشرح
وماكو عله اشفافك جرح
ولا احزان
..........................
يأول فرحه بسنيني ورد ليش الضمه ايلمسك*
اتاني چلمه اليمه تگلي وافرح ابحسك*
يحگك تلعب ابحضني الضمه اشماله خنگ نفسك*
النهر لو يدري گلب امك يجيب اميته وايحرسك*

يغديك شر كل الضمه
ولا اشوفه ثغرك يلچمه
وكله اجروح
حصنّتك ابأم الحسن
شيردون ادفعلك ثمن
بس لتروح
...................
السهم ما لايگ النحرك يعبدالله اشكثر يوجع*
زغير وسهمك اشكبره فداك الماي لا تطلع*
ولو ادري الضمه يكتل اخاف اتروح ما ترجع*
شسوي ابروحي يوليدي كتلنه الجوري من اسمع*

اذبحنه لحسين الطفل
واچوينه گلب امه ابنبل
وايضحكون
چا شلي بيهه خيمتي
ايبوگون مني سلوتي
ابقى اشلون
......................
خشب صاير يبعد امك من ذاك الضمه السانك*
النفس يابس وسط صدرك مثلهم كلهم اخوانك*
هل من ناصري تسمع وشلت عبدالله ذرعانك*
الذبح صار وسهم نحرك يريدك تترك امچانك*

نحرك يناديله السهم
واتفرفح اشگد بالالم
لو أذاك
بچفك وداعآ أشرت
للموت اشوف استعجلت
يبني هناك
.......................
وداعآ ترسك اعيونك صدگ صار ورحت عني*
أول مره اشوفنك تروح ابعيد عن حضني*
خنگه الخيمه بس صوتك گبل چان اليفرحني*
ترد بس انته متغير وسهم نحرك يعذبني*

الخيمه فرغت من رحت
يا روحي صدگني متت
وانته ابعيد
ترجعلي دامي واحترگ
امن اتخيل احنه نفترگ
حيلي ايبيد


علاء المياحي
الفاتحه لروح والدي

يالحيرتني ابطيحتك
موعدنه باچر زفتك
جمالك شربته الگاع
رحيلك صاير ابساع
يبني جاسم
...................
كلهن عليّه اتجمعن*
شافني وابسرعه بچن*
فزّ گلبي من شفت الدمع*
عن ابني اسمع سولوفن*

ما ادري اضلن مدري اروحن لاوين*
خاف اطلع وحيل استحي منّ حسين*
واشويه بعد اشويه ملت اعله الگاع*
عالوگفه ما احسن تعين الرجلين*

كابوس صارت خيمتي
طفو عليّه شمعتي
حلمنه امن الجفن ضاع
رحيلك صاير ابساع
يبني جاسم
.............................
ياما ارسمتهه ضحكتك*
واتخيلتهه زفتك*
تتمشى انته ويالگمر*
وتترس حياتك ابسمتك*

ما بين خوانك لبست اجمل ثوب*
وسفرة ابوك وزاد عرسك مصبوب*
اشگد اتاني وحاسبه الهذا اليوم*
وصيوان هاشم لليبارك منصوب*

عمك يسولف للزلم
هذا ابن اخونه والنعم
شجاعه وحسن الاطباع
رحيلك صاير ابساع
يبني جاسم
............................
من حلمي للمنحر رحت*
عريّس يضحك سيرت*
ضليت اشوطي ابخيمتي*
اگعد واگوم اتحيرت*

عطشان بشفافك حلم ذاك الماي*
واحچي ويروحي هسه يرجع اي جاي*
واسمعهم ايصيحون المن هالشاب*
طاح اعله وجهه وايست منه ارباي*

صاحو وگع فوگ الترب
والتمو اعليه الغرب
يالتارك اجروح اوساع
رحيلك صاير ابساع
يبني جاسم
..............................
يا حيرتي ابنص خيمتي*
ضليت احوم ابغصتي*
لحگو اعله بزري امن الغرب*
صحت وانشف دمعتي*

مديت راسي وشفت دمعة عباس*
بچفوفه يصفگ چان وامدنگ الراس*
واعرفت ما يرجعلي من شفته احتار*
باگو حلالي والحسن ذوله الناس*

يا خنگة الام عالضنه
واجروح گلبي امخزنه
صحت مو هيچ الوداع
رحيلك صاير ابساع
يبني جاسم
.............................
صاحولي ايسي امن الولد*
ما يرجع القاسم بعد*
حلمچ صفى ريح ابشبك*
حدر السنابك وانمرد*

يم الولد تبعچ مشه وطاح اهناك*
مو چان موعدنه گلت ابقى وياك*
شيصبر الرايح ابنهه ومذبوح*
چم يوم احسب واستعد الملگاك*

يالماخذ وياك النظر
دلالي يالغالي انفطر
بدليلي اتشب الاوجاع
رحيلك صاير ابساع
يبني جاسم


علاء المياحي
الفاتحه لروح والدي

مسلم ع (محرم)



گلي رايح..وابتسملي وكض ايديه
گلي رايح..لزمي بيد اختچ رقيه
هيه حسبة بس شهر
نلتقي بعد السفر
يا حميده
......................
كلهه تانتني اشأگول من بده وكت الوداع*
تلعثم ابشفتي الكلام چنت احسن بالضياع*
حاولت اخفي الدموع والحچي من عندي ضاع*
تالي گتله بابا روح وحيلي ما شالته گاع*

چنت احس ابعالم الغربه اطير*
واشعر اشبعد المسافه وبيهه احير*
انه مو مالت وداع ابعمري هاذ*
والزمن ويه الاحب صاير گصير*

واهوه واگف..شالني وحطني اعله صدره
واهوه واگف..چنت احس ابصدره جمره
وراد يحچي وما گدر
نلتقي بعد السفر
يا حميده
....................
غصبآ اعليه بچيت بابا رايح مدري وين*
فجئه حسيت ابأمان شالني ابحضنه الحسين*
دمعي ينزل واستحيت ادري عمي اشگد حنين*
نشّف ادموعي ابأيديه ويانه گلي اتسافرين*

البواچي ما احبهه للبنات*
ويم رقيه افرحت من گلي ابات*
ما احس الغربه گلي وما احير*
تمشن ابذاك الدرب مثل الخوات*

المدامع..نشفن وحضنني كلهن
المدامع..يبسن وانه اشبگتهن
وابتسم عمي الگمر
نلتقي بعد السفر
يا حميده
.......................
ويه كل خطوه اشوف يلتفتلي وكلشي راح*
يمنه واشعر بيه غريب الكوفه بيهه اشگد جراح*
گلبي گلي ما يعود وصدره يشبع بالرماح*
واگعدت فوگ التراب عمري من ودعني طاح*

امودع ابالله صحت انه ابگفاه*
طاست اميه گمت اشمر وراه*
ويه خطواته بدت غربه وحنين*
ماتت اسنيني ابوداعه وكلشي تاه*

ابوداعه..ماتت الضحكه ابحياتي
ابوداعه..احسب الساعة مماتي
ردت اموت امن القهر
نلتقي بعد السفر
يا حميده
........................
چنت اريد اوياه اروح وسافر وما ضلي لون*
شبيهه عندي الدنيه هاي السافرو ما اضن يجون*
مناشغ اگضيت الوداع واهلي بيّه ايصبرون*
وارجعت ما عندي شوف وياه اخذ مني العيون*

انه ادري بيه ابوي ايضل غريب*
جرح ينزف باقي ما اصدگ يطيب*
ظلمه عنده الدنيه اليودع ابوه*
وانه من عندي مشى وراح الحبيب*

عني ماشي..واخذ كل حيلي ابوداعه
عني ماشي..ردته بس ايتانيني ساعه
ظهري من راح انكسر
نلتقي بعد السفر
يا حميده
............................
وارجعت محني گفاي بالگلب تچويني نار*
داري ما بيهه ابوي شلون اگولن عندي دار*
كلشي بعيوني سراب گمت اشوف العمر صار*
انه ميته ابلا حياة مو مثل كل الزغار*

كسرة الما عدهه ابو من عدهه راح*
هيچ احس ابروحي متروسه جراح*
راح مني الچان يعنيلي الوجود*
وكلشي من راح ومشى من عندي طاح*

يا غربتي..البيهه اعيش انه وجروحي
يا غربتي..سافر الماخذلي روحي
عمري بوداعه كبر
نلتقي بعد السفر
يا حميده


علاء المياحي
الفاتحه لروح والدي

نزلة العباس ع (محرم)


هذا أنه العباس ابن علي
سالفة ذاك الماي خلهه الي
..........................
دخيل بختك يبو فاضل*
من صحت هل من منازل*
كلهه شردت عالنخل

زلمه وامرجف الكتايب*
دايس ابرجله الشوارب*
غطهم وعالشط وصل

ضاگت اعليهه الوسيعه*
امن المخيم للشريعه*
ابن امه البيهه ضل

بالعرك شايل املوحه*
فگره هذا الي يلوحه*
وما شرد لحظه وغفل

حتى وجه الماي من شافه اختلف*
من احرورة چفه ماي الشط نشف*

هلا ابسيد الماي والازلي
سالفة ذاك الماي خلهه الي
.........................
اعمامته الخظره اعله راسه*
كسر ظهر الماي داسه*
ويبّس اعروگ النهر

شايل الجربه اعله ايده*
ولاف چفيته اعله جيده*
الشافه ضل يركض شهر

الشگره فوگ الروس غارت*
من ندسهه اتگول طارت*
دگو اجراس الخطر

دگت الگاع ابرجلهه*
بچفه گام ايمشط الهه*
غارت ابحيل الگمر

بيده كض اعنانهه وصارو كحل*
مثل صمّ اطحين طشهه ابو الفضل*

صاح يمّ عون اعله اخوچ اتدللي
سالفة ذاك الماي خلهه الي
..........................
سيفه يتگهوه ابرگبهم*
مثل فنجان ويهزهم*
شيخ وايطرّ السلف

جابهه اطراد المضيفه*
وبس علي گلهم خليفه*
والتنفس حفّه حف

تك رجل وگّف العسكر*
والحسين الحيله كبّر*
والشمر دمه نشف

وگالهم هاي الميّه*
سبع فدوات الرقيه*
وشطكم الفاگد شرف

الا اربطه اليوم بثبات الخيم*
ولو تبّده الماي ألمّن روجه لم*

كلشي بالذر مخلوق كله الهلي
سالفة ذاك الماي خلهه الي
..........................
كربله ابأيده مغطها*
لگط بشليله لگطها*
وهوس الاكبر اله

تگوه يا ابو الفضل تگوه*
الروس هاي اطحنهه گهوه*
وبيهه ضيّف كربله

عمي هذا الماكو منّه*
كاشخ الجود اعله متنه*
هله باليرعب هله

بالزلم صارت عراضه*
شيخ بچفوفه الفراضه*
واليميل ايعدله

مَوگد وللدله چيّم بالرگب*
گام يستنگي الخشن مثل الرطب*

مالت الگاع وامرها اتعدلي
سالفة ذاك الماي خلهه الي
........................
فطن بالعركات يلتذّ*
لو حچه العباس نفذّ*
بلش بالوادم ردم

امن الخيم نادته الحره*
ألمعسكر حيل عصره*
وشّل اعروگ الزلم

ألوي خصر السيف بيدك*
يا گمر اختك تريدك*
زمهم اعله التربه زمّ

خلي بين الناس نزّه*
والحچه ابسيفك تحزّه*
ما ردت واحد سلم

اليوم اريد ابكربله اتخلي مرض*
ضلوع اهل الكوفه اريد اترضها رض*

كفو زلمة حسين يا كافلي
سالفة ذاك الماي خلهه الي


علاء المياحي
الفاتحه لروح والدي

عندما اراد (الحسين) ع وداع حبيبة قلبه (رقيه) ع امتنعت بصيغة الطفولة عن الوداع وكان لها سبب فأخبرته بنغمة الصغار:


گلت لوما اودعك ما اضن تروح
انه لو بيدي اشبگنك عمر*

خاف اشبكك واسمع ابصدرك وداع
وتدري بيه شگد غفيت عله الصدر*

كون كل عمري يصير اهنانه ليل
بصبح عاشر ادري صدرك ينكسر*

خاف احضنك واسمع احوافر خيول
وخاف بمچاني احس رمح الشمر*

أنه من هسه أشم حرگ الخيام
وبيّه احسن واحد ابحبله يجر*

حروره مالت خيمه احس وبيه نار
تخيلت بجدامي ياكلهه الجمر*

البعمري اتبات بحضان الدﻻل
موش تفطن على الموادع والهجر*

املوحه الموادع كلت جدم السنين
واهنه ثلث اسنين چا أهنه شكثر*

الأبوها ايسافر اتانيه يعود
لو مشيت شكثر احسب وانتظر*

وحتى ماكو اميه ارشنهه ابگفاك
لو مشيت انثر دمع وكت الفجر*

بويه هم ترجع اذا اصرخ تعال
من يجر ذهباتي واحد وانسطر*

هسه يمي وانه احس ابروحي شوگ
شلون من تبعد شدورلك عذر*

انطيني چلمة واهس واحضني حيل
وانه ما احچي الخواتي ويبقى سر*

ابذمة الريه اضمنك نسيم
وما اطلعك وعد منا للاسر*

ابسكته اطلعك لو بچيت ابلايه صوت
وبالخرابه هناك اشمنك عطر*

اوعدني مثل امك اصير ويالرسول
كون اول وحده اتبعك للگبر*

ابصبح باچر راح اعد عشرين يوم
ومن اروح اوياك اعد من الصفر*

هناك انه وياك نگعد والبتول
وماكو سوط هناك يمهه وﻻ عثر*

وﻻ حبل يمهه ويعورلي الأيدين
ومن اريدك ما يجي ايطگني زجر*

گلي اتبعك وادفن ابروحي العذاب
خاطر افرح واجرع امرورة صبر*



علاء المياحي
الفاتحة لروح والدي

بقلب يعتصره الالم والحرقة اودع ابن اخي الشاعر محمد جهاد المياحي اثر حادث غرق فأنا لله وانا اليه راجعون..(محمد محرم جاي والمجالس على حبيبك الحسين ع راح تبدي شلون هسه)

نفسه الماي*
اليبّس شفة العباس*
وما بلل اشفاف حسين*
نفسه الماي*
ماخذ منّه هسه اثنين*
نفسه الماي بس الطعم صاير مرّ*
بحلام الشباب ابروجه ضل ينحرّ*
بگلوب التحب بچفوفه ضل يعصر*
الگبل ما بلل الرضعان*
هسه اشماله ماخذ نشعت الشبان*
نفسه الماي*
هوه العذب العطشان*
شو يرتاح بالغرگان*
سرّ كل الحياة الماي*
وتالي انوب ياخذهه*
حياتك لسه بعّدهه*
ليش الماي فرهدهه*
ضحكتك ذيچ جمّدهه*
فرحتك روج ماخذهه*
خذاها وگال ما اردهه*
واهدوم العرس يالمعرس امولمات*
حلم بس ما كمل والفات گالو فات*
گالو مات*
نفس الماي*
ياخذ ما يرد هيهات*

احنه الماتو غرگانين
هسه ابخير ومرتاحين
تلّگانه حسين احنه ويمّه
تونه اعرفنه معنى الخدمة
ومعنى الخادم
.............................
گضينه اسنينه كلهه سوه وسط الحسينيه*
اذا مجلس لطم نحظر نحس ابراحه نفسيه*
عله الضامي سوالفنه وحچينه چنه لطميه*
رزقنه الدمعه والحسره الرزق تقديره عالنيه*

صحبان احنه وچنه انريد
نگضي الدنيه الايد ابأيد
ويه حسين العمر انختمه
تونه اعرفنه معنى الخدمه
ومعنى الخادم
............................
اذا نسمع اسم ضامي نحس طعم العطش بينه*
تحقق كل حلم عدنه سوه للمگبره امشينه*
ثواب الدمعه شفناهه كشخنه ابكل بواچينه*
هلا بالخدمو اوليدي اجت ام الحسن لينه*

ذوله الحزنو عالمذبوح
گالت يمّه امشونه انروح
عطر الحظره ابچفهه انشمه
تونه اعرفه معنى الخدمه
ومعنى الخادم
............................
شحلات الصحبه بالخدمه اذا تجمعنه القرايه*
النهر لمنه وتشابگنه قدرنه اتشابه ابهايه*
مشينه وكلشي ما ردنه فقط نتغطى بالرايه*
لگينه الجنه متروسه خدم وابناس مشايه*

مطهر جانه وجاب اوشاح
اليغرگ گال هنا يرتاح
وطاهر كل غرگان ايلزمه
تونه اعرفنه معنی الخدمه
ومعنى الخادم
.............................
المجالس بيهه خير اشگد يهنياله البچه ابحرگه*
ترى الدمعه اشكثر بيهه فضل بالمحشر اتلحگه*
ابحسينيه اليطب ينعى الحسين ايجيله وايشبگه*
وعلي الخير ابمجالسهم جزاء الجنه بالشهگه*

التنزل من اعيونه ادموع
تصير ابگبره هناك اشموع
بلحده اتصير اللوعه نسمه
تونه اعرفنه معنى الخدمه
ومعنى الخادم
..............................
نرد للمجلس واياكم حلم نتمنى بالعاشر*
لگينه الدمعه مبخوته تداوي بلچمه الحافر*
عرفنه اليفگد احبابه يضل طول العمر حاير*
فقط جرح الولد يبقى بالحسين الخلگ كاسر*

جرح الوالد يبقى اهواي
ينزف كلما شاف الماي
والفاگد شيطّيب همّه
تونه اعرفنه معنى الخدمه
ومعنى الخادم


الفاتحه لروح والدي
علاء المياحي

(يهدى ثواب هذه القصيدة الى روح المرحومين خدام الحسين (ع) الشاعر محمد جهاد المياحي
والخادم رضا چاسب الباهلي)

يا نشعت مطر**
هيمه انه وانته الماي**
بللي الجرح من روج الدموع**
من عاشر العاشر ابقى عطشان**
يسگيني محرم وانبت اضلوع**
فطر بيه جرح ابكبر الخيام**
واذرّه ارماد خيمه**
وافصل ستره غيمه**
واعطش والتفت عالماي**
متبدي وجروحه اهواي**
وارسم چف واعيشن لچمة الآه**
واتخيل خدر وايتاني ملگاه**
ظلمه ودورت صينية اشموع**
واتهمس سوالف ضلت هناك**
واعثر بالحروف (ال الله وياك)**
واصفن بلكي اسمع صوت مرجوع**
دورت اشكثر بيه**
چن ضايعلي ترچیه**
بس چف اللگیته وخنصره المگطوع**
يا نشعت مطر**
هيمه أنه وأنته الماي**
........................
عيشني عذابك يا سراب احلام**
تانيتك محرم واحسب الايام**
باني من الدمع تله**
امحظرلك مهد بس عايز النبله**
يالضعنك مشه الحتفه**
متعوب ونزف چتفه**
واشتمك رماد من الخيم محروگ**
يالليلك ستر باگته عين السوگ**
عشرتنه حزنه المرّ**
عشرة محبس وخنصر**
من تخلص أحس ابروحي نزف ادموم**
لا ترحل اريد ابچيك كوم اهموم**
يا جرحي واحب نزفه**
وما أرضى الجرح يشفه**
تانيتك گلب أم ساعة الزفه**
هلگد ما اشيلن كومة أحزان**
ذكرني ظمه العطشان**
وينك يا محرم**
ليل وعمري أظلم**
يا نشعت مطر**
هيمه أنه وانته الماي**


علاء المياحي
الفاتحه لروح والدي

الشام يا نار الشام

من صاحو التمو اجت ..زينب عله النوگ*
احتاريت وين انطي الوجه.. تدري شني السوگ*
يضحكون من يمشي طفل.. مشيت المحروگ*
باگو حلال الله واحس.. ابحسرة المبيوگ*

وادخلنه للسوگ الصبح*
ضحكاتهم مثل الرمح*
واگبالي يچفون الماي*
يرشون بجروحي ملح*

الشام يا نار الشام
........................
وابماي حار اتسابگو.. من فوگ السطوح*
يا شوغة الماي اشكثر.. لو لاح الجروح*
واشبعنه بالسب والشتم.. ما قبلو انروح*
واحجارهم ينزل مطر.. لو نبچي وانوح*

زلمه يگلهم من علي*
انطوني مسبيه الي*
من حچيه حسيت ابنار*
بيش انتخي وذبحو هلي*

الشام يا نار الشام
..........................
يا كسرتي ابذاك الصبح.. گالو اجت هاي*
حرگولي گلبي بالقهر.. من شمرو الماي*
وگفونه بس يچوي الدرب.. وايتامي حفاي*
صار الوكت يفتر عكس.. يا ابو علي وياي*

جمار واتحرگه الشمس*
اعله اجروحنه نصبو عرس*
چان الحچي مثل السيف*
تذبحنه كل چلمه احس*

الشام يا نار الشام
..........................
ايام بيدينه الحبل.. واتسيل الدموم*
يضل ياكل ابچف الطفل.. يوم اقوى من يوم*
يجرونه لو مره گعد.. ما يگدر ايگوم*
شيوگفه واجروحه اشكثر.. يا خويه ملچوم*

جورينه شبعوه بالعطش*
والسوط بمتونه انتعش*
عليهم احومن بالليل*
ما نمت من يوم اهدعش*

الشام يا نار الشام
..........................
بمزمار واطبول الفرح.. تلگونه شمات*
الشام تارسنه وجع.. وشابعنه لچمات*
ايجيبون راسك عالرمح.. اگبال الزغيرات*
يحچولهن عن العطش.. وتبچي الاميرات*

بنياتك الشبعن جمر*
مشوهن ابدرب العثر*
وامن التعب ياهي اتطيح*
يولونهه ابسوط وسطر*

الشام يا نار الشام


علاء المياحي
الفاتحه لروح والدي

بالشام الطف ينعاد
والكافل بيه سجاد
جيش ايتام..طب للشام
مو أطفال وكلهه ازلام
..............................
بده موسم نصرهم والقصر اخرس*
سكت صوت الخناجر والحچه المحبس*
جيش ايتام حوطهم مثل مگدس*
راس حسين من شافاهم اتونس*

هذوله اشيوخ ولد اشيوخ*
فعلهم من علي منسوخ*
صلبو كل حچي بالشام*
وابخده النظر مكفوخ*

برمحه اتونس عباس
امن الخوف تموج الناس
مثل اخيام...فيّهم گام
مو أطفال وكلهه ازلام
...................................
ابأول صوت من زينب جفنهم رفّ*
نحر حسين ويه اسيوفكم الطف*
ابأول چلمه من زينب وزنهم خفّ*
اجينه الشام حتى الشام ينظف*

العگد والحل بدينه اليوم*
دمّ حسين بس يدوم*
شوفو ازغر ذبيح شلون*
املبس الرمح دمه اهدوم*

ازغر مذبوح ايصير
يمّ الله اشگد اچبير
فتح اسلام....اعله الظلام
مو أطفال وكلهه ازلام
................................
راس الاكبر اعله الرمح راد ايهد*
يزيد ايريد يحچي وگله أس واگعد*
يم عمتي الكلام اتفصل وتعگد*
كل السان بيكم لو حچت يلبد*

هنانه الحچي بس للزين*
زينب وين وانتم وين*
اسكت لا يهد عباس*
بالعباس كضه حسين*

لا تتوقع مذبوح
ايلگفك لو وين اتروح
دنگو الهام......يا اصنام
مو أطفال وكلهه ازلام
....................................
واتحرك رمح عبدالله واتعدلّ*
لو انزل قصركم صدگ يتبهذلّ*
لا عدبالكم بالسهم انه انشلّ*
النحري ابكيفي جبته وچان ما يندلّ*

عمتي هنا ولا تحچون*
كون اليوم تتغشون*
مو حسبالكم بس روس*
لو ننزل ترى اتخلصون*

لو أشر راس حسين
واحدكم يشرد وين
ما ينلام......الراح وهام
مو أطفال وكلهه ازلام
......................................
زينب من حچيهه ابروسهم تلظم*
لسه الشام واهله طابو ضل الهم*
كل الگاع تتنعم حدر ضلهم*
ويم گبر العقيله الخدم هالتلطم*

نصر امن الله عالظلام*
بخير حسين عاش الشام*
الفتح ابأيد زينب صار*
عبايتهه فتح اسلام*

كسرت خشم اليحچون
مثل الحرمه اينوحون
يضل اعوام.......مو ايام
مو أطفال وكلهه ازلام


علاء المياحي
الفاتحه لروح والدي

لذيذه الدمعه لمصابك*
لذيذه الوگفه يم بابك*
ثلاثه ايام صح عاري*
بس غاطيني بثيابك*

العاش ابنعمتك يفهم*
الدمعه كشخت المأتم*
جرحك نعمة من الله*
يلي الكل عطش زمزم*

يا غاية سوؤالي ومُنية احلامي*
معقوله الفرات ابصفك وضامي*
اعطش والگه جرحك تارس ايامي*

همت بيك..والاگيك..سگى وايبلل اسنيني*
يبو الخير..مثل طير..افرفح وانته تحييني*
.................................
فاتح ليّه بيبانك*
واشمر روحي بحضانك*
يا محلا عبوديتك*
مجّدي واطلب احسانك*


رغبة گلبي اتبعها*
وبس الاهلآ اسمعها*
منك يا ابو عافيتي*
وعني اذنوبي ترفعها*

وحگ الله اذا مو رحمتك ضايع*
اتدليني واحسك بالوجع شابع*
صریع وگلبك ابكل اللطف نابع*

وانه وياك..من اهواك..نسايم رحمتك حلوه*
الهوى ايلوگ..يمعشوگ..عليك ولازم اتچوه*
.....................................
اشتل عمري يم جرحك*
ليل واشتهي صبحك*
يالماكفتك عيني*
شلون امسيّر ابرمحك*

المثلك منخلق للحب*
تفك باب الگلب واتطب*
مو للحافر ايدوسك*
وعطرك عالرمال ايصب*

مال الله اشعجب راس ابرمح رايح*
شيسوي الورد فوگ الترب طايح*
يا جوري وطعم طف الالم مالح*


يجمار..الرمل حار..مكانك مقلة الزهره*
يشمام..رضى اينام..خظار ايلون الصحرى*
.....................................
عشگك ماكو من لونه*
خطيه الما يعرفونه*
يا راحة شكو متعوب*
شالك دمعه بعيونه*

اجمل چلمه احچيهه*
اسمك وافتره بيهه*
عشگك جمرة واستورح *
بضلوعي امن اغطيهه*

حلات الشوگ لو ابرد يچويني*
شفتك بالگلب ما شافتك عيني*
قانع بيّه انته وراضي تشريني*

هوى الروح..يمملوح..يأحلا اسوالفي العندي*
يجي الليل..وتراتيل..هواك ويالنجم تبدي*
..................................
يتالي الحب يمحبوبي*
الك كل منتهى ادروبي*
يبيك ابدي ويبيك انهي*
يغبشة عشگي واغروبي*

عمت عيني وفقط يمك*
تفتش من اجي اشتمك*
واحسك تاخذ ابأيدي*
واخط اعله الگلب رسمك*

رهن حبك شكو كل ذره بأحساسي*
اذا ماهن الك ما اشهگ انفاسي*
خدمتك دنيتي وبيك ارفعت راسي*

انه ابهاي..الك جاي..جرح كاشخلك ابدمعه*
الگلب ذاب..ولا طاب..عله چف النقص صبعه*



علاء المياحي
الفاتحه لروح والدي

التنطي للعالم كمر
بيديهه ارزاق البشر
ربنه كلهه اتدللي
واليندبج ما خسر

عظم الله اجركم بمصاب ام القمر عليهما السلام

نزلة العليله

غيّض ابريجك كل ماي..برّد اگليبي ابكربله*
هوه النهر لو بيه خير..چا صاحلك مية هله*
لو سهمك ايريد افياي..عبدالله نحرك سبله*
الواگف ابظهره العباس..متهمه نبلة حرمله*

خويه السهم لو خاف انته امشيله**
بيهم بخت غير انه هسه اعليله**
چا شفت اخيتك من تشد الشيله**
عاد انه اختك بالملاگه اكحيله**
...................
شيلفه حيلك بگماط..كلما تضوج اتگطعه*
شلتك ابحضني وحسيت..بحضيني شلت المشرعه*
خاف السهم يمشي ابعيد..الرگبه مدهه ورجعه*
احجزلي خيمه من اتروح..ابخت الحسين امگبعه*

ابنيهه يمكم واكتب اسمي اعليهه**
محجوزه لختي وگلهم امتانيهه**
بلحظه وتجيني والارض تطويهه**
حبابتي الزهره تجي تمشيهه**
.....................
ذب مهدك اهناك وگوم..والنبله لبسهه النحر*
هناك اكسر اعيون القوس..عبدالله واعيون البشر*
زحمه السهم وين ايروح..يحله الجرح كلما كبر*
خل يدخل ابرگبه ابعين..ما نطرد اليمنه عثر*

شايل جمال الله بجمال اعيونك**
ثگل القياده شايلات امتونك**
وجه الله كلهه الوادم ايشوفونك**
نحر العرش يرمونه من يرمونك**
.......................
نحرك علگ بيه شديت..واگبالي شفتك تبتسم*
يالما تضل ست اشهور..يالشاتل ابعيني الحلم*
لو طلع شفت العباس..تناغيله واتذكره ابأسم*
گله العليله اتانيك..تگلبها نسوان الزلم*

الماي يوگف كون اريده الجاري**
واصريخهم يوصل اسمعه الداري**
عمي الگمر من راح گلي اختاري**
الماي اجيبه لو انشفه ابناري**
......................
يمخظر ابعين القوس..بعد اختك ارفع ايدك*
اتهاده واصعد للغيم..وعلگ النجمه بجيدك*
هنيالك اهناك اتروح..الزهره فوگ اتريدك*
يمونس اعيون الموت..عاشور اعرف عيدك*

خليني اعيش اسوالفك محلاها**
هنيالهه العايش اخوها اوياها**
يا نعمة الله الموت ما خلاها**
وايامك الحلوه السهم باگاها**



علاء المياحي
الفاتحه لروح والدي