الشاعر الحسيني ظاهر حبيب الهليجي

الكاظميه بموسى بن جعفر زهيه
مثل ما بحسين تزهي الغاضريه
قبله للعز والاباء الكاظميه وكربلاء
*
دارت الايـام بـيـهـم ونـدثـر حـكـم الـطـغـــــات
وفــاز دم الغـاضـريـه وانـتصـــر جبـد الثبات
المات على الحك يعله شانه هذا قانون الحيات
يستحـق عـرش المـراجـل للقبـل عـز بل ممـات
هذا منهاج الهواشم ضد الاخصوم
والشواهـد هل المناير ويه الانجوم
سيره تكتبهه الدماء الغاضريه وكربلاء
*

هـل النموذج للامامه موسى ابـن جـعـفـر فـخــر
ذل عرش هارون صبره وقيده عالسجن انتصر.
وابو اليمه ذل اميه ونتصر دم النحر
موغريبه الهيبه بسمه ونسله من فارس مضـر
كعبة الاحرار موسى يبقه نبراس
والخليفه ذاك كبره تحت الامداس
تستحق هذا الوفاء الكاظميه وكربلاء
*
ضد بني العبـاس نهـجه ويانعـم من هل النهــج
عـاد لا هـيـهــات بـيـهــم والـجـبــد اصبـح ودج
موسى درب حسين دربه رافض الذل من خرج
ظـل شعـاره يـدوي صوتـه في سبيـل الله المهج
صرحه شاهـد للبطـوله يكحل العـيـن
منزلة موسى ابن جعفر ويه الحسين
منزلة منهج فداء الكاظميه وكربلاء
*
صار جنة عدن كبـره بناظـر الجـن والانـس
طيـب عـطـره لليشـمه مسـك والگـبه شمس
نسله طاهر من محمد وأنعصم من كل رجس
مـأمـن الزايـر ضريحـه تطمـأن عـند النفـس
ما يخيب الي يكصده ويطلب امـراد
شامخ الكاظم ضريحه وين الاوغاد
هذا منهاج السماء الكاظميه وكربلاء
*
الباع روحـه لجـل دينه يفـوز حتمـا بالاخيـر
والاخـذ دربـه بـيـقـيـنه قـبلـه للعـالـم يـصيـر
هــل المثل موجود فعلا والكلام من الضميـر
سابع العتره بصموده مو سجين اصبح امير
الكاظم بهاي الصلابه مضرب امثال
تستمد من عزمه قوه تبقه الاجيال
تبقه للظلمه ضياء الكاظميه وكربلاء

الشاعر الحسيني ظاهر حبيب الهليجي

هدمها عروش الطغيان مسجون أوذل السجان
بصبره وعزمه نال القمه
مسجون أوذل السجان
*
بظلام وما يعرفه أنهاره من ليله
قيوده امنل حديد الي خذت حيله
هارون أعله موسى بجور شد حيله
والسندي بعلامة موت يوحيله
كل هذا وظل عالي الشان مسجون اوذل السجان
ظحه دمه نال القمه
*
الكاظـم سابع العتره يعرفونه
ولاكن بغضن بحيدر يظلمونه
بطوامير الحقد موسى يخلونه
بني العباس عجزوا بيها يثنونه
للعالم ظل هل تبيان مسجون اوذل السجان
الهيبه باسمه نال القمه
*
طلسم بل صبر ماينعرف سره
لحد هسه وابد لا محد ايفسره
يشح مثله شبيه العالم بأسره
بصبره موسى بن جعفر علا قدره
ترتيل السانه القرآن مسجون اوذل السجان
بجبده وسمه نال القمه
*
صوته المحد ايسمعه فقط هوه
غريب وناره فرگه گليبه يتجوه
ذبل عوده بمأسي البيها يتلوه
تمنه الموت غير الموت ما يهوه
يزداد بگلبه الايمان مسجون اوذل السجان
بهاي الهمه نال القمه
*
سنين الماشفت اهلك يا ابن جعفر
لفراگ الاتحبهم نارك التسعر
اظن مولاي گلبك شوگ يتفطر
وهمومك عليه الدنيه َما تگدر
مضرب اصبح بل الازمان مسجون أوذل السجان
حقق حلمه نال القمه

الشاعر ظاهر حبيب الهليجي

مظلوم يابو الرضا
مظلوم يابو الرضا
،،،،،،،،،،،،،،،،،،،،،،،،،،،،،،،،،،،،،،،،،،،،،
يل الكاظم مدامعنه الك تهمل
ومجالسنه عهد مثلل خليل وخل
عليك اوما نفكر يوم عنها انزل
الدنيه اشما قست هيهات نتبدل
مظلوم يابو الرضا
---
يا كعبة عشگ يا سابع العتره
ابد والله سرك محد ايفسره
مثل صبرك عقيم العالم بأسره.
ذليت الرشيد وطغمته القذره
مظلوم يابو الرضا
---

الصعاب انهارت بصرك يبن جعفر
العليها أجبال من شدتها َما تگدر
سنين اما فارگه اهلك والگلب يسعر
وعينك للشمس مولاي تتنطر
مظلوم يابو الرضا
---
بطاموره مظلمه أنهارك وليله
والسندي عليك ابجور شد حيله
الأذيتك بل سجن شيطانه يغويله
وانت بكل صلابه باقي توحيله
مظلوم يابو الرضا
---
موالينك تصيح بدمعه سجابه
احنه انصار نبقه ونبقه احبابه
نتمنا المنيه اتصير يم بابه
فدوه نروح كلنه الذره بترابه
مظلوم يا بو الرضا
---------

الشاعر الحسيني ظاهر حبيب الهليجي

ياعلي ابن سويد بلغ شيعتي
الجمعه موعدنه تشاهد حالتي
*
ياعلي بلغهم الشيعه السلام
والفرج بل جمعه گلهم للأمام
يعني ارحل من طوامير الظلام
سموم هارون التخذم جبدتي
*
من زمان أتريد تخلص هل طغات
مني وانه اعرف نواياهم قسات
وانه متحظر وارحب بل ممات
حته اخلص من مظالم دنيتي


سنين وانه اتعذب بقعر السجن
لا شمس شايفها والاهلي احن
الليل هذه يمرني للباري اون
ولشتكيله عل جرالي بدمعتي
*
الگيد ما فارگ جفوفي وظل اثر
وجسمي ناحل ومتلت عيني سهر
ومن مظالمهم احس كلبي انصهر
والخلاص الموت ينهي شدتي
*
غدآ اشكي الخالقي رب السمه
والرسول الله وعلي والفاطمه
من بني العباس هاي المجرمه
بلغ الناس التناطر طلعتي

الشاعر الحسيني ظاهر حبيب الهليجي

مشتاگه ابنيتك مشتاگه
خاف اتموت وما نتلاگه
ريتك يمي تغير رسمي
*
معصومه انه ابنيتك يبن جعفر
مشتاگه الك وگليبي يتفطر
مشبوحه النواظر بويه تتنطر
ونيران اشتياگي أعليك تتوجر
شييردك يلماخذ روحي
واشكيلك اهاتي ونوحي
دمعي اليدمي تغير رسمي
*
انه المشتاگه روحي الصدرك اتظمني
سنيني اطشرن ياهو بعدك يلمني
وحگك والهوه منشتمه يلجمني
مو انت الرحت گلبي رحل مني
عيوني السالن مودمعاتي
وحسراتي ترادف عبراتي
يذبح همي تغير رسمي
جرح بيه الك ينزف حزن مو دم
وانته ادره يبويه الفرگه ماترحم
تعال الليل اخلصه ابنوحي وتألم
واسولف ويه نجم اسماي وتهظم
اتعذب لجلك يوميه
شمعة وذابت بل حنيه
ذابل جسمي تغير رسمي
*
يشهد ليلي هذا الي يمر انحب
عله وسادة جمر يابويه اتگلب
تمر ذكراك بيه وحيل اتعذب
بــالـــدار اوحـيــــده وگلبي يتلهب
يل غايب مااحمل فرگه
كل لحظه اتمر گلبي اتحرگ
نوحي وهظمي اتغير رسمي
****
يبويه النوم ماشفته امنهد فرگاك
اليل الي يمرني انحب الذكراك
يل ماخذ دليلي گلي وين الگاك
انخه الله يغالي انموت انه وياك

اترجه الله ابدمع اعيوني
وي نعشك بويه يشيعوني.
معصومه اسمي تغير رسمي

الشاعر الحسيني ظاهر حبيب الهليجي

يل الكاظم اجيتك مهظوم اعتنيتك
ظاكت بيه دنياي رايد نظره مولاي
*
يل الكاظم اجيت ودمعتي بعيني
ويم بابك رفعت اجفوفي بونيني
مثل اسنين يوسف صارن اسنيني
اجيتك يابو طلبه امراد تنطيني
ماتطلع جلمتي مخنوگ أبعبرتي
كثر النايبه وياي رايد نظره مولاي
*
النفس بل سوء تآمر سيدي وتهوه
الملذات الزمن تدفعني و ابقوه
اخذ بيدي يراعي الفزعه والنخوه
خلصت ودري بيهه الدنيا ماتسوه
ياباب المكارم يل تتسمه كاظم
نبته بعازة الماي رايد نظره مولاي

اجيتك لا تردني وحالتي كلفه
مامتعوده روحي الغيرك اتكلفه
يباب الله اليدگها ما يرد جفه
طبيب انت وجروحي بحظرتك تشفه
ياراعي السجيه احلفك بلزجيه
منك هذا رجواي رايد نظره مولاي
*
طلب عندي يبحر الجود هل طلبه
وانت ألي يسمونك ابو طلبه
سهله وادري يامولاي موصعبه
اريد اسمي بعزائك سيدي اتكتبه
ارجاهه بدمعتي تقبلهه خدمتي
تنفع بلحشر هاي رايد نظره مولاي
*
ختام الشيعتك تدعي يواليها
تره هموم ونوايب ثگلن اعليها
بجاهك يظهر الموعود مهديها
لأن هوه الوحيد ألي يصفيها
للمهدي النواظر مشبوحه وتناطر
الشيعه محمله اهواي رايد نظره مولاي

الشاعر ظاهر حبيب الهليجي

لا تلـوم اعـيــونـي --- لـو يـبجـن ادموم
امصيبتـك بظـنوني --- مـن مهدي لليـوم
عمر أكـظـي نحيب ----- على أمصاب الغريب
لاتــلـــوم اعـيـونــي
---
الك يالكاظم مدامع عينـي تجـــري
بعالم أحزانك أعيش وهذا عمــري
وانه بالاصلاب تايه بيــك فكــــري
بعـالـم الـذر وعليكم نـاري تســري
حسرتي وأهاتي ---------- من ذيج الاصلاب
رددن دمعــاتــي ---------- جلمــات المصـاب
كلب عاش بلهيب -- على مصاب الغريب -- لاتلوم اعيوني
---

فتشت عيني ولكيتك دمعه بالعيـــن
من صدر أمي لعزيتك راضع أونين
جانت تلوليلي قصتك والمضاميـــن
بذرت ألونه بدليلي بهاي السنيــــن
عايـش بدلالي ----------- يابــوالرضا النوح
ماتغير حالـــي ----------- ظل دمعي مسفوح
حزن اصبح ربيب -- على امصاب الغريب -- لاتلوم اعيوني
---
تمشي وي دمي أحسهه هل المصيبه
مـن لـزم جفـه وبــده يبجـــي طبيبــه
لا أهــل يمــه صفـت جثـتــه غريبـــه
مـن السلاسـل ليــش جفينـه خضيبــه
جـثـتــك شـالــوهــه --------- اربـع محاميـل
على الجسـر خلوهـه --------- ينعاهه جبريـل
رفع بيده الصليب -- على امصاب الغريب -- لاتلوم اعيوني

شبت ويـاي المناحـه الكاظميــتــــــك
شما يمر طاري السجن أذكـر قضيتك
يابو طلبه حكي لو أبجـــي بـثـنـيـتــك
حاجتي مكضيه بأسمـك لــو نخيتــــك
انته باب الباري ----------- يابـو الجوادين
أهلـن بـــزواري ----------- تنادي المحبين
يجازينه الرقيب -- على امصاب الغريب -- لاتلوم اعيوني
---
دمعتي الابجيهه لجلك تضوي لحدي
مأتم بكبري أسوي وهذا وعـــــــدي
حته لو وحدي بحفرتي أدمي خــدي
للـنخـيـتــه بــدنـيـتـي ونطـانـي ودي
لـلـمـــات وعـــودي ---------- أحيي العزيـــه
تجري هاي خدودي ---------- لبـن الـزجيـــه
جرح لامايطيب -- على امصاب الغريب -- لاتلوم اعيوني

الشاعر ظاهر حبيب الهليجي

يلي ما شفت الشمس --- بالصبـر تنطــي درس
بعالم الجــن والانــس --- ياغــريـبُ ياغــريـب
ياتقي منـُذ الازل -- انت ياخيـُر العمل -- ياغريبُ ياغريب
-----
سابع العتره الشريفه موسى أبن جعفر وحيد
الطيب ابن الطيب أصله مات وبجفه الحديـــد
عـــاد لا هيهـات بيهـم ومثــل حسيـن الشهيـد
حسين ذل أيزيد نحـره وجبــدك يــذل الرشيــد
ذابت بصدرك محـن ------------- يمـك أحتار الزمن
لدينك انطيـت الثمـن ------------- ياغريـبُ ياغريـب
تبقى ذكراتك أمــل -- انت يا خيُرالعمل -- ياغريبُ ياغريب
-----




الخلص أسنينه أبمطامر وعينه ما شافت ضوه
الما عرف ليله ونهار ولا شهك طيب الهـــوه
ينتشي بطعم النوايب وصدره بهمومه أرتــوه
موسى جن موسى الكليم والسجن وادي طـوه
يكـلم البــاري بدمــع ----------- والدعاء ون ينسمع
نـوره بالظلمـه يشـع ----------- ياغــريــبُ ياغــريــب
عاشت بأسمك علل -- انت ياخيرُالعمل -- ياغريبُ ياغريب
---
الفاق قانون التحدي والثبات بهـل الامـــــر
ما نفع هارون سجنه والسجين الـي انتصر
الضحك سنــه بشماتـه هـو قطعــأ منكســــر
والربح موسى أبن جعفر بالصبر نال الضفر
أنكسـر قيـد الحديــد ----------- وندثــر سجـن الرشيـد
ورتفع شان الشهيـد ----------- ياغــريــبُ ياغــريــب
من تمنيت الاجل -- انته ياخير العمل -- ياغريبُ ياغريب

ما نفع جـور الخليفه وكل دهاليــــز السجــن
ديـدن الكاظم عقيــده تنحني يمـــه المحـــــن
ما تغره الدنيه كلهه شمى كصه وياه الزمــن
والطلع من صلبه حيدر عمره ما يعرف وهن
لايذ بسده الشـــرف --------- للظلـم ما غض طـرف
رافض الذل بالتـرف --------- ياغــريــبُ ياغــريــب
صعبه اليفارك أهل -- انت ياخيرُ العمل -- ياغريبُ ياغريب
---
بصدره غيض الدينه كلهه ونعرف بين المله
رغم أهاتــه وشجونـه قــدره بأيمانـه أعتلــه
كل ونينه وسيل دمعه عل الجره بطف كربلـه
فكـره عاش بيـوم عاشـر والجـره عل العايله
يا سليـل المعرفــه -------- عل الجسر نعشك صفه
بالغرب جفنك غفه -------- يـاغــريــبُ يـاغــريــب
للفخر ربك جعل --- انت ياخيرُ العمل -- ياغريبُ ياغريب

للشاعرظاهرحبيب الهليجي
يل الكاظم دموع الشيعه الك من دم
بـــدلاله الموالي ينصـب المأتـــــم
--------------------
ياباب الحوائج خلصت عمرك – من سجن السجن ومكيد بصبرك
تسبيح الجلاله يلهج بصدرك – نشف ماي الظلم بس ما نشف نهرك
يا باب الحوائج حيلنه تهــــــــــــــــــــــــدم
يا زاهد حياتك ما اجل هل الدين – وسافه بعيد عن اهلك تغمض العين
بدهاليز السجن ومكيد الجفين – ننوح اعليك والله شما يطول البين
ضواها الدنيه انته ودنك اتعتــــــــــــــــــــــم
جانت شيعتك تتئملك تطلع – من بعد الغياب اتصورت ترجع
ولن صوت المنادي يسابكه المدمع – امام الرافضه هليله يتشيع
املاك السمه هليله تتألــــــــــــــــــــــــــــــم
عليك الكون هذا الكون كله ينوح – كظيم الغيض نعشه اعله الجسرمطروح
مثل احسين دامي اعله الارض مذبوح – من كد الجروح اجروحه تدي اجروح
لهيب اظماه يلهب ويه المخيــــــــــــــــــــــــم
الك هذا الحزن يا بو الرضا تفجر-- ظليمتكم تظل ويه الزمن تفتر
من عهد النبي لهذا العصر تسعر – لاكن حجة الله الثاكم يظهر
يطلب ثار ضلع امه الذي تهشـــــــــــــــــــــــم

للشاعر ظاهرحبيب الهليجي
طلعة شمس الاحرار --- ضوت خلف الاسوار
من ال الزجيه – بارض الكاظميه
---
اكتب يا قلم عن هاي الاحزان – وخل موسى بن جعفر الهه عنوان
بين يا قلم ما معنى طغيان – وما بين النذر كل عمره قربان
اكتب يا قلم هاي – خل تعرفها دنياي
عاشك للمنيــــه – بارض الكاظميــــه
---
وينه الحاربك يبن الميامين – هاورن وطغاته الليله ميتين
عايش انته بكلوب الموالين – ظل كبرك يشع وي كبر الحسين
ما ينفع سجنهم – بصبرك كيدتهم
الهيبه الهاشميه – بارض الكاظميه
---
من سجن السجن خلصه مظلوم – ارفع شكوته للباري هليوم
إيمام الروافض جبده مسموم – لاكن ظل شمس بس همه لغيوم
كبره كعبه للناس – يا طيب الك ساس
ذليت الاذيـــــــه – بارض الكاظميـــــه
---


صبرك للسجن هدم كيانه – يل الكاظم فزت صيحت لسانه
يا شمعه امل صرت بمكانه – ضوة نورت حقبه زمانه
ضوه الكاظم الكون – هارون انته مسجون
ثبته القضيــــــــــه – بارض الكاظميــــــه
---
يم بابك تجي صبح ومسيه – مولاي ابدمه تبجي المنيه
وينه المثلك تحمل اذيه – بس حسين اظن بلغاضريه
دم نبجي اعله فركاك – هذا الشيعي نادك
أمام الرافضيـــــه – بارض الكاظميــــــه
------

الشاعر ظاهر حبيب الهليجي

كاظم غيظي ظل اسمي – كيدي بجفي وبجدمي
بطاموره ذبل جمسي – ياذنـب الجـنـيـتـه
---
انــه الكاظـم سليـل العـصمه يدرونـــــي
عـلـه الـدنيه الـدنيه ليـش ظـلمـونــــــي
بسجن موحش شمس ما شافت اعيوني
اخلص الليل تجوي دموعي بجفونــــــي
بل الغربه وصعب امري – ونيران الهظم تسري
اختم بالسجن عمري – يـاذنـب الجـنـيـته
---



لون همي اعله اهل الكون يتوزع
تصيح الغـوث منه وحيل تـتجــزع
لجـن انه الرضاة الباري اتضـــرع
شما زادت نوايب سجني انه اقـنـع
كل هذا وكلت يارب – قانع بأمرك اتعذب
بسمك انه اتحسب – ياذنـب الجـنـيـته
---
صدى صوتي يرد المسمعي اجوابـه
غـريـب انـه ايـتمنه شـوفـت احبابـه
انختم امري وعـليهم عـيني سجابـه
العـذر يهلي السجن ما يفـتح ابوابـه
شوفتكم تـــرد روحــي – شوفتكم دوه جروحي
جلماتي باشد نوحي – يـاذنــب الجـنـيـته
---
بطاموره وحيد وادمعتي بخـدي
مجتوف بسلاسل والـدمـه تـدي
وبدت نيران سمهم تاكل بجبدي
اتلوه واعيش بهل الالم وحــدي
حيلي بسجـني يتهدم – ما يرحم عروكي السم
اتلوه وكتلني الهم – يـاذنــب الـجـنـيـتــه
---
بدهـاليـز المأسـي مـوتـي انـتـظـره
صبح شم الهوه بنفاسي جن جمره
بجت حيطان سجني لحالي متأثــره
اكل عـظـمي الحديد واقـبلـت أمــره
مـنـبـع لصبـر طـبعـي – سجاني عرف وضعي
لاكن اشتكي بدمعي – يـاذنـب الـجـنـيـتــه
-----

عظم الله لكم الاجر والعزاء باستشهاد الامام موسى ابن جعفر عليه السلام
القصائد اعلاه ☝️☝️

الشاعر الحسيني ظاهر حبيب الهليجي (للامام موسى الكاظم ع)

مايهمني الموت للكاظم اجيت
انه أخوف الخوف مشاي اعتنيت
هذ عهدآ بلوفاء قد كتبنا بلدماء
*
عادو التاريخ بينه ينذبح كلمـن يـــــــــــــزور
وصارت الحبكم ضريـبه ندفع اجفوف ونحور
وحنه وقعنه بدمانه سيدي لگبـرك نــــــــذور
والله يا موسى بن جعفر ثابتين شمـا تـــــدور
غصت الكاع بجثثنه من ألعده
لاوحقـــك مانهـاب اهـل الرده
نحن اهلآ للفداء هذاعهدآ بلدماء
*

امس يم جسر الايمه نزلت املاك السمــه
تهاوت اعله الماي جنها عل ضحايه مألمـــه
والشمس غطت ظواهه والكواكب مظلمـــه
والنهر ناح ويجرفه وموجه اصبح بلدمــه
صحنه يابــن جعفــر انريــد العـــــذر
واجب احنه نموت كلنه أعله الجسر
منى قد دو النداء هذا عهدآ بلدماء بروحي اجيت
**
روحي توصل كبل جدمي توصل بلهفه وحنين
كلبي يا موﻻي لجلك ينبض بنوح وانيــــــــن
وعيني لو وشل دمعه ابجي يم گبرك العيـــــن
يا كظيم الغيظ عذرن عذرن احنه مقصريــــن
واللـه كلنه نروح فــدوه لكبتــك
صوت هادر بلحزن من شيعتــك
في الخطا صوت الفداء هذا عهدآ بلدماء بروحي اجيت
*

من اجيلك يبن جعفر دمعي وي نگل الجــــدم
بيا حزن اوصلك انه اوصل وكلبي حمــــــــم
ياغريب امصابك اصعب بلسجن شفت الالـــم
والرشيد وابن شائك والسجن اصبح عدم
ياغريب بصبرك انذل الرشيـد
بيده موبيدك صبح كيد الحديد
ياسليل الانبياء هذا عهدآ بلدماء بروحي اجيت
*
يا أسد بغداد يبقه گبرك يشـع للابــــــــــد
والمشه وسار بطريقه حتمآ ينول السعـــد
الرشيد وسجنه وينه هو واعوانه انفقـــد
الكم التاريخ ناده يابني حيــــدر عهــــــــد
يابنـي هاشـم يظـل الكـم اكيد
ويفضح بافعال هارون ويزيد
وبتدى من كربلاء هذا عهدآ بلدماء بروحي اجيت

هذه القصيده كتبت بعد فاجعة جسر الائمه التي راح ظحيتها المئات من شيعة وزوار موسى ين جعفــر ع

الشاعر الحسيني ظاهر حبيب الهليجي (للامام موسى الكاظم ع)

شهور وعوام سجنه الإيمام
بل طوامير گيد والام
والوطن ماله وطن هاي العجيبه
موسى ما ادراك موسى يامصيبه
شهور وعوام شهور وعوام
*
السجن حيطانه للكاظم بجن
اربعه وعشره الگضاهن يلمحن
عل الجراله وظل عظيم بكل زمن
ونال جائزته بهدم ذاك الوثن
كاظم اليوم ويه الغيوم
الگبه تنشاف تزهي للدوم
والگصد بطلبه حتمآ يستجيبه
موسى ما ادراك موسى يامصيبه
شهور وعوام شهور وعوام
*

عينه ماشافت ابد ضي الشمس
والسبب جفه رفض جف الرجس
وراد من هذا الرفض ينطي درس
عل رفض ذله وقبل ينطي النفس
شايف الويل صبره ترتيل
صدره عبرات والدمع سيل
مات مسموم واسف ديره غريبه
موسى ما ادراك موسى يامصيبه
شهور وعوام شهور وعوام
*
خمسطعش عام انحرم من الاهل
بين حيطان وظلام المعتقل
ساجد وراكع لحد يوم الاجل
ولذالك للخلگ اصبح مثل
وفرگة احباب الهم انعاب
گلبه بل نوح گد الاغياب
الله يدري بحاله والحاله رهيبه
موسى ما ادراك موسى يامصيبه
شهور وعوام شهور وعوام
*
المرن بموسى فلا مرن احد
اضطهاد و قسوه والغربه اشد
ومن ابن شاهك مواجع لاتعد
والأمام أمقيد ابلايه سند
يهمل ادموع ونه مسموع
للاهل جان گلبه موجوع
يعينه الله الفاگد ويذكر حبيبه
موسى ما ادراك موسى يامصيبه
شهور وعوام شهور وعوام
*
لأن نسله من علي ومن فاطمه
ينختم أمره بسجون المضلمه
موسى ياحيف الحكومه المجرمه
بل طوامير ابغدرها اتسممه
غربته اتطول نعشه مشيول
بديرته اغراب موسى مجتول
ومن رفع جفه وبده يبجي طبيه
موسى ما ادراك موسى يامصيبه
شهور وعوام شهور وعوام

الشاعر الحسيني ظاهر حبيب الهليجي (للامام المنتظر عج)

انت ما غايب ما غايب علينــــــه
انت عايش عايش والله بينـــــــه
لشوفتك يبن الحسن ننتظر طول الزمن
انت مـا غايـــب مـا غايـــب علينــــــه
*
لو جرح ارضه انه بيك
روحي ملهـوفــه عليـك
كـــون انــدلــك وجـيــك ياأمامي
الساني ردد بالمهد
سيدي واقسم عهد
علـى الـولايـه وللابــــد يا أمامي
مغرم وطحت بهواك
لا ولا أعشـك سواك
دورت مــاكــوا بغلاك يا أمامي
نبض گلبي گلبي اسمع ونينه
لجلك يفيض يفيـض بحنينــه
والنواظر رددن شوفتك يبن الحسن
انت ما غايب ما غايب علينه
*

فوك جنحـان الحمام
ابعث لشخصك سلام
مطرز باجمل كلام يا أمامي
يحبك تربه الدليل
ما يعوفك مستحيل
يلي مالك كل مثيل يا أمامي
انته عن عيني بعيد
لاكن بــــــدم الوريد
اي وحك عينك اكيد يا أمامي
احنــــه عشاك عشاك وهوينه
غالي وبدمنه وبدمنه اشترينه
طالت اويانه المحن ننتظر يبن الحسن
انت ما غايب ما غايب علينه
*

انته يالمهــدي هوه
عايش بروحي سوه
انته لجروحــي دوه يا أمامي
ننتظر نورك يهل
بيك يلتـــم الشمل
بشخصك ايعم الامل يا أمامي
كلهه تندي شيعتك
كل املنــه بجمعتك
نشكي همنه بطلعتك يا أمامي
ندعي من الله من الله ونبينه
بالــفرج عجل عجل عـــلينه
تنمحي كل المحن ننتظر طول الزمن
انت ما غايب ما غايب علينه

الشاعر الحسيني ظاهر حبيب الهليجي

هيل وطش علينه وهبهب الريحان
بمولد حجة الله ابنصف من شعبان
بهيه الدنيه لجله ولبست الالوان
فرحانه بمولد واليها
*
مبروك والف مبروك ميلادك يمهدينه
وي جكليتنه الهوسات بين الناس طشينه
شعلنه لعشره الك مولاي وعل مختار صلينه
والفرحه بجالك نحيها
*
يا قائم محمد ياسليل الزود
تعال وشوف بينه شصار يلموعود
البينه يصير ماظن بلبشر موجود
بس سيفك هو يصفيها

كل جمعه لظهورك شابحات عيون
عراقك يابو صالح بل ظهر مطعون
وأهله أمن المظالم بيك يتنخون
ياراعي الشده أظهر ليها
*
ظاكت يبن حيدر والسنين ابجور
تاهت واليبوگ مشاركه الناطور
عجل يل ظهورك يجبر المكسور
والدنيه بعدلك تمليها

عندما تخرج من حرم مولاي
امير المؤمنين او الحسين او ابا الفضل
(صلوات الله عليهم) قل  :

"سيدي طالع منك عله رجليه اذا جابوني الك مشيول عله امتون الناس "

آنه دخيلك بذيج الساعة 😭💔

الشاعر الحسيني ظاهر حبيب الهليجي (للامام علي ع)

الشده من اتضيج اندب يا علي
ايحلها لو گتله علي افزع الي
*
دنيتك لوضاكت اتوجه اله
ذاك ابو الحسنين راعي الاوله
هوه راعي الشده والكل معضله
من تكلفه كل همومك تنجلي
*
الزم الشباج وسجب دمعتك
وگله يابو حسين رايد فزعتك
وحلفه بل زهراء وطلب حاجتك
رايد مرادي بعجل يا موئلي
*
العلي خله علي أيحل العسر
لليوالي ويعتقد في هل أمر
من تندبه وداعته يصبح يسر
مايرده الي أعتقد هوه الولي

*
مو فقط بلدنيه حته الاخره
مايعوف الحبه والي ناصره
واليموت بگبره حيدر يحضره
وروحك يگلها الصميده ادللي
*
لانكير ومنكر يخوفونك
انت ماتبغض علي يعرفونك
للجنان ويل ولي يبشرونك
صيح بايعتك على اني وهلي

الشاعر الحسيني ظاهر حبيب الهليجي (للامام علي ع).

هامت علي دم تمتيلي
بسيف المرادي الجاهلي
وكت الصلاه وبرمضان جبريل. ناده بدمعه
*
جبريل ينعه المرتضى بمصابه
صاح ودمعته أويل الخلگ سجابه
غدروا علي ياشيعته بمحرابه
سيف الغدر وكت الفجر غدرو علي الما ينگدر
اهل السمه واهل الگاع بهذا الخبر منفجعه
*
انهدمت اركان الهدى هل الليله
والعروة الوثقى بحزن ترتيله
واهل السمه واهل الأرض تصغيله
للمرتضى گاع أوفضى بدمعه عله الأمره إقتضى
سيف المرادي الملعون دين الله صابه وشرعه
*
الكوفه ضجت عل خبر متئلمه
سمعت سراط المستقيم أبدمه
ابن العين بسيف راسه يهشمه
الكوفه بحزن تنعه وتون كلها العلي الليله تحن
من شافو الدم يسيل گالو علي شي يرجعه
*
يالوعه من سمعت خبر ايتامه
حيدر علي الألهم يشد حزامه
ويمهم فقط ماخله يوم الثامه
الهم اهل وجان الامل ليتامه بس خير العمل
مثله ابد هل أيتام تلگه اليشابه طبعه
*
حته الطيور البسمه لجله اتنوح
من شافت ابهام الولي دم يفوح
صاحت عله الدنيه العفه يل المجروح
ماي البحر ويه النهر تبجي اله أوراق الشجر
وملاك وفلاك اليوم كلها بحزن متگبعه