‎የሀዋሳ ከተማ ስፖርት ክለብ ያጋጠመውን የውጤት ማጣትን አስመልክቶ የክለቡ የበላይ ጠባቂ አቶ መኩሪያ ማርሻዬ በተገኙበት ዛሬ ውይይት አድርጓል
‎
‎በዚህም የሀዋሳ ከተማ የፊት አመራርና የስፖርት ክለቡ ጠባቂ በጋራ በመሆን ለክለቡ ውጤታማነት መክረዋል።
‎
‎የስፖርት ክለቡ በቀጣይ ያለውን ውጤት አስጠብቆ መቀጠል በሚያሰረችለው ጉዳይ ላይ በመምከርም ነው ውይይት የተደረገው። ውሳኔዎችን በቀጣይ የምናሳውቃችሁ ይሆናል።

የሀዋሳ ዩኒቨርስቲ ስታዲየም ለቀጣዩ የፕሪምየር ሊግ ጨዋታዎች ማሻሻያ ተደርጎበታል

ቀጣዩን የሁለተኛውን ዙር የኢትዮጵያ ፕሪምየር ሊግ ለማስተናገድ ሽር ጉድ ላይ የምትገኘው ሀዋሳ ከተማ ውድድር የሚደረግበትን የሀዋሳ ዩኒቨርስቲ ስታዲየም ቀድሞው የነበረውን የመጫወቻ ሳሩን ሙሉ በሙሉ በመለወጥ በአዲስ አፈር እና በአዲስ ሳር ሙሉ በሙሉ ለውጥ ተደርጎበታል። በኢትዮጵያ ፕሪምየር ሊግ ላይ ከጅምሩ 1990 አንስቶ በመወዳደር ከኢትዮጵያ ቡና ጋር ታሪክን የተጋራው አንጋፋው ክለባችን የሁለተኛውን ዙር ጨዋታ በሜዳው እና በደጋፊው ፊት እንዲያደርግ የከተማ አስተዳደሩም ሆነ የክለባችን የደጋፊ ማህበር ከፍተኛ ስራን ሲሰራ የቆየ ሲሆን እየተሰሩ ካሉ ስራዎች መካከል አንዱ ደግሞ ዋነኛ የውድድር ቦታ የሆነውን የዩኒቨርስቲውን ሜዳ የመጫወቻ ሳር ሙሉ በሙሉ በመቀየር ማሻሻያ ማድረግ አንዱ ስራ በመሆኑ በስኬት ይህንን ተግባር አጠናቆ ለሊጉ ውድድር አዘጋጅቷል። ከሳሩ በተጨማሪ በስታዲየሙ ዙሪያ በመልበሻ ክፍል ያሉ ተጨማሪ ተግባራት እየተከወኑ ሲሆን የልምምድ ሜዳዎችን በበቂ ሁኔታ ምቹ የማድረግ ስራም መሰራት ተጀምሯል።

ካለፈው የ17ኛ ሳምንት የቅዱስ ጊዮርጊስ ጨዋታ ጀምሮ ክለባችንን ወደ ውጤት ጎዳና እንዲመጣ ከደጋፊ ማህበሩ አንስቶ እስከ ከተማው ባለሀብት እና ነጋዴው ድረስ ከፍተኛ ንቅናቄዎች በመፍጠር የክለቡ ታሪክ እንዳይበላሽ ከፍተኛ ጥረት እየተደረገ ሲሆን በቀጣዩ ሐሙስ ከመቻል ጋር አንጋፋው ክለባችን ለሚያከናውነው ጨዋታም ደጋፊው ወደ አዳማ ለመጓዝ እንዲዘጋጅ ተገልጿል። ከአሰልጣኝ ዘርአይ ሙሉ ጋር የተለያየው እና በጊዜያዊ አሰልጣኝ እየተመራ ያለው ቡድናቸው ከቀድሞው ተሰናባች አሰልጣኝ ጋር የነበረውን ውል በስምምነት ለማፍረስ በጥረት ላይ ሲሆን በቀናት ውስጥም አዲስ አሰልጣኝ ለመቅጠር እየሰራ መሆኑንም ተመላክቷል።