خليك في السعي طماع وفي النتايج راضي.

الحياة صح مش ساهله ولكنها مش صعبه ..

و كل الناس اللي انت تشوف فيهم ناجحين او عندهم فلوس او بالنسبه ليك امورهم طيبه انت ماحضرتش الرحلة امتعهم ولا حضرت كم مره خسروا فيها ولا شفتهم في مواقف الصعبه اللي ماوروهالكش .. انت تشوف بس في نجاحهم المبهر او في سيارته اللي ماتعرفش شن دار باش شراها او في حوشه اللي ماتعرفش قداش عقد باش بناه ولا تعرف خدمته قداش مره اعتر و فشل فيها باش انت وصلك النتيجة اللي هو فيها ..

مافيش حد راقد في الحوش و ناض لقي روحه ناجح و فالح و متفوق و عنده اللي يبيه .. اللي يبي حاجه ينوضلها و يسعالها و يجيبها .. و الصعب بالنسبه ليك و مستحيل بالنسبه لغيرك هدف رتب يومه و نومه و حياته على خاطره .

‏رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحًا تَرْضَاهُ وَأَصْلِحْ لِي فِي ذُرِّيَّتِي إِنِّي تُبْتُ إِلَيْكَ وَإِنِّي مِنَ الْمُسْلِمِينَ

مش اي انسان في الدنيا يستاهلك .. ولا كل شخص يستتحق معدنك و حقيقتك .. في هلبا اشخاص حتى لو تحبهم مايستحقوكش

اني اهني توا معاك .. جنبك باش نمسحوا اي شي فات .. اي وجع حسيته و اي شخص ضرك و اي حد مايستاهلكش .. اني اهني باش نستاهلك .. باش نحافظ عليك و نقسم معاك كل حاجه تفرح .. اني اهني باش نحققوا شن تتمنى و نتمنى .. اني اهني باش نكونوا سُعداء كل يوم اكتر و مرتاحين كل يوم اكتر .. اني اهني باش نحبك بكل شي فيك و باش نساعدك تغير كل شي للأفضل .. اني اهني باش نوصل و توصل .. باش انت تعيش العالم اللي تبيه و نعيش العالم اللي نبيه .. اني اهني نتعلملك كل يوم افكار جديدة تصلح بيها حياتك زي ماخاطرك .. اني اهني ليك بكل درس و بكل حياة عشتها قبلك .. اني اهني باش نولدوا احني الاتنين من جديد .. باش ننسوا كل شي فات و باش نكونوا قد كل شي جاي .. احني اهني على خاطرنا .

يارب لك الحمد حتى ترضى ولك الحمد بعد الرضى ♥️

"لا أحد أعمى بقدر شخص لا يريد أن يرى".

إني لما انزلت الي من خير فقير ♥️

مش كل ناس تبي مصلحتك و تهمها ..
في اشخاص حايتكلمولك على ناس و حايفسدولك علاقتك بيهم مش لانهم يحبوك بالعكس في نيتهم شي تاني بعيد كل البعد على كذب و الافتراء اللي قالوه ..

حايقولولك كلام مافيش منه يمشي اكتر مع مصالحهم و رغباتهم و عقدهم و اسبابهم الخاصة اللي انت ماعندكش فيها شي ..

حايضروك و يمشوك و يبعدوك على ناس هدفهم انه مايشوفوكش متهني معاهم ..

حكم عقلك و اختار ناسك و محيطك و رفاقتك كويس .. العمر اللي امشي كان ساد يعلمنا ان الصاحب مهم جدا انه يكون كويس و نضيف و قدع و معدنه مايصديشي الزمان .. الانسان محتاج في اللي جاي ناس حقيقيه ادوم و تقعد .. ناس تستمر معاك و تشدك و توقفلك و ماتخليكش ..


الوقت اللي جاي يبي ناسه .. يبي حقيقين ينشد بيهم الوقت .

بعد ما حاتحب شخص بجديات و تشوف روحك كيف حاتكون .. معاش حاتقتنع بولا حب اقل من هذا .. حاتكتشف ان اللي يحب يولي بطل و مافيش حاجه تصعب عليه .. حايولي متسبل باش يكلم و باش يقرب و يعطي .. حاتشوف ان الحب اكبر من اللي قاعدين نشوفوا فيه .. حاتشوف عظمة الحب و كبره و اللي يحب كيف يولي.

يميل المرء ‏لمن يُثير رغبته في العيش .

وفي هذا الفجر..

‏"اللهم لا تحيرني في أمري وفي حياتي وعقلي ونفسي وقلبي، اللهم سيرني لما هو خير لي وارضني به ولا تشغل لي فكرًا وكن معي دائمًا وأبداً يارب".

‏
كان الحصول عليك صعبًا، والمعركة من أجلك قاسية،
لكنّك تستحق ♥️

ولعلك تلتقي بشخص أنت عوضه ، وهو عوضك ♥️

في عيون نراهن عليهم من يقدر يشوفهم و ماتوقفش بيه الدنيا .

ماتتعلقش بحد و مافيش حد يستاهل انك تشد فيه باش مايمشيش لغيرك .. اللي شاد عليك السمي يطيحها .. و اللي يعطي فيك في راتب يوقفه .. ماتعطيش لحد مكانه اكبر من مكانته ولا تخلي حد يحس انه يوكل فيك و يشرب .. قدرك و كرامتك فوقهم كلهم .. واللي يستاهل منك ماتحسبش للقدر معاه مش حايقلل منه .. الشخص الصح صح في كل شي و ماتحتاجش معاه لشعور زعما يبيني او مايبنيش .. الشخص الصح قايمك و قايمه .. و الشخص الغلط تلقى روحك معليه و هو هلبا منزل منك .

⁣كيف حالكم ؟ وين واصلين

- ﻟﻤﺎ ﺗﻜﻮﻥ ﻣﺶ ﻗﺪ ﺍﻟﻌﻴﺶ ﻭﺍﻟﻤﻠﺢ ﻣﻦ ﺍﻻﻭﻝ ﻣﺎﺗﺎﻛﻠﺶ ﻣﻊ ﺣﺪ ، ﻋﺮﻓﻲ ﻛﺎﻥ ﻳﻘﻮﻟﻲ " ﻣﺎﻋﻤﺮﻙ ﺗﻨﺴﻰ ﻋﺸﺮﺓ ﻟﻲ ﺟﻤﻌﺎﺗﻚ ﺑﻴﻪ ﺳُﻔﺮﺓ ﻭﺳَﻔﺮﺓ " ﻻﺑﺎﻟﻚ ﻧﺎﺱ ﻋﺎﺷﻮﺍ ﻣﻌﺎﻧﺎ ﻭﻓﻴﻨﺎ ﻭﺑﻴﻨﺎ !
ﺍﺫﺍ ﻛﺎﻥ ﺭﺏ ﺍﻟﻌﺎﻟﻤﻴﻦ ﻟﻲ ﺧﻴﺮ ﻣﻨﺎ ﻭﻣﻨﻜﻢ ﻗﺎﻝ " ﺍﻟﺤﺴﻨﺎﺕ ﻳﺬﻫﺒﻦ ﺍﻟﺴﻴﺌﺎﺕ " ﻭﻣﺎﺫﻛﺮﺵ ﺍﻟﻌﻜﺲ ، ﻋﻼﺵ ﺳﺎﻫﻞ ﻋﻠﻴﻜﻢ ﺗﺒﻴﻌﻮﺍ ﺍﻟﻌﺸﺮﺓ ﻟﻤﻮﻗﻒ ﺑﺴﻴﻂ ﺗﺎﻓﻪ ﻣﺎﻳﺠﻲ ﺷﻲﺀ ﻣﺮﺍﺕ ﻗﺪﺍﻡ ﺣﺠﻢ ﺗﻀﺤﻴﺎﺕ ﺍﻟﻄﺮﻑ ﺍﻟﺜﺎﻧﻲ ﻓﻲ ﺳﺒﻴﻞ ﻋﺸﺮﺗﻚ ، ﻋﻼﺵ ﺗﺴﺘﻨﺰﻓﻮﺍ ﻓﻴﻬﻢ ﻭﻓﻲ ﺍﻻﺧﻴﺮ ﻋﻠﻰ ﺍﺑﺴﻂ ﺷﻲﺀ ، ﺗﺒﻴﻌﻮﺍ ﻃﻮﻝ ؟؟ !!
ﺍﻟﻤﺸﻜﻠﺔ ﺍﻧﻚ ﺗﺤﺎﻭﻝ ﻣﺎﺗﺮﺧﻴﺶ ﻭﻋﻠﻰ ﻗﺪ ﻣﺎﻫﻤﺎ ﻳﺤﺎﻭﻟﻮﺍ ﻳﺮﺧﻮﺍ ﻳﺪﻙ ﻣﻨﻬﻢ ﺗﻘﻌﺪ ﺍﻧﺖ ﻣﺘﺸﺒﺖ ﻭﻣﺎﺳﻚ ﻏﻴﺮ ﻻﻧﻪ ﺍﻟﻌﺸﺮﺓ ﻣﺎﺗﻬﻮﻧﺶ !
ﺍﻟﻐﻠﻂ ﺗﻌﺮﻓﻮﺍ ﻭﻳﻦ ؟؟ !!
ﺍﻟﻐﻠﻂ ﻓﻲ ﻟﻲ ﻓﺘﺢ ﺍﻟﺪﻻﻋﺔ ﻟﻘﺎﻫﺎ ﻗﺮﻋﺔ ، ﺭﺵ ﻋﻠﻴﻬﺎ ﺳﻜﺮ ﻭﻗﻨﻊ ﺭﻭﺣﻪ ﺍﻥ ﺑﻨﺘﻬﺎ ﻣﻠﻴﺤﺔ ..
ﺍﻋﺘﺬﺭﻭﺍ ﻻﺭﻭﺍﺣﻜﻢ ﻗﺒﻞ ﻛﻞ ﺷﻲﺀ ..
ﻭﺍﻟﺒﺎﻗﻲ ﺗﻔﺎﺻﻴﻞ ﻣﺶ ﻣﻬﻤﺔ ♥️

كل مانركز في مشاعر الحب نحس انها حاجه غريبة و كيف ممكن انسان يود انسان تاني بكمية المشاعر هادي من غير سبب .. كيف شخص زيك زيه يشغل بالك بشكل يخليك حتى الاكل تستصعبه لو غايب و نفسه الاكل ممكن يفرحك لو هو موجود .. كيف الانسان يحب انسان لدرجة يبيه قبله في الباهي و يكون وراه في المواقف الاخي و يتحمل ياخدها مكانه .. كيف انسان يحب انسان لدرجة يودله دعواته اللي في صلاته اللي بينه و بين ربي و في اكتر اللحظات خلوه و خشوع ! كيف يتفكره ؟ كيف انسان يحب انسان لدرجة مش مهم عنده غير انه يكون سعيد و فرحان و مرتاح مهما كلفه من جهد و تعب و تضحية و معاناه ...

الحب اثمن حاجه في وقتنا الحالي و اثمن هدية ممكن تقدمها لشخص و اغلى حاجه ممكن تعطيهالك الدنيا و تحس انها راضيه عليك هي انها تقدملك شخص يحبك .

الحمدلله رب العالمين 💚
اللهم لك الحمد على مارزقتني من مشروع كان فكرة و خطوة في الحوش يوم 1/6/2022 الى مشروع بزوز فروع يوم 8/5/2024 💚 مزمز - Mzmz

اللهم لك الحمد اللهم لك الحمد اسألك يالله ان التوفيق و السداد و نكونوا ديما من احسن لأحسن 💚

و شكر لكل شخص وقف جنبي من امي و خوتي و صحابي و المعارف و اللي ماخلونيش لحظة نحس ان مشروعي بسيط بالعكس كانوا ديما ينظروله لأعلى 💚

و شكرا طبعا لأقدع صاحب اللي كل خطوة نجحتها كانت ليها النص Gofran Ayad💚