▎主席 - 毛毛

首先多謝你哋默默支持咗工會一年。可以嘅話，想搞多啲見面嘅機會，認識下大家嘅長處，進而召集人手嚟搞多啲計劃，但限聚令令我哋有啲手足無措，搞實體meeting又驚武漢肺炎嘅關係無人嚟，會員大會點搞online都要睇條文做下功課，唯有圍內忙過返工咁做住能力所及嘅先。

遲下會公佈會員大會嘅安排，希望到時見到你哋，聽下你哋嘅意見，一齊摸住石頭過河，行落去。

▎副主席 - Edmond

是咁的，工會成立一年，對極權暴政我哋無能為力，對設計我哋有計劃，不過能力所及嘅好多嘢都未完成到。但我哋只係開始，工會以後會由香港嘅設計師傳承下去，帶領住大家向目標一步步前進。

多謝咁多位一直以來嘅堅持，和你哋開工會我很愉快，希望大家可以繼續堅持下去，建立大家心目中理想嘅

▎秘書 - 鬼

一年。要感謝呢班工會戰友，成班乜都唔識嘅工運新人行埋一齊向住未知前進；但更要感謝大家，支持同包容我哋呢班傻仔，完全無嫌棄我哋。自知經常力有不逮，啲嘢成日都跟得唔足，甚至乎都唔知我哋對於香港、對於設計界幫助到幾多。

最近大家可能都好無力，唔知有咩做到，但我好想講：一齊連結、一齊堅持落去，一齊喺唔同地方行多一步、試多少少，世界將會因為我哋每個微小嘅努力而改變。我哋只能如此相信，共勉之。

▎司庫 - 翼翼

感激一班同行一年前膽粗粗咁踏出第一步，一齊成立HKDIU。

設計唔係撳個掣。可能經歷好多Draft、好多Options、好多Versions先去到Final Output…...改變設計界亦然。或者依家為止只係撳咗幾個掣，改變咗嘅嘢只係好少，將來個development亦好漫長；但希望大家唔好氣餒，一齊為設計呢行把關落去，將佢成為見得人嘅成品……

而面對我哋嘅香港，亦都一樣。

▎理事 - 魚

"It is my personal belief that human beings are naturally meant to persevere. No matter what happens, as long as we simply make the decision not to give up; it simply does get better if you believe it will.

There are certain experiences that even thinking about, even the act of thinking about it, sets you back, maybe all the way back to all the work you've done just by thinking about it.

But that's not the point.

The point is, you need to focus on the fact that you overcame it. And if you're going through it, focus on the fact that you are choosing to overcome it. You're pushing through, and that's more than anyone can ask of you."

— Quote fr. <Juan "Hungrybox" Debiedma>

▎理事 - DB

一年，好似好漫長，又原來可以咁快過。

呢一年，香港人成長咗好多，我哋工會都同大家一樣，成長咗唔少。大家喺呢年做咗嘅嘢，都係戰戰兢兢咁：「做唔做好呢？」「做啦！」「怕唔怕嫁？」「做啦，唔理咁多喇！」我哋理事同幫手們都喺呢個情況下，咁同行咗一年。

經過咗一年，好難得有各位攬住一齊行，而明日會點，香港將來又會點，希望堅持到再堅持唔到果一刻為止。
多謝理事們，多謝所有支持HKDIU嘅每一位，多謝你哋！

//明日再續……

▎理事 - 三叔

好抱歉啱啱開工會本人就遇到小小麻煩事而未能出席任何大小事嘅活動，但暗啞底都有留意DIU嘅嘢，做得好好做得好靚，三叔感到老懷安慰。往後嘅事冇人知會係點，希望繼續加油，三叔繼續會小心翼翼地喺遠處守望大家，有咩事就大嗌三叔~啦！

▎成員 - 中東

唔覺唔覺就一年，由籌委會到而家都對住呢班人，仲多過對朋友。好開心識到一班理念相近嘅同行，一手一腳去開始一件未有人做過嘅事。呢段期間我哋有好多或偉大或有趣嘅目標，雖然唔係全部都完成到，但大家兼顧自己份工之餘都互相扶持，少少少少咁樣邁向理想。愚公移山、聚沙成塔，希望各位畀啲耐性HKDIU，或者加入我哋一齊努力，在此好感謝一直支持HKDIU嘅你哋。

▎成員 - BOT

好開心可以做小幫手，呢班人好古怪但係我喜歡。係參與嘅過程入面，作為一個學習設計或者做設計嘅人，好感激大家真誠嘅分享同埋教導，感受到設計呢條路唔係自己一個行嘅力量。其實堅持真係好困難，喺呢個社會，喺呢個環境，喺大家都有家庭工作嘅情況下，多謝大家仍然行落去，尋找設計喺社會上嘅定位同意義，堅持對公義嘅追求。

▎成員 - 雪糕

我相信工會能夠讓設計行業在香港得到更多的了解及尊重。短短一年時間，理事與義工都為行業略盡綿力，深信在不久的將來，大家都能看到我們努力的成果。

P.S. 原來大家都同工會英文簡稱一樣咁惡趣味，我鍾意呀。