نزلة لـ الأنصار ع

يمهم وفاء الصحبة بس يمهم
سبعيـن ومامـش زمن كررهم

عـرفـو بالوفه زيـن
بس أنصار الحسين
سبعين ومامـش زمن كررهم
----------------------
الله خصهم لأبو اليمه ولنـصـرتـه
طينهم چنه أنعجن من ماي گصته
هوه اليماشي ابوفاضل شنهي بخته
وصارو أبواب الشفاعه من رحمته

چم باب حطة ندخله من عدهم
سبعيـن ومامـش زمـن كـررهـم
بـاب التوبـة باقيـن
بس أنصار الحسين
------------------------
مطـلـق التسليم عـدهـم وبقناعة
ثابتين القدم من وكت الرضـاعـة
لو ألف مرة أنقتل! أعظم شجاعة
مثل دويّ النحل هاي شلون طاعة

طاعة رصينه صدگ طاعتهم
سبعيـن ومـامش زمن كررهم
عـدل لـزمـو الثقـليـن
بـس أنـصـار الحسين
-------------------------
ثابتين و ريـح دنـيـا مـا خـذتـهـم
لأجل ابو السجاد عافو حته أهلهم
الرايد ايحب كربـلـه يتعلمه منـهـم
الحر أجاهم شاف كل الصدگ عدهم

والحر عشگهم على غيرتهم
سبعيـن ومامش زمن كررهم
شاف أصدق عناوين
بس أنـصـار الحسين
--------------------------
شگد عظيمه منزلتهم حته أجاهم
خبر من الحسين وبـركبه لوآهـم
وعافو أهـل الدنيا والدنيا وراهـم
جاسهم حب الخيم وأنطو دمهاهم

خـيـمة وهب بالعشگ دلتهم
سبعيـن ومامش زمن كررهم
بيوم اضحو سلاطين
بس أنصار الحسين
--------------------------
بدربه ناس تغربلت بـس هما ظلـو
بزمن كل ذاك الغدر بالصحبة وفّو
غاية الـحـب تضحيتهم لمن ضحّو
الموت جنة بحب ابو السجاد عرفو

مـاتـو وحب حسـيـن خلدهم
سبعيـن ومامش زمن كررهم
بحبه ايـخـلّـد البين
بس أنصار الحسين
--------------------------
حسين علي التقي

كأني بمولاي الحسين ع وحيداً
يلتفت الى أصحابه

يصحابي گومو بغربتي عينوني
بهل حيرة وحدي فدوه لتخلوني
من عازتي واگف و احشم الموته
بهذا السكوت البيكم تهضموني

أرض الطف صفت وحشه،، وحدي ابين عدواني
وين احزامي البظهري،، احشم ماكو صحباني
اول تالي هيج اصفه،، اجـي ومـحـد تـلـگـانـي
عگب سبعيني ياوسفه،، اشوف بظهري نسواني

گومولي يصحباني
واحد ينده الثاني
صارت حيرتي چبيرة
العاشر كلش أذاني

حسين وجاي ايحشمكم ،، صفه منهوب صاحبكم
-----------------------------
وحدي بقيت أفتر و ادور ناصر
بين الشماته وحالي يكسر خاطر
گعدولي شوفو احسينكم ياحاله
الـهـج بأسـامـيـكـم و اردن حاير

من مصرعكم الدامي ،،  ارد للخيمة و اتحير
العطش تصرخ كل عيالي،، وانه شفافي تتفطر
ماظل حيل بيه اسمع،، يبويه عـطّشانـه الـحـر
خذت عبدالله للشاطي ،، ورجعته بدمه المنحر

خذيته ذابل وضامي
راد ايموت بخيامي
عود اطلبله شربت ماي
تالي انذبح گدامي

بدم عبدالله أحلفكم ،، صفه منهوب صاحبكم
-----------------------------
شوفو مصايب كـربـلـه تعبتني
كل ساعة اوسدلي عزيز بحضني
طيحت اخوي البيها كاسر ظهري
نوبه امشي للقاسم وارجع لأبني

بعد ياحيل ظل بيه،، كل ساعة انفجع بالطف
كل واحد اودعنه،، ورى شويه وراه ألـهـف
اليروح ادري ولا يرجع،، وانه بحيرتي مچتف
كلمن ينذبح ضامي،، عليه امن الدمع انشف

كلساع امشي بجنازه
حسين امخلصه عزازه
حته ما أهظم زينب
انـحـب يمكم أتوازه

صرت ما أبجي بس يمكم،، صفه منهوب صاحبكم
-----------------------------
الواحد اذا يفگدله واحد صعبه
وانه افگدت سبعين بين الغربه
لهمي بعد ماكو الي يفتح گلبه
بس زينب ابنص الخيم متغربة

شريچة حزني وهمومي،، وهمها خاف تفگدني
أردها بظهر محني،،  وزينب گوه تعدلني
كل ساعة بخبر مگتول،، اردلها وتساندني
اعله بني ماحزنت اكثر،، من دمعتها تذبحني

لزينب حسرتي چبيرة
دمعها الشام تفسيرة
اودعها و ارد ابچي
طحنة أثنينه بحيرة

نسولف والدمع يهضم،، صفه منهوب صاحبكم
-------------------------------
حسين علي التقي

أنكسار مولاي الحسين ع على أخيه أبا الفضل ع

طاحت خيمتك وي گض الصفـاح
شيوگف الخيم كون الگـمـر طـاح

طگ عمودي البظهر،، من هويت اعالنهر
-------------------------
من صوت أدركني أخي.. خليتني ابنص بلوة
كلش قريبة المشرعة.. و جدامي ردات تچوه
مو بالمسافات التعب.. لا مـن تطيـح الـخـوة
يحزامي گربت طيحتي.. چي طاح چفك توه

أول مره هيج تشوفني الـنـاس
كل خطوة عثرت ياخويه عباس

حگها الجدام اتعثر ،، من هويت اعالنهر
--------------------------
ياخويه نتحمل عطش.. بس كون ترجع للخيم
يرفض بعد أي چف تره.. بـالگاع خليته العلم
أنه بعيونك ونصبت.. من صوّب اعيونك سهم
وحرورة العاشر گضت.. مـن العمد راسك لچم

بهـتـت حرگة الحومة يـصنديد
كاسر ظهري بين الموش اجاويد

وعسكري كله أنكسر،،  من هويت اعالنهر
--------------------------
عـبـاس جيتك للنهـر.. ولمصرعي أفگد جَـيّــتك
چم ذبحه مقسوم انذبح.. ياخويه تذبح طيحتك
مصيبتي بفراگك أشـد .. كسرتني هاي مصيبتك
لن تشمت بحالي العده.. هالطاح اخوك وهيبتك

راح ارجع و اطيح خيمتك راح
وفعلي هنـا يبيـن عسكـري طاح

وتفتهم زينب خبر،، من هويت اعالنهر
--------------------------
عينيني خنجر العمد.. يازينب الكافل هُوه
گوه وصلت الخيمته.. وبريّتي ضاگ الهوه
يازينب انه وخيمته.. عباس طيّحنه سوه
بطيحته بانت غربتچ.. وانه وحيد بنينوى

هد حيلي الگمر من شفته عالگاع
وهـسـه تيقنت كـل الـعـمـر ضـاع

صارت خيامي بخطر.. من هويت اعالنهر
--------------------------
كسرتني طيحت رايته.. لازمها چفه المنگطع
كلش غيور بطيحته.. شابگ جربته ومنصرع
عباس گتله امخيمك.. وانحصر بعيونه الدمع
زينب سمع مني وشهگ.. حسراته ظلت تنسمع

من الفظت أسمچ مـات مرتين
بلّغهـا اعتذاري گـلـي يـحسيـن

گلها دلاله انفطر،، من هويت اعالنهر
------------------------------
حسين علي التقي

أمري ،، سلمت أمري،، للكفل عمري،، قمر عباس
جنتي،، بيده طلبتي،، هيبتي وبختي،، قمر عباس

أمري بأيده،، ابا الفضل
رزقي يزيده،، ابا الفضل
كلبي يريده،، ابا الفضل

رزقي من باب الكفيل ادخيله،، قمر
أبقى أمد ايدي اله و أوميله،، قمر
حيل لطماتي رزق من حيله،، قمر

ابا الفضل ياسيدي
-----------------------
سائل،، غيره ما سائل،، بس ابو فاضل،، قمر عباس
حبي،، ونور البدربي،، ياروحي طلبي،، قمر عباس

چفه يكرم،، ابا الفضل
اعليه منعم،، ابا الفضل
حقي أخدم،، ابا الفضل

ابد ما شايف مثل حنيته،، قمر
خله بيده كلشي من انخيته،، قمر
روحي بي متعلّگه وناديته،، قمر
-----------------------
رحمة،، وباب ابو اليمّه،، گلبي ملتزمه،، قمر عباس
يگدر،، بيه من غيّر،، من الحجر جوهر،، قمر عباس

بحماه باقي،، ابا الفضل
دخيله الساقي،، ابا الفضل
امغيّر اوراقي،، ابا الفضل

غيّر اسنين العشت بوهامي ،، قمر
صار بوصلتي وشفت گدامي،، قمر
وبالعزه اسمه اليشد حزامي،، قمر
--------------------------
غيرة،، منطيني غيرة،، العندي من خيره،، قمر عباس
زلمة،، سواني زلمة،، وجرني للخدمة،، قمر عباس

عشت بخيره،، ابا الفضل
مـالـي غـيـره،، ابا الفضل
گلبي يجيره،، ابا الفضل

ملك كلبي ومجره دم انياطي،، قمر
مرني عذب اسمه وانه بگماطي،، قمر
مثل ما زاده عذوبه الشاطي،، قمر
---------------------------
عزمي،، يجري وي دمي،، يقضتي وحلمي،، قمر عباس
شارة،، حبه يتجارة،، بگلبي طهارة،، قمر عباس

انطاني سمعه،، ابا الفضل
انطاني رفعه،، ابا الفضل
گلبي يتبعه،،  ابا الفضل

صرت من اهل الخدم من زوده،، قمر
شما ردت ايده الي ممدوده،، قمر
شكد مواقف بيه اله مشهودة،، قمر
----------------------------
حسين علي التقي

صاحالي حسين
و احتاريت شلون أركضله
بين السبعين
أركض محني هاي الفشله
حيل الرجلين
ما عـايـنّي حـتـه أوصـلـه

من صاحلي أدركني أخي
أسـودّت الـدنـيـا بـعـيـنـي
جـيـتـك شبه مـيـت لچن
بـس شـوفـتـك تـحـييـني
طيحة الرآية بنص حـرب
يـمـك طـحـت تـدرينـي

چدمي ثگيل
جيت ابلايا حيلي
وأنـدب يـا كفيلـي
ياخويه شجره

أركض وأميل
تـتلـگـانــي ريـتـك
مايل ظهري جيتك
ومدوهن تره

آه ويلااه يابو فاضل،، ويلااه يابو فاضل
---------------------------
أحتاريت بهاي
عباسي شلون ايطيحونه
ثاري السـگـاي
لو طيحو مايه يكسرونه
مجروح هواي
بس الجربة ابين سنونه

بسهامة ما محتار ابد
بـس جـربته كـل همه
مصيوب برماح وعمد
كـلشـي تلّگه بـجسمـه
مطفيه عينه وهم بعد
بالـمـاي يـوصـل حلمه

حلمه الزغاز
تـشـرب من أدينه
بس مطفيه عينه
راگض للخيم

كل الي صار
جسمه عرضه صاير
لـسـهـام وبــواتــــر
وماعاف العلم
--------------------------
يحزامي الطاح
جنت مأمن عسكر بـيـدك
ويــاك أنــزاح
هسه لوحده ظل اعضيدك
مكسور جـنـاح
وبحسراتي اسمع تنهيدك

من عين وحده دمعتك
ياخويه نزلت جـارحة
والثانية متـروسـة دم
والسهم ناصب فاتحـة
يالبارحة امضوّي الخيم
لاچـن شـيـرد البارحة

لمن هويت
جـيـشـي كـلـه أنـته
بهل الطيحة كسرته
وبانت كسرتي

توه انحنيت
يهضم حالي صاير
شيخ ابنص عشاير
طاحت رآيتي
----------------------------
ياخويه شلون
هـاي الـوادم كـلـها اتاني
بيه ايشمتون
وخاف يعيلون بصيواني
حرّك المتون
تدري متانيتك نـسـوانـي

ترضه يشمتون العده
ياخويه لـم اچـفـوفـك
لم حيلك امشي للخيم
كـمـل عَـلـيّ معـروفـك
شلون ارجع لوحدي بعد
و زينب تريد اتشوفك

بحيرة بقيت
أرجـع أبـقـى حيرة
والـكـسـرة چـبـيرة
زينب تنتظر

يمك بچيت
وبالي يم رجعتي
لو شافتني أختي
مو هيّن الأمر
----------------------------
أكـعـد عـبـاس
حاجيتك دلالي اتعـذب
يابو النوماس
يردون اخيامك تتسلب
مابين الناس
خايف باجر تطلع زينب

ياخويه حـظروها الهزل
يـعنـي السبي متانيهن
هالگوم ايتاني طيحتي
حـتـه بـعَـجـل يسبيهن
وتعرف حرمنه امخدرة
بـس الـگـمـر حاديـهـن

باجر نشوف
زينب تمشي أسيرة
تـعـبـر ديـرة ديــرة
وأحنه عالرمح

كلفة تطوف
چم هيمه وخرايب
و ديـوان الأجانـب
هذا اكبر جرح
---------------------------
حسين علي التقي

السيدة رملة تنعى ولدها القاسم ع

يضناي شبعد عندي وضيعت يمه من اديه
يـا أجـمـل ذخـر عـمـري وخـذتـه الغاضريه
وساعة انـه مامتـعـوده افـگـدك تـدري بـيـه
دمك تارس الگاع وطـريـح اعله الـوطـيـه

وهاي الگاع مثلي ماتضمك
مو مثلي حنينة ياروح امك

وشعدها الگاع
تغطيك بساع
مو مال اتراب
عطر النعناع

ايا جسام ايا جسام
------------------------
رايح حته ما لحگت اشمك ياضوه العين
طـولـك حضنـي اليلمه ولا تلمه الميادين
وسـفـه يابعد روحـي اشوفك يالمطاعين
على الحلوين امثالك شجاه ويغبش البين

دمـع افـراگك اوليدي اشيضمـه
ضوه الدنيا بغيابك عندي ظلمه

أظلّمت دنياي
عگبك يضناي
كونك عطشان
ابقى اعالضامي
---------------------------
من جابو خبر موتك ييمه تراده حيلي
بهالساعة تمنيـت المنيـة بـس تجيـلـي
يلجنت بدليلي وصبّحت شـالـع دليـلـي
ياوليدي ونظر عيني وكبرتي وياخليلي

شمـاخـذ مني ياطف النوايب
أعز شي چان بي دلالي ذايب

ياطف النوح
خليت اجروح
تموتني بيوم
ماظنها تروح
-----------------------------
عطشان وبقى ريجك خشب يمه لمماتك
ياضامي وتراب البر أخـذ منـك حـلاتـك
أبدمع عينـي أبللهـا لـون يـمـك لـهـاتـك
علـيـك الـمـاي ماينعـز يالمـدلل خـواتـك

انه ادري الضمه شيسوي بالشاب
يـنـام بالشمـس و امغطّـه بتـراب

امطشر يا يآس
جسمك وانداس
وبـاجـر بـرمـاح
ايرفعون الراس
-------------------------------
باجر يضناي اشلون اشربه الـمـاي بـعـدك
لو مرونه عالشاطي واشوفه ضامي گلـبـك
هاي الحسرة التضل بدليلي يبقى جرحك
اشوفنك واعوفك بالترايب ودامي جسمك

شلون امشي واعوفنك يروحي
وعالهزّل عـزائـك يبدي نـوحـي

امغسل بدماك
يايروحي الگاك
اترف مذبوح
الحافر داساك
---------------------------------
حسين علي التقي

مولاي الحسين عندما خرج القاسم أبن الحسن عليهم السلام


يالطالع من الخيام چنك أخوي بعيني
جاي بلآمة الحسن وتذكيرت اسنينـي
عيونك رجعني وين شفتك أخو گدامي
طولك هيبته وعطر هدمك صفه يبچيني

حظنك بي خوة
القاسـم ياسلوه
وشفت اعمامة الحسن،، عصرت دليلي گوة

عطرك بچانـي
اوداعك أذانـي
بس انته شبيه اخوي،، مثلك ولاكو ثاني

الوداع الوداع يبني يالقاسم
--------------------------
يالقاسم لمن هويت بيك انكسـر دلالـي
چني شفته عالتراب طايح اخوي الغالي
يانسخة من الحسن ماكو شبيها ابگـدك
ماردتك ياروح اخوي تتوسد انته گبالي

شفتـك گـدامـي
ورجعتلي أيامـي
حسبالي الحسن هوه،، فوگ الوطية ضامي

طـولـك ذكـرنـي
من صرت بحظني
تذكرت ايام الحسن،، حظـنـه لـمـن يلمنـي
---------------------------
هاضمني لمن صحت لعمي نذرت ايامي
وموتي احلى امن العسل لمن گلت گدامي
يالوافي بعهود أبـوك جانـت وصيته هايه
وكسرت گلبي طيحتك عالغبره شفتك ضامي

الماي بلا قيمة
وشفتك بالهيمة
تتظله العطش يعم،، وذاك النهر حِريمة

صوتك عذبني
وتصيح أدركني
ياعمي على الترب ،، حر الشمس لچمني
-------------------------
يـا عـمـي يعزي عليّ تدعيني ما أجيلك
و ادري بـجـيـتـي الك ما ابـرّده غليـلـك
ضامي ورايد العذب وانه دليلي ضـامـي
ياعم اتصيح العطش وانه بضمه اشتكيلك

يالكسرو زندك
ويالذابل خـدك
يازهرة سنين أخوي،، روح ارتوي وي جدك

روح ويه الأكبر
اتروه من الكوثر
هنانه مكتوب عطش،، وهذا عطشنه معبر
------------------------------
شلتك للخيام اجيت وامك تتاني طولك
حسبت ترجعلها كون سالم تجي تشوفك
ومن شافتك بدمه حنت بايديها دمـك
صاحت يمه يالولد امغطي الترب زلوفك

يالرحت امبرگع
ورديت امـوزع
من شافت دمه النحر،، مو حگها يبني تجزع

مابين الصرعه
گلب امك ينعه
ونعيّ امـك يالمـنذبـح،، حته الحجر يفجعـه
-------------------------------
حسين علي التقي

كأني بمولاي الحسين ع
عندما هوى علي الأكبر ع

يالاكبر طايح ويـن دلـيـنـي بـروحـك
يل صايح بويه حسين لا تگطع نوحك

ياروح حسين،، ما اندل وين،، دليني بروحك
-----------------------------
أدركني أبه منها اشدهت حالي
يل صوتك عزيز وطابع ابالي
ولأن نبرة مُنازع هدت احوالي
والغالي تضيّعه طيحت الغالي

من أدركني احتاريت ياصوب امشليك
تيّهت وانه حسين ضيعني اعويلك

يل ردت امعين،، ما اندل وين،، دليني بروحك
-------------------------------
يل الطايح على التربان دليني
أشرلي تره وحقك عمت عيني
صوتك ياعلي چنه خذه سنيني
يل اميبس مهجتي وحيل رجليني

صوتك ضيعلي الرآي يالماخذ حيلي
لو ماتگدر وتگوم بأيدك أوميلي

معمية العين،، ما اندل وين،، دليني بروحك
----------------------------------
علي بويه وصلتك هذا انه يمك
عمت عيني لگيتك سابح ابدمك
صاير وصلة وصلة وبالله شيلمك
حيرة شلون اشيلك وارجع لأمك

شيلمك يل مدلول ياروح احسينك
يچبيري شصاير بيك ليش مطشرينك

رسومك طافين،، ما اندل وين،، دليني بروحك
----------------------------------
يخاطف لوني بويه شصاير بلونك
على الدنيا العفه لو غمضن عيونك
سعفه بريح أظلن تدري من دونك
الفواطم بالمخيم جاي ايتانونك

الظل بخيامي ايتانيك ياروح اخيامي
حيرة شلون ارجع بيك يل كلك دامي

ياتعب سنين،، ما اندل وين،، دليني بروحك
-----------------------------------
صعب فرگاك وگلبي بحبك امتيم
بس موتك اشوفه راحة من كل هم
ساعة وبيك الحگ والشمل يلتم
يل عطشان بالحر وبنزيف الدم

روح اهناكه ايرويك جدك من مايه
ساعة وراح الحگ بيك نلتم بفيايه

ويلمنه البين،، ما أندل وين،، دليني بروحك
-----------------------------------
حسين علي التقي

شجاعة مولاي علي الأكبر ع

برز بالبتار،، مولانا علي الاكبر
فارساً مغوار،، مولانا علي الاكبر

اسد الشهامة،، لو سل حسامه،، تصير القيامة،، ياعلي الاكبر
سيفه بيمنته،، ثگيله سطرته،، كلفة حملته،،  ياعلي الاكبر

رعد سيفه
يآخذ بالرگب كيفه
روس كبار تكليفه،، مايدنه الزغير
مثل جده
أكبر عايل ايرده
خصمه يدور الشرده،، وبملگاه متحير

مولاي ياعلي الاكبر
----------------------------
راعب الفرسان،، مولانا علي الاكبر
سيد الميدان،، مولانا علي الاكبر

لو سرفن ايده،، تنزل رعيده،، ما تبقى صيده،، ياعلي الاكبر
الجيش بقناعه،، هجومه ودفاعه،،وگفوله طاعة،، ياعلي الاكبر

منو بحلّه
لو يحمل فرد حمله
جيش يصعده وينزل،، ويحيرهم بروحه
أسد يزأر
من يجبل مثل حيدر
الجيش گباله يتطشر،، ياويله الذي يلوحه
-----------------------------
ابن حامي الجار،، مولانا علي الاكبر
وارث الكرار،، مولانا علي الاكبر

أول  محارب،، من آلِ طالب،، ايذل الكتايب،، ياعلي الاكبر
هيه الهواشم،، بالحومة لازم،، تدمي الصوارم،، ياعلي الاكبر

نسل هاشم
حيود وبالحرب لازم
تخلي امثلّمه الصارم،، بگرابه يرد احمر
ابن أبو طالب
جده اليرهب الراهب
بوكته مسكت شوارب،، مايعله علي منكر
------------------------------
قاتل الأرجاس،، مولانا علي الأكبر
عمهُ العباس ،، مولانا علي الاكبر

شد ظهره عمه،، بالحومة عزمه،، عباس ايحشمه،، ياعلي الاكبر
چنه بوفاضل،، بس غيرة شايل،، سوه عمايل،، ياعلي الأكبر

مثل عمه
حار وما برد دمه
گباله ماوگف زلمه،، عنده حرورة الكافل
ابو السطره
من ضهضب على المهره
أبن غانم خذه عمره،، رد براسه متفائل
----------------------------------
حسين علي التقي

لسان حال مولاتي ليلى ع

علي الاكبر يغالي
يـا عــزي ودلالـي
گارصني كلبي بروحتك من هالوداع
انه اخاف اعله طولك
مـن غـدر الـيـجـولـك
من تبتعد گلبي تره ايگوده الضياع

يايمه گلبي بي حزن،، خافت يون،، ملچومة
بس لا تروح وماترد،، يل مستعد،،  للحومة

چني دريت بهل روحة هاي
للـخـيـمة ماترجع يا ضناي
درب العطش ماخذ چم عزيز
وچنك تروح وماتلگه ماي

علي الاكبر ييمه علي الاكبر ييمه
-----------------------------
قـمـر لـيلى يروحي
يبلسم كل جروحي
ظـلـمـة تره كلشي يظل لمن تغيب
يضي تارس الخيمة
روحي دونك يتيمة
متحلّفة گاع الوغى اتخلك سليب

مو تدري نار اموجّره،،  بگلبي تره،، يـولـيـدي
بالحومة منتضرك ذبح،، يبوگك رمح،، من ايدي

كـل الـمـشـو مارجعو عجب
الحومة تضملك بس التعب
خوفي جمالك بالدم ايروح
وراسك يشيله رمح الخشب
------------------------------
يـا اعز كـل بنيني
الك ذروة حنيني
ربيتك امكيفة اكبرت تالي تروح
مـو للذبح ذاخرتـك
كلت تكبر واعرسك
تتحنة تالي ياعلي ابدم الجروح

أرباي وذخرتك للكُبُر،، شبر ابنذر،، ربيتك
امنيتي سكتها الذبح،، راس برمح،، تاليتك

ياشمعتي التضويها الخيام
بـفَـيّ گلبي ردتـك يمه تنام
شجابك تنام بعين الشموس
اعليك الحوافر صار ازدحام
-------------------------------
يـمـه موهذا گدرك
بهيمة ينتثر عطرك
ايطيح النده بس عالورد مو بالهجير
يـا زهـرة سنينـي
لموتك تعمه عيني
مـا تـلـتـم وصـايـر وذر يـبـني الأمير

شـيـلـمـه تـاليها الـعـطـر،، مـن ينتثر،، بالهيمة
ياهيل ولمن تنسحگ،، عطرك يطگ،، بالخيمة

بذيج الحوافر لخيامي أجت
عـطـرك وصلنـي يبن البخت
مـنـهـا وعـرفتك صـايـر وذر
شگد الخيول بجسمك مشت
------------------------------
تـالـي بالسبـي شـفـتـك
ابرمحك امفطره شفتك
بس منطفي وجه الگمر مومثله ذاك
بالرمح تالي نومك
ذوبلت كل رسومك
بگصتك حجر باقي أثر تنگط دماك

نـايـم يـويـلـي عالرمح،، وجه الصبح،، معقولة
شيحمل يگلبي جمرتك،، من شوفتك،، مذهولة

دربي بعيد وگدامي اشوف
بس السموم براسك تروف
لو هبت الريح أشهگ وأموت
بس لا تطيح بدلالي خوف
-------------------------------
حسين علي التقي

كأني بمولاي الحسين ع
يقف عند مصرع علي الأكبر ع

علي شد حيلك وگوم
نومك هذا مو نوم
حاچيني يجيدوم،، نخيتك

دخيلك خل أرد بيك
بس حركلي أيديك
الخيم كلها تتانيك،، بچيتك

علي ياما صحت،، ياما نحت،، بس رد عليه
أناشغ مو متت،، عينك ردت،، تفتحه اليه
روحي اتعلعلت،، وتمرمرت،، يـمـك سبيه

علي گوم و أمك امتانيتك اتـرد
شيبتي لو ألها خاطر عندك أگعد
سكتتك يابويه حيل بگلبي تمرد

ياعلي نومك مو هني ياحلو الرسوم
ياعلي صعبة شيلتك شد حيلك گوم
----------------------
طولك ماهو للگاع
الخيل تريد السباع
علي توه العمر ضاع،، وعيونك

مو توك ردت ماي
جبتلك ماي عيناي
بدونك سوده دنياي،، بدونك

العطش بويه شخذه،، وجه النده،، ياوسفه ذبلان
من بيك استقر ،، گلبك فطر ،، بشفاك نيشان
أخذ دمعي علي،، منه ارتوي،، حته آنه عطشان

الماي صاير نشتري ياعلي بالدم
وصارت الگطرة عزيزة اعالمخيم
روح جـدك يروّيك بـمــاي زمـزم

ياعلي من عدها اخلصت وبحيل تعبان
ياعلي بس خليت أبوك حسين عطشان
-----------------------
علي شمعة حياتي
ارسمت بيك امنياتي
تره يبست لـهـاتـي،، ومهجتي

شتريد تگول أحجي
بس هاا بـويـه گلي
أحتضرت وما گمتلي،، بحسرتي

علي ماظل صبر،، بويه العمر،، ساعاته خلصن
ردتك تنتهض،، هاي الأرض،، مـا بـيـهـا مـأمـن
خيل بكل كتر،، خايف تمر،، و اعليك ايسحگن

علي ذيج الخيل خاف اعليك تعبر
وخاف بهدومك تچلب بويه وتجر
ومـن تـغـيّـر الأعوجية تره اتطشر

ياعلي تعرف غايتي من گمومتك جان
ياعلي مـو جسمك يضل للخيـل ميدان
-----------------------
يمن لـ گليبي سبّاح
حيلي من الهظم طاح
وصلت لگض الصفاح،، يحيلي

طالت حيرتي حذاك
أعوفك ابقى وياك
زينب رادت هناك،، تجيلي

زينب تنتظر،،  مثل الجمر ،، بويه وتتاني
حيرة بطيحتك،، بويه علي،، ضكني زماني
بينك و الخيم،، أرجع قدم،، وابقى بمكاني

بينك وبين الخيم يابويه حـيـرة
ضاع حيلي وكل مسافاتي چبيرة
ابقى يمك خاف ايسلبوها الأميرة

ياعلي حدي اوياك طلّعَت عمتك هناك
ياعلي ستر الله الاعز من گعدتي احذاك
---------------------------
توه اعرفت شيصير
الأبو لو مات الچبير
يظل اينوح وايحير،، اعله أبنه

يموت ويعدل انوب
وعليه ايشگ الجيوب
وما يرتاح فد نوب،، امن ايدفنه

على الدنيا العفه،، وسفه الجفه،، بيناتنه ايصير
نتفارك صعب،، حـزن الـگـلب ،، يملي التعابر
لو مات الكفو ،، يكسر الأبو،، وخصوص الچبير

ياچبيري تنكست رآيتي بنومك
شكد كلتلك كون يومي قبل يومك
الخيم جرتني وأيدي جرت هدومك

ياعلي عالدنيا العفه بدونك يروحي
ياعلي بعدك ما أظلن يشفن جروحي
------------------------------
حسين علي التقي

جروح مولاتي الرباب ع

من جنت بشليلي بهيده اغطيك
وتضحكلي شحلاتك من اناغيك
عمت عيني السهم كالولي مآذيك ... عبدالله ييمه

عليك الشمس لو دارت افييك
يا بزر العشگ وشلون اداريك
واكول شلون بالله هناك تاليك .. عبدالله ييمه

لو ما اجيت وياي .. والطف يتعب هواي
تحصل حوافر خيل .. لا ما تحصل ماااي

غصة بگلبي يمه جيتك هايه
لو يم العليلة باقي احسلك
العطش باجر تره يآخذ معانيك
ترف يايمه وبهذا السفر شلك

يعبدالله يضي عيني يعبدالله
يعبدالله يضي عيني يعبدالله
------------------------------
جبت الدرب كله صافنه عليك
ماسلهمت عيني وانه احاجيك
ساعة اشتم رگبتك ساعة بيديك  .. عبدالله ييمه

بالهودج و أهـزك هـزة الروح
دمع الفرح جان وياك مفضوح
هسه شلون اصد عليك مذبوح .. عبدالله ييمه

يالغافي نص العين .. هاا ياعزيز حسين
يـا وردة سنيني ..  انته ورمحهم وين

البعمرك لون جاسة العطش يذبل
الورد من رگبتك أشتمه هاا يبني
شلون تعوف حضني الدافي يوليدي
معقولة الرمح يهتز مثل حضني
----------------------------
مالحگت اشوفك تحبي يضناي
ولا تعبت يمنتي بنومك حذآي
تيهت العگل والشور والرآي .. عبدالله ييمه

أصبّر حالي بالله بفگدك شلون
يضي عيني وراك شظل للعيون
حظن أمك وكاروكك يتانون .. عبدالله ييمه

شيصبره گلبي عليك .. بيه الذبح مو بيك
ادعي عله سهم البين .. كون الله لا ينطيك

حرّ النبلة يمه شسوه برياگك
بلهيب مثلث النبلة شهگ صوتك
لا مو هينة وگماطك وصل صاير
بتعب وضماك ياويلي لفه موتك
---------------------------
يايمه العطش چملها وياك
نشف مهجتك والضيم راواك
غيرلك جمالك يالولد ذآك .. عبدالله ييمه

يا واسع العين وتجذب الشوف
أوهم عيني گوة واحجي بالخوف
كلت مو دم عليك برآية ملفوف .. عبدالله ييمه

لو ادري شمتانيك .. للحومة ما انطيك
ريته وسط گلبي .. وذاك السهم جازيك

العطش من كون كاتلني قبل موتك
يعيوني وراك ابيضت عيوني
ييمه الهاضمتني الضعيو رسومك
مو بحبال بگماطك يجتفوني
-----------------------------
بالله بيا گلب شافك الذباح
يالراسك زغير وخشنه الرماح
چم مره نشوفه من الرمح طاح .. عبدالله ييمه

رايد مااااي ذنبك  تنذبح ليش
عله جسمك الناعم هوسو جيش
اخلصك بالله من حافرهم ابيش .. عبدالله يييمه

الباوع جمالك ذآك .. لو رحمة بي خلاك
الماراضي ينطي الماي .. ليش بسهم روآك

اليطلب ماي بالطف يرجع بدمه
ليش الذابحك ما باوع شفافك
من شاف البرائة بوجهك الضاوي
لون خلاك ميت بالعطش عافك
---------------------------
حسين علي التقي

مولاتي الزهراء ص
تنعى مولاي الحسين ع

أبچيك أم شافت ولـد فـوگ الترب گـلـبـه أنمـرد
أبچيك ضامي ومنسلب صابك حجر صابك عمد
أبچيـك مبتـور الصـبـع ذبـاحـك أبـصـدرك گـعـد

مامثلي أم،، مذبوح أبنها شـافـتـه
حرگة لطم،، صدرك حوافر طحنته
بگلبي هظم،، أبني تطيح عمامـتـه

يمه حسين نحرك ليش گطعوه
يمه حسين ثـوبـك ليش سلبوه
يمه حسين طولك ليش داسوه

واا ويلي على ابني المات عطشان
ولعبت على صدره الخيل مـيـدان
--------------------------
عطشان يانبعي العذب ويلي وشفاهك ذابلة
عطشان تحلف بالنبي يابـس لسانـك بالـفـلـة
عطشان والكوثر ملك أمك وابوك الساقي اله

بثالث عمر ،، عفتك جمال ابلا وصف
شنهي الأمر،، وجهك غده مـاينعـرف
بشمس الظهر،، يايمه لونك منخطف

يمه حسين چبدك ليش عطشوه
يمه حسين حِسنك ليش غيروه
يمه حسين ظلعك ليش طحنوه
---------------------------
محتار يل محد الك وحدك تحامي عالحرم
محتار وتروح وترد بين الشريعه والـخـيـم
محتار مكسور الظهر ظهرك حنا راعي العلم

عزوة وأهل،، چانو الـك وتغـربـت
وين الكفل،، بعيالك لـوحـدك حرت
شنهي الحصل،، وتقدم حصانك أخت

يمه حسين طفلك ليش ذبحوه
يمه حسين ظهرك ليش كسروه
يمه حسين الأكبر ليش طشروه
---------------------------
صيوان عامر بي چنت شيخ العشيرة ياشـهـم
صيوان وين أهل البخت ما جاي أصدك مو حلم
صيوان بي زينب بقت تفتر عـلـي غـربـة الـزلـم

وسفة أنچفت،، الدلال من طاح العلم
وزينب بقت،، محتارة بأطفال وحرم
شلون أطلعت،، مذعور وتطفي الخيم

يمه حسين بيتك ليش حرگوه
يمه حسين ظعنك ليش أسروه
يمه حسين خدرك ليش طلعوه
----------------------------
يايمه مهظومة لأن عاري وبقيت ابلا دفن
يايمه مو ذاك النهر ليش الدمه تغسله الأبن
يايمه راسك بالرمح خليت نحرك بالحظن

نمت بترب ،، والذاري يلچملك جرح
شاب الگلب،، يسلبونه ثوب المنذبح
ويه الغرب،، راسك خذاه ذاك الرمح

يمه حسين جسمك ليش عافوه
يمه حسين راسك وين ودوه
يمه حسين ليش برمح شالوه
----------------------------
حسين علي التقي

شسويتي بآل المصطفى،، أويلاه يكربلا
اثمنطعش نور ألهم طفه،، أويلاه يكربلا
الـ بدنيا ما ألـهـم شَـبـه،، أويلاه يكربلا
بالترب واحدهم صفه،، أويلاه يكربلا

وضيعتي أطهر قافلة،، أويلاه يكربلا

شـصـار وجـره يانينوى،، أويلاه يكربلا
بـ أهل الهوه ضاگ الهوه،، أويلاه يكربلا
بـ آل الله شح مايچ عجب،، أويلاه يكربلا
وحـتـى طفلهم ما روه،، أويلاه يكربـلا

عَطشّتي شبان العُلا،، أويلاه يكـربلا

شبان حـمـاي الـحـمـه،، أويلاه يكربلا
چم حيد عالگاع أرتمه،، أويلاه يكربلا
من طاح الحسين الظهر،، أويلاه يكربلا
ما طبگت بگاعـچ سمه،، أويلاه يكربلا

بگيعانچ اكبر معضله،، أويلاه يكربلا

ياكـربـلاه وكـل العجب،، أويلاه يكربلا
بگاعچ عزيز الله انسلب،، أويلاه يكربلا
وركضت بگاعچ يا مرة ،، أويلاه يكربلا
وصيوان ياحرة أنـهـب،، أويلاه يكربلا

رَگضّتي چم امـدللـه،، أويلاه يكربلا

عثرت بگاعچ يامرة ،، أويلاه يكربلا
بـت فاطمة المخدّرة،، أويلاه يكربلا
و رقية مچويه الجدم،، أويلاه يكربلا
بگاعچ مشت متحيرة،، أويلاه يكربلا

سلّبتـي كـل عايلـة،، أويلاه يكربلا

الـمـا لمح ظلها طالبـي،، أويلاه يكربلا
شـصعدهـا تل الزينبـي،، أويلاه يكربلا
يـا كـربـلا وما تنعقل،، أويلاه يكربلا
مولاتي زينب تنسبي،، أويلاه يكربلا

وحاديها شمر وحرملة،، أويلاه يكربلا

مولاتي زينب ع

كلبي طاح،، حيلي راح
لمن هوت خيامي
كلشي مات ،، يا فرات
وظعني بلا محامي
بلايا حيل،، گملت أميل
وانه دليلي ضامي

أخ اعله حالي ما جره بحرمة قبل
مامنسمع صوتي ولا شافولي ظل
مو حالي من حال النسه الماتنكفل
ام الخدر كلفة صرت  أصعد هزل

يا حالي من دار الوكت
بظهرية چم غالي فگدت
بالهيمة مجبورة طلعت
بلايا اخوان وين اندار

بالعاشر اه يامحنتي
من احركوها خيمتي
عل التلة كبرت حيرتي
وبين الخيل عندي زغار

على التله أومي بأديه
يخويه شعظمها الرزية
---------------------------
معوزة شوف،، بيه خوف
خوفي على الظعينه
حيلي مال ،، بالرمال
لمن شفت ولينه
گتله گوم،، جانه گوم
خويه تره انولينه

لو الك نفس الحك علي يابو الشيم
متچتفه برآيي وصعدت اعله القمم
دورلي حل يابو علي حليلي انهدم
متطشرة اطفالي وانه بلايه خيم

مذعورة ادور بالفزع
وعيوني غطاها الدمع
خاف بجيدهم اندفع
فشلة اعثر وسط هالناس

ليا طفله اروح ليا طفل
للميت اركض للعدل
مستصعب أمري مو سهل
دخيلك خويه يا عباس

يابو فاضل الحك عليه
يخويه شعظمها الرزية
-----------------------------
وين اروح،، بس جروح
العاشر خذه الأحبه
هايه نار ،، والزعار
شيلمها والله صعبه
بعز نهار ،، طولي صار
وصار الضوه يچهبه

صار الضوه يجرحني من بعد الخدر
اصعب جرح بعد الذبح ركض الظهر
يامن يجيب الليل الي ويگضي العصر
بنيت علي صعبة تره من امشي بيسر

طاح الكفيل و رايته
وطاحت خيامي بطحيته
الأمشي قبل بحمايته
شلون امشي بلا كفّال

ياخويه حاطتني الغرب
وبلا كفالة أمري صعب
درب السبي رايد گلب
وعكبك خويه بيه شضال

الذبحكم صفه يحدي بيه
يخويه شعظمها الرزية
---------------------------
من مشيت،، وشلگيت
من السبي ومصابه
الخطوه يوم،، بالهموم
أحسبها من عذابه
دربي موت ،، والسكوت
بعيني رسم سحابه

وانه عرفت هذا الدرب ما ينتهي
ألا بخرابة وتخلص ايام الـسـبـي
الماعدها أخو لازم يماشيها اجنبي
والشام يقلل قـدر كـلمـن طالبي

تالي بخرابه تحريت
زينب غريبه هنا صرت
چلمه بحلك شامي أنگلت
صاحو هايه اخت عباس

ديرة شماته بلا أخو
وسايگ ظعنّه هم عدو
ياخويه وينك يل كفو
بالديوان  بين ارجاس

صفه أسمي تره الخارجية
يخويه شعظمها الرزية
----------------------------
حسين علي التقي

يبن أمي وين دوريتك
مشدوها بـال تيهيتك
بس من هواك فرزنيتك
متغير اشلون

صار الظلام واعتنيك
دربي وعر بس أجيتك
خويه بسكوت ودعيتك
عن لا يحسون

عـريـان خـويـه شبيهم ،، عزو عليك الهدم
فوگ الترابة جروحك،، تـتـگـلـب وتنلچـم
عود انه جيت اشكيلك،، هدت علينه الزلم

طـايح ومگلوب وجهك عالتراب
شوفتك ترست گلب زينب عذاب
يا مصاب اشكيلك وانته بمصاب

واا ويلاااه ياكربله
-------------------------
أكعد حسين فرهدونه
مـن الـخـيـام شردونه
مالي كفيل لالي عونه
محتاره بـأيتام

ام الخدر وسـفـه تـالـي
بطولي مشيت لا أبالي
بين الخيام كل عيالي
محروگه الجدام

فرن يخويه عيالك،، طلعوهن امن الخدر
وحده تلوذ بوحده،، ويسحگن اعله الجمر
صار العفاف ابهيمة،، ويركض وراهن زجر

اعذرني خويه والعذر منك قليل
اعليه كل لـمّـت بناتك مستحيـل
على التله گمت أصيحلهن وأميل
----------------------
صوب النهر من ركضنه
لاگتنه خيل طـشـرتنه
بچف الكفيل من عثرنه
صحنه يعباس

صحنه شكثر حشمينه
ظيعو دلال هالظعينه
خيمة ستر ماكو لينه
وتتشمت الناس

عباس خويه ألحگنه،، العياله أجت عآيله
بـالـبـر حريمك صارن ،، وتطشرن بالفله
المستورة شيركضها ،، المرعوبه بين الملا

خويه عوف الماي وألحگ بالظعن
كـل حـرمـنـه بالـفـيـافـي اتشردن
وبـ لسان الغربه اسامينه انحچن
----------------------
خوف ورعب بالظهيرة
لا خـوة ظـل لاعشيرة
وجهي لمن خويه أديرة
وأنتم مطاعين

المنّي يضيع بيش أدوره
من الخيام جدمي جمره
لا بيه حيل لا لي قدره
والزلم صوبين

صارت رماد الخيمة،، والبيها كلشي انّهب
ويه الخيول اتدافع،، فحطانه من التعب
ياكون ألـم اعيالك،، والما لحگته انسلب

هاي اول طلعه الي بعين النهار
صار وكـتـي ضيّگ ابلم الـزغار
الما لحگته بالحوفر يعني صار
----------------------
ليل الظلام جمّعانه
بنص خيمة صار ملتقانه
وجـه الصبح لا لـفـانـه
يبعدنه عنكم

صبح اهدعش ياهضمته
گلبي انخمش من چهبته
خويه الوداع هذا وكته
انودع جثثكم

چم درب بي هالوادي،، يودينه صوب النجف
والحادي مرنه اعليكم،، متعمد ومـا صـدف
حته يحرّگ اگلوبنه،، خويه بجثثكم هتف

حـتـه لا نـنـزل نـودعـكـم عـدل
حيل حيل بسرعة جروها الهزل
وما رفعنه ايدينه لن بيهن حبل
--------------------------
حسين علي التقي

الحگلي اصيحن يخويه خيامي احرگوها
ضيعتها صعبة العزيزة التضـيّـع أخـوهـا

اتطشر ظعنّه،، وبهيمة ضعنه،، وبعيـدة الـشـريـعـة
اتعثرني هضمة،، من الگه حرمه،، بصحاري وسيعة

چنه بأمان الگمر رآيتـه تـرفـرف
هسه عبينه خجل بالحومة تنزف
بلا چفه مانندل ولا ديرة نعـرف

غـارة وتـريـد النـهـب بالدرب زلم
يروح ويرد مستحه حيرة بالجدم
بظلمة وطلعنه بخجل طلعة النجم

ويلاه يزينب ويلاه يزينب
-------------------------
لحد عاشر ولا طلعنه بخيمنه حراير
غير الهواشم حشاها تشوف النواظر

لحد عاشر احنه،، نلوج بعطشنه،، بخيمنه بقينه
النـار افزعتنـه،، وهيه اجبرتنـه،، نطفي بعبينه

ويا طلعة الحيرة طلعتنه بالبر
الما تعثر بجمرة بالنظرة تعـثـر
الفازع يسلّب شيعرف أحنه خدّر

الـسَـلاّب مـا يفـتـهـم عـفّـة الـحـرم
اليحرگ گلب طفلة يستسهل الخيم
الينهب تراچي بأذن شمعرفه بالشيم
-----------------------------
بالحيرة تلة اصعدها بهضمتي صحتلك
لو ما تجيني اعالهزلة تجيلك تره أختك

هالگوم اجالي،، وضاعت عيالي،، الأمانة ثگيلة
احبالي تتاني،، تچتف دلالي،، الحگلها العقيلة

حـرمـة وكفـيـلـة بظعن كله يتامة
وچفني التلاگة بذبح ليله شينامة
ولا واحد من اخوتي گلي بسلامة

يحسـيـن تـرضـاهـا صعدوني عالـهـزل
اوداع الغصب تدري بي خويه مو سهل
وچفي التلزمة صفه امشبّگة الـحــبـل
------------------------------
من تالي اعوفك يخويه طريح الترايب
عالناگة اودعك هظيمة وأماشي الأجانب

من تالي اشوفك،، هيج واعوفك،، سليبة ثيابك
بدمك يسابح،، مالك ملامح،، يـويـلـي لعذابك

يبن امي اكبر جرح عريان جسمك
ليش انته مالك چفن غارگ بدمك
اعليك من أذب روحي خافن ألچمك

النظرة الأخيرة وعـلـي تـگـطـع الـگـلـب
شلون امشي وابن امي اعوفنه عالترب
أرد ابقى يـمـك لـچـن مـاخـوذةً غـصـب
------------------------------
حسين علي التقي

عالتله ناديتك،، خويه أحترگ بيتك
وضيّعني هالصوت
مديت الك شوفي،، صحتك وانه بخوفي
مدلي أيدك وموت

الأخت عادتها حنينة وهم تحن لخوانها
وزينبك حنت لعينك يالعفت صيوانها
عينك انسدت وأميه أنفك الي ديوانها

ما ظل ولي لا ظلي نغّار،، خويه
والهيمة باگت مني الزغار،، خويه
وضيّع دلالي الخيل والنار،، خويه

يابو علي زينب تتانيك،، خويه
-----------------------
شعندي بعد يسوه،، من طاحت الخوة
شخسر بعد كون
كل خوفي لاعوفك،، عيني تحب شوفك
يا فـص العيون

من الخيمة اطلعت گوه بحيل بايد حايرة
بين خيل اطفالي ضاعت وانه عيوني غايرة
و اصعدت للتله ادورك غيرك انه شخاسرة

فدوه الك بخيامي شيصير،، خويه
لأجلك بعد خل زينب تحير،، خويه
بس كون اشوفن طولك بخير،، خويه
------------------------
ماكو ظره بهيمة،، جدمي انچوه بخيمة
بس همّتي اعليك
ما طالعه بعمري،، بس أنجرح صبري
وگلبي اليهم بيك

ما يأخرني الحرگ وخيامي طاحت توه
بدربي خيل وچدمي مچوي بس أجيتك گوه
هاي مو بلوة أحسبتها فراگ وجهك بلوة

جيتك بيا حاله من جيت،، خويه
الخيل سحگتني تمنيت،، خويه
بجيش كامل من تلآگيت،، خويه
---------------------------
جيت بگلب حاير،، أمشي بجدم عاثر
بس كون ألاگيك
شيصير ما اهمله،، لو جسمك اندله
وبدمعي أزگيك

طايحه لعينك سبيه كون اشوفك سـالـم
من سمعت طگت ضلوعك گلت اجيلك لازم
جايبه وشالة عيوني وادري گلبك صايم

لـو مـا تـجـي ألـمـن اتانيك ،، خويه
جيتك اشوف شبيك مابيك ،، خويه
صايم وجايه بدمعي أرويك ،، خويه
---------------------------
ماتت سوه أحلامي،، و راسك الگدامي
أنُس السبي صار
معناها الي موعد،، ويمك أرد و أگعد
ويم گبرك احتار

راسك امنسيني ضيمي وحته حبلي البيدي
بقه شي من جسمك ايماشيني هاا يعضيدي
دام روس أخواني يمي الدم يضل بوريدي

هم زين راسك موش وياك،، خويه
تـعرفنـي ما اعيشن بلياك،، خويه
وخلالي موعد ارجع احذاك،، خويه
----------------------------
حسين علي التقي

يا صاحب الزمان لك العزاء

وين استقر بيك البچي
وين استقر بيك الهظم
يـا ديـرة نـاصـب مأتمك
صدرك اشلونه من اللطم

يالغايب عن العين،، ناصب مأتمك وين
يم بـاب العقيلة،، لو يم باب الحسين
-------------------------
يارضوى ما جالج خبر مانصب يـمـج مأتـمـه
ماخظر بگاعج دمع بـيـا گـاع صار امحـرمـه
بالعشرة يبچي بيا كتر وتحظر عزائه فاطمة ؟
يمكن اذا شاف ام حسن من البچي شوفه أنعمه

يارضوى وين ابن الحسن،، ناصب عزائه
خـلـيـنـه نبچي لغربته،، نـواسـي بكائـه
ضاگت علي يمكن الأرض،، حتى سمائه

عزائك بي معزين؟،، ناصب مأتمك وين
يم بـاب العقيلة ،، لو يم باب الحسين
--------------------------
مايطفه شوگ النه وبعد بمحرم ايزيد الشوگ
حارگنه فگدك سيدي يل گلبك شگد محروگ
حزنك ولا ساعه برد و امطوگك مثل الـطـوگ
بحالك يمولاي شيظل من تسمع بذاك السوگ

شيصير صبرك لو نعه،، الناعي يمولاي
لو صاح عماتك بقن،، ماعدهن افياي
وبسوگ فرجة اتوگفن،، للرايح وجاي

ودخلوهن دواوين،، ناصب مأتمك وين
يم بـاب العقيلة،، لو يم باب الحسـيـن
--------------------------
هـاي الليالـي امصيبتـك والـثـار يلچم گلـبـك
ايبچيك كل ناعي يون والحزن بيش ايطلبك
بالشام غـربـة دمعتـك وبـكـربـلـه اكثر تـعـبـك
من تمشي مابين الخيم چم جمرة تگطع دربك

چـم جمرة لچمتلك جدم،، بالـهـيـمـة مـولاي
من ركضت ام عون الظهر،، هم ظل الك راي
سالفّت حزنك  ما تفض،،  من تشرب الماي

حزنك داير اسنين ،، نصاب مأتمك وين
يم بـاب العقيلة ،، لـو يـم باب الـحسين
------------------------
هل من معين اعله البچي گايلها وانته تعينه
محد مثل حالك أبـد حـزنـه ابـقـاء اسنينه
يعگوب مو مثلك حِزن ولا نـوح حمرة عـيـنـه
كل منثكل جرحه نشف بس الي جرحه حسينه

الـف وتسعمـيـة جـرح ،، وبگلبـك أشكال
جرح العطش جرح الرمح،، لو جرح الرمال
جرح الحرگ جرح الهزل،، لو جرح الحبال

وأشكال العناوين،، ناصب مأتمك وين
يم بـاب العقيلة،، لو يم باب الحسين
------------------------
ليل ونهار ابمدمعك موطن دمعتك عاشور
هاي الليالي بلوعتك ويه أمك الزهرة تدور
تلطم لطم حرگة وجزع وبگلبك اخيام اتفور
من تشوف فاطم تنحني چيفن ظلعها مكسور

تدريها مكسورة الضلع،، وتدگ على الهام
وثار الضلع ما ينجلي،، رايدله صمصام
يا عـام ثارك ينقضي،، مـولاي يـا عـام

ونگلك ياضوه العين،، ناصب مأتمك وين
يم بـاب العقيلة،، لو يم باب الحسين
--------------------------
حسين علي التقي

مولاتي زينب تشتكي لـ أمير المؤمنين ع

أحظر ياعلي شوف شجّره بينه
يم المشرعة مذبوحه أهـاليـنـه
وخيل الشام بويه غارت اعلينه
حركوها الخيم وبهيمة طشينـه

ألحك ياعلي هدت العياله

حسين اعالترب بويه صفه خده
وعباس الشهم مـنـه اگطعو زنده
چم مصيبة هدت حيلي مو وحده
يالتگضي الشدد زينب تره بشـده

شدّة ياعلي طلعتي بالهيمة

يـابـويـه صـفـو بالـگـاع ولـيـانـي
راحـو للـذبـح واحـد وره الـثـانـي
وين انطي الوجه واحترگ صيواني
صـرت بـلا كـفـالـة ابـيـن عـدوانـي

وين انطي الوجه وانذبحو أخواني

طاحو زلم هاشم والنسه بهـيـمـة
والعـدوان ما خلـولـي أي خـيـمـة
وچم ايتيم عندي بويه و ايتيمـة
تره الطف ياعلي ما ينحمل ظيمه

عالجمر ركضونه حفاي الظهر

كلفة مصيبتي يا ابا الحسن كلفة
عگب اثمنطش حامي الف وسفة
علويـة وجـبـيـرة اركـض بلهـفـة
وتالي اعالـهـزل ياعلي منچتـفـة

وذبّـاح خواني سايگ ناگتي

بناتك ياعلي اعالهزل صعـدوها
والما طالعـة چـم ديـرة فـروها
بخرابة الدللتها تـالـي گعـدوهـا
وتدري بيا درب ياعلـي ودوهـا

للشام ودوها الماعدها أخو