جنه سامره ومهبط للاملاك
بحضرة الهادي تندار الافلاك
عاشر انوار السمه
من سلالة فاطمه
تندار الافلاك
…
الناس تتباهه بعشايرها الچبيره
واحنه غير العتره ماعدنه عشيره
الما يحب ال النبي ما عنده غيره
من رسول الله لعلي الهادي المسيره

من طفولتنه بهاي العقيده
الما يريدونه لا ما نريده
زلم منبع غانمه
من سلالة فاطمه
تندار الافلاك
…
هُمَّ العيون وأعز من شوف العيون
الما يجن بحبهم يسمونه مجنون
الكون بيديهم وصارو سادة الكون
الشمس ما تطلع اذا مو هم يرضون

ويم علي الهادي كل عالي يركع
شمس سامره من گُبْته تطلع
چفه بحر المكرمه
من سلالة فاطمه
تندار الافلاك
…
روح دگ باب الامام الهادي وتشوف
گبلك املاك العرش يم عِتبته اتطوف
لخاطر العباس ميرد كل الچفوف
مدلل الزوار اسمه وهذا معروف

تلگه يم بابه هيبة سلاطين
تارس بخيره چفوف المساكين
چنّه حماي الحمه
من سلالة فاطمه
تندار الافلاك
…
علي الهادي يهدي كل ضايع مزاره
شيخ ديوانه ابد ما تطفه ناره
الدنيه تفنه وتبقه گُبته والمناره
يدعي احبابه ويجونه للزياره

گلبك ابابه يحس بوجوده
مسوي سامره الله اعله موده
للمهابه عاصمه
من سلالة فاطمه
تندار الافلاك
…
عاش مظلوم وگضه بالغربه مظلوم
مات مسموم الچبد يا شيعه هاليوم
اليوم خل نصيح واويلي يمسموم
فاطمه تبچي لمصاب الهادي بدموم

نزلت الجنه تنوح اعله بابه
وامه هالليله تبچي لمصابه
دموع تتجاره دمه
من سلالة فاطمه
تندار الافلاك
…
انشال نعشه بين آه وبين دمعه
واندفن واعله الگبر علگوله شمعه
ليش بس حسين محد ما يشيعه
فوگ ذبحه حافر يدوس اعله ضلعه

يوم عاشوراء مثله فلا صار
المنذبح ثاره يم صاحب الثار
يصير قاضي المحكمه
من سلاله فاطمه
تندار الافلاك
…
خادم الحسين ( عليه السلام)
كرار حسين الكربلائي
( ابو كميل )

📃غريب📃


https://youtu.be/YcUwoA45O8s?si=hC5qCZ2KPj_oQp8S


🎙أداء🎙
#الرادود_خالد_الكربلائي

🖋كلمات الشاعر🖋
كرار حسين الكربلائي


{عزاء الحر المركزي }

#كربلاء_المقدسة

ليالي استشهاد الامام موسى أبن جعفر

انحنت و تمـش الدمـع بردانها
وماتت الله اوياكم ، اعله السانها
...
ماتت اعـله الـسانها چـلمة وداع
ازغيره بس حسرتها ما لمتها گاع
ضعن غير الموت ما ماخذ متاع
ودعتهم شيبها وشبانها
...
اجت ليهم حافيه بچفها اتعمت
المرض ماخذ حيلها وتنهت نهت
اتگول مدري شظاملي ظمه الوكت
وبنفس يرعش تشم بخوانها
...
النفس يرعش مدري عِلّه مدري خوف
بعينها زخ الدمع ما خله شوف
وداعهم خلاها تتوچه اعله طوف
محدبه والضيم ايخطف بالوانها
...
الضيم يخطف لونها اليبرج بخت
النوگ كل ناگه لعزيزه نوّخت
صوت ما ظل حته اگولن صارخت
وحِده الحادي وطوّح بركبانها
...
طوّح بركبانها وجد المِسير
وخلفه مدت شوفها الماهو گصير
عالحواجب حاطه چفها الزغير
لحد ما ابعد ضعن وليانها
...
الضعن ابعد عنها واخفاه العجاج
ونست علتها ولهيب الشوگ هاج
جرح المفارگ هله ماله علاج
غير نوحه ودمعته وجروانها
...
بچت حد ما خضرت يثرب حزن
وبالجوانح شايله الما يستچن
الليل مثل الموت عالفاگد يجن
تضيج بيها وتشتكي لديانها
...
بعد ما كبرت اسنين من القهر
لنها تسمع من ابن حذلم خبر
بلا زلم رد ضعن عدنان ومضر
اتذبحت بالطف اهي ورضعانها
...
الحرم ردت لابسه ثوب الثچل
وگاطعات دروبهن سوط وهزل
لحد ما ماتت مدامعها اتهمل
طفله بس شيبت من احزانها
...
خادم الحسين ( عليه السلام)
كرار حسين الكربلائي
( ابو كميل)

هله يا بو علي
عشگي الاولي
حبيتك سميتك
عشكي الاولي
..
ميلادك ما اجمله هالليله الفرح حله ميلاد الإباء
هله يا بو علي هله هله بيك بگد كربله وبگد السماء

انت شمعة كربله ومصباحها
والسمه علنت الك افراحها
والملائك صفگت بجناحها
يا بو علي

فرحانه السمه
يا بن فاطمه
ناديتك سميتك
عشكي الاولي
..
عله مهدك فطرس نزل
شفه جنحه وشافك امل مثلك يلگه وين
گالوله شنهو الحصل
ردد هذا المستهل محبوبي حسين

وصاح ابو السجاد روحو لبابه
سجلو اسمكم يا خلگ بكتابه
يا هو مثلك و الدوه بترابه
يا بو علي

دوه اسمك دوه
واغله من الهوه
شميتك سميتك
عشگي الاولي
...
أرضه بنارك احترگ هيهات عنك افترگ يا اعظم إمام
لولاك گلبي ما يدگ مهيوب وياك العشگ ولغيرك حرام

انت مو صدفه رزق رباني
واليضيعني ايعرف عنواني
تراب يم باب الصحن يلگاني
يا بو علي

وداعة گبتك
بيتي بحضرتك
يم بيتك سميتك
عشگي الاولي
...
اهواك يا جنة عدن اهواك يشهدلي الزمن وايام السنين
ضايع دونك يا وطن لو گالو انت لمن اصرخ للحسين


آنه عله الفطره اصيح بصيحتي
حسين احبنك يبعد رويحتي
حروفك بوكت الصلاه تسبيحتي
يا بو علي

مربيني بزغر
مدللني بكُبر
تربيتك سميتك
عشگي الاولي
...
مولاي يا عطر الورد ما يوم عنك ابتعد يا كهف الحنان
تاخذني الدنيه وترد يحسين وارجعلك عبد والگاك الأمان

انت سر العاجز بتفسيرك
تضيع روحي من تروح لغيرك
الخير انت وكلنه عشنه بخيرك
يا بو علي

والحب كلمتين
خادم للحسين
وبصيتك سميتك
عشگي الاولي
...
خادم الحسين ( عليه السلام)
كرار حسين الكربلائي
( ابو كميل)

حياك بدر العشيره
تارس دنيانه غيره
يبو فاضل .. يبو فاضل .. يبو فاضل
...
بكلشي عالي يا بدر عالي
غالي تبقه وتسوه كل غالي
هالجنون البيه يحلالي
عندي مثلك والله هنيالي
عباس هيبة عمامه
بيرغ ينثر شهامه
يبو فاضل .. يبو فاضل .. يبو فاضل
...
الليله نورك يسطع ادخيله
وفي وام الوفه تلوليله
يا علي بكامل تفاصيله
الدنيه مطرت غيره هالليله
من شاف هاي الكرامات
جبريل سوه صلوات
يبو فاضل .. يبو فاضل .. يبو فاضل
...
آيه جانت تضوي بزنودك
فسروها وافي بعهودك
ضگنه طعم الماي بوجودك
والعطش مذبوح يم جودك
عطشان ما يبقه حاشه
وعباس ساقي العطاشه
يبو فاضل .. يبو فاضل .. يبو فاضل
...
أمنيات ويا حلم حيدر
انت تكبر والامل يكبر
بكربله تتكفل الخدر
وانت تلزم ظهر ابو الاكبر
مثلك يحصل اخو منين
يا كاشف الكرب الحسين
يبو فاضل .. يبو فاضل .. يبو فاضل
...
يا امير الحومه لو ضهضب
الكون يتعب وانت ما تتعب
يا هله بنبضة گلب زينب
انت رايه ومحمل ومعصب
عباس خدر العقيله
غيرك ماكو كفيله
يبو فاضل .. يبو فاضل .. يبو فاضل
...
خادم الحسين ( عليه السلام)
كرار حسين الكربلائي
( ابو كميل)

شعبان شعبان هله بشهر السعاده
شعبان شعبان فرحنه بهالولاده
...
شوگ ظل يزداد
والفرح ينعاد
شمعة الميلاد للحسين

همي كله انزاح
والگلب مرتاح
نعقد الافراح للحسين

وبالفرح ناديتك حبيبي
من الزغر سميتك حبيبي
يا عطر شميتك حبيبي
بالگلب ضميتك حبيبي

فرحان فرحان دليلي اليوم ناده
شعبان شعبان فرحنه بهالولاده
...
عدها فرحه الناس
بمولد العباس
انت تاج الراس يعباس

فُرحت الزهراء
بكافل الحوراء
شعت الاضواء يعباس

هذا اعظم كافل گمرنه
والنعم ابو فاضل گمرنه
بالوفه متواصل گمرنه
رايه للطف شايل گمرنه

قران قران اله تلوگ السياده
شعبان شعبان فرحنه بهالولاده
...
خامس الاسياد
مولد السجاد
زينة العُبّاد هلا بيك

انت شمس الدين
وعِلّة التكوين
صاح گلب حسين هلا بيك

بمولدك فرحتنه يغالي
وخدمتك هيبتنه يغالي
رفرفت رايتنه يغالي
صايتك خيمتنه يغالي

عنوان عنوان مجدنه والعباده
شعبان شعبان فرحنه بهالولاده
...
والعشگ يكبر
بمولد الاكبر
والوحي كبر يالاكبر

بمولدك من جيت
للارض ضويت
يوسف اهل البيت يالاكبر

للعوالم قبله جمالك
والله ما صح مثله جمالك
من شمسنه احله جمالك
والجمال واصله جمالك

سهران سهران الك گلبي بوداده
شعبان شعبان فرحنه بهالولاده
...
اغله ماعندي
مولد المهدي
حاير شأهدي يموعود

بمنتصف شعبان
ينولد قرآن
صاحت الاكوان يموعود

نورتنه بنورك يمهدي
عجل الله ظهورك يمهدي
انه لذت بسورك يمهدي
يمته عيني تزورك يمهدي

ولهان ولهان الك تاج القياده
شعبان شعبان فرحنه بهالولاده
...
خادم الحسين ( عليه السلام)
كرار حسين الكربلائي
( ابو كميل )

بالفرحه انادي
بشواگي وودادي
علي علي علي علي زينِ العباد
...
من ساعة ميلادي بروحي عشگ سجادي
يا سادس اسيادي جيتك عله ميعادي

بسمه ايامي ترف يبرغ عالي
حبيبي انت يبن حبيبي الغالي

دمعاتي يكتبن
يا اهلاً وسهلاً
هله هله هله هله انفاسي تنادي
علي علي علي علي زينِ العباد
...
حبيتك مو بيدي بسمك يظل تريدي
ميوصفك تمجيدي وجهك هلال بعيدي

علي يالإسمك شمس يضوي بليلي
علي تدري بكل حرف يظل ترتيلي

من احله الاسامي
اسمك يا إمامي
نده نده نده نده وايروي البوادي
...
حبك من ايماني حبك سور قرآني
حبك يظل عنواني حبك لغز رباني

هله بانوارك هله ينور الباري
تظل بعيوني حرز يسر أسراري

كل نور القداسه
بوجهك انعكاسه
ضوه ضوه ضوه ضوه بدنياي وبمعادي
علي علي علي علي زينِ العباد
...
ما اجمل اوصافك غار الگمر من شافك
ما يفلح من عافك مغرك البشر بالطافك


نعم حبيتك نعم گبل ما اشوفك
گبل نبضاتي قره الگلب بحروفك

راهب بالعباده
مبروك هالولاده
علم علم علم علم يا اكبر قيادي
علي علي علي علي زينِ العباد
...
احلفلك وعيونك ظلمه الحياة بدونك
مفتونك مجنونك للموت اظل مديونك

امير اسنيني اجه تصيح انفاسي
الك بعيوني عشگ يتاج براسي

لإسمك انتمائي
عشگك كربلائي
تظل تظل تظل تظل نظراتك مرادي
علي علي علي علي زينِ العباد
...
خادم الحسين ( عليه السلام)
كرار حسين الكربلائي
( ابو كميل )

ميلادك
يا علي هالليله
اعيادك
يا علي هالليله
يا زين العباد .. يا زين العباد
...
ياهله وهمومنه خل تنجلي
صرخة الاحباب بسمك تعتلي
يا عشگنه وانت حبنه الاولي
بأبي انت وامي يا علي

تنورنه
يا علي هالليله
تسحرنه
يا علي هالليله
بابٌ للرشاد
يا زين العباد
...
مولدك فرحه ونسيت احزاني
لو سكت گلبي يصيح لساني
انت انت الواحد بلا ثاني
من الطفوله عايش بوجداني

بايعتك
يا علي هالليله
تابعتك
يا علي هالليله
نورت البلاد
يا زين العباد
...
كوكب العصمه التضوي ادروبي
بالنسيم ابعث الك مكتوبي
انت محبوبي وتظل محبوبي
لو صحت بسمك تطيح اذنوبي

ترعانه
يا علي هالليله
مولانه
يا علي هالليله
يا راية جهاد
يا زين العباد
..
انته كعبتنه الوجوب انطوفك
وبگلبنه شايلين حروفك
لا وحگ حيدر علي منعوفك
رايه انت بكل زمان نشوفك
ناديتك
يا علي هالليله
واليتك
يا علي هالليله
حبك احله زاد
يا زين العباد
...
اعيونه شمعة فرح نهديها
للبقيع اويه الهوه نوديها
ان شالله گُبتك ذهب نبيها
بحضرتك ليلة حفل نحييها

افراحنه
يا علي هالليله
بفراحنه
يا علي هالليله
يا بحر السداد
يا زين العباد
..
خادم الحسين عليه السلام
كرار حسين الكربلائي
( ابو كميل)

يدر من كوثر
هله يالأكبر
...
عطر كل جوري يتنفس انفاسك
يروح حسينك يا هيبة عباسك

اليوم صاحت كربله
يا علي الاكبر هله
جمالك يسحر
هله يالاكبر
...
ييوسف گلبي يسمونه مجنونك
أتيه بعالم اوصافك وعيونك

انت عشگي الاولي
يا علي ويشبه علي
يوارث حيدر
هله يالاكبر
...
بدر من تضحك تضحك كل الدنيه
ضوه ومن نورك صارت چم حوريه

نظرتك جنة عدن
غالي وچفوفك وطن
عشگ ظل يكبر
هله يالاكبر
...
علي ومن جدك بچفوفك فقاره
تذل الحومه وعدوانك بالغاره

من تشد يوم الفزع
تطبگ السبعه بسبع
تهد عالعسكر
هله يالاكبر
...
بخبر ميلادك فرحت كل ساده
شبيه الهادي هليله ميلاده

هالاسم لاگ وحله
يا محمد كربله
صگر تتصدر
هله يالاكبر
...
خادم الحسين ( عليه السلام)
كرار حسين الكربلائي
( ابو كميل )

خياله
علي خيّال ابن وادم خيّاله
انفرد ما يحصل بحسنه خي اله
اعله اهل السمه لو بيّن خياله
الملك والحور تسجد له سويه
...
والاكبر
الك يحسين اظل خادم والك بار
زغار الشيعه يفدونك والاكبار
احلفك سيدي بزينب والاكبر
ردت نظره ابو منك إليه
...

هنيال اهدعش شعبان حگه اعله الوكت يفخر
اجه الاكبر گمريكبر يهز الكون لو كبر
شايل غيرة العباس وخزرة عينه من حيدر
عباس وحيدر بعيونه

ضوه سنيني يبو علي
نظر عيني يبو علي
يمحبوبي
...
عشگ رباني سكن وجداني
أنه بلا انت ما عندي هويه
يشمس العالم يفرحة آدم
جمال عيونك تدري شسوه بيه

انه كل عمري عندك
انه سموني عبدك
انه كل ما املك من وجودك

انه ضايع بدونك
انه عاشگ عيونك
انه عايش كل عمري اعله مودك

ضوه دِيني يبو علي
نظر عيني يبو علي
يمحبوبي
...
يفطرة امي التعيش بدمي
مخيم حبك ربّاني بحنانه
احب كلماتك احب نظراتك
ملك بوصافك وبگلبي مكانك

هله يا احله جنه
هله يا بو المحنه
هله صاحت كل الدنيه بسمك

هله يا عمري انته
هله طيفك عشگته
هله يالساكن بعيوني رسمك

بشراييني يبو علي
نظر عيني يبو علي
يمحبوبي
...
شمس ما تطفه گمر ما يغفه
فُرح گلب امك من شاهد جمالك

يشامة خدك تضوي بمهدك
انخلق كل الحب من عالم وصالك

سمه شايل كواكب
سمه كلها مواكب
سمه وصفك متلوحك قصيده

سمه ونجومك احنه
سمه تمطر محنه
السمه نزلت للگاع باست ايده

رياحيني يبو علي
نظر عيني يبو علي
يمحبوبي
...
قسم وعيونك اظل مجنونك
اعوف جنوني ما اتسمه عاقل

يطيّب عشره يخيمة فقره
نهر عطشان من دونك گلبي ذابل

ضوه تارس حياتي
ضوه كل امنياتي
ضوه والعافك كل أيامه ظلمه

ضوه بيت النبوه
ضوه اوصافه حلوه
ضوه ويا سيد اهل الجنه اسمه

تدليني يبو علي
نظر عيني يبو علي
يمحبوبي
...
يخير الدنيه هله بالجيه
الف مبروك بميلادك حبيبي

يمالك روحي تصيح جروحي
انولد هالليله يا عالم طبيبي

دوه روحي العليله
دوه ما صح مثيله
دوه بترابك يشفيلي جراحي

دوه فطرس يشوفك
دوه گاصد يطوفك
دوه گلك يحسين رد جناحي

تداويني يبو علي
نظر عيني يبو علي
يمحبوبي
...
اعله بابك گاعد عشگ متواعد
نثرت عيوني بميلادك هديه

يباب الجنه بدمعتي اتحنه
هلاهل زفت كل الغاضريه

روه دمعي جنانك
روه گلبي بحنانك
روه زرعي من خيرك يغالي

روه حبك خيالي
روه عشگك دلالي
روه نهرك اخلاق الموالي

ترويني يبوعلي
نظر عيني يبو علي
يمحبوبي
...
خادم الحسين ( عليه السلام)
كرار حسين الكربلائي
( ابو كميل )

جمال حيدري
هلال كوثري
وجهك محلاه .. ما شاء الله
...
دلالك جمالك
يغالي حلالك

اكتبك اندبك
حياتي بوصالك

عايش بگلبي علي
يا ضوه دربي علي
بس الك حبي علي
علي مولى

هواك علوي
بضواك ارتوي
اسمك اهواه .. ما شاء الله
...
الثواني تتاني
يحلو المعاني

البدر صاح بالافراح
تعال بمكاني

كوكبك دُري علي
والعشگ عذري علي
يا بعد عمري علي

علي مولى

صفات طالبي
شبيه للنبي
تحمل معناه .. ما شاء الله
...
غرامي وهيامي
يشمعة امامي

حبيبي وطبيبي
اعله وجهك سلامي

شمعة اسنيني علي
يا بعد عيني علي
ثبتت ديني علي علي مولى

فرات للضمه
حبيب فاطمه
صوت اسمعناه .. ما شاء الله
...
وَسامه وكرامه
المهابه علامه

مقامك كلامك
نبوه وامامه

تنحسب خلي علي
بعضي لا كلي علي
يا بعد أهلي علي علي مولى

علي يا علي
فداك كل هلي
مصحف اقراه .. ما شاء الله
...
يجنه ومحنه
الدهر يحچي عنه

إبائك وفائك
علي ماكو منه

جدك الغالي علي
وانت هم غالي علي
عايش ابالي علي علي مولى

ثبات اكبري
يقين جوهري
والطف ناداه ما شاء الله
...
خادم الحسين (عليه السلام)
كرار حسين الكربلائي
( ابو كميل)

الغيم يسولف اويه الگاع بعد يالگاع ما نمطر
انولد للماي شيخ الماي وهو الينهه واليأمُر
دخيل اسم ابو فاضل بيه كل اليابسه تخضُر
ومن تعطش غيمه يرويها
…
العبد العباسي

دعوة شرف

هي لمولاي صاحب الزمان عليه السلام واعتذر ان لم ترتقي لذوقه وذوقكم

خادمكم
#كرار_حسين_الكربلائي

https://youtu.be/1s8kyAONTZ8?si=gzl0x5DR5QfHsc3r