انا الفترة دي محتاج #طرف_مضموووووون
مضمون بمعني الكلمة ، سواء كان قريب أو صديق أو حبيب ما بتفرق

{ المهم الايام ما تغيرو }
زول يكون #فااااهم_كويس دوره في العلاقة ، عارف واجباته ومكتفي بي حقوقه

زول كدا لما اعاين في عيونه اشوف فعليا نفسي فيها ، يكون حنين ، مريح ، وسند في #نفس_اللحظة

يهوُن علي الايام الصعبة العايشها حاليا ويبقي المُتنفَس الوحيد لي في الدنيا الكاتمه علي نفسي

رفاهيات الحياة كلها ما فارقه معاي
انا محتاج بس ارتاح واحس بالآمان
محتاج القي #يد_تطبطب علي لما ازعل وتشدني لما اقع

#محتاج_اطمن
#اطمن_وبس 🙇💔

#انور_ادم

انا امس لما كتبت اني محتاج طرف مضمون ، الليله عملت لي اعادة توجيه وقالت لي ممكن #فرصة_تانيه

معليش انتِ كنتِ وين في #الفرصة_الأولي ؟؟ كنتِ وين لما قدمت ليك من كل شي الأجمل والاحسن؟

وين لما بعافر #سنه_ونص عشان بس علاقتنا ترجع زي آول ، كنتِ وين لما كنت بتمني إنك ترضى

وين وانا بترجاك نتفاهم ونحل مشاكلنا عشان نكمل ،، وين وانا كل يوم بنوم مضايق ومقهور

بعد كل دا عايزني اديك #فرصة_تانية ؟؟ وكمان ارجع أثق فيك من تاني ؟؟

بسببكِ انا بقيت ادي كل زول في حياتي #فرصه_واحدة ،، عارف دا معناه شنو ؟؟ اكيد ما ح تكون عارف ولا ح تكون عارف احساسي انا زاتي كيف 💔

الشي المتآكد منه هو إنك بتطلبِ فرصة تانيه عشان ما لقيتِ زول يستثنيك ويعاملك معامله خاصة زيي ،، لأنك لفيت وشوفتِ واتأكدتِ اني ما بتعوض ، ف رجعتِ طمعانه في فرصة تانية لكن الحاجه دي ما ح تحصل تاني وما بسمح ليك إنكِ { تبوظي حياتي من جديد }


#خلص_الكلام 🙇🚶

#انور_ادم

اوقات كتير بتمر عليك بتكون محتاج تحس بحب الناس ليك ،، تحتاج زول من غير آي مناسبه يسمعك #كلمه_حلوة

نحن بطبعنا بنحب وبنميل للشخص البمدحنا والبلفت انتباهنا لي تفاصيل فينا .. #زي_مثلا ..

لبتسك حلوة ، انت عندك زوق عالي في تنسيق الالوان ، انت عندك ضحكة جذابة شديد ، انت صوتك حلو ، استايل شعرك عاجني جدا ، نظارتك رهيبه ، انت انسان راقي جدا ، انت افضل شخصيه لقيتها السنه دي ،

المهم يوريك انه #انت_مهم او عندك مكانه في القلب ويحسسك انك مميز بشكل او بأخر

كلنا بنحب التفاصيل دي وبكون عندنا #ميول_تلقائي للشخص الدايما بقول لينا كدا ،، ال بكلماته البسيطه بخلينا مبسوطين جدا من جوانا

انا ااسي بعمل كدا مع الناس البعرفهم رغم اني ما متواصل معاهم بشكل يومي بس ،، لما القي post في الفيس فيه حرف فلان او بتكلم عن فلان بنفس الاسم بعمل اسكرين وبرسلها ليو وشويه كلام حلو بلقي انبسط جداا وانا بحس اني فرحته ،، لما القي صورة تصميم حلوو باسم شخص باخد التصميم وارسله واقول لي انت مميز جدا ،، ومرات بكتب في حاله الواتس عن شخص بتعبير جميل اشوفه انبسط ،، ومرات من دون مقدمات اجي اشاغل شخص واتغزل فيه ويضحك ويفرح شديد ،، ومرات اغني لي شخص اغنيه هو بحبها او بالاصح يحب يسمعها ،، المهم بفرحهم بالحاجات البسيطة دي


كلنا لو بنعمل كدا مع الناس الحولينا وبنتبادل التفاصيل دي فعليا ح نكون مبسوطين كل يوم 💜💐

هي ريدة تعالو نعبر عنها ب التفاصيل الصغيرة

#انور_ادم

كل زول فينا #بدون_أستثناء عندو وجع مدفون جواه...!!

في العاش فترة صعبة
في العندو ذكرى موقفة حياته
في ال حب وما اتحب
في العنده احلام وما حققها

المهم اوجاع وحاجات كتير ممكن نمر بيها #توقف_حياتنا وتموت حاجه جوانا

لكن #الحياة_تجارب
التجارب يعني حرب
الحرب زي ما بتخسر فيها بتكسب حاجه قصادها ،، والحاجه البتموت جواك بتصحي 100حاجه تاني

#الوجع بعلمك القوة
#الخذلان بخليك ما تثق في اي زول
#الاستغلال بعلمك توقف اي زول في حدو

[ علي قدر ما بتتوجع علي قدر ما بتتعلم ]

#اديك_الزيت ..!
ماف زول قوى بدون ماضي قااسي ✌️

#انور_ادم

انا فعليا #قاعد_ادس كل حاجه عن اسرتي واهلي ، داايما بعيد من البيت وبهرب منهم ب آي حجه وبآي طريقة

زي اني بطلع كتيير وبتآخر كتير بره البيت آو اقعد في كافي ل اخر الليل ارجع القاهم كلهم نايمين ف بنوم ،، أو مرات بلجاء #للسوشيال_ميديا بقعد ساعات طويله عشان الوقت البقضي في البيت ببقي عبارة عن #انتقاد لكل حاجه بعملها سواء كبيرة أو صغيرة

زي مثلا .. دا شنو العاملو في شعرك دا ؟ ومالك لابس كدا ؟ دا شنو الحاجه البتحضرها دي ؟ خليك قاعد قدام الزفت دا ليل نهار لحدي ما تموت .. كيف بتتكلم في مواضيع وما تتكلم في مواضيع زي دي .. تاني ما تاكل برا البيت ،، ما تتكلم كتير بالتلفون ،، بتتكلم مع منو ،، هي لو محترمه ما بتتكلم معاك بالتلفون لحدي الزمن دا ،، خليك برا البيت طول النهار
البيت بقي فندق بالنسبه ليك
خليك كدا وما تسمع الكلام
انت تستاهل ، انتو جيل فااااشل
ما تلبس اللبس دا ، اقعد عديل
وطي صوت الاغاني
نووم ، اصحي كفايه نوم ، كفايه سهر
ما تمش مع فلان ، ما تقعد مع علان
مااف فاايدة فيك ،، انا قلت ليك البت دي ما بتنفعك..... الخ

لما اتعب من #كتره_الانتقاد والصد واقرر اقعد براي ،، يجو يسألوني بكل براءة انت ليه ما بتقعد معانا ؟؟ وليه دايما قاعد براك ؟؟

انتو بتعقدو دنيتي ومخلني ما عارف اعيشها زي الناس وفي الاخر تسألوني ليه ما بتحب تقعد معانا ؟؟

عارفين المشكلة وين ؟؟
المشكلة انكم لازم تملو حياة اولادكم بالمدح حتي لو علي حاجه انتو ما مقتنعين بيها

سمعونا الكلام ال نفسنا نسمعو منكم بدل ما نفتش علي زول برا يسمعنا ليو
ولما تكونو عارفين اننا عندنا موهبه او حاجه بنعملها اهتمو بيها ،، ما تدونا فرصه نفتش زول من برا يحسسنا بكداا
حسسونا انكم متقبلننا بآي حاجه مختلفه فينا وبآي حاجه مختلفه بنعملها حتي لو كانت بعيدة عن رغباتكم .. اقبلو اختلافنا عنكم

{ ياريت كمان تتقبلو فكرة آنه الابن لازم يمر بمرحلة التمرد في حياته }

اسمعونا...!
#اسمعوا_ممبرراتنا حتي لو من جواكم عارفين انها غلط ،، ادونا فرصه نعبر عن آرائنا واختارو الوقت المناسب البتورونا فيو غلطنا ،، ما تورونا غلطنا ونحن متعصبين ومجروحين ومقهورين ومظلومين


في النهاية..
راجعو كلامكم البتقولو لينا وانتو تعرفو ليه نحن بنهرب منكم ، اعرفو كمان ليه بنلجاء لغيركم ، واعرفو ليه القعدة معاكم بقت سخيفه بطريقه غبيه ولو ما السوشيال ميديا البنطلع فيها كل الكبت الجوانا كان 90% مننا #ادمر_نفسيا 🙇💔

#انور_ادم

انا الشي البعرفه انه #دور_الحبيب في أي علاقة إنه يكون سند في الاوقات الصعبه ، يقويك لما تضغف ، يبقي ونسيك في وحدتك

-بكون مكتفي بيك
-متقبلك في كل حالاتك
-بفهم سكوتك
-بكون رحيم شديد وقت الخلاف
-بتحكم في نفسه وقت المشاكل والزعل

بناء علي المعايير القلتها دي يبقي انت #حدد_بنفسك اذا كنت فعليا بتعيش علاقة سليمة وصحية ولا بضيع أجمل سنين من عمرك في #وجع_قلب علي الفااااضي ؟؟؟ 🙇


#انور_ادم

تعالو احكي ليكم عن #شويه_خيبات حصلت معاي ولحد الان انا بتحسر عليها وبقول ياريت...!

1/ مره في واحد عرض علي موتر ب 25الف الكلام دا كان عام 2018 مع انه عندي المبلغ بس اترددت وخفت اخاطر اشتري
بقيت اجي اشوف الموتر واتفرج عليو واجرب بس مع التردد ما اشتريتو لحدي ما جا صحبي اشتراهو واسي سعر الموتر قريب ال400الف

2/ كنت بدرس في اكاديميه سموحه العالمية في العربي (اكاديميه مختصه في البرمجه والسوفت والهارد) بعد ما خلصت ومسكت شهاداتي وقتها كنت صاحبت مهندس اسمه علاء الدين هو سوداني بس شغال معاهم ،، المهم علاء دا كنت بلقاهو طوالي وبينا تواصل اقترح علي انه عايز يعمل اكاديميه خااصه بيو ..وقال عايز شركااء
قلت ليو بدخل معاك واتفقنا ،، كلنا كنا 4 اشخاص ف انا اترددت وقعدت احسبها واحسبها وافكر واتكاسلت من الموضوع وهمشتو ااسي مشاء الله عمل الاكاديميه ومرخضه ومسجله وشغاله فل الفل

3/ عندي صديقتي اسمها هند آل جيد كنا اصحاب شديد قبل ما ندخل شركه jeunesse global هند طرحت علي فكرة المشروع وطوالي بتقول لي ي انور ادخل حياتك ح تتغير يا انور الليله عندنا zoom لازم تحضر ي انور الليله عندنا meeting مع فلان الفلاني وهكذا وكالعاده متردد وخايف اجازف واقعد اتحجج ليها بي ااي كلام ،، حاليا هند مشاء الله اشترت قطعه ارض وقبل شهرين اشترت عربيه جديدة

الرساله العايز اوصلها ليك أنه ،، #اكبر_غلطة ممكن تعملها في حق نفسك إنك تتردد وتقعد تفتش علي الكمال في اي حاجه انت عايزها ،، ح تندهش لما تلقي ال انت عايزو #اتخطف_منك وكل الحوليك أتقدمو وسبقوك بمراحل وانت قاعد متحسر علي حظك

هم ما احسن منك ولا عندهم امكانيات أفضل منك ولا حتي أشطر منك لكن عندهم الجراءة وروح المغامرة وانت نايم مستني الآمان

اكتر #مكان_آمن للسفينة هو وجودها في الميناء لكن السفن ما اتعملت عشان تكون بس قاعدة في الميناء ..

لما تفقد #متعه_المخاطرة
اتأكد تماما #انك_اتهزمت 🙇

#انور_ادم

قضيت #فترة_طويله شديد من طفولتي ما فاهم ولا قادر افهم نقطة انه كيف الناس الكبار بنومو عادي جدا أو بنومو بكل سهوله يوم الوقفه أو ليله العيد .. كيف بنومو من الاساس ؟

انا لما كنت صغير بجهز #ملابس_العيد الجديدة ، أفردها قدامي ، ما بعرف ولا بفكر في النوم من عظمة سعادتي بالعيد بقوم قبل ااي زول عشان استمتع بكل لحظة في العيد

بعد ما كبرت فهمت كيف بنومو الناس الكبار بكل سهوله بدون حماس وبدون شغف ، لكن لحد الان بتذكر كيف كنت وكيف عشت الاعياد ، بقت #مجرد_زكريات بتمر علي خاطري وابتسم ، بشوف الاطفال مبسوطين بفرح ليهم جدا

بس بيني وبين نفسي بقول
كبرت وما كبر معاي العيد 🥺💔

#انور_ادم

انا عندي وجهت نظر إنه الاضواء بتحرق أي حاجة حلوة ، الموضوع بالنسبة لي ما قصة حسد أو غيرة بقدر ما في #قادسية_فريدة للكتمان

الخصوصية ال بتم انتهاكها لمجرد انك بطلع كل حاجة حلوة للعامة ، دي كفيلة أنها تجرد كل شي من جوهره

بتتحول لمادة #مباحة_للكل سواء رضيت أو ما رضيت ،، تكون عرضة لآي نقد أو راي ملوث أو نفس مريضة

{أستعين بقضاء حوائجك بالكتمان}
الهدف من العبارة دي ما عشان تتجنب العين والحسد لا ,, #الموضوع_أعمق من كدا

#أستعين_بالكتمان عشان ما تتصاب بخيبات الأمل في العلن ،، عشان ما تتخذل قدام الناس في العلن لانه الحاجه دي الألم بتاعها بكون مضاعف وعميق شديد ما ح تقدر تتعافي منه بسهوله

في النهاية الانترنت و السوشيال ميديا عموما بيدفعك أو بلذك للاضواء عشان تظهر نفسك وخصوصيتك للعامه ،، زي بتفكر في شنو ،، بتعمل شنو ،، اصاحبك منو ، شارك تفاصيل يومك مع الاصدقاء ،، بتحب شنو ،، بتحب الناس الحوليك قدر شنو ،، شكلك وانت صاحي من النوم ،، وانت ماش تنوم ..... كلها تفاصيل بتعملها او بتشاركها في السوشال ميديا وتدريجيا انت بتطلع للاضواء وبتتخيل انك فعليا بتضيف جزء من الواقعية لحياتك بس في الحقيقة انت بتخسر جزء من قيمتها ومضمونها وانت كدا

{ بضحي بغموضك وتفردك }

#كن_بخير 🙇💜

#انور_ادم

هل في طريقة للنجاح بتمكن الزول من #النجاح_المستمر من غير ما يحتاج شخص يساعده علي عمل هذا الشئ؟ وهل في طريقة تتخطي بيها المشاكل والتحديات من غير ما تطلب المساعدة من الناس..؟

الاجابة ايوا نعم..
في مبدأ بسيط يخليك تستغنى عن طلب المساعدة من شخص لما تقع في مشكلة وبخلي عقلك تلقائيا يجرب
#أفكار_النجاح
#افكار_الحلول ويخليك دايما تعتمد علي نفسك

المبدأ هو إنك تعيش وتجتهد وتعمل بشكل طبيعي جدا لكن ضيف حاجه جديدة وهي إنك تخت في عين الاعتبار #مافي_شخص
#مافي_جهه
#مافي_صديق بساعدك يوم تقع في مشكلة...بمعنى العمليه فكرية تماما

#درب_عقلك علي أنه لما تحصل معاك مشكله، تحدي، فشل مثلا في حاجه معينه قول من جواك (انا الشخص الوحيد البنقذ نفسي)

في كل مرة بتواجهه تحدي ومشكلة
عقلك ببدا يتخذ خطوات وقرارات بسيطة شديد يتعامل فيها مع المشكلة وفي كل مرة بتحس نفسك بتتعامل مع خطوات أعمق مع التعامل مع المشاكل ودا البقربك من #الهدف_الأكبر أنك تكون شخص مستقل وبتعمل بنفسك ولي نفسك

ممكن واحد يسألني ويقول الكلام دا ما منطقي وليه ما اخد مساعدة من الناس؟
صح نحن بشر وبنحتاج المساعدة واذا لقيت مساعدة خير وبركة لكن السؤال هل في كل مرة تقع في مشكلة ح تلقي شخص يساعدك؟ او شخص يقدم ليك يد العوون وانا بتكلم من باب ريادة الاعمال والاعمال التجارية

كل العايز اشرحو ليك انه دا مبدأ عاش عليه انجح #رواد_الاعمال في العالم زي ايلون ماسك، جيف بيزوس، جاك ما وغيرهم كتير وانا ما بتكلم عن أول الخطوات ، في البدايه اكيد بتحتاج المساعدة عشان تتعلم وتكسب خبرة لكن علي المدى الطويل درب عقلك أنك انت الشخص ال دايما بتحمل المسؤولية واعتمد علي عقلك ال انت قاعد تستثمر فيه انت بتشتغل في وظيفة وتقابل ناس وتتبادل معاهم المعرفه والأفكار عشان تكتسب الخبرة والثقة والارادة

ففي النهاية عشان توصل لمرحله انك بتكون شخص مسؤول فيها عن كل شي
خت المبدأ ال اتكلمت عنه في عقلك واتخذ خطوات بسيطة للتعامل مع التحديات والمشاكل وبتوصل ان شاء الله لمرحله تكون فيها عندك ثقة عاليه وخبرة عميقة تمكنك من تخطى التحديات في وقت سريع ومخصتر و الله يوفقك واشوفك علي خير 🌷

#انور_ادم

انا ما ح اطالبك #بتضحيات_عظيمة ، ح اطالبك بحاجات بسيطة قد تبدو ليك تافهة في نظرك....!

انا بتمنى اني ما #انطفئ_جواك
اشوف الشغف في عيونك كل ما اتلاقينا
تكونِ معاي في وقت انا زاتي ما قادر اقعد فيه #مع_نفسي

#بحب_شعور اني مؤثر في حياتك
#بحب_مشاركتك في تفاصيلي فما تحسسني اني ممل وتفاصيلي ما بتثير أهتمامك

انا ما ح اعاتبك #علي_انشغالك لكن ما تهملني ، اتذكرني ولو صدفه في يومك دا بخليني اطير من الفرح

#اتحمل_مزاجياتي ومسحي للدردشة ب استمرار لأنها مهما طالت ما ح تأثر علي مكانتك في قلبي

الشي البأثر بالجد هو #لومك_الشديد علي اني أعاني من المزاجية

انت #ما_مضطر ترسل لي كل يوم
يكفي ان أحس فعليا أني لسه الاجمل والافضل في حياتك ، يكفى ان نكون مع بعض ونتبادل الصمت او الاغاني او حتي #المناقشات_التافهة

اي نعم لما اغضب بهدم #كل_شي لكن صدقني لما أهدأ بدخل في #حالة_حزن ما بقدر استحملها لاني هدمت كل شي ف انا بترجاك ما تعاتبني ع غضبي دا بألمني اكتر ، حاول انك تعاتبني ب #اسلوب_حلو

زكرني ببداياتنا الظابطة وحاول معاي انه كل يوم يكون بداية جديدة لعلاقتنا

#دمت_لي 💜

#انور_ادم

كلمة "عشانك" دي من الكلمات الفيها كمية طبطبة وحنيه ما طبيعية والله

تخيل لما زول يقول ليك " انا جاي عشانك" "ح اسامح فلان دا عشانك " "انا جبت الحاجه دي عشانك"

فكرة انه الشخص البحبنا #يبين_لينا مشاعره قدامنا ف دي عندنا بالدنيا وما فيها

نحن ك بشر بنميل وبنحب البقدرنا ويحسسنا بحبه و بقيمتنا سواء بكلمة أو بنظرة أو ب #أهتمام_بسيط

والله نحن #أبسط_ناس ممكن تتعاملو معاها وأسهل ناس تقدرو تراضوها

القصة كلها #شوية_إحساس وذكاء منكم وقتها تقدرو تكسبو قلوبنا بمنتهى السهولة 🙇‍♂💜

#انور_ادم

بتزكر مره صحبي قال لي "خلى كل زول علي راحتو" قالها لي بعد ما حكيت ليو اني زعلان و مضايق من #ناس_معينة

#جملة_بسيطة جدا بس في الحقيقة هي حلت مشكلتي ومشكلة الناس الزيي
الناس البتزعل شديد وبتاخد كل حاجه حاجة علي اعصابهم

بالجد كدا تعالو #نخلى_الناس علي راحتها يعنى نخلى المهتم مهتم من غير ما نطلب منه إنه يهتم ،، ونخلى الناسي ناسي والمتذكر متذكر نحن في بالو نخلي العايز يبقي موجود موجود والزعلان يفضل زعلان عادي ونعيش نحن زاتنا علي راحتنا

انا كمان بديت #اعمل_بنصيحة عمر بن الخطاب لما قال" "عاملو الناس بما يظهرونه لكم والله يتولي ما في صدورهم" مجرد ما قريتها انا بطلت أحلل وأدقق في كلام الناس وبقيت ما مهتم بالجواهم...مهتم بس بالظاهر منهم وبشوفه بعيني وبس ،، حرفيا من وقتها وأنا #مرتاح_جدا 🙇‍♂👌

#انور_ادم

الظروف الحولينا يا صحبي { نوعين }
ظروف ما بنقدر نتحكم فيها وخارجه عن سيطرتنا زي ما انت اسي { نازح } ودا شي ما بتقدر تغيره مع #كامل_الأسف وعندك كمان ً الفقر ، الأمراض المزمنة ، الشلل ً او اي نوع من انواع الظروف الانسان ما يقدر يتحكم فيها

النوع التاني من الظروف
هي ظروف الانسان يقدر يسيطر ويتحكم فيها من ضمنها { التعليم ، تطوير الذات، القوة البدنيه ، تعلم الحرف......الخ}

اذا فعليا عايز تصنع فرصتك في الحياة رغم الظروف ، لازم تركز علي الظروف البتقدر تتحكم فيها ومنها تقدر تصنع الفارق في حياتك

اديك مثال :-
تخيل انت انسان ما بتعرف #لغة_انجليزية وقررت انك تتعلمها والتعليم من ضمن الظروف البتقدر تتحكم فيها وما تنسي نحن في القرن ال21 من تلفونك تفتح ال YouTube تتعلم اللغة من A to Z و { مجااااااااان }
وبعد ما تتعلم اللغة الانجليزية واتقنتها بشكل ممتاز وقررت انك تستفيد من الخطوة المبادرة دي وتشرح اللغه الانجليزيه في الاسنتغرام او اليوتوب او التيكتوك ومن تلفونك تقدر تعمل الكلام دا كله

ولنفترض إنك تعبت جدا في #صناعه_المحتوى وكونت قاعدة جماهيريه قويه شديد بعد ما تصل المرحلة دي ح تبدا تدخل الالف الدولارات في الشهر

وانا واثق جدا جدا انك ح تغير حياتك عارف ليه؟ لانك ما قعدت وسكت ورضيت بالظروف ال انت عايش فيها ولانك مهتم تغيير من نفسك وجيت سالتني كيف تصنع فرصتك

#كن_مبادر

والمبادرة تعنى ان تبدأ وتسرع بفعل الصواب قبل ان تجبرك الظروف علي فعلها

يعني مثلا تشوف الظروف التقدر تتحكم فيها والظروف الما بتقدر تتحكم فيها وتشوف الخيار الافضل والشي المؤثر الممكن تسوى وبسرعه
اتأكد انك في يوم من الايام ممكن تجبرك الظروف تسوى الحاجه دي لكن بعد فوات الأوان ويكون تأثيره ضعيف شديد في الوقت دااك

فما تنتظر لحدي ما تموت من الجوع عشان تفتش أكل ، ما تنتظر لحدي ما الظروف تنهار عليك عشان تبدأ تتحرك وتحاول تنجو و تمرق نفسك

اذا اتحركت قبل ما تجبرك الظروف ح تصنع الفارق في حياتك ويكون تحركك تقدم و تتطور في حياتك اما لو اتحركت بعد ما تجبرك الظروف بكون تحركك محاوله منك للنجاه .... ودا الفرق بين انك #تبدأ_الان او #تبدأ_متأخر

( #انتبه #انتبه عشرة مرات)
انتبه تنتظر الظروف تكون مثالية وخت في بالك انه الظروف ما ح تكون مثالية #اااااابداااااا

من اللحظه ابدأ بتغيير حياتك وبتغيير الظروف ال انت بتقدر تتحكم فيها و اول الظروف واهمها { عقلك 🧠} اذا غيرته وعلمته و طورته واستثمرت فيه ح تتفتح ليك #فرص_كتيييرة شديد زي مثال #اللغه_الانجليزيه الاتعلمتها من اليوتيوب فتحت ليك أفاااق كبيرة و اي معلومه غير اللغة الانجليزيه ح تفتح ليك أفااااااق أفاااااق و توفر ليك خيارات اكتر و اكتر

ميزة القراءة ما بس علم
علي سبيل المثال انا قريت كتاب الاب الغنى الاب الفقير وعلمني طرق الوصول للثراء والمعلومات كانت خرافيه جدا ورغم كدا ما ح اكتفي بقراءة الكتاب ح اقرا كتب تانيه تعلمني كيف اوصل للثراء ....ما بحث عن معلومة

لأن الكتب زي ما بتديك معلومات بتوسع مدارك تخليك تشوف اشياء و فرص انت ما شايفها فعلا { أقراء وربك الاكرم }
انت بس اقرا وربنا بكرمك 💜

#انور_ادم

العالم مليان ب الأمراض المعديه زي وباء كرونا المطلع عينا

بس اتخيل معاي ممكن تكون #حالة_نفسيه تكون معديه

يعني ممكن تكون عايش في بيئة او مجتمع كله عصبيه و توتر و مع شويه الوقت البتقضي معاهم او وسطهم بتبقي بتتعصب و تتوتر من حاجات ما كنت بتتعصب منها قبل كدا ،،، وبالعكس لو ما اتعصبت تلقاهم يقولو ليك انت زول بارد ياااخ ،،، انت ما بتتعصب معانا ليه؟

ممكن تكون #زول_طبيعي وعلي طبيعتك وبتحب المغامرة والتجارب لكن انت قاعد وسط مجموعه من الناس خايفه من المغامره والتجارب و مع الوقت تبدأ تتغير تبقي أليف و #بتخاف_زيهم

يااخ حتي الاحباط والطاقة السلبية بتكون معديه

في مره من المرات تلقي نفسك متحمس عايز تعمل حاجه معينه وتقابل واحد يقول ليك يااخ الحاجه دي ما ح تظبط معاك ، ما ح تنجح، يااخ انت بتضيع وقت سااي في الفاضي ودا بأثر عليك جدا جدا ف #خلي_بالك

البيئة دي ممكن تكون الاشخاص الفي حياتك ، اصحابك ، اهلك ، زمايلك في الشغل

بيئتك لو بتشجع علي التطور و الإنجاز بشكل عام دا بساعدك انك تطلع من #مود_الاحباط ال انت فيه لانك بتكون عايز تنجز زيهم

والعكس صحيح

ممكن كلامي دا يلفت انتباهك ويخليك تقعد #مع_نفسك وتفكر وتسأل نفسك

البيئة ال انا فيها هل هي سبب مرجعني ورا؟؟ ولا بتساعدني الانجاز؟؟


#انور_ادم

لما تكون ما واثق في نفسك
أو ثقتك بنفسك بسيطة

بتحاول دايما تقلل من أي مخاطرة تجاه الحاجه ال عايز تعملها و { #دي_مشكلة }

لإنه الخطوة ال فيها مخاطرة ،، دي هي الخطوة البتبني ثقتك في نفسك

ف انت محتاج بس انك تعرف #كمية_المخاطرة ال ما عندك استعداد تستحملها والكمية ال انت محتاج تاخدها #عشان_تطور

ممكن تاخد خطوات بسيطة و برضو تبني ثقتك بنفسك "بس ح تحتاج مجموعه خطوات كتيرة"

لما انت بأرادتك بتخاطر حتي لو مخاطرة بسيطة وانت عارف انك بتعمل كدا "ما لازم النتيجه تكون خرافيه عشان ثقتك في نفسك تزيد

لأنه مخك ح يبقي" مبسوط" إنك اصلا اخدت الخطوة دي

ف اختار مجموعة من #الخطوات_البسيطة ال ما ح يبقي فيها #مشكلة_كبيره لو فشلت فيها "لإنك ممكن تفشل و برضو تبني ثقتك في نفسك

"just do it"

#انور_ادم