هذا نور الله نورك ياعلي
ياولي الله يانعم الولي
جيتك تسر العين أهلاً يبو الحسنين


1
الليلة جبريل ورد جوري نثر
وطلعت النـاس تدور عالخبر
حايط البيت لابو الحملة انشطر
والنبي صاح هلا بفارس مضر

والأمر صار نعم واضح جلي
فارس بدر وحنين أهلاً يبو الحسنين



2
علي الكرار مثل وروع مثل
حكه جبريل على الكعبة نزل
الليلة وجه البدر كله أكتمل
لجيته نقره مواويل وغزل

بالمحافل هلاهل تعتلي
هالفرحة من سنين أهلاً يبو الحسنين


3
ياعلي اليوم زهت جنة عدن
والحواري بفرح يتعايدن
بسمك تصيح علي ياباالحسن
ليلة العيد ذكرها بكل الزمن

أنت حبنا وسندنا الأولي
صحنا يحامي الدين أهلاً يبو الحسنين


4
الكمرة كل يوم ضواها يعتلي
وأنت بس يوم بقه نورك جلي
الهادي سألوه عن السر الجلي
قبل الأصلاب خلق ربنا علي

علي الكرار سند هو إلي
خوتنه رمش وعين أهلاً يبو الحسنين


5
الله خلاك نجم وسط السمه
ياعلي وهاي عظيمة المكرمة
بليلة العيد دعتلك فاطمة
من الفردوس يحامي الحمه

أنت بعلي نعم وأنت الولي
روح بوسط جسمين أهلاً يبو الحسنين


6
كل الكلوب نعم صاحت سوه
أسم أبو حسين مثل شم الهوى
أنت داء العشك وأنت الدوه
وأنت سر الخلق والمحتوى

هالرسالة تألم عاذلي
بس حبه مختارين أهلاً يبو الحسنين

شطره
امجد صاحب الشطري

https://hottg.com/oydgh

الليلة بسمانه أكتمـل بدر السعد
نور أبو الحسنين بالكعبة أنولد

1
الليلة أملاك السمه صطفت سوه
ترتل آيات الفتح والقل هو
الليلة من الكعبة يتلاله الضوه

أسد جابت ألنه فاطم بت أسد

2
الليلة صوت من العرش ظل يعتلي
ياولي الله يانعم الولي
الباري ناده لا فتى ألا علي

واحنه صحنه بصوت ياحيدر مدد


3
الليلة وجه الظلمة من ساسه أنغمر
وحايط الكعبة العلي كله أنشطر
الناس فرحت وبتهج سيد البشر

وصار جف المصطفى لحيدر مهد

4
الليلة لأجله تزينت جنة عدن
والحواري بالولادة يسبحن
هلا بجيتك ياعلي ياابالحسن

بيك كل الخير ياحيد أنوجد

5
الليلة من جبد السمه نازل نهر
هذا ماي الكوثر لحيدر صدر
نزل يروي عروقه من فارس مضر

يدري حب المرتضى أحلى من الشهد

6
الليلة أجمل ليلة بيها الحق نزل
ونجمعنه بحب علي خير العمل
هذا حيدر هو مفتاح الأمل

شما نحبه يزود حبنه أكثر بعد

7
الليلة كل عاشك يحضر مُنيته
من علي الكرار يأخذ حاجته
كون تفرح يالموالي بفرحته

وكله يابو حسين ماعوفك أبد

شطره
امجد صاحب الشطري

https://hottg.com/oydgh

(حــــب علـــــــي)

اهواي كالولي اليحب حيـدر حـرام
وآنــه أكلهـــم حتــى لو حبه حـرام
أبقى كل عمري وأموت بحب علـي

هذا رأيي الشخصي محد بي شـريك
آنه حبيتــه وقـــراري أيعــــود إلـي

لاتحـاول تغــري روحي أبهـل كـلام
روح الله أيسامحـــــــك ياعــــــاذلي

هـــذا للعشــاك بالمحشــــر كفيــــل
هذا قتــــال العـــرب حــامي الدخيل
هذا أبو الحسنين قطعة مـن الدليــل
أعـز مـن أمـي وأبـوي وكــل هلــي

حيدر الكعبـة الشـريفة طلكـــــت بي
وجابت الكرار ألنــــــــه أشرف ولي

علي لو ما الــــــــه عنــد الباري جاه
جــــا جـــدار الكعبــة ماطــــــر العلي

والله لــو حبه ذنب هـــم أرضــــــه بي
والله لو بعــدونـي أزحــــف وأعتنـــــي
والله لـــو ينبـــاع بالـــــدم أشتـــــــري
هذا عهـــــــدي ألآخــــــري والأولـــي

الجنة لو مابيها حيـــــــدر والبتــــول
ما أطبهــــا لــــون بالنــــار أنصلــــي

يالبديت بسيــرت الحــــق والحـــــرام
راح أسمعـــك منيتـــــي ياســـــــــائلي

الجنة مخلـــوقة العلــــــي قبل النشوء
شلون كلــــي أتعيش جنـة إبـــلا علي

امجد صاحب الشطري

https://hottg.com/oydgh

🔳🔻 جديد 🔻🔳

قصيدة { آخر رواية }

▪ الرادود 🎤 : #جمعة_حامد
▪ الشاعر 📝 : #أمجد_الشطري

▪ المناسبة 📅 :
استشهاد السيدة #فاطمة_الزهراء (ع) 1445 هـ
( الرواية الثالثة )

#حسينية_أبي_الفضل_العباس - #الصفار

▪ رابط القصيدة :
https://youtu.be/jIC0WRt6fkk?si=yHCw-OfDyADpBHSp

اجيتك منكسر ضلعي اجيتك
ييمـه وعالجسر نايـم لكيتك
نوحي عليك يمـه شبيـك صد عينك عليه
مثل حسين نور العين هم رحت من أديه
(اجيتــــك)
__________

1
أسمعت صـوت النايبـة وهــزنـي بجيهـا
هَــّل الجنــازة العالجســـر محـــد يجيهـا
قلــــت لازم أمشـــــي والليلـــة اعتنيهـا
جنــازة الكـاظـــم منـــو يــدلينـــي بيهـا

اجيت وشفتك أنت امددينك
أويلــي وبالحديــد مقيدينك
أنـت تـروح وآنه النوح ظل يوليدي إليه
مثل حسين نور العين هم رحت من أديه


2

منهـــــو اليقابلنــــي ويشــــارك ونينــي
جنـــي زينـــب حـايـــرة ومحـــد يجينــي
صرت عالراس الطم وأيدي أعله عينــي
ليـش بالســم والــذبـــح خلصــوا بنينــي

السم والذبح واصـل سابـع إيمام
بعــد خمسـة ورآي اشحمـل ألآم
ما أرتـاح هــم ونيـاح أقضــي كـل مسية
مثل حسين نور العين هم رحت من أديه


3

بدمعي أودعــك يمـه ولصـدري أضمـك
راح أحــاول ضلعـــي ماخلـــي يلجمــك
آنـــه يالكاظـــم الـــزهــــرة آنـــه أمــك
رغم كسرت ضلعي اجيـت الليلـة يمــك

أصيرن ناعيـه أكبـال الحماميل
ومثل دم الاديـن المدمـع أيسيل
عالتابوت يعلي الصـوت وانصبلك عزية
مثل حسين نور العين هم رحت من أديه


4

جنــــي أسمــــع منـــــك حجــايـــة خفية
تقلـــــي يمـــه بطّلــــي نـــوحـــــج عليه
جسمي صاحي وذني عندي جفوف أدية
نوحـــي عالـداســــت عليــــه الأعوجية

جدي حسين ظل جثة بلا رأس
خيامة محرقة ومذبـوح عباس
ركـض الخيـل تسحك حيـل والعمة سبيّة
مثل حسين نور العين هم رحت من أديه


5

كـــل مصــايبكــــم عليــــه أنــــي ثجيلـة
بـس مصـاب حسيـن أبـد ماصــح مثيلـه
عــاري ثلــــث أيـــــام مـاواحـــد يشيلـه
مـن الكفــه مذبــوح وتشـوفـــه العقيلـة

صدره الشمر ويلـي أتربع أعليه
يقلها حسيـن زينب خويه عوفيه
خيــل ونــار والأشــرار مـــابيهــم حميه
مثل حسين نور العين هم رحت من أديه


6

هــل مصايـــب كلهـا مكتوبــة علينــه
بيــن بقعــة وبقعــة ليــش اطشرينــه
واحــد بسـامـــره واحــــــد بالمدينــة
واحــد بطـــــف كــربــــلاء مقطعينــه

واحـــد بالنجـــف واحـــد ابغــداد
أظل طول الدهر أنحب على أولاد
عالوليان تبقى أحـزان قلبـي وهمـي بيه
مثل حسين نور العين هم رحت من أديه


بغداد
امجــد صاحــب الشطــــري

https://hottg.com/oydgh

نار نار بالقلب تسعـر
راح راح موسى أبن جعفر
وألالـــــم زاد تبجـي بغــداد


1
الليلـة مـن يادمـع نبــدي والجــروح أهواية
والحـــزن بالكـاظميــة اليـــوم نـاشــر رايـة
مـــن علــى جســـر الأئمــة ناحــت المشاية
ودجلـة مـن كثـر المصيبـة ضـل يلاطم مايه

آه آه يبســت اجــروفـــه
آه آه والسمـة أتشـوفــه
والجــرح عــــاد تبجــــي بغـــــداد


2
اليهجــر أهلـه ومايعـــاود بالغـــرب يلكونه
تنـزل أدمـوع اشتياقـه وتيبس أعله عيونه
المالـه بــس الله ودعــائــه بيمــن أيطلبونه
وليـش فــوك الغـربـة ويلـي وآدم أيسمونه

ليش ليش تجري دم عينه
ليش ليش من يسمونه
لسيد الأسيــاد تبجـي بغــداد

3
مـن صبـاك وبالمصـايـب جـان ضنـك عالم
سيـدي وتــدري مصيــرك بيـــد ذاك الظالم
ماجنت مـن مـوت خـايف ماجنـت هـم نادم
جنت متوكـل علـى الله أبكـل وكـت يالـكاظـم

راح راح ينتقــدم منك
راح راح وأنت ماجنك
يبــن الأمجــاد تبجــي بغــــداد


4
خمسطعش عام بحسرتك يامـه قلبــك عانه
خلصـت عمـــرك يمــوسى عـايش بزنزانه
لا خبـــر منــــك يجينـــه حيـــــرة يامولانه
سجنــك أتـــأذيت منـــه وهــم رجـع أذانه

وين وين إلحــك أعلينـــه
وين وين لا تجــــافينــــه
كلــشي مافـــاد تبجـــي بغـــــداد


5
حيــن حسيـــت بـرحيــلك دمعتـــك مجمــوره
وضحت بجدران سجنك صورة واسوه صورة
شفـت بالحومـة أبـو اليمه وذبحتـه ابعاشوره
كمـت تنعـى حسيـن جـدك وأنــت بلطــامـوره

حسين حسين بالسجــن شفتــه
حسين حسين ينحب أعله أخته
لذبــح الأولاد تبجـــي بغـــداد


6
كلـشي متوقعيـن والسـم مـاحسبنـه أحسابه
ينفطـر جبـدك ونــورك جــن يحيـــن أغيابه
نعشـك أعلــه الجســر يبقـه ينتظـــر أحبابه
ويصرخ الناعي أبن جعفر حان يوم مصابه

عليك عليك ننحب بحسرة
عليك عليك ناحت الزهرة
ظلمة البلَاد تبجي بغداد

شطره
امجــد صــاحب الشطـــــري

https://hottg.com/oydgh

سلام الله أعله قبرك سلام الله أعله صبرك


1
أسلــم وأذكــــر الكاظــــم بالآهــــــات
وأعَبـّــر وأتـــرك بصـــدري علامــات
يمـن عمـرك كضــه بهـــم وجراحــات
على أجروحك على همومك سلامــات

سلام الله أعله عمرك سلام الله أعله صدرك


2
سلام الله علــــى كــــــل ذكــــــرياتك
سلام الله أعلـــه سجـادة صـــــــلاتك
سلام الله علــــــــى أول حيــــــــــاتك
سلام الله لحــــد لحضــــة ممــــــاتك

سلام الله أعله قدرك سلام الله أعله فكرك


3
سلام الله علـى قيــودك ضـــوه العين
وعلى اجفوف الأمس نزفــن قرآءين
سلام الله أعلــه سجنــك والحيــاطين
وعلـــى ذاك الصبـر يابـــو الجوادين

سلام الله أعله قهرك سلام الله أعله نحرك


4
سلام الله أعلـه كـل دمعـة مـن العيـون
سلام الله علـــى إحسـاســك يمسجـون
متـــت مسمـــوم والـــــوادم يشيعــون
صـرح عالـي صــرت وإنــزاح هارون

سلام الله أعله أجرك سلام الله أعله بدرك


5
سلام الله أعلــــــه أرض الكاظميــــة
وعلـى جنـة ضريحـك هـــل مسيـــه
سلام الله أعلــــه قبتـــــه الذهبيـــــة
وعلـى الرايـة وعلـى جســر المنيـة

سلام الله أعله سرك سلام الله أعله سترك

6
سلام الله أعلــه كــل زايــــر تعنــاك
كصـد مشـاي وبهــــل الليلـة زاراك
إمـام الرافضـة أبكـل حســرة نـاداك
أمــوت وما أعـوف بيـــوم ذكـــراك

سلام الله أعله أمرك سلام الله أعله ذكرك

شطره
امجــد صـــاحب الشطــــــري

https://hottg.com/oydgh

إمامي إمامي أنا عاشك إمامي
سلامي للحسين والعباس إمامي

1
أنا من أول صباي للحسين أنتمائي
وأظل شيعي للموت للزجية ولائي
بفخر شايل الواي منهو يكرب لوائي

بداياتي للحسين واله يبقه ختامي

2
أنا خادم حسين كاتب أعله الهوية
نعم حبه لليوم عايش إحساسه بيه
أنا منه ماتوب هو خيمة عليه

الملك كلشي بالروح اله أبدي احترامي



3
أنا بروحي الجنوّن وبجوني آنه عاقل
عشت عمري منذور للحسين وبوفاضل
سِره بدمي هالشوك جن مسيرة قوافل

عشكهم بالعيون هذا آخر كلامي

4
صرح حب الحسين هو لمني وحواني
بدونه يهالناس ياخلك شسوه آني
قسم بأسمه للموت مااحب غيرة ثاني

حبيبي بوسجاد هو عَلّه مقامي


5
أبو الغِيرة عباس سلمت أيدي بيده
سكن حبه بالروح عن دراية وعقيدة
قصيدة اكتب عليه أو مو كفاية القصيدة

الشعر مايوافي شما أوصفه بهيامي


6
أنا بطول السنين ما أغير أعتقادي
أبو الغِيرة وحسين آنه أحبهم أنادي
دخل تسمع الناس هذا شوكي أودادي

أنا خادم حسين ومنه مأخذ وسامي

شطره
امجد صاحب الشطري

https://hottg.com/oydgh

هاي أم البنيـن الليلة مسرورة
عباس الكمر شع بالسمه نوره

1
هاي الجابت الليلة أبو فاضل
عنوان الوفه وأم الكوافل
ألها اليوم مبتهجه المحافل
تنطي الناس كلها بلا مقابل

قديّسّة علي بالكون منصورة

2
هاي الطاهرة الحرة الأميرة
تحضر بالزغيره وبالجبيرة
من عدها أنعرف مصدر الغِيرة
وخلتها بكلب ليث العشيرة

وعباس الكمر كلنا أنعرف دوره

3
فاطم بت حزام ونعم منها
مانوفي الوصف لو نحجي عنها
جفوف الدهر أبداً مالونها
عاشت بينه وتخلد زمنها

راية حيدره بيديها منشوره

4
بحب حامي الحمه ربت ولدها
وبجنة عدن صاغوا مجدها
من أم الحسن أخذت مددها
وأغلى إنسان هو حسين عدها

منها والنعم والحرة مشكورة



5
من أطهر رحم معدن أصلها
كلي يامره وفت مثلها
أنطت كل ولدها وكل أهلها
جان حسين أبو اليمه أملها

وفت للحسين بأكمل الصورة

6
دايم فاطمة نحجي بفخرها
والكل البشر أنطت ثمرها
عند الله وعلي وعدنا شكبرها
مازَلت ولامره بعمرها

كل أرواحنا للحرة منذورة

شطره
امجد صاحب الشطري

https://hottg.com/oydgh

لِبَنْيّ الزَهراء حبي فَهمُ نبضات قَلبي

1
بــ طه ابدي أول كلامي ياهلا ياهلا
هو كل شوكي وغرامي ياهلا ياهلا
حيدره يبقه أمامي ياهلا ياهلا
بالحشر هو المحامي ياهلا ياهلا

أولياءُ الله رحبي فَهمُ نبضات قَلبي

2
فاطمة وكل خيري منها ياهلا ياهلا
الحسن وحسين ابنها ياهلا ياهلا
عاجز منين أحجي عنها ياهلا ياهلا
الجنة كل عاشك ضمنها ياهلا ياهلا

فبهم ينزال ذنبي فَهمُ نبضات قَلبي


3
بالحسن وحسين أخيه ياهلا ياهلا
روحي انطيها هدية ياهلا ياهلا
بزينب الكلها حمية ياهلا ياهلا
أخت عباس الشفيه ياهلا ياهلا

عينِ للأنوار تربي فَهمُ نبضات قَلبي

4
بزين العباد آنه افاخر ياهلا ياهلا
بالفرح هليلة حاضر ياهلا ياهلا
روحي لمحمد الباقر ياهلا ياهلا
والعشك باطن وظاهر ياهلا ياهلا

بحروف الآل نَدبي فَهمُ نبضات قَلبي




5
آنه عاشق وأبقه عاشق ياهلا ياهلا
وخادم الجعفر الصادق ياهلا ياهلا
الكاظم اسمه يبقه شاهق ياهلا ياهلا
وللجواد العشك سابق ياهلا ياهلا

بهمُ يَنزاح تعبي فَهمُ نبضات قَلبي

6
للرضا شوكي أودادي ياهلا ياهلا
من علي والعلي الهادي ياهلا ياهلا
بالحسن كل اعتقادي ياهلا ياهلا
وبسم مهدينه أنادي ياهلا ياهلا

اسمعوا هاليوم خَطبي فَهمُ نبضات قَلبي

شطره
امجد صاحب الشطري

https://hottg.com/oydgh

بألف الصلاة الليلة نبدي
يامرحبا بجيتك يمهدي
يامهدي يامهدي يامهدي العجل


1
وجهك ضوه علينه بجماله يامرحبا بطله هلاله
أول سلالة ألنه محمد وأنت يمهدي آخر سلاله

صوت الصلّه بجيتك تعاله إشراقه الحب بكماله
ميلادك السر الإلهي يامدرسة وحي الجلالة

هالدنيا مخلوقة أعله مودك
مابيها معنى بلا وجودك
يامهدي يامهدي يامهدي العجل




2
يالمهدي أيامك سعيدة يامنهل أدروب العقيدة
كلمن نكر نص الإمامة باجر يموت ومن يفيده

هاك أسمع الخادم نشيده أينادي غيرك مايريده
ياخاتم العترة الأفاضل لعيونك أقدم وريده

هو أنت للعاشك وسيلة
نورك ولا شفنه مثيلة
يامهدي يامهدي يامهدي العجل



3
قلب المحب ناثر وداده متلهف لهاي الولادة
ليلة نصف شعبان هايه نحيها بالحب والعبادة

عيدك علينه الباري عادة والتمت بروحي السعادة
العاشك اليدعي بظهورك يايوم يتحقق مراده

كل جمعة مرفوعات أدينه
عجل يبو صالح علينه
يامهدي يامهدي يامهدي العجل



4
ياسيدي وتاج المعالي الماله أول ماله تالي
أنت البداية والنهاية واربعطعش نور أعله بالي

يافرحتي وعيدك حلالي ياندبتي بطول الليالي
كل لحظة وتمر بخيالي يالمنتظر واطرح سؤالي

ياسيدي بيايوم أشوفك
جاوبني أريد الثم جفوفك
يامهدي يامهدي يامهدي العجل


5
أمنيتي يتلاكن سوية عيدك مع الطله البهية
وتلمنه يالمهدي برداك من كربله لقبر الزجيه

ونعيش كل أحنا سوية بظل القيادة الحيدرية
تتغير الدنيا بأسرها بدولة الحق المهدوية

خلفك نجي نصلي جماعة
ونصيح إلك سمعاً وطاعة
يامهدي يامهدي يامهدي العجل



6
للجية ملهوفة المشاعر يالغايب وردناك حاضر
تشاركنا هالفرحة العظمية وبجيتك أطيب الخواطر

بيك أعله كل واهم نفاخر ونكله يرجع ألنه باجر
لابد يشوفك بالحقيقة واكف تنادي أعله منابر

بثاراتك تصيح وتطالب
وبعدلك بسيفك تحاسب
يامهدي يامهدي يامهدي العجل



شطره
امجد صاحب الشطري

https://hottg.com/oydgh

عمري وياك ما أنساك

1
يالمهدي هذا آنه الحبيتك
دلالي ياغالي أصبح بيتك
ياروحي وياعمري سميتك

من دونك اختنك من دونك
ياشوكي حكهم يحسدونك
غير أنت من علي يعرفونك

آنه هواك ما أنساك



2
من عيدك آنه أرسمت أمالي
(محسود) بهذا الحب هنيالي
ياواضح مثل النجم العالي

ادعيلك وانتظر ميعادك
واترقب وي صبح ميلادك
دلالي يابو صالح رادك

وين الكاك ما أنساك



3
إشراقه كل عاشك من نورك
يالماخذ من حيدر دستورك
عرش الله بهاي الليلة يزورك

يالمهدي وجم ملك يدعيلك
وينادي للفرج شد حيلك
بيت الله بالنصر يوميلك

ليومك ذاك ما أنساك



4
بكل مصداقية أحجي وماجامل
بحبك آنه المجنون العاقل
لو كل عمري أنطي لك تستاهل

هالكلمة بضامري مكتوبة
بس أنت للكلب محبوبة
الميحبك منهو يمحي نذوبه

بروحي أقراك ما أنساك



5
يالغايب ماأكدر من دونك
مشتاق بحلمي أنظر لعيونك
يمته العالم كله يشوفونك

من تظهر دولتك تبنيها
والراية بالسمه تعليها
والزمرة من العرج تفنيها

يعله الواك ما انساك


6
كل جمعة أدعي بحيدر وبفاطم
ياساعة أيعود المهدي القائم
فرّح قلبي وفرّح كل خادم

بسمانه من يشع هلالك
كل عاذل يرجف من خيالك
ميقاوم لو لمح زلزالك

قلبي فداك ما انساك


شطره
امجد صاحب الشطري

https://hottg.com/oydgh

نعزي فاطمة

اداء ملا #محمد_بوجباره
كلمات #أمجد_الشطري

مجلس القاسم ابن الإمام الكاظم القطيف الخويلدية

https://youtu.be/8UMCuQJlhXY?si=OP5L5cAyTdSkdGFJ

بالجنة الكمر بان
شَرّف كل الأكوان
مكتوب أحلى عنوان
ميلاد الحسن

1
نور الباري أشرق من جنة عدن
وتبين علينه ميلاد الحسن
مجموعة الحواري بجيته يهلهلن
هذا ابن الوديعة للضايع وطن

عطر الجوري والهيل
هب من نجمة سهيل
أشعار أو مواويل
ميلاد الحسن

2
نزلت أحلى بشرى من رب السمه
للزهرة الزجية والحامي الحمه
محتارة الملائك شنهو تقدمه
وراعي الغِيرة هو سيد المكرمة

حبه الماله تفسير
عجزتها التعابير
هو مصدر الخير
ميلاد الحسن

3
بعين الزهرة فرحة أوسع من جبل
لن شافت أبنها ضَيّ وجها أكتمل
طه الليلة صَلّه والكون أحتفل
وأحنا نهي فاطم وي خير العمل

للزهرة مهنين
شيعة أحنا أو مولين
اليوم أيكحل العين
ميلاد الحسن

4
ياشوك اليلمنا بميلاد الكرم
وبثغر المحبة كل لون أنرسم
وجه الحب تعطر والعيد أبتسم
هي الدنيا كلها من دونه عدم

هذا الشايل الرأس
بيه تتفاخر الناس
ساكن وسط الأنفاس
ميلاد الحسن

5
هل الفرحة الجميلة بينه من تمر
نضويها الصواني لأجل أبن الطهر
نلبس أحلى ملبس وبأطيب عطر
نحضر بالمحافل حد وجه الفجر

ذكره أيطيب الروح
تشفه كل الجروح
راية وبالسمه يلوح
ميلاد الحسن

6
ذولة أحنا الغيارى الما نخلف وعد
الوالينه وسندنا منطين العهد
ندعي الله ورسوله والحيد الأسد
بهل الخدمة العظيمة ينطينه مدد

نبقه بكل سنة وعام
لأبن الزهرة خدام
يحلى بهاي الأيام
ميلاد الحسن

شطره
امجد صاحب الشطري

https://hottg.com/oydgh

الما يريدك يالحسن منريده
****************
١
المايحبك سيدي بجنونه
روحه تصبح بالغدر مرهونة
واليحبك يالحسن خيعونه

نلكه أسمك طابعة بجف أيده
الما يريدك يالحسن منريده

٢
اليريد محبتك يشريها
كون باجر مايساوم بيها
ومثل روحه العاشك أيداريها

ومن عشرتك عنده قمة بعيدة
الما يريدك يالحسن منريده

٣
خل يطم روحه اليريد ايعوفك
وخله باجر بالقيامة أيشوفك
يظل يتنخه ويبوس اجفوفك

خلي دينه بالقيامة أيفيده
الما يريدك يالحسن منريده

٤
خل يفيده بالحشـر محبوبة
بدكت الميزان ترسي أذنوبه
لايجينه ولايكول أتوبة

هوه شاريها المذلة بأيده
الما يريدك يالحسن منريده

٥
لايكول أنه بعشرتك ذايـب
احنه نعرفها التضد وتصاحب
مانريده بغير حكه أيطالب

بالبداية وماعـرف تحديده
الما يريدك يالحسن منريده

٦
مستحيل بعشرتك يتباها
عِشرة صعبة منين لو يقراها
خل نشوفه وفنه إذا سواها

حتى من يغلـط كلبنه أيصيده
الما يريدك يالحسن منريده

٧
هذا صوتي وصوت أهلي وناسي
اليوم ارفعه ويرتفع مقيــاسي
أبقـى شيعـي ودوم ماطـخ راسي

فرض حبك والشعوب أتريده
الما يريدك يالحسن منريده

٨
عهدي ما أعوفه لظـل بعهدي
آنه أبـوي العلامانـــي وجــدي
وغير شخصك يالحسـن ماعندي

لسناني بس اسمك تـراه أيجيده
الما يريدك يالحسن منريده

الشطره
امجد صاحب الشطري

https://hottg.com/oydgh

للحسن للحسن نادينه ياهــلا ياهــلا بوالينه

1
هذا نبع الزلال الصافي
شما نخدمه نعم موكافي
كل عمرنه معاه نوافي
والوفه مآخذه من أسلافي

هالشرف هالشرف يكفينه ياهــلا ياهــلا بوالينه

2
هل إمام الله رافـع كدره
لازم أبكـل قداســة انذكره
والي مايعرف أسمه وسره
والـده حيــدر أمـه الزهرة

لفاطمة لفاطمة هنينه ياهــلا ياهــلا بوالينه


3
للحسن منزلة عد جده
هو ريحانته وسر وجدّه
هالوالي أسمه حرز بالشِدة
وحاشه بابه بوجهنه يسده

بالشدد بالشدد يلفينه ياهــلا ياهــلا بوالينه

4
زاهد وعابد ومن طيبة
من علي عنده قوة وهيبة
لو حجه معدل بترتيبه
واليبغضه يحس بالريبة

واليحبه طهور الطينة ياهــلا ياهــلا بوالينه




5
أفرح اليوم يشيعي بعيدك
كلشي باجـر تره ميفيدك
تمسك بكل إمام بأيدك
وعالمجالس تربي أوليدك

خل يصيح بشرف وفينه ياهــلا ياهــلا بوالينه

6
بالشدايــد أبـــــد لتبــــالي
ينتهي كلشي بسم الــوالي
هو للمــوت يظــل الغــالي
والعشك حيــدري للتــالي

حقنه هاليوم إذا غنينه ياهــلا ياهــلا بوالينه

شطره
امجــــد صاحــــب الشطـــــري

https://hottg.com/oydgh

‌‎[ بعيوني عبره ]
-
أداء الملا #محمد_بوجبارة
كلمات الشاعر #أمجد_الشطري
-
ذكرى استشهاد السيدة فاطمة الزهراء
عليها السلام 1445هـ
-
حوزة الرسول الاعظم - الكويت
-
مخطوطة - حسين مقيم
ترجمة - حسن القطري
‎مكساج - حسين نجم
مونتاج - محمد الخليفي
إدارة المتابعة - محمد عبدرب الرسول
إدارة الإنتاج - محمود السلطان
-
https://youtu.be/VmU735pXOfo
-
إنتاج: #بوجبارة_ميديا
1445 هـ - 2024 م

باعدنا الزمن ونعدمت الشوفه
أنتي بالمدينة وآنه بالكوفة
ضلعج فاطمة بالباب مكسور
آنه الليلة راسي بسيف مطبور
يزهره يزهره


1
يالزجية والله دنيا وضاع كلشي من أدينه
يالزجية ليش واحنا بقبر واحد ماصفينه
يالزجية الليلة عندج علم راسي مطبرينه
يالزجية ياطبيب أيداوي جرحي يالحنينه

شوفيني يزهره كومي شوفيني
دم راسي أحسه ينزل بعيني
عمري شلون أخلصه وقلبي مجمور
آنه الليلة راسي بسيف مطبور
يزهره يزهره



2
شلون دنيا عشنه بيها هموم من أول عمرنا
شلون دنيا فرحة وحده بالعمر مافرحتنا
شلون دنيا هي والودام يزهره شيبتنا
شلون دنيا تقاسمينا همومها وعشنه بصبرنا

آنه وياج هاي الدنيا عشناها
وهموم الحياة تقاسميناها
كلنا الدنيا يمكن باجر أدور
آنه الليلة راسي بسيف مطبور
يزهره يزهره


3
يامصيبة بيها اسولف واشفي قلبي بهالمسيه
يامصيبة كسر ضلعج لو طبرتي يالزجية
يامصيبة ثنينه تحملنه ضيم وهَمّ وأذية
يامصيبة تفركينه رغم ماجنه سويه

ليش بهم يزهره تنتهى العِشرة
أنتي بسطره رحتي وآنه بالطبره
مجبور أعله هذا القدر مجبور
آنه الليلة راسي بسيف مطبور
يزهره يزهره


4
حالة صعبة علي نايم يأم حسن وبلا عمامة
حالة صعبة وجه أصفر بَعلّج ويصعب كلامه
حالة صعبة مااظن أرجع واكومن بالسلامة
حالة صعبة اليتامة أتصيح رد يابو اليتامة

زينب تلتفت ليه وتحاجيني
الله عليك بويه لا تجافيني
كتلها بحسرتي أتهدم السور
آنه الليلة راسي بسيف مطبور
يزهره يزهره


5
شلون ليلة ليلة العصره وبعد ليلة وداعي
شلون ليلة من أموت وعالنعش يوكف الناعي
شلون ليلة لليتامة منهو بعدي يصير راعي
شلون ليلة يالحبيبة ينتهي كلشي بضياعي

قلبي من المصيبة مكطّع ودامي
مره أبجي أعله حالي ومره ليتامي
بس باجر وأنام بين الكبور
آنه الليلة راسي بسيف مطبور
يزهره يزهره


6
مو بدينه الصـار كلـه يالوديعة مـو بدينه
مو بدينه نفـس هـاي الحالـة تكرر علينه
مو بدينه تنـدفـن بالشـام زينـب يالحزينه
مو بدينه والحسيــن بكـربلـه محـد يعينه

حيرة يأم حسن تتبعها إلف حيره
حتى أولادنا كل واحد بديره
رأس حسين يعله بيوم عاشور
آنه الليلة راسي بسيف مطبور
يزهره يزهره

شطره
امجد صاحب الشطري

https://hottg.com/oydgh

بحنانك دللتني يبويه يبويه
تركتني ويتمتني يبويه يبويه


1
أنه زينب يبويه افتحلي عينك
قبل لتروح ضمني ابين أدينك
حنين أنت ولا يوصف حنينك
تفكر بيه والدم بجبينك

ضعت لمن عفتني يبويه يبويه
تركتني ويتمتني يبويه يبويه


2
تعال ارحمني بويه وشوف حالي
بعد جم يوم يتفرهد دلالي
لَوَن منك يصير البيت خالي
عليه تزدحم سود الليالي

وبعد منهو اليلمني يبويه يبويه
تركتني ويتمتني يبويه يبويه


3
جريمة تروح من عندي جريمة
عَلَي صعبة إذا كالو يتيمة
حياتي بلا أبو ما ألها قيمة
هضيمة تعوفني والله هضيمة

برحيلك عذبتني يبويه يبويه
تركتني ويتمتني يبويه يبويه


4
إذا عني أرحلت شيضل أليه
البشر والدنيا تتغير عليه
جبتها من الضلع هم واذية
واختمها بذبيح الغاضرية

المصايب لوعتني يبويه يبويه
تركتني ويتمتني يبويه يبويه


5
أنا بسابع سنة وأمي تركتني
وأنت بهجرك اليوم أفجعتني
وباجر كل هلي لو فاركتني
الشمر بالسوط يضربني أعله متني

يريتك لاشفتني يبويه يبويه
تركتني ويتمتني يبويه يبويه


6
بودعك ناظري لاوين أديره
حيرة وحيرتي بويه جبيرة
شلون أتيسّر وآنه الأميرة
غريبة بكربله ومالي عشيرة

النوايب شيبتي يبويه يبويه
تركتني ويتمتني يبويه يبويه


بغداد
امجد صاحب الشطري

https://hottg.com/oydgh

ياهازم الأحزاب حيدر يحيدر
ياقالع الأبواب حيدر يحيدر
أنت علي من العلي


1
علي أنت الولي من البداية
شكول عليك يالمالك نهاية
يواضح بين قاموس البرايا
يآيه وأصبحت للدين راية

مثلك نحصل وين حيدر يحيدر
بس أنت أبو حسنين حيدر حيدر
أنت الولي من العلي


2
علي بكل موزمه تارك علامة
يسيف الموت ياشيخ الامامه
يفارس خيبر ومنفي الظلامه
وبنفس الوقت راعي اليتامه

ياقابض الأرواح حيدر يحيدر
حتى اليضربك صاح حيدر يحيدر
ماتنجلي من العلي


3
تبوك وخيبر وصفين وحنين
لو ما أنت منتصرن يبو حسين
يعرفونك علي ضارب بسيفين
بحيث إلي يجيك يصير نصين

وبضربتك ميزان حيدر يحيدر
تتخير الشجعان حيدر حيدر
شما تعتلي من العلي


4
نشوفك ياعلي بكل دور حاضر
منو مثلك عبر ماضي وحاضر
علي مافرطت بيك المصادر
أديان السماء بسمك تفاخر

ياعله التكوين حيدر يحيدر
كلشي أنذرت للدين حيدر يحيدر
شمعة هلي من العلي


5
علي لو ماوجـودك بالخليقة
جا كـل الوهـم أصبح حقيقة
محمـد من صرت أنت رفيقة
عرفت شلون أنت تشق طريقة

دين النبي الإسلام حيدر يحيدر
بسيفك يحيدر قام حيدر يحيدر
حبك إلي من العلي


6
يحيدر حكمتك جانت بصيرة
عرفت الناكر وبايع ضميره
الخلافة جانت بأيدك أسيره
خذوهم الوادم الماعدها غيره

أنت ولي الله حيدر يحيدر
غصباً على الأعداء حيدر يحيدر
واضح جلي من العلي


7
تظـل أنت ولينه ياصميده
وغيرك ياعلي لا مانريده
اليبضغك بالقيامة من يفيده
لو ما بالولاية مخلي أيده

يوم الحشر بحماك حيدر يحيدر
عالفطره حبيناك حيدر يحيدر
ياعاذلي من العلي


شطره
امجد صاحب الشطري

https://hottg.com/oydgh