#فيلـوفوبيـا
(سميتك الخوف البطمن)
#الحلقـة_الرابعـة_عشـ14ـر
#بقلـ ✍️ـم:نـوودين=Πeedoo

-"ماذا لو تعانقّنا وأزلنا كل سُوء يحِيط بنا؟"😔💛

وانا ببكي وزعلانه عمر مسك يدي .. ماكان فيني طاقه اقول ليهو فكني حتي .. جا وقف قدامي وفضل يعاين لي كنت بجر النفس جر حاسة نفسي مخنوقة .. في غصة في حلقي ..في حاجة واقفة لي في قلبي .. نفسي اغمض شديد وم افتح الا وكل الشعور السيئ دا راح مني ..

عمر قرب مني وقش لي دموعي .. لما خته يدو في خدي حسيت جسمي كلو ارتعش نفس الخوف للمرة الالف رجع لي .. انا متعودة اكون اقرب مايكون من عمر ليه لما يقرب علي بخاف .. ليه بحس بنفس الشعور البحسو من الناس الغرباء .. قبل أقول أي شي قال لي

رزة فاكرة إنو نحن أو خليني أقول أنا ماحاسس بيك؟!

خلاص ياعمر حينفع شنو انت عايز تقول لي زي كل مرة انك هنا ومعاي وم حتخليني و...

قاطعني بانو جراني عليهو شديد بكل حيلي لقيت نفسي ف حضنو همس لي رزة ماتخافي انتي بطلي تخافي وكلو حيظبط  .. كنت قادرة اسمعو بوضوح رغم الخوف والرجفة البتهز كل جسمي ..

عمر كيف يعمل فيني  كدا هو من وين جاب الجراءة دي؟!! .. كان ضاميني عليهو شديد لزيتو لما قرب يقع ومشيت بدون م اعاين وراي ..

دي المرة التانية عمر يغلط معاي نفس الغلطة .. مرتين دخل جواي نفس الخوف .. عمر مالو يعني ليه بقا يتصرف معاي كدا .. حتي هو .. انا م ح اقدر اواجه الحياة دي اذا الطعنة بتجيني من الحتة الامنت فيها .. اذا عمر بتعامل معاي كدا انا اقول يامنو ..

كنت ماشة بسرعة وانا مشمئزة من نفسي لقيت مروة جنب الباب مارفعت راسي عاينت ليها حتي بس متأكدة إنها شافتنا .. حوشنا كان صاني وامي قاعدة متحسرة فاكرة انو عمر لما يتكلم معاي حيقنعني اول م جيت قالت لي رزان؟!

داخلة انوم وان شاءالله مااصحي زاتو 🙂💔

ماانتظرت رد منهم دخلت الغرفه واتمنيت لو اقفلا علي وم افتحا بس حتي الحق دا م عندي ليهو مابراي ف الغرفه دي ..

طلعت توبي وعطر عمر عالق في كل جسمي حسيت اني بكرهو شديد فضلت واقفة في مكاني مسافه .. مشيت دلفتي طلعت البوم الصور قعدت اشوف صورنا هنا انا في حضن ابوي ..انا عشت زكريات طفوله حلوة مع ابوي وباين من الصور كان بدلعني انا ليه ناسية الحاجات دي .. كل صوري معاه كان رافعني او حاضني وكل صورة كانت فيها لعبه او حتي حاجة بياكلوها كنت مبسوطة وانا جنبو .. باين انها صور عفويه التقطوها لينا في اماكن مختلفه .. صورة بملابس البيت هو واقف وراي وانا بلعب بالطين .. صورة وانا نايمة في حضنو .. صورة وانا منكوشة وهو بسرح لي شعري .. صورة بملابس الروضة مكتوب عليها اول يوم ف الروضة .. صور كتيرة انا وابوي برانا حتي الصور الفيها ناس امي ورزاز كنت انا بكون جنبو او ف حضنو .. في صورة واحدة ماسكنا انا ورزاز مع بعض وكان بعاين لي .. انا من وين جايبة القساوة دي تجاه ابوي .. كيف ووين ومتين اللحظات الحلوة دي كلها اتحولت لجحيم .. ليه م قادرة اتزكر اللحظات دي وعالقة ف زاكرتي اللحظات السيئة؟!!

بقيت ببكي وانا بعاين للصور .. اتزكرت كل مرة كان يتكلم مع ناس رزاز فيديو كول واكون جنبهم وبقول ليهم ماعايزاه قولو ليه انا م ف 😢💔

اتزكرت لما تعب وعملو ليه عملية زايدة كل البيت كان مقلق عليه حتي امي .. امي اكتر واحدة عانت ف الحكاية دي قدرت تتجاوزو وتسامحو وماشايلة ف قلبها تجاهو وبتدعي ليه وبتخاف عليه .. الا انا 💔

انا كنت فاكراه بكرهني 😔 مع انو انا الختيت الحاجز دا بينا انا الاخترعت الشعور دا وصدقتو 💔 اتزكرت كل مرة بسمعو بقول لناس رزاز اعفو لي وخلوها تعفي لي 💔

كنت بهرب من كل شعور بحسو باني ابكي .. البكي هو الحل البواجه بيه مشاكلي
ببكي لما اخاف .. لما اشتاق .. لما احن .. ببكي في كل مرة وزي اسي بعمل اهو ببكي لاني م عارفه اعمل شنو 💔

________________________________________
في يوم حلو شديد كان مزاجو رايق عبر ليها عن حبو ومن بعدها عاشو احلي ايام ،، بني معاها كل آمالو ،، البت الوحيدة القدرت تخطف قلبو ،، عافر شديد علشان يصل ليها ،، كان بتعب ليل ونهار علشان عارف أهلا لايمكن يرضو لبتهم الوحيدة بحاجة بسيطة ،، في كل مرة بقول ليها انا اعمل شنو لاهلك ديل ،، من وين اجيب ليهم كل الطلبات دي ،، ايمتا حتخلو عاداتكم وتقاليدكم دي ،،كان كل م يشتغل ويزيد قروشو بفرح ويجي يقول ليها فضل بسيط ،، في اخر لحظة اتخلت عنو ،،هيا مادافعت عن حبها ليهو ،، ماقدرت تقول ليهم انو هيا بتحبو وهو نفسو يكمل معاها وكان بتعب علشانا ،،، الزعلو اكتر كانت عارفة انها مصيرا تكون لولد عمها اللى. أساسا خاطبا من هيا صغيرة. ،، بس كملت معاه كانت بتحب حبو ليها. ،، اهتمامو ،، خوفو عليها. ،، خلتو ف نص الطريق من وقتها وهو ماقادر يثق في زول ،، ماقادر يكمل طبيعي ،، كل م يتناسى وجعو بيصتدم بالواقع. ،، عندو فكرة إنو كل البنات زي بعض ،، فقد الثقة في العلاقات ،، حتي في نفسو 😔💔وبقا عمار مختلف خالص عن اللي كان زمان

_____________________

____
في غرفتهم كانت قاعدة جنبو وماسكاه من يدو

=أحمد..!!

_معليش يادان 💔

=ولايهمك .. بسيطة جدا انت بس خليك ريلاكس اوكيه!!؟

-دان انتي ليه بتستحمليني؟!! ليه متقبله الموضوع برحابة صدر ؟!!

=عشان كلنا عندنا نقص م فينا زول كامل .. جوانا حاجات ناقصة ومابنقدر برانا نكملا نحن محتاجين حد نكمل بيه النقص دا

-ماعارف بس انا لو محظوظ في شي يبقي انتي ..

=الله يخليك ليا يارب 💛

_______________________________

عمر كان راقد وخاتي يدو ف جبينو بفكر في رزان لمتين حتكون كدا .. حاول بكل الطرق ماقدر يطلعا من خوفا دا قرأ كتير عن حالتا ولقي انو افضل حل الواحد يواجه خوفو هو ماعمل معاها كدا شهوة في انو يحضنا ابدا بس كان لازم يجرب كل الطرق 💔 في الاخر اكتشف انو رزان بتخاف حتي منو .. اخر حاجة اتوقعا انو يكون هو برضو زيو زي اي غريب بالنسبة ليها .. رزان اللي طول عمرو شايفا معتبراه حتة الامان بتاعتا اتصدم بحقيقة انو خوفا بشملو 💔 ماكان عايز يعرف حاجة زي دي .. كان اخر همو انو هو يطلع سبب خوفا ولامرة فكر انو لو قرب منها حيحصل كدا .. المرة الفاتت كان زعلان وماواعي لنفسو وهيا سامحتو وعدت الموضوع بعد تعب .. بقي يفكر اسي حتعمل شنو!؟
اكيد م حترجع تتعامل معاه عادي زي اول 💔

___________________________________
صحيت بعد مسافه ماعارفة نمت متين عاينت لتلفوني كانت الساعة 2ص لقيت رسايل من دان كان محتواها محتاجة تتكلم معاي اذا فاضية حسيت بالزعل انا م كنت موجودة لحظات احتاجتني رسلت ليها
(معليش ي دان كنت زهجانه ونمت دي صحيتي) انا عارفه الزمن اتاخر م ظنيت يكون ف حد صاحي بس حبيت اعتزر منها شلت تلفوني ونورت بيهو طلعت برة لقيت أمي قاعدة في مصلايتا  حاولت ارجع بس حست علي ونادتني مشيت وانا ساكتة

رزان ..!!

هااا! ...

بقيتي كيف؟

مصدعة شديدد

جنب التلفزيون هناك في بندول وماذا وكيكة جابهم ليك عمر قال لو صحيتي

اول م قالت عمر اتزكرتو غمضت عيوني شديد عمر .. عمر .. عمر كرهت حياتي البقا م فيها حد غيرو هو ليه بهتم بي اكتر من أمي من وين عارف أنا ح أصحي الوقت دا مصدعة وم ح أقدر أكل شي قلت لامي ماعايزة طلعت مشيت الحمام وجيت راجعة لقيتو واقف بعاين لي م أشتغلت بيه كتير لقيت أمي بتفرش في السرير قالت لي تعالي مشيت قعدت جنبها مدت لي البندول والموية بلعتهم وانا ساكتة فتحت الكيك والعصير مدتو لي انا جعانه شديد وحاسة عصافير بطني حتزقزق شلتها اكلت وشربت نص قالت لي بتموتي يوم

أحسن زاتو اريحكم مني

منو قال ليكي حنرتاح منك

يمة أنا السبب في كل المشاكل دي

إنتي م السبب ولاحاجة أنا أساسا م عايزة الموضوع دا وقلبي أباه بس خالتك مصرة و..

لا م ف داعي أي حاجة أنا أقول لا تبقي لا أحيانا لازم تعملو الانتو عايزينو 🙂

ماعارفه بس

ماشه أنوم جوة بكرة عندي محاضرة مهمة كدا م ح أفهم

طيب ماتشغلي بالك

مشيت رقدت نمت ماعارفة من وين جايبة البرود دا يمكن صحي المقوله البتقول
"لو كترت عليك الهموم أرقد نوم " هو م كان نوم بالمعني الحرفي دا إغماء أنا أصلا م عارفه متين وكيف لقيت المنبه برن صحيت الصباح وجهزت وكالعادة طلعت بدري لقيت عمر واقف ف الباب حتي م سلمت عليه وهو م قال لي شي زح لي وطلعت مشيت سرحانه وماقادرة أفكر أساسا لحد م وصلت الجامعة تلفوني رن دي دان

اي ي دونة وينك

م جاية الليله أخدي لي إذن علشان غايبة كتير حيحرموني ح أجيب أورنيك

إنتي كويسة؟

أيوة م فيني شي بحكي ليك بعد أجي

طيب ياحب بتصل ليك بعدين

إنتي كويسة ي روز مالو صوتك م عاجبني

مافيني شي م تقلقي ..

ماحاسة كدا بس يلا الحقي المحاضرة ونتفاهم بعدين

دخلت لقيت ميناس بقينا نادرا م نتلاقي هي عندها شلتا الخاصة وشله للمواصلات وللطلعات وأنا ودان طبيعي مع بعض وحتي لاباتنا نفس القروب عشان كدا علاقتنا معاها بقت سطحية سلمت عليها وقعدت جنبها

بت ي رزة مالو لونك مخطوف كدا

ماف شي

يابت لما عيونك واقعة عيانة انتي؟

امكن علشان كنت مساهرة

منظرك زي المطلقة سهر شنو ي بت 😹

مارديت عليها كلاما دا وقع علي زي الصاعقة المطلقة؟ لون مخطوف؟ عيون واقعة؟ هل المطلقه عندها شكل معين؟ الصفات دي بس للمطلقات؟  اتزكرت كلام نسوان الحلة عن أمي محل م مشت بعلقو علي شكلها إترسمت صورتا جواي أمي اللي في الصور جميلة وملامحا حلووة حاليا منظرا بقا باهت فعلا حتي شعرا اتحتا، عيونا علي طول مرهقة، مهمومة وشايله همنا، شغاله ليل ونهار علشان منو؟ مستحيل البشوفا يقول عمرها لسة ف بداية التلتينيات بيقول نهاية الاربعين، لما تمرض حيلا بتحد وم بتقدر تقاوم أقل شي بنتهي منها دا كلو علشان مطلقه؟ ليه الحاجات دي م بيتوصف بيها حد غير المطلقه؟

لاول مرة م أفهم المحاضرة كانت الاسئلة دي جواي طول الوقت طلعت من المحاضرة م فاهمة شي م عارفه أعمل شنو

فجأة خطر ع بالي عمار .. ماعارفة ليه بس طلعت مشيت علي مكتبتو أول م وصلت فضلت واقفة ف الباب ...

("الحياة خشنة، ويلٌ للناعمين"! 😔💛)

#يتبع
#نهاية_الحلقة

سـلسلـة_فـوبيـا
(فيلـوفـوبيـا 😔🥀)
#الحلقـة_الخامسة_عشـ15ـر
#بقلـ ✍️ـم:نـوودين=Πeedoo

"هُناكَ دائمًا شخصٌ مُختلف، يمكنُه أن يسرقَ ثقلَ هذا العالمِ عن كتفيكَ دونَ أن تشعُر ✨❤️🖇️"

(اه من دموع الرجال 💔)

هو ليهو سنة واكتر ف الحالة دي كل م يتزكرا قلبو بيوجعو، لسة تفاصيلا مالية المكان 💔
لسة بتزكر كيف كانت طالعة وهيا لابسة التوب ويديها ملانة دهب والناس حواليها بتزغرد، دا الدهب اللي كان نفسو وروحو حتطلع علشان يغلب بيهو عادات اهلا وينالا ..💔

نفس اللحظة الاتمني تتزف ليهو عروستو ويمسك يدها قدام كل الناس 💔 انسحب من مكان المناسبة وهو مليان وجع يوما كان قادر يسمع قلبو وهو بيتهشم، صوت القلب وهو بيتكسر م ليهو صوت بس بخلي ضجيج جوانا نحن بس اللي قادرين نسمعو 😔💔 ماحد غيرنا بيقدر يحس قدر شنو كنا بنتوجع لحظتا ..

عمار من يوما وهو بيتوجع كل يوم، كل لحظة، اتغير خالص بقا م ياهو الولد الظريف البحب الطلعات والونسات، كمل قراية لمجرد إنو عايز يعمل حاجة يشيل بيها الهم من أمو، علشان م يتقال عليه شاب وبتصرف عليه أمو، أمو اللي طول عمرها كانت بالنسبه ليه أم وأب وأخ وأخت، صاح هو ولدا الوحيد وحتي مابيتذكر أبوه لما أتوفي بس ولامرة حوجتو لأب، أو أخوان كان بيجري ليها وهو شايل نتيجتو ، لما كل الاولاد ف سنو بيمشو المسجد مع أباءهم كانت أمو بتلفح توبا وتقدمو، في اللحظة اللي كان الاولاد بيمشو الصالون لحلاقه العيد مع أخوانهم كانت أمو بتقدمو، عمار طول عمرو بيسمع عن الاخوات ،بس لما حباها كانت قادرة تعوضو عن مكانة الاخت، كان بيتصل عليها من وش الصبح علشان تختار ليه لبسة يطلع بيها، كان بيسألا كيف بيطبخو الاكلة الفلانية علشان الليله عايز يريح أمو ويطبخ عنها، كانت أختو، حبيبتو،سندو وكل شي، طب ليه م قالت لأهلها إنها بتحبو، وهو بيتعب علشانا، بقا محتار اذا فعلا كان حبتو أو لا !؟
هما البنات لما بيخافو ليه بحبو!؟
لما بيمشو أساسا بدخلو حياتو ليه!؟
أسئلة كتيرة ماليها إجابة .. كل يوم بيسأل نفسو الاسئلة دي أمس بالتحديد الزكري السنوية التانية لفراقهم وهو م عارف عنها شي ولانفسو يعرف بس ماقادر ينسي التاريخ دا كل م تمر سنة بحس وكأنو التاريخ بعيد نفسو كأن الحصل كان أمس ..

صحي علي صداع وملامحو م بتتفسر أمو أول م شافتو

عمار مالك ي ولد

مف شي ياأمي ..

غايتو غلبني البسوي معاك ..

ياأمي ماتكبري الموضوع خلاص

تعال شيل قهوتك

مانفسي في شي

مشي فتح المكتبة ع امل يقعد مع نفسو بما انو م ف حد بيجي المكتبة كتير كان ماسك تلفونو وبمسح ف زكريات .. زكريات بتوجع فضل يتخلص منها مع كل حاجة بيمسحا بغمض شااديد عسي ولعل يمسحا من دماغو .. رسايل .. صور .. ريكوردات .. فيديوهات .. حتي سجل المكالمات 💔
أخد حكاية ساعة قاعد في نفس،المكان
أمو ندهت عليه مرتين للفطور بس رفض .. في اللحظة كان علي وشك إنو يقوم ويقفل المكتبة لقا رزان واقفة إتفاجأ بوجودا نفس الري أكشن الظهر علي،ملامحا حتي هيا كانت متفاجأة للحظة إستوعبت نفسها جات ليه .. وبتعمل في شنو .. وحتقول شنو واحد منهم حاول يدارك الموقف وكلهم في نفس اللحظة إتكلمو مع بعض هو بقول ليها رزان؟ وهي قالت ليهو عمار عاينو لبعض وضحكو 😹

-إتفضلي !..

=أنا ..

-خشي حنتكلم جوة

أول م دخلت مد ليها موية ومرر يدو علي وشو كأنو ببعثر ملامح الحزن والزعل .. سألا بلهفة

-إنتي كويسة؟

أثناء م هي بتشرب هزت راسا بإنها كويسة إبتسم وفضل يعاين ليها كانت ماسكة الكباية بيديها الاتنين بتشرب وهيا بتعاين ليهو سرح في ملامحا مسافه بعدها قال

-الشمس الحارة دي جيتي فيها كيف؟

مدت الكباية وبلعت ريقا كأنها بتفتش لاجابة صح هي جات ليه؟وكيف؟ومتين؟ سكتت مسافه قالت ليهو

=خلصت .. خلصت محاضرات واتزكرتك

-ياسلام ياخ أخيرا بقا في،زول بتزكرني

=لاع قصدي القروش،"كانت بتتكلم بتوتر"

-يعني م افرح م اتزكرتيني، إنتي إتزكرتي القروش

=لا ماقصدي كدا ..

-بشاغل ساي م تركزي، اها كيف مع الدراسة

=ماش الحال .. انت كويس؟

-نوعا ما

=معليش ..

-علي شنو؟!!

=معارفه بس حبيت أقولا ليك

-ياريت لو بتجبر الاتكسر

=عمرو م بتصلح بس لازم نتجاوز

-محتاجين البخلينا نتجاوز

=حيجي 💛

-متين؟

=عملت ليهو اشارة بي كتفها نظام م معروف بقا يضحك وهي ضحكت معاهو 😹

-م كنا عميقين قبل شوية 😹

=أعمل شنو ماعرفت ارد ليك

-رزان شكرا ياخ

=علي شنو؟

-معارف بس حبيت أقولا ليك

=إكتفت بأبتسامة هي فاهمة كويس يعني شنو تخلي،زول زهجان فجأة يفرح الحاجة دي م بسيطة 💛🌏🖇️

-فضلو ساكتين مسافة قال ليها أحكي ..

=أخدت تنهيدة وقالت ليهو للاسف مف شي يتحكي

- خلاص بما انك الليلة طلعتي بدري أوفي بوعدك

=الليلة؟

-اي عندك ديت لاسمح الله

=لا أبدا بس

-خلاص خليها علي راحتك

=لا م قصدي أزعلك

-مازعلت

=مهو باين

-في العيون نهرب منو وين "بدأ يدندن اغنية ود الامين"

=هزلي،بشكل

-وإنتي جادة باشكال 😹

=خالتو وين الليلة؟

-قاعدة من قبيل مشغلاها لي،

=سلم لي عليها عليك الله 💛

-إعتبري وصل 💛🔐اها البعدو

=حتمش معاي؟

-قدااام

=ساااريع طيب

-اكلم حنو واخد لي،دش،واجيك 5دقايق  مابتآخر ..

=هييي م جادي،والله..!!

-المرة دي جادي وجدع لي الريمود قال لي أحضري لما أجيك م بتآخر ومشي م انتظر يسمعني حتي ..

كان مشغل جوغرفي غيرت لقيت سبيس،تون سرحت بفكر دا شنو الانا هببتو دا 🙂💔 من متين؟  لا دقيقة مش كنت زهجانه وشوية ح ابكي الجابني هنا شنو؟ اشمعني عمار انا بتعامل معاهو كدا 🙄 نسيت الموضوع الكان مزعلني،بس،دا م موضوع يتنسي 😪 تقريبا 10دقايق بفكر جا قاطعني صوتو سبيس تون ياشافعة

-إنتبهت لقيت القناة ماحبيت أبرر ليهو هو اخر مرة قعدت ف التلفزيون ايمتا م بتزكر ولاعارفة الشغال دا شنو ولا ركزت معاه اصلا قلت ليهو إتآخرت علي فكرة

=ماإتأخرت دا توقيت مثالي والله

-طيب دا حسابك حق المرة الفاتت وعايزة إستيك نوت ملونة وشرايط ودبابيس

=مشي يجيبهم لي .. بتعملي بيهم شنو؟

_هدايا وبرطمان سعادة وهكذا يعني

=ماشاءالله بالك طويل للحاجات دي

-ملي فراغ م اكتر

=وينو الفراغ أدينا منو😹

-الجمعة والسبت 😹

=وعاملة ليك مكان ولا الناس بتطلب منك كيف

-بوصل ليهم أنا ومعظمم صحباتي بنات خالتي ف الجامعة وكدا

=طيب عندي ليك عرض ظابط إنتي أعمليهم وختيهم ف المكتبة بتاعتي هنا ومنها يجوني زباين وإنتي ترتاحي من التوصيل 😹

-فكرة والله مرات بكسل أوصل وكتير بلغي طلبيات

=مد لي يدو "شراكة"

-لوهلة إترددت بس فجأة لقيت نفسي بمد ليه يدي وإبتسمت

ماإتحرك جواي إحساس الخوف البلازمني علي طول لا أصلا أنا م متزكرة أخر مرة صافحت زول من خوفي من الفكرة مانعة نفسي أصافح أي حد ماعارفة ليه كنت متصورة أحساس مخيف للمصافحة ولا هي الحكاية مع عمار بتختلف قبل فترة لما عم عبدالرحيم مد لي يدو سلمت عليه بسرعة وجريت يدي كان تصرف غبي مني أمي شاكلتني بي سببو 😪 أنا بقيت م فاهمة نفسي أساسا

طلعنا مشينا وطول الطريق كان بونس فيني حاجات هايفة شديد وأحيانا بنضحك 😹 والله م شايفة لي حاجة بضحك بس هو بتصنع المواضيع جينا ماشين جنب محل عماري مكتوب عليه "أبو عمار للعماري الممتاز" قال لي أوعي تصدقي دا م حقنا والله 😹 ياخ قعدت أضحك ضحك لما غلبني أمش فضلت ف محلي واقفة وبضحك عليه بعد شوية قال "الله يرحمك ي أبوي بتبلو عليك " حسيت بالزعل وإعتذرت منو "أسفة" عادي يابت الموت حق أصلا هو وقت مات م أظن إنتي مولودة حتي لذلك م تتأسفي بدون أحس عرف عني معلومات كتيرة.

مراوغ بعرف كيف يخليك تجاوبو بدون م يسألك 😹 خلال الساعتين القعدناها مع بعض عرف عمري وساكنة وين وعدد أخواني وخلاني أحكي ليهو إني عدت تالته وكمان ماامتحنت تامنة أول مرة 🙂💔 مهو يااما أنا غبية وم أظن لانو ناس ميناس،ودان يومي معاي المعلومات دي م عرفوها هو ف ساعة قدر يعرفا ي اما هو ساحر 😹 الحاجة الكويسة إنو كان بيحكي لي يعني بطريقة غير مباشرة مقابل كل حاجة حكاها لي أنا حكيت ليهو حاجة فجأة قال لي بنبرة حزينة

-ياروز الحياة دي صعبة شديد ونحن لازم نتعايش معاها غصبا عننا آي حرام عديل البحصل معانا دا وم بنستاهلو بس خلاص هو حصل يعني لازم نتعايش معاه  ..

=معارفة بس بالجد بحس نفسي فاشلة شديد في حكاية التعايش والتجاوز دي أنا عارفة إنو الدنيا م واقفة وعارفة كويس إنو كلو بيعدي بس برضو ماقادرة حرفيا ماقادرة ……

- حيجي يوم وتقدري إنتي بس أدي كل شي وقتو

=طب لو طال الوقت دا وم عايز يخلص

-بيخلص مهما طال سنة سنتين تلاته وخمسة وعشرة حتلقي نفسك ف يوم اتجاوزتي لانو دوام الحال من المحال إنتي بس حاولي

=عاينت ليهو إبتسم وقال لي خلينا من الحياة دي كلها ياخ المهم أنا مبسوط بيك شديد

-معرفت أقول ليهو شنو 😹 هييي انا م متعودة للكلام دا

واصل كلامو وقال

- لي أكتر من تلاته سنة م طلعت مع زول ولا امبسطة للدرجة دي ماعارف بس يمكن أنا أصريت عليك أو زيما بتقول أمي الصدف البتلمنا في الحقيقة م صدفة هي قصة المهم مبسوط،جدا إنو إتعرفت عليك م عارف شكل العلاقة لقدام حتكون كيف ومامعروف أصلا أذا حتكون دي علاقة أو لا بس،م ح أنسي ليك اللحظات الحلوة دي 💛🖇️

=لوهلة كنت ح أقول ليهو أساسا دي أول مرة أكون مرتاحة في التعامل مع ولد،وم حصل طلعت مع ولد ولا حتي حكيت الحاجات دي،لزول غيرو بس،دايما في شي بمنعني أعبر إكتفيت بإبتسامة وقلت ليهو وأنا كمان 💛🖇️

-طيب أسيف رقمك ماتنسي بينا شراكة

=م اترددت ولا ثانية مديت ليهو يدي فهمني ومد لي تلفونو سجلت ليهو رقمي وسيفتو بي رزان قال لي م كدا مسح الاسم وسيفو بي "الروز" وجرس لي سيفت رقمو"Aμ"   ضحك قال لي بتختصريني من بدايتا ماشي ي روز 🙂

ضحكت قلت ليهو ح اغيرو بس م اسي

قدمني مشي معاي لانو اصلا البيت قريب ماف داعي اركب مواصلات لما وصلت للشارع التاني من بيتنا قلت ليهو يلا أركب إنت وأرجع أنا وصلت خلاص ودعنا بعض وأنا مشيت ..

‏"عندما أكونُ معك، أشعر بأنني زُرت كُل الأماكن التي أحبها."❤️

#يتبع
#نهاية_الحلقة_الـخامسـة_ع

#فيلـوفوبيـا
(سميتك الخوف البطمن)
#الحلقـة_الـسادسة_عشــ16ـر
#بقلـ ✍️ـم:نـوودين=Πeedoo

"‏الوقت بدون شخصك المفضل كئيب جداً 🖤🖇 "

كنت حاسة براحة.. إحساس خففت عن الكتمان الجواي هو يمكن ماقلت الحاسة بيه بالضبط بس كونو ف شخص لأول مرة يحسسك إنو هو عارف الإحساس صعب وإنك بتحاول بس حتتخطاه ويثق في قدرتك دي حاجة كنت فاقداها .. م بنكر إنو ناس البيت كلهم بحاولو معاي بس ماأدوني وقت أنا أحاول م فيهم زول قال لي الحاجة دي صعبة كانو بحسسوني إنو هما معاي .. ماشفت زول بتألم علشان أقارن ألمي بي ألمو .. أنافاقدة أبوي من سنين بس عمار فاقدو للابد ومن سنين أطول من سنيني .. أنا بتوجع لاني ماقادرة اتجاوز حاجات تافهة زي الخوف، عدم الثقة بس عمار ماقادر يتجاوز حاجات أكبر .. م حكي لي بالتفصيل بس الفهمتو مشاكلو مقارنة بي مشاكلي ولا أي حاجة 💔

كنت محتاجة أشوف قصص غير قصتي وأحس بيها .. كنت محتاجة للصفعة بتاعت ميناس لما وصفت شكلي بالمطلقة يمكن لو م كلاما م كان حسيت بشعور أمي .. كنت محتاجة أصافح زول علشان أعرف إنو المصافحة م بالسؤ الكنت متخيلاه هي بسيطة زول بمد يدو وأنا بمد يدي .. ليه كنت متخيلة حاجة أشبه بالجحيم وياما زرعت خوف زيادة جواي لسبب تافه .. كان لازم أعرف إنو م براي البعيش قصص حزينة في ناس عندهم قصص أحزن من قصتي .. كنت محتاجة أتكلم مع زول ويقنعني .. أول مرة أعرف نفسي بقدر أواسي زول .. بعرف أطمن رغم خوفي .. م حسيت بالاحساس دا لانو كنت طبيعي محتاجاه .. عمر وكل البعرفهم بحسسوني إنو أنا المحتاجة دعم وماينفع أدعم زول إذا أنا نفسي م قادرة أدعما 🙂💔 للاسف أكتشفت إني مضخمة الموضوع في حال إنو بستاهل بس،م قدر القيمة الخاتاها ليه 😪 ضيعت كتير م حيتعوض ..

_________________________________
عمر كان قاعد وبفكر في رزان .. تصرفاتو معاها أن دلت علي شي إنو هو واصل أقصي درجات الحب معاها .. بس آي حب دا .. حب من طرف واحد .. حب مغشوش .. حب مغلف بقناع الخوة .. هو عارف كويس وسمعا عدة مرات رزان ذات نفسها بتقول عنو أخوها لما تتسئل عنو .. لما تكون عايزة تعرف زول عنو .. لما يتجاب سيرة الاخوان كانت بتقول عليه أخوي الكبير .. للاسف هي م شايفاه أكتر من أخ وهو م قادر يشوفا ك أخت .. طول عمرو بعاني من الحب المهلك دا .. حتي هو بخاف من العلاقة دي .. بخاف يخسرا .. بخاف يجي يوم وتروح من يدو .. بخاف مايقدر يكمل بدونا .. خوفو من إنو هي تكون بتخاف حتي منو خلاهو م يظهر الحب دا واكتفي بإنو يكون ك أخ أحسن ليهو بألف مرة من إنو يخسرا .. بس للاسف م بنقدر نتحكم في مشاعرنا 🙂💔

عمر م بيعرف يقعد بدون م يطمن عليها .. م بيعرف ينوم وهي زعلانه حتي لو م منو .. بشيل همها .. بخاف عليها .. بشتاق ليها وبفقدا .. وقتو بدونا كئيب جدا .. عارف نفسو غلط،لما اتصرف معاها كدا بس كمان م إتوقع إنو ردة فعلها تكون كدا .. كيف رزان قدرت تكون قاسية معاهو للدرجة دي 💔
كيف قدرت تشوفو الصباح بدون م تتكلم معاه .. كيف بس؟؟!!

عدي عليهو أطول يوم .. 12ساعة  بدون رزان .. صباح بدون صوتا .. نهار بي طولو بدون مكالمة منها حتي إنها إتآخرت اليوم

بقا مقلق عليها ماعرف يعمل شنو بأي عين حيتصل يسأل عنها .. حاول يتجاوز الوقت بدونا بس م قدر لحد م شافا جاية كان شويه حينده عليها من بعيد بس فضل متأمل هي تنتبه ليهو وتجي تسلم وتنسي الموضوع بس م حصل كدا هي حتي م اتلفتت باتجاهو وصلت البيت وإتجاهلت إنو في حد مستنيها وم كانت بتعرف تصل البيت قبل تمش ليهو بالاول .. اتجاهلت كل الطقوس الكانت بتعملا .. عمر مشتاق لي صوتا وهي بتسلم عليه .. مشتاق لهظارا .. ضحكتا .. عنادتا وهي بتشيل البارد وتشربو رغم تحذيراتو ليها .. إشتاق للتفاصيل الصغيرة دي 💔

___________________________________

=أحمد يلا حبيبي ماف شي بخوف اوكيه ..

_معارف يادان بس ماحابب المشية دي خالص

=مسكت يدو "أنا معاك بسيطة حنقابل الدكتور وبعدها كل الامور حتظبط"

-طيب نتوكل ع الله ..

* طول الطريق كان سايق وهو ساكت متوتر من فكرة يمش للدكتور بس دان أصرت عليهو وفضلت تقنع فيهو ودخلت النت عرفت تفاصيل كتيرة عن مشكلتو وطمنتو إنو ف حلول كتيرة ناجحة ووقفت جنبو لحد م أقتنع 🌏💛🖇️ *

لما وصلو بركن العربية وم نزل

=يلا ننزل علشان نخلص بسرعة وحنتعشي برة الليلة

-رغم التوتر كان شايفا مطمنة فتلقائيا هو إطمن

نزلو ودخلو ع الدكتور وطمنهم إنو الحل بسيط وكلمو يبعد عن التوتر وضغط العمل ويتعامل مع الموضوع ببساطة 💛

بعدها طلعو كان حاسس بإنو قادر يعمل أي شي طول م دان جنبو رغم فرق العمر البينهم الا إنو قدام دان بنسي حاجة إسمها عمر بتصرف معاها بنفس أسلوبا إتعشو وإشتري ليها أيس كريم وقعدو يتصورو ختت الصورة ستوري وكتبت: -

"لديّ حياة بأكملها  لأمسَح عن وجهكِ كُل
الندوب التي تركها عليكِ العالم
وأنا أعدُك 🌏💛🖇️"

شال نفس الصورة وكتب: -

".‏تشبهين إنبعاث ضوء من زاوية صغيرة
في غرفة ظلّت مُظلمة لسنين طوي

لة."♥️

رجعو الشقة ورتبت شنطهم علشان بكرة حيرجعو البيت جا طالع من الحمام

-الحلو بيعمل في شنو؟

=امممم مش كفاية قعدنا برانا أنا مشتاقه لـ أروى وأمك وأكل البيت

-عدي إسبوع بالسرعة دي

=الأيام بتمش بسرعة لما نكون مع البنحبهم

-إنتي بقيتي تقولي درر" وقرب عليها"

=من يومي 🙈

___________________________________
أول م وصلت البيت كنت مروقة ومبسوطة 😻💃 دخلت بشاغل ناس مروة

-ياسموحة ملاحظة معاي الليله رزة دي إتآخرت ومابس كدا جاية مبسوطة كمان

-اي اي ملاحظة غريبة الليله وين البيبسي ولا السيد عمر م أداك

=مامشيت ليهو 🙂

-حدث تاريخي يخوانا

* انا كشرت وشي ودخلت جوة شلت ملابسي وجيت طالعة سامعة مروة بتقول لسماح إتشاكلو أمس وأظن عمر هو الغلطان والا رزة م كان ...*

جيت سمعتهم فضلت واقفة هما سكتو

علي فكرة يامروة مازيما شفتي عمر كان ..

-يابت هبلة انتي أنا م بعرفك ولا م بعرف عمرر ماتفتكري إني فهمتكم غلط أصلا ...

=بس خلاص .. وطلعت خليتهم

*مروة حكت لي سماح الشافتو وبقو يتناقشو ليه عمر بتعامل مع رزان كدا طب اذا رزان م عاجبا التعامل دا من البداية أدتو وش ليه *

مشيت سلمت لحبوبة ودخلت لي موية الحمام وفضلت نص ساعة بفكر حتعامل مع عمر كيف؟ أنا ليه حياتي جايطة كدا وم فاهمة فيها شي 😪 لسة كمان شوية وأمي تجي حيتفتح نفس الموضوع واقفة بين أني ماعايزة أبقي سبب في دمار حياة أمي وبين إني م متقبلة الموضوع خالص معارفة أنا تايه جدا 😪

طلعت من الحمام لقيت رزاز مطلعة ملابسا ف السرير وبترتب دولابا قعدت جنبها وفضلت ساكتة

-رزة

=هااا

-أسألك سؤال؟

=قولي ..

-لو أمي إتزوجت عم عبدالرحيم حتمش تعيش معاهو وتخلينا

=اكيد م حتعمل كدا هي م فكرت تتزوج الا علشانا أمي م بتعمل حاجة تأذينا تفتكري حتختار راجل غريب وتخلينا لمنو .. هو أساسا م عندو أولاد صاح؟

-عندو ولد معاق

=عيب م تقولي معاق قولي مقعد

-ماعلينا انا شايفة أحسن تعرسو زاتو

=إنتو أمشو أقعدو معاها أنا م بحب الراجل دا ولا ح أسكن معاهو بيت واحد بقعد مع ناس حبوبة

-والله زول طيب أنا م عارفة مشكلتك معاه شنو .. عموما إنتي م بفرق معاك زول أصلا حتي لو أمي ولا أبوي

=نقفل الموضوع لانك م حتفهميني 🙂

-لانك م بتتفهمي 😹😹

=رزاز إنتي فاكراني شنو مثلا م بحس يعني؟

-ماعلينا ي بت عيشي حياتك .. رمت لي فستان قالت لي قصيتو لعرس مزن رايك شنو؟

=حلو

-متين شفتي زي الناس جنك تمشيني غلطانة انا البسألك أصلا .. جرتو مني وطبقتو دخلتو وطلعت خلتني

انا م عارفة الاخوات بتعاملو كيف زول يفهمني كيف أتعامل مع رزاز البت بتكبر وفكرتا السيئة عني بتكبر معاها 😪 نفسي أقعدا وأشرح ليها بس حتي دي م بقدر عليها كلما أقول أبدا صفحة جديدة معاها وأقول خلاص حتفهمني بلقاها خاته نفس الفكرة عني وإني أخت سيئة 🙂💔

طلعت لقيتهم بتكلمو عن عرس زونا طبعا بت عمتي ورزاز بتحبها شديد وتقريبا هي الوحيدة البتفضل تجينا وتسأل عننا من بين أهل أبوي كلهم زول شغال بينا غير هي وأمها ماف يوم الجمعه العرس ورزاز متحمسة ماشة تقعد معاها وإشترت تلاته لبسات وهاك ي الحبسة من خلصت إمتحاناتا البت اليوم كلو بتصلح شعرا ووشها 😹 التقول هي العروس وبتلم قروشا عشان تشتري لبسات من زمن المدرسة الحماس المتحمساه رزاز لعرس مزن يمكن لو كان هي اخت العروس م عملت كدا عكسي تمام للان م إشتريت ولاشي مع إنو أمي أدتنا قروش الفستان مع بعض بس م مشيت السوق قعدت جنب سماح قالت لي اها ي روز حتمشي ولا كالعادة حتتهربي؟

-زونا حتزعل لو م جيت هي الحنة متين؟

=يوم الخميس

-طيب عندي محاضرتين بس أخلص وح أمش ليهم من هناك

=حتلبسي شنو؟

-أي شي

=جادة إنتي؟

-يب

=لو عايزة تشتري فستان أحنا بكرة ماشين السوق ارح معانا

-لاع م عايزة ..

*رزاز قالت هييي خلوها وفرت لو م عايزة *

*سماح قالت ليها عيب خليني انا بقنعا *

*مروة قالت لي رزة أطلعي من المود الكئيب دا وارح ياخ حنلف السوق ونشتري حاجات ونتبسط،مرة واحدة في حياتنا أساسا بكرة محاضرتك واحدة أكسري حنكا أرح معانا *

قلت ليها طيب 🙂

رزاز قالت ح أتصل لابوي أشوف رسل لي القروش ولا لسة وشالت تلفونا وجات قعدت جنبي حمرت ليها عملت نفسها مشغولة ماعارفة ليه فضلت قاعدة كان بإمكاني أقوم من جنبها شايفاها فتحت الفيديو ورد ليها

-ايش تبغين يارزاز

=كم مرة قلت ليك م تتكلم معاي سعودي

-ضحك وقال ليها بمزح معاكي عارفك بتتغاظي منها كيفك

وبدا يسلم عليها ويسأل من ناس البيت بدا بي قالت ليهو

كويسة ياها جنبي تسمع فيك

طوالي هو سكت ووجهت التلفون علي

حسيت نفسي مخنوقة وم قادرة أتحرك من مكاني فضلت بعاين ليهو مسافه م بتزكر أخر مرة شفتو إيمتا ملامحو إتغيرت كتير يمكن مرت 8سنين علي إنفصالو من أمي ومن وقتها أنا بتجاهلو إتكلمت معاه مرتين بالعدد ولاقيتو مرة واحدة مع إنو نزل السودان تلات مرات وكل مرة ناس رزاز ورامي بيمشو يسلمو عليه بس أنا برفض أمش معاهم المرة الوحيدة الاتلاقيت معاه كانت في

وفاة جدي اللي هو أبوهو أمي ساقتني بالغصب من المرة ديك وتاني م شفتو ولا اتكلمت معاه حصل ليهو حادث مرة رفضت أتكلم معاه عملو ليهو عملية مرتين برضو رفضت م عارفة أنا مالي بس الليله كنت عايزة أشوفو .. مشتاقه شديد أسمع صوتو فضلت ساكتة لحد م قال لي

- رزان كيفك؟

=عايزة أقول ليهو م كويسة .. تعبانة نفسيا .. هو ليه عمل كدا .. ليه مشي .. ليه حاجات كتيرة ماعرفت أقولا كأنو لساني إتربط واصل كلامو ……

-مااشتقتي لأبوكي .. م ودك تسامحيه .. ؟!

=دموعي نزلت ورزاز بتلكزني بي يدها إتكلمي أبوي بتكلم معاك

-بلعت ريقي وفتحت خشمي قلت ليهو تعال

=وعد نتلاقي؟

-هزيت راسي بمعني أيوة

=وعهد الله لانزل في الاسبوع دا بس م تغيري رايك

- من بين الدموع ضحكت كأني في حلم جواي طاقة غريبة إني عايزة أسامح وأنسي كل الفات عايزة أبدأ صفحة جديدة .. نفسي أزح كل الهم دا وأفرح بجد .. عايزة أجرب أكون مبسوطة .. قشيت دموعي وقلت ليهو كيف إنت؟

-الليلة بقيت كويس

=واولادك كيف؟

-كلهم بخير الحمدلله إنتو كيف؟

=كويسين الحمدلله

_ماشاءالله دخلتي الجامعة

=أيوة شهر وأخلص سنة أولي

-اللهم بارك ركزي بدراستك 💛

=حاضر

كان بتونس معاي بلهفة شوق 8سنين م بتكفيهو مكالمة .. عيونو بتلمع كان شويه وهو كمان حيبكي من الفرح أبوي رغم ال8سنين م يئس فضل مستني يوم أروق وأكلمو كل م يتكلم بسأل عني رزاز أدتني التلفون ومشت فضلت بتونس معاه مسافة جو أولاد إتنين قعدو جنبو أنا عارفة أنو عندو أولاد بس لما تتجاب سيرتو بمش أخلي ليهم المكان ولامرة سألت نفسي أنا ليه بعمل كدا .. مؤمنة بالقضاء والقدر وإنو الزواج قسمة وبتنتهي بس كمان محملة أبوي المسؤليه شوفة عمار وهو بيحكي عن الحياة بدون أب خلتني أحن أنا أبوي عايش بس كأنو ميت بالنسبة لي .. إذا مات ح أقعد أبكي؟ ح أحكي أقول شنو؟ خوفتني الفكرة وكنت ناوية أتصل عليهو بس ماعندي الشجاعة وكويس إنو رزاز إتصلت وخلتني أتكلم معاه أنا للابد ح أفضل الاخت الكبيرة بالاسم بس فعليا رزاز هي البتعرف تتصرف صاح .. هي البتحتويني وبتمنعني أقع ف الغلط .. ممنونة جدا لرزاز 🌏💛🖇️

بعد عرفني بأولادو أواب ومعتصم طلعو ظراف بقو يتكلمو معاي .. كمان عارفين كل ناس البيت 😹 ونسوني مسافه فصيحين شديد وقالو لي تعالي لينا 😹😹🚶‍♀️
"إنتو م عارفين أنا م بعرف أمش سوق أمدرمان براي 😹"

إتونست معاهم لحد أبوي قال ليهم تكفون يلا

بقيت أضحك علي لهجتو الاتغيرت 😹

-يلا حبيبتي الصلاة

=طيب ماشي

-تلفونك شغال؟

=اي

-نبقي ع تواصل 💛

قفلت منو وإحساس الراحة الحسيت بيه م بقدر أوصفو ..

(عشان تتخلص من أي شعور سيئ جواك إنت محتاج تواجهو .. محتاج تحس إنو في شعور أسؤ من البتحس بيه حاليا حد تاني غيرك عايشو .. الالم مش حوار يعني so لازم تتفه الموضوع لدماغك البيكبر الامور علشان تقدر تتجاوز صدقني غير كدا م بتتجازف 💛🔐)
#يتبع
#نهاية_الحلقة_الـسادسة_عشـ 16ـر
#بقـ ✍️ـلم:نوودين_بت_من_حب

#فيلـوفوبيـا
(سميتك الخوف البطمن)
#الحلقـة_الـسابعة_عشـ17ـر
#بقلـ ✍️ـم:نـوودين=Πeedoo

"ولكنني لا أريدك أن ترحلي ، لذا رغبت بكونكِ صديقة أكثر من أي شيء آخر ، لإنني ببساطة لا أحتمل يومًا تكونين فيه ذكرى 😔💛"

عمر م كان ليهو نفس يرجع البيت قعد أطول فترة في البقالة كان من عاداتو يجي كل شوية صح م ببين إنو جاي علشان رزة بس دا البيحصل .. مابحب تطلع ف الشارع وتجي ليهو كل مرة كان بشاكلا وبقول ليها اذا عايزة حاجة إتصلي علي بس بكون مبسوط لما تجيهو ..

الحب شعور متناقض جدا .. حلو ومر ف نفس الوقت .. مريح ومتعب ف نفس الدقيقة .. بريح وبوجع في نفس اللحظة .. أعان الله قلوب المحبين 😔💛

فصلت تلفوني من الشاحن لقيت مسج من عمار

"ربما لست الشخص الذي ستسعدك معرفته، ولكن عليكِ أن تعرفِ أني لن أتسبب في تعاستكِ بأي شكل كان 🌏💛🖇️"

رديت ليهو: -

"كان ينبغي علي أن أجدك منذُ مدة في غير هذا الوقت، في غير هذا المكان، قبل أن نَهلك، قبل أن تجرفنا التجارب و تسلُبنا منا و نصبح خائفين مترددين في خُطانا، منهكين لا نملك الطاقة لتحمّل أنفسنا، يائسين من كل شيء حتى من القاء السلام 😔"

طوالي أتصل لي إترددت بين أرد أو لا لما المكالمة قربت تفصل رديت

-وصلتي كيف؟

=تمام التمام إنت لقيت مواصلات

-إتسهلت الحمدلله

=الحمدلله

*فضلنا ساكتين مسافة قلت ليهو عمارر!

-بسمع فيك

=شكرا ليك كتير

-طيب رايك شنو م نشكر بعض إنتِ ساعدتيني وأنا ساعدتك وكدا حبايب أقصد أصحاب 😹

=ضحكت قلت ليهو إتشرررفنا

-بس أوعك تمشي

_وين تمشي الخطوة عنك مش بقولو كدا 😹

=شيليني فيك وحومي بي

-شنووو؟؟

=ياخ انتي م لبيبة قصدي ليك الاغنية البتقول ياما شايلك فيني حايم

-مهو أنا لو كنت سامعه بيها قبل كدا كان عرفت بس دي،أول مرة أسمعا عندك

=بتسمعي لمنو طيب

-ولاحد

=فايتك كتير

-المغرب ح يأذن

=دسيني في دعواتك

-ههههه كويس

=جادي معاك قولي يارب عمار يكون دايما مبسوط،وفرحان زي يوم الليلة

-يااارب

=يلا نتلاقي في الواتس

-بايات

قفلت منو لقيت المكالمة 6د قايق أنا أخر مرة إتكلمت مكالمة طويله كانت مع دان لما حكت لي موضوع أما عمر بنتكلم 5دقايق لو بالغنا .. الليلة اليوم دا من أغرب الايام العدت علي في حياتي .. طلعت مع ولد غريب .. لا وككمان صافحتو .. أكلنا أيس كريم وإتونسنا ساعتين .. قدمني وأسي إتكلمنا 6د .. إتكلمت مع أبوي ساعتين .. فجأة إتزكرت عمر في نص الزحمة دي وين الليلة 🙂💔 بالبساطة دي بقا يومي م بشملو

طلعت صليت ولقيت أمي جات .. سلمت علي واكلنا واتونسنا عادي جا عمر داخل قال

السلام عليكم

أمو أول واحدة ردت عليه وكلهم ردو أنا فضلت ساكتة 😪 وكنت قاعدة جنب أمو علشان عارفة حيجي يقعد جنبها قمت رفعت كبابي الشاي ودخلت المطبخ م جيت منو سامعاهم بتونسو أمو ندهت علي أجيب ليهو أكل .. ماغلطة زول غيري أصلا أنا عودتو كدا جهزت الاكل ولبست توبي وطلعت وديتو ليهو قال لي وينك الليلة

=جيت متأخرة

-سكت علي كدا كلهم بقو يعاينو لي اتجاهلتهم ومشيت المطبخ سخنت ليهو الشاي وبديت أفكر ماف داعي لتصرفاتي دي حتكون ظاهرة ولو سألوني م عندي جواب 😪 طلعت رفعت الصينية واديتو الشاي وبقينا نتونس عن عرس مزن هو م كان بتكلم معاي بس كل م اتلفت بلقاهو مركز معاي قلت ليهم أنا ح أمش يوم الخميس وسماح ورزاز قالو ماشين من بعد بكرة حيقعدو معاها حكينا لأمي إنو بكرة ماشين السوق عمر قال ليهم

-خلو بالكم من .."وسكت"

=مروة قالت ليهو ماتجي تمش معانا وتخلي بالك منها

*إداركت الموقف وقلت ليهم أنا م شافعة بعرف أتصرف براي أسي ببطل المشية دي *

هم مشو زمن مسلسلهم جا فضلنا أنا وعمر وأمي وأمو قومي إنتي ي خالتو مني أفتحي الموضوع 😪 قلت ليهم م عندي مشكلة أمي تعرسو بس أنا م ح أمش من هنا أمي كانت عايزة تتكلم بس خالتو مني سكتتا وقالت لي خلاص كويس أقعدي معانا 💛

مشيت شلت تلفوني وقعدت ف التلفزيون معاهم وداخلة الواتس شايفة عمر خاتي حالة

"الف إقتباس محزن في هاتفي...
ولم أجد سطراً واحداً يعبر عن شعوري .... 😔"

لوهلة كنت ح أرد ليهو بس قلت م ف داعي أفتح أبواب إتقفلت أنا مشاعري تجاهو م بتاعت حب ولا ح أقدر أكمل معاهو في الدرب دا طالما عرفت إنو هو عندو مشاعر تجاهي أحسن أفصلا منو علشان بلاش يتعلق بي ف الفاضي .. إتزكرت قدر شنو أنا غبية مهو باين أي زول بشوفنا بقول لي بحبك بس م كنت مصدقة حسب انو الناس م عارفة الحاصل علي وليه بعاملني كدا .. بس إتأكدت وياريتني عرفت من بدري م هاين علي أشوفو كدا بالمرة عمري م فكرت أرد ليهو جميلو معاي وجع بالكمية دي 💔 أنا حاسة بشعورو ف اللحظة دي بس ماقادرة حتي أعتذر ليهو عن بشاعة الشعور البي سببي إتخت جواهو 💔ياريتني لو أقدر أقول ليهو م بيدي 🙂💔

ختيت ستوري:-

‏"نحن نولد وحيدون ونعيش ونموت وحيدون، وفقط من خلال الحب والصداقة نوهم أنفسنا لوهلة بأننا لسنا كذلك"

شافا عمار رد لي: -
كلام كتير محتواه إنو الواحد لما يكتب مقوله ويصدقا حتبقي جزو من

و علشان كدا مفروض نكتب عن الحاجات الحلوة العايزنها تحصل لينا نتفائل لانو "كل متوقع آت " طول م إنت فاكر نفسك وحيد وم بتتحب حيفضل الاحساس ملازمك وم حتشوف الجانب الاخر منك .. لما تفتكر إنو ما عندك أصحاب م حتنتبه لاصحابك ولاحتعرف تحبهم وتحس بصحبتهم ليك إتكلم معاي ريكورد وضرب لي أمثلة وحكي لي قصص من الواقع كنت بتونس معاهو وبستمع ليهو أكتر من ساعتين بندردش .. ساعتين ورا بعض بتكلم معاي تقريبا حكاية 30ريكورد .. أخر شي رسل لي أغنية قال لي أسمعيها 💛🌏🖇️

كانت كلمات مريحة شديد ومطمنة والاحلي من كدا قال لي دي سلسلة بتاعت أغاني هي ف الحقيقه م أغاني مشوار عمر بين نفرين بحبو بعض كان بِدّوِن لحظاتو معاها بالاغاني دي ح أهديك واحدة من أغنياتو في كل مرة القاك بائسة وزعلانه 😹

ضحكت قلت ليهو مصطفاكم دا كلامو حلو شديد وبالجد بطمن 🌏💛🖇️

بعدها قفلت منو وفضلت أسمع ف الاغنية كررتها أكتر من ست مرات لما حفظتها عمري م حسيت إني معنية بي أغنية أو ممكن حد يهديني ليها ك حاجة خاصة بي 🙈

بالليل الساعه ماشة لي 11 أنا معلقة في الاغنية وبدندن

"‏الوردة لو فاتا الفراش ما أَظِن تلومو مع النّدى
‏ما بتجرح إِحساسو الجميل,الريدة يا حِنين كِدا 🌏💛🖇️

ماعارفة بس حبيت المقطع دا شديد 😔💛

قفلو بعد خلصو مسلسلاتهم طلعت سريري برة قلت عايزة أنوم جنب أمي بعد صلت قالت لي روز

يمة أنا رزان روز دي رزاز

=هههه اي عارفاك رزان بس مافيها شي كلكم أساميكم زي بعض

-وليه سميتونا زي بعض

=أبوكي كان نفسو ف تؤام يسمي رزان ورزاز لما م بقيتو تؤام قال المرة الجاية نسمي رزاز

-ولو كان جا رامي قبل رزاز

=الله بديك علي قدر نياتك 💛

اتمعنت مسافه ف الجملة دي

"الله بديك علي قدر نياتك"

كم مرة نويت حاجات ولقيتا ولامشيت بعيد يوم امس القريب دا كنت تايهة ومحتارة وم عارفه أعمل شنو من جواي إتمنيت تحصل ولو معجزة تخليني أعرف كيف إتقبل الموضوع وم أظلم أمي .. كنت عايزة أسامح أبوي وفعلا حصل .. كنت ناوية أفرح وأحس بمتعة الحياة وحصل .. كنت محتاجة شخص يفهمني ويحس بي واذا بي القي عمار 🌏💛🖇️

فعلا الله بدينا علي قدر نياتنا

طالما في العمر باقي
بكرة تنجبر الخواطر 💛
الله سامع .. الله شايف ..الله قادر
الله ما حا يسيب عبادو .. و كل ليلاً ليهو اخر..💛

حكيت لأمي إني إتونست مع أبوي كانت فرحانه لي شديد وقالت لي

"دعواتي الكتار صبحن بقن 🌏💛🖇️"

يوما لأول مرة أنوم مرتاحة نومة هنية شديد 🌏💛🖇️

"يا ألطاف الله الخَفِيّة، ضُمّينا." 💗

#يتبع
#نهاية_الحلقة_الـسابعة_عشـ17ـر
#بقـ ✍️ـلم:نوودين_بت_من_حب

#فيلـوفوبيـا
(سميتك الخوف البطمن)
#الحلقـة_الـثامنة_عشـ18ـر
#بقلـ ✍️ـم:نـوودين=Πeedoo

" وأرجع إليك بكل هذه الثقوب في عمري ، وأتظاهر امام عينيك بأنني نآي 💛🖇️"

دان صحت لقت أحمد طالع من الحمام

_صباح الخير حبيبي .. يلا ي كسلانة قومي علشان ح أوصلك الجامعة حتي أمش الشغل

=ماقادرة ياخ
-مش قلت ليك م نسهر

=أعمل شنو حصل الحصل خليني أنوم

-وجامعتك؟

=أصلا لاب م مهم حكلم رزة تشرح لي

-لبس وإتعطر وطبع بوسة علي خدها وخت ليها مصاريفا وقال ليها طيب ح أنزل أشرب الشاي مع ناس أمي بحاول أجي بدري الليله 💛

نزل تحت لقا أروى بتجهز للجامعه صبح عليها وباين إنو رايق ومبسوط

-صباح الخير

=أهلين "لسة مصدومة أحمد مفرهد كدا ايوة عارفة إنو هو مبسوط قدر يرجع دان بس،م إتوقعت بالسرعة دي أمورهم تظبط وينسو الفات "

-طالعة الجامعة؟

=اي

-ح أوصلك طيب خليني أشرب الشاي بس

دخل المطبخ صبح علي أمو وقال عايز شاي إستغربت لأنو من فترة طويلة م شرب معاهم الشاي أمو إتبسطت جدا وجهزت ليهو شاي بي بسكويت وقعدت تتونس معاه لما خلص وقال ليها دان دي خليتا نايمة قالت م حتمش الجامعه ماتطلعي تخليها براها

-أحسن تقعد تونسني زهجت من قعدت براي دي،

يلا ي حجة فتك بعافية وطلع هو وأروى طول الطريق كان بتونس معاها وبسألا عن الجامعة وتخصصا كأنو أول مرة 😹 نزلا قدام باب الجامعة وأداها مصاريف زيادة

"الحب دا حلو شديد لما يتزرع جواك بزهر وبشمل كل الحواليك 🌏💛🖇️"

____________________________

صحيت بدري أصلا إتعودت صليت الصبح ورجعت رقدت علشان م ماشه الجامعة نسيت إنو عمر حيستني نشرب الشاي مع بعض زي كل يوم 💔

صحيت بعد الشمس جاتني دخلت جوة لقيت رزاز بتنضف

_نحن ماشين السوق لو نمتي حنمش نخليك ..

= أمشو الساعه يداب 8 ماتستنو طاردينكم
طيرت النوم من عيوني زاتو.

مشيت المطبخ لقيتهم خلصو البسكويت وم فضلو لي زعلت طوالي وشاكلتهم مروة قالت لي أمش لعمر جيبي ليك بسكويت وتعالي إشربي .. قلت ليها خلاص م عايزة إنشغلنا مع النضافة وتجهيز الفطور وغسيل العدة وموضوع حمام الساعه بقت 11ونص جهزنا كلمنا حبوبة وقفلنا البيت وطلعنا قبل نمش غشو عمر ناس مروة عايزين يشيلو منو قروش .. فضلت ساكتة

-ماشين خلاص؟

=اي

-رزة أنتي الليلة مالك م مشيتي الجامعة؟

=عندي لاب واحد بس وعايزة امش السوق

-طلع قروش أداها لمروة وقال ليها حساب رزة وروز معاكم

رزاز قالت ليهو قروشي كم؟

ضحك قال ليها مروة حتوزعهم بيناتكم بالتساوي

-سامعه ي سماح بعدين م يظلمونا قالو بالتساوي

=نهرت رزاز قلت ليها انتي سيبي الطمع مش أبوي حيرسل ليكي مالك وحق الناس

عمر عاين لي بي نظرة يداب لاحظت لردة فعلي قلت ليهو حول لي رصيد زين كنت عايزة أغير الموضوع ..

مشينا طوالي كان يوم ظابط شديد لفينا سوق أمدرمان دا لما فترنا إشترينا فساتين طقم .. أبوي رسل لي قروش أكتر من حقت رزاز 😹 ودورناها شكلة في نص السوق لما حلفنا م نرجع سوا هي وسماح صحبات وانا مروة بنتفق قلت ليهم ح أعزم مروة بيتزا ونرجع سوا إنتو أمشو .. مسافة ونسينا الموضوع من أساسو إشترينا كل شي لما إشتريت مسبحة لحبوبة وجدو .. ونعال بيت  لأمي وخالتو .. وإشتريت ساعة لعمر ورامي .. نسيت إننا متزاعلين إتعودت لما أشتري لنفسي شي أشتري ليهو معاي 🙂💔

أول م وصلنا البيت نمت من التعب .. صحيت المغرب أنتظرت أمي جات وإتونسنا لقيت مكالمتين من دان رجعت ليها إتونسنا مسافة وقالت بكرة بإذن الله حتجي وعندي محاضرة فاضية ح أشرح ليها الفات ..

إتكلمت مع أبوي وشكرتو ع القروش الرسلهم لي 😹 مع انو عادي برسل من زمان بس،كنت برفض أشيل ومجننا أمي أي حاجة عايزاها بشيلا منها ..

جا عمر سلم علينا وطلعنا حاجتنا أديتو الساعة .. عاين لي مسافة وماقال شي وأنا م حبيت أقول شي 🙂

مافتحت الميديا اليوم دا خالص .. نمت بدري علشان الصباح عندي محاضرات كتيرة عايزة أرتاح ..

الصباح في المواصلات فتحت تلفوني مركزة مع أذكاري لحد م وصلت الجامعة إتلاقيت مع دان وعديناها ونسة وشوق حسيت نفسي مشتاقة ليها شديد أول مرة أفقد لي زول ويبقي جزو من يومي وإتعلق بيهو كدا .. الاحساس الادتني ليهو دان ولامرة لقيتو عند واحدة من الفاكرة إني صحبتهم .. دان علي طول بتحسسني إني أختها ..

خلصنا محاضرات وقالت لي حتنتظر أحمد .. أنا رجعت البيت طول الطريق كنت سرحانة بالشباك أفكار كتيرة جايطة مافاهمة شي وصلت البيت أخدت لي دش وصليت العصر لقيت رزاز وسماح مشو ناس عمتي فضلنا أنا ومروة بس ..

مروة لسة م جات .. طالعة من الحمام وبنفض شعري حبوبة شاكلتني 😹 التهابي كعب شديد ولو مرضت بجننهم دخلت اتسرحت وقعدت اتصور اي والله 😹معارفة حاسة بشنو انا نادرا م اتصور ..

بعد زهجت من التصوير مشيت شلت من ماسكات رزاز عملت واحد وفتحت دفاتري عندي رسمة بادياها خلصتها علشان الجمعة والسبت حكون مشغولة قلت انجز اسي شوية المغرب اذن جات مروة وأمي كمان أكلنا ورجعت للرسم بعد ساعتين خلصت لفتت إنتباهي رسمة

عمار..

إتزكرت إني رسمتو بس ليه م عارفة 🙂💔 أحيانا بتصرف تصرفات م ليها أي ستين لازمة لميت الرسمة مع رسوماتي القديمة وجهزت الهدايا مفروض أوديهم لعمار زيما إتفقنا بس مانفسي أمش ليهو ..

دخلت الواتس أكدت علي أصحاب الطلبيات ولقيت رسالة منو .. رديت ليها قبل أطلع لقيتو متصل بدون أحس فضلنا ندردش لحد م جات مروة قالت لي مليت براي بكرة ماشة لناس سماح ..

=وانا أقعد مع منو لو أنتي مشيتي؟

-أقعدي مع البونسك في التلفون دا مش سافهاني علشانو؟

=هييي م كدا والله خلاص ح أقفل تلفوني تعالي

عدينا اليوم بس فعلا م ف زول بقدر يعوض مكان زول مروة كانت فاقدة ناس رزاز وجوطتهم وتعليقاتهم عن المسلسلات أنا كنت جنبها بس ماشاركتها أخر شي إقتنعت وقلت ليها خلاص أمشي ليهم وأنا بلحقكم بعد بكرة ..

طلعت لقيت عمر جا سلمت عليهو وأديتو موية وقعدنا جنب بعض ساكتين قال لي

-رزة معليش

=مايهمك

-رزان م تعامليني كدا ماتاخدي في بالك كتير انا مرات بتصرف معاك تصرفات غبية بس والله م قاصد شي

=إنت م تتصرف معاي كدا طيب 🙂

-بس كدا من عيوني

=شفتا!!

=هههه خلاص ياسجم كدا ينفع معااك

=ااايااا 😹

-الحمدلله

=علي شنو

-عليك

=وات؟

- انو اتصالحنا ي غبية ي غبية

=اها هو انا اصلا م شاكلتك

- المهم الحصل دا م يتكرر

=سمح

عمر بعد مشي ماإطمن كليا بس كونو مايخسر رزان دي حاجة عندو بتمحي الف شعور سيئ جواهو  كتب بوست :-

" وأرجع إليك بكل هذه الثقوب في عمري ، وأتظاهر امام عينيك بأنني نآي 💛🖇️"

جد إحساس إنك تتظاهر بالقوة وإنو الموضوع عادي دا أحر من الموضوع البوجع نفسو 💔

_____________________________
عمار كان بحاول يتجاوز ماضيهو ويدي نفسو فرصة ماخاتي في بالو إنو يرتبط أو يرجع يحب بس أمو علمتو

"إنو النهاية لو م كانت سعيدة إذن تبقي دي مالنهاية ♥️"

كان بفتش في قصص زيما قالت ليهو الحياة قصة وكل البدخلو حياتنا هما قصص وعلي حسب فهمو لقاؤ مع رزان وحوجتا ليهو حسستو إنو بقدر يدعم الزول رغم إحتياجو الشديد للدعم

"فاقد الشئ يعطيه وبسخاء ♥️"

بقا شاغل نفسو بقصتا ليه عيونا فيها كلام كتير .. ليه هو الوحيد الشايف إنها محتاجاهو بالزات .. محتاجة زول يطمنا .. ليه بتحاول تضاري خوفا لاحظ للحاجة دي خلال لقاءتهم المااتجاوزت مرتين تلاتة .. كان راقد وسرحان في القمر بدندن مع أغنيتو المفضلة

" كوني الكلمة لصمت الليل وكوني النجمة  ♥️"

رغم الصمت هي جواهو .. كان بعاين للسماء بس صورتا مرسومة

لأول مرة من سنتين يفكر في حد غير اللي كانت شاغلة تفكيرو طول المدة الفاتت ..

______________________________

مع دان طلعت غرفتا بعد إتعشو تحت مع ناس أروى خلت أحمد بتونس مع ناس أمو دخلت أخدت ليها دش وإتعطرت وبتسرح في شعرا جا أحمد داخل إرتبك أول م شافا هو كيف قادر يشوفا بنفس اللهفة في كل مرة
علاقتهم م جديدة بس الشغف لسه م إنتهي ..

بتشبه عروسة الليلة .. الحبيبة الأولي .. أول ميعاد .. أول لمسة إيد ..  أول حضن .. أول رعشة جسد .. وأول قبلة

كانت جميلة بشكل لايقاوم .. بس كل م يقرب منها بتزكر ضعفو .. اللحظات الجميلة م بتكتمل ..

لقاها وقف سرح فيها مسافة مشت عليهو .. وقفت قدامو وفضلت ساكتة .. مد يدو وكأنو بيقول ليها إنتي حقيقية؟

=يداب جاي ي أستاذ؟

_معليش بس

=إتس أوك .. غير ملابسك وتعال أمس ساهرت بي والليلة بساهر بيك عندي فيلم عايزاك تحضرو معاي

-بس كدا من عيوني

=سبقتو علي الصالة وكانت ماسكة القداما وحاضناها وبتحضر بتركيز جا قعد جنبها قالت ليهو عارفاك م بتحب النوع دا بس العرض جديد .. حلو والله دا ممثلي المفضل أحضرو معاي علشان خاطري

-مسك منها القداما وقال ليها علشانك بعمل أي شي

=باستو بسرعة ورجعت مركزة مع فيلمها

علي الرغم من إنو أحمد بي طبعو م بحب الافلام والتلفزيون عموما ولو حضر بكون أخبار أو برنامج ولو حب يفرق بيحضر ناشيونال جوغرفي بس فضل مركز معاها وفي الفاصل بونسا كانت نعسانة بس مصرة تقاوم لنهاية الفيلم نامت علي كتفو ..

ماحب يصحيها رفعا زي الطفلة صحت في نص المسافة وكانت حتصرخ سكتا وقال ليها أهدي

نزلني ي مجنون حترميني

وقف وقال ليها لو عايز أرميك من قبيل كان رميتك

طيب أمش وقفت مالك 😹

عجبك الموضوع فجأة

أحمد ياخ 🙈خلاص نزلني بمش براي

الليلة للصباح نقيف هنا

حرام عليك ياخ أنا خايفة

انتي عارفة إنك بالنسبة لي زي الشافعة يعني م حاسي بيك أصلا 😹

ياأحمد خلاص ياخ

لما انتي م قدر السهر بتساهري ليه

عشان الفيلم

وإن شاءالله تميتي

أنا نمت متين؟

لما الفيلم سخن نمتي 😹

خلاص طيرت مني النوم نزلني ح أمش براي

إتحرك ونزلا في السرير

مجنون إنت ..

"يبدُو بأنني لن أتجَاوز معكِ لهفة البداياتّ يبدو بأنني سَأُحبك بَهذا الإندفاع إلى الأبد هَذا ماسيحدُث مادمت في كل مرّة أراكِ تضحكِ فيها أُحِبك من جديد 🌏💙🖇️"

#يتبع
#نهاية_الحلقة_الثامنة_عشـ18ـر
#بقـ ✍️ـلم:نوودين_بت_من_حب

📖 اذا انتهيت من قراءه  الروايه اضغط علي #لايك 👇 واذا حصلنا علي #خمسين    (50) لايك سوف نقوم بتنزيل    #بقية_الرواية.

#فيلـوفوبيـا
(سميتك الخوف البطمن)
#الحلقـة_التاسعـة_عشـ19ـر
#بقلـ ✍️ـم:نـوودين=Πeedoo

الرسائل النصية بتزرع جوانا احساس تاني ومابتجي من اي زول 💙🌸

تاني يوم قدمني عمر من الصباح مع إنو خلاص إتعودت للجامعه وبقيت عادي أصحي بدري وأطلع براي بس علشان طولنا وكدا قدمني لحد إطمن أني ركبت حتي رجع لما وصلت الجامعة وخلصت محاضرات دان قالت لي إنتي شايلة معاك شنو الليلة؟

دي طلبيات ناس ح أوديهم لعمار

-عمار دا منو انتي لامة كل العمرات في حياتك 😹

= واااي م لاحظت للصدفة دي المهم ي ستي دا قصتو طويلة بحكيها ليك

-اقعدي احكي لي سريع

=مشينا الكافتريا شلنا بارد ورجعنا الاستراحة قعدنا حكيت ليها من البداية للنهاية ضحكت قالت لي

-دقيقة دقيقة .. ماقادرة استوعب انتي طلعتي مع ولد مشوار

=قادرة تتخيلي

-كنتي حاسة بشنو

=محسيت بي شي 🙂

-سجمنا ي رزة 😹

=انسي انتي واحمد أموركم كيف؟

-ظابطة 🙈

=ماتتخجلي لي أخرتيني أنا مفروض أمش لناس عمتي الليله الحنة بتاعت بتها يلا باي

-طيب انچوي ي بيب

=ح اتصل ليك بعد اصل

-بالسلامة 💙

طلعت إتصل لي عمار

-الروووز" ياضلنا "

=أهليييين

-الخبر والصحة واللمور

=كلو تمام التمام وانت عامل شنو

-عامل صينية بسبوسة تقطعي يدك وراها

=😹😹😹ع اساس بتعرف

-ماتستخفي بمواهبي انا شيف والله طوالي بساعد أمي في شغل المطبخ إتعلمت منها كتير

=امممم كويس والله

-اها م طالة علي

=مشغولة مابقدر ياخ " وأنا قربت لمكتبتو 😹"

- إذن حتفوتك البسبوسة

=حزينة منك

-أنا الأحزن ليه كنت متأمل إنك حتجي وخيبتي ظني

= معلش

-م حنك يازولة .. لو في العمر بقية بنتلاقي

=دا لو م سافرتا

-ماشة وين؟

=السعودية

-ماجادة ياخ

=جادة

-كيف ومتين الكلام دا؟

=ح أصوم هناك

_طيب والشغل القلنا حنبداهو

=خليهو بعد أجي راجعة

- طيب ياستي ربنا يسهل "وسكت"

= انا خلاص قربت ليهو فضلت ساكتة لما وصلت لقيتو في المكتبة لما شافني إتخلع 😹قفلت المكالمة وقلت ليهو أدخل

-حقو الزول يقول ليكي م تتفضلي

=ليه الحقد دا كلو

- عشان كذبتي علي

=إسمها سبرايز 😹

- المهم مبسوط بشوفتك

=سكتا م رديت قال لي اتفضلي عندو كنبة كدا وجنبها صبارة موية ختيت الحاجات ومشيت اشرب جا علي

-إستريحي أنا ح أضيفك

=لا م مشكلة كمل شغلتك ح أشرب

-ماعندي شغلة أصلا كنت باكل لي ف بسبوسة وسديتي نفسي لما قلتي مسافرة

=أنا؟ سديت نفسك

-أنسي هاك

مد لي قعدت وبي طبعي بمسك الكباية وبشرب بي راحتي هو فضل مستني رفعت راسي قلت ليهو ماتنتظر لما أخلص برجعا

-عشان م عندي تربيزة يعني 😹

=مفروض تجيب ليك تربيزة علشان م حتقعد تستني الناس يشربو

-ناس منو م ف زول غيرك قاعد أديهو مويه العايز يشرب براو

=لما مارديت قال لي اها كيف مع الدراسة

-ماش حالا

=خليكي هنا شوية داخل البيت

-ماتتأخر أنا مستعجلة

=هو ياتو يوم م كنتي مستعجلة 😹

طلع مشي فضلت أعاين للمكتبة شكلو غير الترتيب تاني 😹 وعلق لوحات واحدة فيها صورة راجل بشبهو شديد مشيت عليها مكتوب
"رحمة الله تغشاك تحت الثري ياغالي "

عرفت إنو دا أبوه نفس الملامح فضلت مركزة ف الصورة ، طلعت تلفوني صورتها حابة أرسما عارفة دا م تصرف لايق م إستأذنت منو بس م حيزعل 💛

رجعت مكاني طلعت الطلبات كانو 10 برطمان ولوحات حيغلفهم بأكياس هدايا وحيجو يستلمو الطلب من مكتبتو حنتقاسم الارباح 💛 زمان م برسم لاولاد علشان اتجنب حكاية ياخدو رقمي ويرسلو لي ف الواتس وكونو إتلاقا معاهم علشان أوصل ليهم الطلبية دا موضوع أنا م عايزاه وكنت بضيع طلبات كتيرة بس حاليا ح أقدر أعمل كدا بمساعدة عمار ..

جا داخل شايل صحن بسبوسة 😹 قال لي دا نصيبك ي قول أمي

=قول ليها تسلم لي 💛

-وأنا؟

=بقا فيها مقابل يعني؟

-لا خلاص هاك ضوقيها بالاول واديني رايك

=شلتها وقلت ليهو دي الطلبات تغلف تلاته منهم بي ورق جرايد والباقي  بي أكياس هدايا كاتبه ليك رقم الطلب وإسم صاحبو ورقم تلفونو لما يجو يستلمو تحاسبهم وبعدها نتحاسب .. قعد جنبي وبقا يشوف الرسومات

-بترسمي من متين

=من زمان شديد

- كلك م تامة عشرين سنة شنو من زمان 😹

=خلاص من عمري 10

-ماشاءالله عابرة شديد

=قعد يلم الحاجات وانا باكل جنبو وبجاوب ليهو ع الاسئلة عدينا نص ساعه بنتكلم ونرتب وح أوريهو بعمل كدا كيف وبحتاح لشنو قال هو حيوفر لي كل شي هنا لما خلصت لقيت الزمن فات قلت ليهو انا ماشة لحدي أمدرمان ياخ

-بتتسهل حتلقي مواصلات

=في بحري زي الزمن دا صعب القي مواصلات امدرمان

-البوديكي بحري شنو اركبي من العربي هنا مواصلات امدرمان

=لالا م بعرف

-كيف يعني م بتعرفي لازم تتعلمي

=م متعودة ولا حصل مشيت من هنا ح اتوه

-ياروز اي حاجة لابد يكون ليها اول .. يعني لازم تعمليه لاول مرة .. لازم تجربي الماحصل جربتي

=دا م وقت تتفلسف لي فيهو انا م بعرف أمش وعندي رهاب من المواصلات المسافتا طويلة 🙂💔

-معلش بس الليله ح أخليك تواجهي خوفك دا وتكسري الحواجز دي أرح بركبك من هنا مواصلات الشه

داء ولا ماشة وين انتي

=اي بعد الشهداء بشوية ماشة ود نوباوي

-طيب ح تركبي من هنا الشهدااء ومن هناك أركبي أي شي يوصلك ود نوباوي

=قبل أرد ليهو وأنا أصلا متخوفة من الفكرة قال لي ح أقدمك ورفع المفتاح وقال يلا علشان م نتأخر

غلبني الاقولو ليه طلعنا وبقا يحكي لي مغامراتو وكل الحاجات العملا لأول مرة في حياتو كيف سافر البلد وهو عمرو 11سنة برااو. .. كيف سجل للجامعه أول يوم .. كيف مشي أماكن كتيرة م كان بيعرفا .. لحد م وصلنا وإنتظرنا جا كريز حجز لي وقال لي م تتوتري ح أتابع معاك بالتلفون لحد م تصلي 💛

وفعلا كان بدردش معاي بالـ SMS لحد م  وصلت وبعد نزلت اتصل علي قال لي

-أها كيف كانت الرحلة الي ام در

=😹😹😹مابالسؤ الكنت فاكراه

-أفتكر تبطلي تفتكري لانو أفكارك كلها بتطلع م زيما فكرتي

=سمح 😹😹

-يلا تصلي بالسلامة ماشي الحق الصلاة

=ربنا يتقبل

بعد وصلت بقيت محتارة البيت باي شارع 😹،أصلا لي أكتر من تلاته سنة م جيت ليهم ونسيت البيت اتصلت لسماح م ردت لي اتصلت لمروة م ردت قربت ابكي 🙂💔

جو بنات قاشرات كدا سألتهم قالو لي اي نحن كمان ماشين لمزن اارح وبقو يسألوني بتقري وين وهي بتبقي ليك شنو واسئلة كتيرة لما وصلنا من الباب النسوان مترصين صف وكرهتي والسلام الكتير 😪

كويس انو سماح رجعت لي قلت ليها انا جنب الباب تعالي لي فضلت واقفة بعيد وبتناقش معاها هي قالت بتلبس والحنة شوية حتبدا وقاعدين يتمكيجو م فاضين لي زعلت منها قفلت التلفون ودنقرت مشيتي واحدة لحد م وصلت لاقتني عمتي ام مزن حضنتني وسلمت علي بكل حب وساقتني من يدي ودتني للنسوان القبيل م سلمت عليهم 😹😹 ياخ انا اتمنيت الارض تتشقا وتبلعني 🙂💔

شبكوني سلام واسئلة من نوع مالك م بتجي للناس؟
ودخلتي الجامعة؟
انا مرت عمك فلان، وانا اخت عمتك، وانا بت جدك، غايتو بس وكلام كتير كتير تقريبا ربع ساعة دي كلها سلام حتي مشيت منهم ..

لقيت شافع وصف لي ناس مزن وين من دخلت قلت ليهم وااااي زول يلحقني بي موية حتي سلمت عليهم جيت سلمت لي زونة

-العروس

=اهلين ي رزة

-كيفك؟

=الحمدلله

-مالك ي بت

=ماف شي انتي كيف وعمتي وناس حبوبة كيفهم

-نحن كويسين "استغربت ملامحا وطريقة كلاما زونا يمكن انا وهي م صحبات شديد زيما هي مصاحبة رزاز بس برضو م كانت كدا في يوم بتسلم لي بحب شديد تقريبا الوحيدة البحب اسلم عليها بالحضن ومن بين كل بنات اهلي بتونس معاها ملامحا بتبين انها زعلانة ومتوترة حتي صوتا م فيهو نبرة المرح الدايما بتتكلم بيها قعدت جابو لي موية وسماح قالت لي اتغديتي؟

ماجعانة

طيب جبنا ليك ملابسك شوفي الشنطة هناك واخدي ليك دش تعالي نتمكيج سرعة الحفلة حتبدا بعد الصلاة

-مابعرف استحما في بيت ناس ولابعرف انوم ف سرير ماحقي حاسة نفسي مضايقة دي اول مرة ابيت برة البيت دخلت الحمام اخدت دش سريع اتوضيت صليت وجيت لبست وهم طلعو لانو انا اتاخرت م انتظروني .. فتحت تلفوني لقيت مكالمتين من عمر وامي رجعت لعمر

عمووور

رزة وين انتي قدرتي تمشي براك؟

اطمن انا معاهم اسي وصلت اي

كنت مستنيك تجي واوصلك

مشيت من العربي م جيت بي بحري

براكي؟

اي الح يمش معاي منو

خلاص م مشكله انتبهي لنفسك وخليكي جنب ناس مروة علي طول

حاضر

قفلت منو رجعت ل أمي طمنتها إني وصلت وكدا ولا إتمكيجت حتي 🙂💔طلعت مشيت لحبوبة في غرفتا

أم أبوي بس لي أكتر من 5سنة م شفتها ولا إتكلمت معاها دخلت لقيتا قاعدة براها والغرفة مضلمة .. سلمت عليها وفتحت النور زكرتها بي يمكن م اتزكرتني كويس بس من قلت ليها بت محمد مسكت يدي وقالت لي مالكم قسيتو علي 💔لحظتا دموعي كانت حتنزل .. حقيقي يعني حبوبة م عندها ذنب نحن ليه م بنسأل عنها، ذنبها شنو؟
إعتذرت منها كتير وونستها مسافة قالت لي مزن الوحيدة البتهتم بي وياها ماشة .. ماعرفت ارد ليها حتي قلت ليها عايزة حاجة انا ماشة

-ماتبعدو كدا ي اولادي مامعروف العمر خليكم جنبي اغشوني

=حاضر ي حبوبة باذن الله 💙

طلعت لقيتهم بتصورو واخر قشرة جريت كرسي قعدت جنب شفع كدا واحدة منهم جات مدت لي كاسة رز قلت ليها شكرا ي حلوة م قاعدة اكلو

-حلو والله ضوقي

=مسكتو منها وقلت ليها انتي اسمك منو

-اسمي رهف

=اسمك حلو ماشاءالله جيتي الحفلة مع منو

-مع ناس ماما هديك ماما "وصفت لي علي عمتي منال "

=امك اسمها منو

-ماما منال

=انتي بتعرفي زونة؟

-اي زونة بت خالتو نهال

=وبتعرفي خالو محمد

-اياااا في السعودية مشينا ليهو مرة بالطيارة

=يلا انا بتو الكبيرة .. يعني ببقا ليك بت خالك وامك دي عمتي

- كوركت باعلي حسها ماما ماما دي بتعرف خالو محمد

براءة الشفع 😹😹 أحرجتني لما شافوني ناس عمتو منال ونهال نادوني تعالي ي رزة

مشيت والشفع تبعوني .. عمتو نهال قالت لي انتي م بتعرفي بنات عمتك منال

-ابدا والله شفتها في وفاة جدو بس كانت صغيرة شديد ماشاءالله كبرانة

عرفوني طلعو الشفع الجنبي كلهم بنات عمي وعماتي وانا م عارفاهم

-عمتو منال قالت لي لقيتي اولاد عمك احمد؟

=لالا اتلاق

يت مع سمر وسحر بس م لقيت الاولاد

-بكرة تلاقيهم انتو رايحين ساي من اهلكم كويس عرس مزن خلاكم تتلمو خطوبة سحر م جيتو .. تخريج رهف من الروضه عزمتكم م جيتو .. ولدي وائل سافر عملنا ليهو لمة قبل السفر ناديناكم أبيتو تجو .. طوالي عمتو مناهل قالت لي انا زاتي عزمتهم خطوبة زونة جات رزاز بس رزان دي م بتجي للناس كعبين انتو

في سري قلت ليهم وانتو البتجونا يعني امي عملو ليها عملية م جيتو .. جدو عملو ليهو عملية م جيتو .. عملنا كرامة ماجيتو .. قاعدين تجو للناس ف العيد .. بس بتعرفو تلومو 🙂

سكتا مارديت نفسي اقول كلام كتير بس دا م وقتو لو م زونة زاتو م كان جيت جاتني سماح قالت لي وين انتي تعالي نتصور

ياخ مالي نفس في شي اتصورو انتو

ماتبقي نفسية كدا يوم واحد بنتلما ناس سمر بسألو منك من قبيل

مشيت معاها وسلمت عليهم وقعدو يغنو ويرقصو فتحت تلفوني ماركزت معاهم كتير

..
عمر رجع البيت وكان كئيب مافي زول يفتح ليهو الباب ويجهز ليهو الاكل والشاي بكل حب زي باقي الايام، ماف زول يجوط،زمن المسلسل، البيت كان هادئ خالتو عشة بتصلي وأمو راقدة أول م جا قعد جنبها وسلم عليها كانت عايزة تقوم تجهز ليهو الاكل قال ليها استريحي بجهزو براي دخل المطبخ وهو بفكر ف رزان كيف حيقدر يتعايش مع غيابا، مخيفة جدا فكرة انو خسرا وم كان عايز الحب دا نهايتو تكون كدا ..

(أعلم أن هذا الحُب بلا جدوى، ولكني أحبّك 💔🙂)

#يتبع
#نهاية_الحلقة_الـتاسعـة_عشـ19ـر
#بقـ ✍️ـلم:نوودين_بت_من_حب

#فيلـوفوبيـا
(سميتك الخوف البطمن)
#الحلقـة:الـعشـرين
#بقلـ ✍️ـم:نـوودين=Πeedoo

"واقف براك والهم عصف" ريحآ "كسح زهرة صباك "ليلا" فتح شرفة وجع" قمرا" رحل فارق سماك جدد عذاب الارصفة ضوء المصابيح البعيد أتعب عيونك وإنطفا."

بعد الحفلة خلصت بقينا نرفع ونلم والنسوان بالجنبة شغالين خضار وونسة والبنات رجعو للدلوكة وجابو العشا واتلمو ف الفرشة شي غنا وونسة الساعه 2ص ونحن لسة م نمنا أول مرة في حياتي أساهر كدا كنا بنصور فيديوهات توثيقا للحظات م معروف تاني نتلما متين ..

كان يوم حلو والعجب الصباح،بعد خلصنا فطور مشينا الكوفير مع زونة وقضيناها ونسة مسكنا الكوفير ع حسابنا تقريبا دي أول مرة ف حياتي أعمل ميك اب كامل كدا وإتصورنا ختيت الصور إستوري دخل لي عمار

"وضاحة يافجر المشارق غابة الابنوس عيونك يابنية من خبز الفنادق 💙"

=ضحكت قلت ليهو دا غزل ولا واحدة من اغانيك البتحبهم

_يارايحة انتي دي اغنية لسيدا وطوالي رسلا لي قلت ليهو حقت المرة الفاتت علقت فيها وحفظتها قال لي مش قلت ليك ح أهديك أغانيهو كلها يلا أسمعي دي وأحفظيها 💙

فعلا بقيت مشغلاها الناس ف شنو وانا في شنو. 😹😹

بعد الغدا والحفلة طلعنا من الصالة الساعه كانت 8مساء ودعنا زونة ورجعنا البيت إتزكرت بكرة عندي محاضرة مهمة واااي لبسة م عندي 🙂💔 شلت عباية سماح ومشيت الغسالة اتصل لي عمار ونسني حكيت ليهو العرس،بحكي وانا مبسوطة قال لي هووي انتي اول مرة تحضري عرس

=بتتريق علي مش غلطانة لاني بحكي ليك

-لالا ياخ بس قصدي حماسك ووصفك للعرس حسسنا م ياها اعراسنا البكره احضرا دي 😹

=بقا هو يحكي لي عن مناسباتهم والمواقف البتحصل ونسني لحد م خلصت غسيل عاينت للساعه لقيت نفسنا متكلمين 45دقيقه معقولة انا بكره المكالمات 🙂💔 دا شنو البحصل دا حاجة م مطمنة 😹

اتهربت طوالي وقلت ليهو ح أمش أكوي وأنوم لانو بكرة عندي محاضرة بدري مشيت كويت والصباح من بدري ودعت حبوبة وناس البيت نصهم نايمين مالحقت اودعهم ناس سماح قالو لي احتمال نرجع واحتمال نقعد نضاير معاهم الحاجات البيت جايط م صدقو اندمجو مع ناس سحر وسمر واخر صحبة مستغربة كيف بتصاحب زول عرفتو في يومين 🙂💔مهو ي انا الغريبة ولا هم وفي الغالب انا 🚶‍♀️

المواصلات زحمة والشارع طويل كل شوية اعاين للساعه الدكتور صعب لو دخل مايدخل زول بعدو وصلت الجامعة والمحاضرة بدت بي دقيقتين مستحيل الدكتور يدخلني 🙂💔يعني خسارة التعب التعبتو طيب والصحية من بدري؟والغسيل والمكوي نص الليل؟
شاي الصباح الماشربتو؟
قروش المواصلات؟
اللمة الظابطة البدلتها بي محاضرة فاتتني 😭😭اقسم بالله شوية ودموعي حينزلو زعلت زعل مشيت الكافتريا قعدت وشوية ح أبكي دان اتصلت علي جرسين وفصلت المكالمة رسلت لي مسج

"رزة بس تخلصي من المحاضرة ارجعي لي "

اتصلت عليها

-مالك ي بت م ف محاضرة ولاشنو

=لالا الدكتور جا وم حيدخلني 😢

-قولي لي جاية علشان محاضرة واحدة وم دخلك

=قادرة تتخيلي 😭انا ح ابكي خليت ناس رزاز ف بيت المناسبة وحيتبسطو وانا جاية ع اساس عندي محاضرات م كنت عارفه انو التالته اتلغت وياهو الاولي فاتتني

-كررر عليكي انا لو كنت ف البيت كان تجيني بس ماشه مع عمتو السوق

=م مشكلة ح ارجع البيت اكمل نومي 😔

-طيب لبكرة نتلاقي

قفلت منها وقفلت معاي إشتريت لي سندوتش وقلت ح ارجع البيت اصلا تعبانة شديد اليومين الفاتت دي م نمت كويس ..لما قربت للبيت شايفة عمر برش موية جنب البقالة مشيت سلمت عليه وسألني وحكيت ليهو و رجعت البيت لقيت أمي وخالتو قاعدين م مشو الشغل إستغربت فيهم..!!

-رزان مالك جاية من الصباح كدا انتي كويسة ي بت؟

=اي كويسة بس مالحقت المحاضرة الدكتور دخل وم بيرضي زول يدخل وراه وكمان المحاضرة التالته كنسلوها ماعندي شي انتو مالكم الليله م مشيتو الشغل ..؟؟!!

-سكتو وعاينو لبعض خالتو قالت لي طيب تعالي اشربي ليك شاي بتكوني م شاربة شي

=يعني دا تهرب من سؤالي لا بالجد الموضوع مريب في حاجة غلط وم عاجباني .. البيت منظرو جايط وأمي وخالتو قاعدين ماسكين قروش وكراس وشكلهم بدربو ليهم ف حسابات عاينت حوالي ف التربيزة جنب التلفزيون علب حلاوة وباكيت بارد ودا شنو بقيت م فاهمة فضلت ساكتة وواقفة

-أمي عاينت لخالتو وهي قالت لي أقعدي طيب

=في شنو ياخالتو منى؟

=أمس عبدالرحيم وأهلو جو وإتكلمو مع جدك لموضوع العقد الجمعة الجاية وماحيكون ف جوطة ولا كلام كتير علشان ..

-تمام أنا ماشة أنوم نعسانة م نمت كويس من يومين

إتحركت وحاسة جسمي منمل م قادرة أمش حتي في كتمة كأنو م ف هواء ف الغرفة مخنوقة وحاسة الكلام دا زي الكذب كدا دخلت وقفلت الباب وراي طلعت جزمتي ورقدت كدا بس عايزة أغمض عيوني والقي نفسي ف عالم غير الانا عايشاه دا .. عايزة يكون عندي أم وأبو مبسوطين وعايشين مع بعض .. عايزة يكون عندنا بيت برانا حتي لو غرفة وحوش المهم بيتنا برانا .. نتلمي المسا مع بعض أبوي يمش الشغل ويجي راجع نتغدا سوا .. عايزة أمي تقيل ف البيت تطبخ لينا ..ع

ايزة، أقول أبوي .. عايزة أسمع أخواني بقولوها .. عايزة حاجات كتيرة عمرها م حتحصل ف الواقع الانا عايشاه دا .. يعني أمي حتمشي .. ماقادرة إتخيل الشعور دا خالص .. أنا إتعودت أول م أجي من البيت أسأل منها .. لما تجي راجعة أكل معاها .. أقعد جنبها .. أحكي ليها حاجات كتيرة .. أشكي ليها من الجامعة وناس رزاز .. دقيقه ناس رزاز حيمشو معاها .. هم جد ماشين يعيشو مع راجل تاني وعالم مختلف عننا .. حيخلوني وحيدة أكتر مما أنا وحيدة .. ح أقعد مع ناس سماح بس أنا بالجد م بقدر أعيش بعيد عن أمي وأخواني .. أنا أصلا م عندي غيرهم .. كيف الحياة دي حتتعاش بدونهم .. هو ليه أنا حياتي معقدة كدا .. عملت شنو علشان يحصل لي كدا .. بقيت ببكي .. ببكي قدرتي .. كأني مخنوقة .. أنا م عارفة أعمل شنو .. بكيت من الساعة 8ونص لحد الضهر كلو قضيتو بكي ناس أمي جو دقو لي الباب مرتين نادوني للفطور قلت ليهم م عايزة خالتو قالت ليها خليها تاخد وقتها .. تاني جا عمر إتكلم معاي برضو م طلعت ليهم قلت ليهم ماف زول يزعجني .. طلعت أخدت لي دش والضهر أذن إتوضيت صليت ورجعت رقدت من الصداع راسي حيتفجر دا غير الجوع غمضت عيوني لما غفيت سمعت تلفوني برن .. إتجاهلتو بس أزعجني فتحتو لقيتو عمار فصلت المكالمة تاني رجع لي تاني فصلت رسلت ليهو مسج

"ح أرجع ليك ياعمار بس م أسي "

لقيت السندوتش ف الشنطة طلعتو علشان ريحتو م تتغير مالي نفس اكل جا رامى لقاني

-هيي انتي جيتي متين

=من قبيل

-وناس ززة وين

=حيجو بكرة.

-ماسقتوني معاكم ليه

=كانت حفلة حنة كلها بنات

-برضو زونة حتزعل قالت لي اجي عايزة تشوفني بنات عمتو منال

=المرة الجاية تشوفهم شيل السندوتش دا وأكلو

-انتي مالك زعلانة

=مازعلانة انا

-انا عارفك عشان أمي ماشة مش

=رامى إنت ماعارف حاجة خليك ساكت

=عارف أنا وعمو عبدالرحيم قال لي حنعيش معاهو

-هو قال ليك كدا؟

=اي انتو امس كنتو ماف جا وساقني بالعربية كمان

-طيب وأبوي؟

=أبوي زاتو عايش في السعودية مع عيالو نحن مالنا ومالو

-خلاص خلاص شيل السندوتش دا وأمشي

=الجو برة حلو حتجي مطرة تعالي

_ ح الحقك امش

=بعد طلع قعدت مع نفسي شوية يعني رامى م كبير يمكن هو م فاهم شي للحياة لسة بس بيعرف يعني شنو طلاق لما أبوي وأمي إنفصلو
كان هو صغير في تالت يداب بس حاليا بقا يعرف عمرو ماش ل14سنة وم ظنيت فايته عليهو حاجة قادر يشوف العالم العايشين فيه عارف إنو أبوي بي أولادو في السعودية وأمي هنا موقفة حياتا علشانا .. حتي رامى قادر يقتنع ويتعايش مع الحكاية أنا مالي؟ خايفة من شنو؟عموما الناس ماوقفو كلام وم حيوقفو؟  بس م عارفة في شي أنا م قادرة إتقبلو .. نفسي أعرف مالي

فجأة جا هواا كتير وبدت المطرة تصب أنا بحب المطر وبحس بطمأنينة في الجو بتاعو أقل من ساعة والمطرة وقفت طلعت برة شلت تلفوني لقيت مسج من عمار:-

"كأن غيوم اليوم أنتِ 💭💫💛"

تلقائيا إبتسمت للمسج رديت ليهو:

"انت أحلى حاجة فيك💙"

إتصل لي وقتها الجو كان هادئ ومزاجي راق شوية قاعدة في المسطبة حقت الباب بتاع الديوان وبعاين للسماء رديت ليهو وفضلت ساكتة

-ياعميقة

= اهلييين

-تسفهيني النهار كلو وتردي لي يداب ..اسي الواحد لو كان عايز يموت واتصل ليك تلقني الشهادة م بتردي ليو

= يعني هو الواحد دا حتي وهو بحتضر خاتيني ف بالو لدرجة يتصل لي علشان اشهودو

-علشان لمح فيك راحه المشاوير البعيده ولفحه النسمه الحنينه الجايه من جوف المضيق.

=سكتة م رديت

-ممكن أعرف في شنو؟

=مف شي مهم

-انا عايز اعرف المامهم دا

=شوية زهج وراح

-حد يزهج في الجو الحلو دا

=لاع

-انتي كويسة؟

=اياا كويسة انا

-متأكدة؟صوتك م بقول كدا

=مافيني شي

-بكرة فاضية

=عندي تلاتة محاضرات

-يعني بتخلصي حوالي الساعة 1

=حاجة زي كدا في شي؟

_ اي عازمك قهوة

=مابقدر معليش

-ماصاح ترفضي عزومتي

=معليش ياعمار خليها مرة تانية ممكن؟

-اوك علي راحتك ي ستي

=حسيتو زعل بس مالي نفس وبعدين انا بديت إضايق من فكرة المكالمات والتطورات البتحصل بينا اي عارفة إنو زول كويس .. وعاديني صديقة بس مامتعودة كدا انا كل الحكاية إني بحاول أثبت لنفسي إنو الحياة م سيئة وم كل التجارب فاشلة بس م علي حسابو .. أنا بكون مرتاحة وم بحس بشي لما أتعامل كدا معاه بس بعد أقعد مع نفسي بلقاني لسة م مقتنعة من جوة حابة أبعد شوية وأقعد مع نفسي .. فضلت ساكتة وهو م قال شي

-عمار..!!

=بيسمع فيك

-معليش

=عادي ياخ م تتحسسي أنا كمان م كان أضغط عليك

-صافية يعني؟

=قشطة

-طيب المغرب ح يأذن يلا الحق الصلاة

=حاضر يلا بينا التلفون

-حاضر

=روز

-اهااا

=ماتزعلي ياخ م شبهك الزعل

-باذن الله

=يلا يلا م تأخريني

قفلت منو وقمت عايزة أمش شايفة عمر واقف وراي

=عمرر جيت متين انت!؟

-م طلعت مكان اساسا

=معليش انا كنت قاعدة في الباب كنت تقول لي انك طالع

-م حبيت ازعجك

=ماعرفت انك هنا وكنت زهجانة جيت الحوش دا وقعدت ف الباب ما

-خلاص عادي يلا أصلي وأجيك أمشي أكلي لي

ك حاجة

*يقال بأن هناك شخص واحد فقط يلتفت لصوت قلبك إن تغيرت نبرته ♡*

#يتبع
#نهاية_الحلقـة_الـعشرون
#بقلـ✍️ـم_نوودين_بت_من_حب

الفهرس

أعزائـــــــــــي القراء .. حبابكم عشرة بلا كشرة.. نقاط مهمة راجعوها..👇👇👇
الفهرس مثبت في القناة و لن يتم ازالة تثبيته.. لا تضغط على(×) و اذا لم يظهر لك الفهرس قم بكتابة كلمة الفهرس في خانة البحث


عشــــــ❤️ــاق الروايــــــاتII للروايات الخليجية


قروب عشاق الروايات


فــــــهرس عشـــــــــاق الروايـــــــــات


فــــــهرس عشـــــــــاق الروايــــــpdfـــات