#البارت الرابع والعشرون

#رواية...انا هي جميع نساؤك

#بقلمي...سمو العراق

_______

أغار عليك من كل كلمة تقولها إذا لم أكون أنا حروفها وكل أبجدياتها أغار عليك من أصابع الناس إذا إلتقت بأصابعك في سلام عابر أغار عليك من فكرة تخطر ببالك من حلم لا أكون أنا فيه .

#اغار ..واريد ان اكون جميع نساؤك

..........................

جان طول الطريق الوضع هادئ...

واني ممتعلمه علئ هيج لبس اول مره بحياتي اطلع هيج

حسيت روحي عريانه...

جنت انزل التنوره علئ ركبي بس هي طايره

دهر صاب روجين وبشيره بعافيتهن عبن لابسات هيج وما يستحن مسيطرات...

وصلنه للجزيرة

زوج هاله طبك سيارته بالكراج...

وهاله نزلت شايله ابنها وبنتها لازمتها بيدها

هم جانت لابسه تنوره لحد نص الساق ولابسه قميص وشعرها كصير مفتوح....

ورجلها نزل ومشينه

جنت اعدل بحجابي تندمت لان ما لفيت حجابي عدل وحطيت دنبوس...

وما لفيت شعري كل شويه وانفتح وفضحني...

شعري اشگر وطوويل وسرح وشسورته صار زبد كل شويه وانفتح....

همه خلوو اغراضهم بالحديقه جانت الجزيره حييل جبيره وحدايق هوواي بيها...

بيها بيبان هووايه اماكن مااندلها اليدخل وما يعرف يضيع بيها...

رجل هاله ضل كاعد يحضر بالسفره والمشاوي وجمر يريد يشوي تكه....

انه رحت انه وهاله للالعاب جنت متفاجئه وفرحااااااانه

عمري وحياتي مشايفه هيج شئ

جانت امي تسويلنه مرجوحه اني وغرومه بين الاشجار

ونتعارك عليها

ومره غرومه كتلتني وشمرتني منها...

ضليت ابجي وتزلغت رجليه...

وامي طاحت بيها وكطعتها وشحتتنه ومن ذيج الساعه ماكوو مرجوحه

غرومه حملتني السبب وانه حملتها السبب وما نعرف منهي الغلطانه بينه

بس الاعرفه اني لزكه.... ولزكت بالمرجوحه

وغرومه ما قصرت شمرتني منها وجسرت رجليه...

الله يرحمج حبيبتي محتاجه ريحة عطرج يخيتي واشكيلج ضيم الحال...

انتبهت علئ صوت هاله كالت ....تعالي نركب هاي اللعبه حلووه

باوعت اللعبه تخووف وتصعد وتنزل وتفتر

كلتلها بخووف...ياله وروح ابووي اضلن ارجف عبن اخاف من الشئ العالي...

هي ضحكت وركبتني شدوو النه حزام الامان وانه ارجف وكلبي يدك سررررريع...

ومهبوطه موش اذا اجه نذري يفرني يفرني ويشمرني بالشط

اي صدك الجزيره بيها شط حلووو

كون هييج يجي نذري ويشوفني وانه اغطن رجليه بالماي

والحجل يدندن برجلي

يمممماي يموووت يمووت يطك من الغيره

مثل ما انه طاكه...

تذكرته اخر مره من تغزل بحجلي وصفه مثل فاكهة الجنه المشتوله بالفردووس...

من سألت عن قصده ماجاوبني....

بعدها ما مشتغله اللعبه واسمع صوت البنات يصرخن من ترتفع باقي الألعاب

هزيت ايدي كلت...خايبه كبر حتئ كبر

شنهي العالم زاحت المستحه شمالهن يصرخن معقوله هيج تخوف بس حتى لو تخوف موش هيييج يصرخن عبن عيب

هي شتغلت اللعبة الانه بيها وانه لزمت حيييل احسن روحي طارت...

من ارتفعت وافترت وانه حسيت ملك الموت

واكف علئ راسي...

ضليت اصررخ بصوت عالي وابجي واللعبه تفتر وتصعد وتنزل...

وانه اصيييح....ولج يممممممممه ولك منذر

يمااااي رگبتي طكت...من افترت احس رگبتي انخلعت

ضليت اغلط عليهم وانه اكول ....نعله على والديكم نزلوني...خايبين نزلوني

شبعت بجي وصريخ والكل تضحك اله انه متت من البجي

صارت موش دقايق لا سنين...

وكفت اللعبه وانه اشهك وابجي وهاله تضحك ولا الها شغل

نزلنه من اللعبه وان اتطوطح مثل السكران والكعب ما مسيطره عليه

انثنت رجلي اجيت اطيح بس هاله لزمتني...

ضلت تضحك عليه وانه دايخه ونفسي تلعي اريدن اتقيئ

اخذتني كعدتني علئ المصطبات...وراحت لجهالها كالت ..ديري بالج دكومين

هزيت راسي بأي...

بعدين رجعت كالت تعالي نكعد علئ الشط

رحت وياها والكعب موتني ابدي اشمره وعيون الشباب تنطنط عليه

كرهت روحي انه شسويت بنفسي

غمضت عيوني حييل عبن مااريد اشوف اي واحد

كعدوو يمي ثنين ولد واحد يكول للثاني

باع الدكاك مال رجلها يخبل نجمه وهلال

ذاك كله...لك باوع الحجل انطي راس ابووي اذا قلدتلي

انه خفت ضليت ارجف خفت اكووم واضيع واذا ضليت كاعده

ذوله فريد الاطرش وعبد الحليم حافظ يتحرشون بيه

ضليت انزل بتنوره واعدل بالحجاب...واطكطك من الخوف

................................

نيران جان دنيا العصر

بس اني وامي كاعدين وحنان بغرفتها...

ضاجت لان منارس طلعت وهي مطلعت

عادي يكول سفينة الشرايج مشت وسفينة النسوان حمه غركت....

اثنينهن مو منطقيات ويجفصن بالمصارين...

بس علئ الارجح منارس احسن

حنان من النوع الي متخجل وتخبث على منارس وذيج خبله تطكها طك بطك....

دخل المنذر جانت عيونه تدور علئ منارس

هو يعرف بيها زعلانه متدخل للغرفه

كال بهدوء...نيران صيحي منارس عكب باجر عندها امتحان انكليزي وبس اني اعرف اقريها

ضحكت جاوبته...لعد مو كلتلها روحي ويه هاله للجزيرة شنو نسيت...

هو عقد حواجبه وعفس ملامحه كال بتهجم...شنوو شنوو؟

جاوبته بااستغراب...هي كالت لهاله وراحت وياها

كالت...المنذر كلي روحي واجي وراج

هو مسح وجه بعصبيه

ماما كالت...شنوو جذابه منيرس؟

هو تدارك الامر ورفع حاجب ...لا صح اي اني كلتلها هسه رايح اجيبها

طلع بعصبية وغضب ضاهر على ملامحه

اني تأكدت جذابه ...هو مكال الها روحي

روحي منارس اكليها...يوميه كتله حتئ بعدج مطايبه من كتلت ذاك الأسبوع....

بعدها رحت بدلت ماما كالت خلي نروح للسوك نشتري شغلات العرسج

من ذاك اليوم لهل يوم عمر ماكوو لا اجه ولا خابر

والزواج مضل اله شئ

وانه مهدده فاروق كال العرس يخرب اذا منارس مااجت لوثاب...

بس اني حاگرته يطبه مرض خلي يخرب العرس

.....................

بعد ما راحت هاله

رجعت هي وزوجها زوجها شايل ابنه وبنته بيده

كالت هاله...تعالي نركب سفينه

كلتلها...اي خوش نركب عبن جان عدنه مشحوف وجنت اعرف اجدف بي

ضحكت وردت عليه...لج عوبه هاي سفينه علئ الكهرباء تطير بالجوء مو بالمي

انه فشلت وخليت ورحت وياها صعدنه وجانوا نفس الولد كاعدين

كعدت وهمه كعدوو وراي...

جان يكله...اجت الحمامه

اني بلعت ريكي من الخوف ردت انزل ما قبلت هاله

حسيت واحد منهم حط ايده علئ شعري

اني تحنطت

لزمت ايد هاله كلتلها ببكاء ...هاله واحد منهم يلعب بشعري

هي دارت وجهها شافته يلتمس شعري بحنان

ويكوول...اففف شعر حرير ...

ذاك الثاني يكله...لا جنه ريش مال كناري

ويه مدرت وجهي وهاله عاطت بوجههم

واشوف المنذر يحجي ويه رجل هاله

ورجل هاله اشر علينه...

بس رفع عينه واجت بعيني وهذا يمسح علئ شعري وهاله تعارك بي...

هو شفته عيونه صارت بكصته

مشئ بسرعه بزيه العسكري ومسدسه بحزامه

جان اله رهبه والعالم من يمشي تتنحئ للجانب الثاني

ابو السفينه شغل السفينه...

وهو لزمه من ياخة قميصه كله بحده...وكفهااااا

خطيه صاحب السفينه بدون اي كلام وكفها

وهو صعد جانت عيونه تجدح....

من شافوو الولد اصطكووو

هو جان جثل وضخم وطووويل

مو مثلهم ومثلي مجعوصييين...

وكف كدامهم وجه انضاره لواحد منهم گله بعصبية...گووووم لك

الولد وكف برجفه اول ماوكف المنذر جااابه براشدي زلغ وجهه زلغ

خطيه تكوم بحضن صديقه

وهو هجم عليهم بقمة غضبه دفرات وراشديات ونزلهم من السفينه راشديات ...

العالم جانت تتفرج محد مد ايده

وانه ضليت اطكطك وحاضنه هاله وابجي

وهي تهدي بيه دكول ...شوفي كتلهم الخاطرج

يممه من شفته صعد اليه مثل الاسد يمااااي موش رجال عاصفه غاضبه وتطير الاخضر واليابس...

جان وجه ما يتفسر بالخيير

لزمني من ايدي ونزلني بسرررعه

انه جنت اركض وراه وهو ما مهتم للعالم

اسمع العالم دكول الضابط عجبته هاي البنيه واخذها

وانه ابجي كسرت خاطرهم

الحجاب طاار

والكعب واحد منهم لزك بالكاع لان هو ابو البسمار

لزمته من ايده وانه اعرج واتوسل بي...نذري بروح ابوك كعبي طاح من رجلي خلي اروحن اجيبنه

هو يسحل بيه مثل البهيمه وممهتم الكلامي....

وصلنه للسياره فتح باب السياره وشمرني بيها...

رد بتهجم...وانتي شعليج بيهن كل لشه تتعلگ من كراعها

انتي تتقدمين لو ترجعين ليوره

مسحت دموعي ...جاااا اخواتك موش يلبسن كصير

عض اصبعه حييل ....لج لا تقارنين انتي غير عن الكل

انتي بريئه واجيتي هيج

مطلبت منج تغيرين ولا تتشلتحين

اني مو اشتريلج ملابس اشتري الي يناسبج الي يلوگ ويه اخلاقج...

مو ترحين تلبسين هيج

وبعدين انتي مو كلتي مااسوي غلط مااريد اغضب ربي

وين كلامج...

رديت عليه بحيره واريد اخلق عذر...موش كله من وره بشرئ

هو رد بجمود...لا تذبين الصوج بغيرج بشرئ ما ضربتج علئ ايدج وكلتلج روحي البسي كصير

انتي تتحملين الذنب وحدج

مسحت دموعي بطفوله...خووش هسه اصلي واستغفر والله يقبل التوبة عبن غفور رحيم

موش مثل باقي الوادم ايدهم والكفخه...

باوع عليه بااستهزاء وانه ضليت مركزه عليه

بس للاسف كدر يكسر نظرتي...مااكدر احط عيوني بعيونه اخجل حيل واحس روحي وكحه وصلفه اذا ركزت بعيونه

تنهد وهز راسئ باسئ كال...منارس اني كل مره احاول اضبط اعصابي

وانتي تتعمدين تثيرين غضبي وكأن دكولين اضربني

لج بابا اتقي شري وعدلي اسلوبج وكتلج تردين تحجين صدري مفتوحلج

ذبي كل همومج بي

بس مو تتصرفين برعونه ومزعطه

يعني حلوه بحقي مرتي مشلتحه و واحد تافه يلعب بشعرها...

رديت بقهر بعد ما عقدت حواجبي...جاا موش رويجه شعرها طالع وتنورتها اكصر من تنورتي

وانت اتذكر دكلها خالقج من عسل...

هو حط ايده علئ راسه وكال...لا اله الا الله

ربي اذا انجلطت فهاي المخلوقه هي السبب...اشر عليه...

جاوبته بحزن...جااا انه شعليه

تحسر على حاله كال بحزن...منارس والله طكت روحي علئ ساعه احط طلقه براسي واخلص روحي منج...

شبيج بابا تخبلتي ...

من تزوج مؤيد لحد الان وانتي ابببد ابببد مو منطقيه

رديت عليه بخوف وخايفه من ردة فعله ...احجي وما تضربني

كال...احجي مااضربج

منارس...احلف

المنذر بقلة صبر...والله مااضربج

منارس بقلة حيله....موش انه حسيت حنينه وبشيره قصدهن موش شريف عبن يتلزكن بيك...

وذاك اليوم حنينه السحليه دكل لعمتي مدام سقطت منارس اول طفل الها بعد ما تخلف

هو عقد حواجبه بااستغراب...شنوو بكيفها

جاوبته بعناد...ياله موش بكيفها بكيف ربي

بس هي دكل لعمتي خطيه المنذر كبر خلي يتزوج عليها...

هو وكف مفزوع كال...هذا الحجي صحيح

منارس بثقه...اي وروح ابووي وروح اختي غرومه حتئ أسأل امك

كال بعصبيه...وليش ما كلتيلي

رديت بقهر...وين انت تطي ببشيره وحنينه ؟

عبالك هنه نسوانك موش انه

تافئف بضيق المنذر....يا سالفة بشيره وحنينه الما تخلص...

ولج بابا شلووون بيج دكلج ماعندي شئ وياهن

كعدت علئ الجربايه باسئ...انه هذا حظي مكطن معفن عبن شنهي اشوف الناس مرتاحه وانه شابعه دك

المنذر بهدوء...من ايدج

شهكت واحجي بكلمات متقطعه من البجي...اليوم رجل هاله مدللها ومحتار بفروخها...اءءء قصدي بجهالها...

وهي تركب مرجوحه وتركب سفينه ويعاين الحلگها

وانه بعدني ما ركبت سفينه كتلتني...شنهي فصليه ما عدي اخووه والله اخووي عابد يهجم زلف كامل لخاطر عيوني...

بس انه ما اشكي واحجي

انه كتلك من ذاك اليوم طلكني وخلي كل واحد يروح بحال سبيله

عبن انت بالغرب وانه بالشرق موش متوالمين

هو هز ايده وضحك بسخريه كال...ليش انتي ناطيتني مجال...

لفيت نفسي عليه بعصبيه...انه وحده وكحه ووحده موش خووش

شعندك ضال وياي...

هو سحبني ضمني لصدره وانه دفعته ...رووح وخر مني جسمي يوجعني من ضربك وانه مووش راضيه

كال ...ترئ انتي الغلطانه محد غلطان غيرج

حاولت اخلص نفسي منه خليت ورحت للكنتور شنهي ضاله افتر عليه بقميصه...

وهو موش رجال عبنه مووش راحه وعيونه تنطنط علئ رجليه....

لزم الحجل انكسر همس باسف...بعد معركه انتي الخاسره بيها واني ربحان...

اكتشفت اني خسران بعد ما افتقدت اعز ما املك حجلج الكاسر عيني...

باوعتله حجلي مكسور انقهرت علي بس فرحت لان نذري يحبه وانكسر...

همست ...حللللللللل

ضحك كال...اشتريلج غيره رجلج تنطي رونق للحجل مو الحجل ينطيها رونق...

الحجل_يركص

#غزل لو ضاك #رجلينج

عفته ورحت كلامه ما يأثر بيه شنهي انه دوشك كلساع وطكني وزورك جسمي...

شنهي ماعندي احساس انه وبساع ارضه ياله وروح ابوووي ولا ارضه...

رحت طلعت ملابس مدري مالاتمن مال وحده ميته

ابو النسوان ما مخلي شئ ما مشتري بس مبين قديمات ومتروكات...

رحت غسلتهن ولبستهن مبللات

عبن شنهي اكشن من نسوانه الخايسات

ضليت ابجي وهو متمدد ويدخن وحاير...

صار دنيا ليل وانه متت جوع وباجر امتحاني كلشي ما حافظه...

موش انه ططوه صارت إمتحاناتي ويه مصايبي.

هو رحت توضيت وصليت وبجيت طلبت من ربي يسامحني ويغفرلي علئ غلطتي اليوم....

وهو هم كام توضئ وصله الحمد لله صار يصلي ويعبد موش مثل اول

بس شنهي الفايده انه تعبت عليه وراح يروح الغيري

انه اربي وغيري تجي علئ الحاظر

كمل صلاة كال...حضري روحج يالله نرجع للبيت

درت وجهي زعلانه ولفيت حجابي وطلعت وانه

اباوع للبيت

شهد علئ سوالف تعبانه وانتهاك الكرامتي واخلاقي وخضعت معركه جنت اني الخسرانه بيها....

ركب بالسياره واني صعدت ساق بهدوء والدخان ما فارك شفايفه

جنت مثل الجكاره احترك حرك

اتذكر كلامهن من عمتي كلتلها...خلي اشوف هذا الشهر اذا محبلت اخذها للدكتورة بلكي تحبل

وحنان دكلها...لا مرة عموو هماتين هيج وابد محبلت يبس رحمها...

وصلنه للبيت وجهي معطب من الراشديين الاخذتهن

قررت اخلص امتحانات واروحن الاهلي

روحي هايمه وحاسه بغربة مشتاقه لامي

رحت يم نيران حضنتها شبعت بجي هي استغربت حييل

خطيه مقصرت حضنتني وكالت شكووو

من شافت خدي عرفت مكتوله

ضلت تحجي عليه وتلوم بيه وانه خلصتها جاا موش هنه يلبسن...

هي كالت هذا الكلام ميوكل خبز تعالي اقره

لزمت الكتاب مال الانكليزي وكعدت تقريني وكالت هاي اختيارات هيج اختاري

جانت دموعي توكع علئ الكتاب احاول استوعب بس ماكوو فايده...

ضلت للصبح خطيه تشرح المهمات قرتهن الي...

المهم شوويه حفظت...

عيوني مرمه ولا اكدر افتحهن

هو دك الباب...صاح منوووس يالله اتأخرت حظري نفسج بسرعه

اني كلت مااروح وياه بس شنهي من يروح وياي المعلمين يساعدوني ويردولي

غسلت وبدلت بسرعه وطلعت

هو من شاف وجهي ارتعب مورم من البجي.

تنهد بضيق وكال...يالله امشي

اخذت طول الطريق ابجي وهو ساكت ما نطق بولا كلمه....

وصلنه وهو مثل ذيج المره وصه عليه

دخلت للامتحان عرفت كم فرع من الاسئله

ولوو اول ما انطونياها لازمتها بالمكلوبي وساعه صافنه مااعرف ساسها من راسها....

اجت المعلمه عدلتها الي يالله فهمت...

وساعدتني بس موش هوواي شويه

طلعت كال ...هاا جاوبتي

هزيت راسي بأي ورحت زعلانه

وهو جر نفس قوي وركبنه بسياره طول بالطريق يفر بيه...

وبعدها رحنه للبيت خليت ونمت حتئ ما بدلت...

كعدت ساعه بالعشره باليل...

هو لكيته مو هنا رايح الدوامه....

انقهرت حيل حاسه بكئابه اريدن اروح الزهوره بس خاف اطلع وانكتل وبعد مابيه حيل طك

موش زهوره من ريحة احبابي واهلي وناسي وهي اختي الما جابتها امي

مؤدبه وعاقله موش مثل السحليات الجابهن مؤيد

هو صلف ينلام لو كال الفاهي ابو حلك الملطي

موش مثل الاسد ما ينگحم بس شنهي توحش تالي وكت وصار بس يكفخ...

يتعيقل عبن يردون يرفعونه ويصير نقيب

هو ضابط واكول اسسد اسسد جاا من نقيب شكولن...

وحشش وحشش..

مااريدنه ولا احبنه

طلعت المدام تتبطح لازمه بطنها وهي كرش حفيظه اكبر منه

كالت بدلع...بطني توجعني موتتني

تنهدت...جااا ليش خاف ماكله هوواي...اي صدك انتي تكثرين بالاكل وهل تهورشتي

عقدت حواجبها وكالت ...لا بس النونو زاعجني ومتعبني ومؤيد متعب وبس يبوس بيه

مع العلم دكوله موزين علئ نونو بس هو لا ابالي

لويت شفايفي جاوبتها...نفس نذري منا لمن طيح النونو مالتي

كعدت علئ الدرج كالت...اووف مشتهيه لبن وليمون دا اتنسئ حمضيات

احتمال جنس الجنين ولد

ونبي مدا اصدك مؤيد يصير عنده طفل قبل المنذر مع العلم منذر متزوج قبل

يعني اني هسه ابني هو ولي العهد وهو الطفل الكبير والبكر للعائله...

حسيت دخنت من كلامها كلتلها...اي البكر بس شنهي لازم تربينه تربيه صالحه موش تخلينه عار علئ العايله...

كالت بغرور...نو نو ابني يطلع فد شئ لان ابو دارس وامه مخلصه تجاره

بس اذا صار عندج طفل خطيه مااعتقد يتطور لان بصراحه دشوف استيعابج بطيئ

جريت نفس بقهر...موش بطيئ بالعكس نذري يكول انتي ذكيه بس انه ما داخله مدرسه وهسه دخلت والحمد لله بسرعه استوعب...

دخل مؤيد شايل علاليك كلها حلويات ومدري شنهي

هي وكفت ملهووفه حضنته وباسته كدامي بكل جرائه ودكله....اوووووي فدوووه حبيبي انت كوولش تحبني ومدللني وديبين عليك

وعود شنهي تقصد انه نذري بس يكتل بيه

عافتني وراحت لغرفتها هي و رجلها

غميتها ورحت الغرفتي شكد مستفزة وملعونه هي واختها

والله زين الفاجرات نايمات بحضونة رجلهن وانه حاضنه المخده...

.....................................

نيران ..اليوم هو يوم حنتي

جان يوم مزعج كد ما هو مفرح للباقي

رحت للصالون اني واختي بدت تشتغل بيه ويه كل لمسه اتذكر فاروق العار

وتهديده اليه طلبت منه مهله وره العرس وكلشي حيكون تمام...

انتبهت علئ ام الصالون خلصتني

وكفت كدام المرايه ..وإني اباوع على شكلي

لابسه بدله مارونيه ومكياج ناسك وطالع شكلي حلو اتنهدت بحزن يا ريت يفيد هل جمال ..

اشو وكعني بمصايب الها اول مالها آخر واتزوجت شخص .. حتى ميطيق يباوع بوجهي اجتي اختي عليه وابتسمت وكالت

-لج نيران هاي شطالعه غير تخبلين هسه عمر يدوخ ويوكع لما يشوفج ..

تافئفت لما سمعت اسمه هو حتى ميباوع بوجهي مو نوب يوكع من يشوفني

جرتني وكعدتني على الكرسي منتظرين مؤيد يجي علينه ياخذنه من الصالون ..

اشوي واجه لبستني اختي البركع مال بدله وطلعنه

وصلنه للبيت ودخلت والهلاهل بدت كعدت على التخم ..

بعد مده اجوي أهل عمر دخل عمر ورا أمه تهلهل وتركص ..

اجه كعد يمي ودار وجهه مني .

. وجان يتصرف برود

جابو الكيك والعصير وخلو كدامنه وأمه كالت

-يلا يمه عمر وكل مرتك الكيك ..

هو دار عليه أخذ الكيكة وخلاها بحلكي إلا اشوي جان لطخها بخشمي وشربني العصير بسرعه
مسح كف أيده بالجفيه ودار وجهه ..

أمه اجتي وكفت يمي وانطتني الكيكة

لزمت الكيكة بادين ترجف هو خزرني وأخذ الكيكة مني واكلها وكف وكال

-يلا يوم اتاخرنه ..

اني نزلت راسي للأرض وأمه كالت

-على شنو يوم تاخرت أكعد ليش مستعجل ..

هو أصر على الروحه طلع اجتي سلمت عليه أمه

وراحو بقيت اباوع على البنات وهنا يركصن ..وبداخلي اكول

عندي بصيص أمل انو اكدر اغيره واكدر أحبه واعيش ويا ..

انه جنت ضايجه

وبشرئ وحيحو وفطم كلهن جايات ويركصن همزين المنذر موش هنا

جاا صارت بنعل

جنت لابسه بدله ذهبيه كصيره وحاله شعري مشسورته

وحاطه حمره لونها ماروني طووخ مالت هاله

بس ذن الكاوليات لاعبات لعب

الشعر تسريحات والمكياج عد الصالون

والبس مشلتح

انه صاحت عليه هلوله كالت جيبي المناشف بغرفتج

عااا صار هواي مداخلتها من اول كتله

رحت امشي بهدوء وحزن...ا

اول ما دخلت واشوفن المنذر بوجهي

منارس...اءءءء اريدن المناشف هاله دكول

هو ضحك كال..تحسسيني تطلبين من جيرانكم مو من غرفتج

درت وجهي رحت اجيب المناشف

ماحسيت غير باديه طوقت خصري من وره ودفن وجه بشعري وهو يشمه

بلعت ريكي وغمضت عيوني وكعت دمعه يتيمه من عيني وشهكت

هو تخبل دارني عليه ويحجي وياي مثل الطفله

المنذر بحنين...مناري يروحي شبييج ادري ائذيتح وتعبتج بس اصبري راح افاجئج والله

دفعته وطلعت اركض وانه ابجي...

رحت الغرفة نيران ونمت وبملابسي وابجي

عدم اهتمامه بيه اذتني حييل كرهتني بروحي

كلهم مو بس هو كلهم ...

نمت ومحد اصلا سأل عني وفقدني هم شئ عدهم ام حفيدهم الاول حنان....

..............................

العرس جنه بالعرس مالت نيران طلعت حلوه حيل

بس عمر ولا مقلد الها حالها حال الموجودين

وهي طكتها بجيه خربت ابو المكياج

نريد نسكتها ماكوو

كلها تبوس بيها امها وأختها وحتئ انه بس هي بس تبجي

كدرنه نسكتها وبعدها تعشينه وهي زفوها....

واحنه اجينه بسياره

جنت حيل ضايجه جنت انام يمها هسه وين انام

نذري ماانامن يمه اله يتعدل ويخليني كل نسوانه

ولا يضربني بعد ويبصبص للنسوان...

رجعنه للبيت هو جان ماكوو خفر...

سبحت وبدلت وصليت ورحت بسابع نومه

وتراودني احلام المنذر محتركه سيارته

لو اني سجينه بركبتي...

واكعد ارجف وابجي من الخوووف والرعب

من تزوجت لحد الان ما تحلمت حلم حلوو

احس حياتي الهدوء ما بعد العاصفه

رجفت وقريت ايات صغار من القران ورجعت نمت

كعدت الصبح كلها نايمه

ثاني يوم السبت

البارحه عرس نيران واليوم سبت كالوو وزعو النتائج

اني مو من المدرسه استلم لازم من التربيه

بس ام طالب كالت وزعو الشهايد وهي طالعه ناجحه

رحت لعمتي توسلت بيها نروح للتربيه عبن المنذر موش هنا....

عمتي بست ايدها يالله رضت تروح وياي....

بس شنهي كالت نضفي يالله موش حنان ضهرها يوجعها

وانه بدون ما توصي حريص كربت الكراب المطي

بدلت ورحنه اجرنه تكسي شنهي ارجف وبطني توجعني عبن حييييل خايفه

وصلنه للتربيه

عمت وكفت علئ صفحه وانه لزمت الشباك

الموضف انطيته اسمي وهو شويه وجاب النتيجه

كتله بخووف ...هااا ساقطه

ضحك كال...لا بنيتي إكمال بالاسلاميه

عقدت النونه وطكيتها بجيه بوجه الرجال وانه اتوسل بي...عليك ابو فاضل عمي نجحني

عبن شنهي يتشمتون بيه ويكول ساقطه

ورجلي قاسي يكتلني فدوه عمي نجحني

كال باسف...مو يمي والله لو عليه انجحج بس والله مو يمي...

ضليت اتوسل بي وابجي بس هو كال مو يمي واعتذر مني...

انه باوعت عمتي بعيده

لزمت الشهاده بخوف وانه ابجي

وحددتها من يم الاسلاميه والاسم وشكيتها بس بترتيب

من العربي وجوه انه ناجحه بس شنهي الاسلاميه ساقطه

شلت اسمي ودرجتة الاسلاميه وشمرتها بزباله

رحت العمتي واني امسح بدموعي

كالت...ها شطلعتي

كلتلها بخوف ...ناجحه...

هي حضنتني وباركت الي

ورحنه للبيت هي همزين ما شافت شهادتي جاا انفضحت...

وصلنه للبيت جان المنذر هسه داخل

امه كلتله ...خايب ابشرك منارس ناجحه

هو ضحك كال...صدك بالله شهادتج؟

طلعتها من جنتي بخجل وانهيار ودمعه تلمع بعيني

جانت حنان واكفه ومؤيد ....

طلعتها انطيتها اله

هو باوع عليها استغرب...

عبن موش شهاده نص شهاده

جنها دجاجه طاير منها فخذ موش الاسلاميه ماكو هي واسمي

باوعلي بااستغراب واني باوعتله بحسره

رفعت روحي اله وهو نزل نفسه شاورته بصوت رايح من البجي....

همست بفشله ونحيب...انه ساقطه

هو باوع عليه مستغرب

رجعت همست ...ساقطه بالاسلاميه وشكيتها

هو ضحك وحضني حيل باسني بخدي وكال...اي ادللي اخذج للحبانيه بمناسبة نجاحج...

انه استغربت خطيه ما حب يفشلني...

بس مؤيد خمطها من ايد المنذر بسرعه وهو يضحك

_نهاية البارت ..
.

........ #يتبع

#رواية...انا هي جميع نساؤك

#بقلمي...سمو العراق

مستقبل منارس ونذرها 💔

هلاوو بنات قلبي


حبيت اغششكم شوويه...

عن مستقبل منارس ونذرها....

اتبعوني...مشهد👇

......................

شلت طفلتي ولبست حجابي وعباتي وطلعت

روحي هايمه وصار اسبوع عيني ما شافت النوم

والدموع تنزل بغزاره...

انه خسرت نذري لا مااصدك وروح غرومه ابوسن الرجلين بس يرجع الي....

احسن روحي معطوبه والالم ياكل بصدري

بعده عني سرطان ينهش بعضمي

باوعت لبنتي وطفلي الثاني الي ما ولدته اني لا ربيته

بس اعز من روحي

حضنت البنيه بستها بخدها

مرة عمي صاحت عليه كالت...وين منارس

باوعت عليها باسئ وروح ذايبه همست بنحيب ...رايحه ابوسن الرجلين بس يرجع نذري

هي حطت ايدها علئ راسها وبجت

شفت جاسم واكف بالباب

باوع عليه كال...هااا منارس وين رايحه خوويه

جريت حسره كطعت انياط كلبي جاوبته...خويه بعد اختك وديني البيت وثاب

هو عقد حواجبه كال...خلي يولي هل عار لا ترحيله هل نكس ومنذر يرجع وعيونه تشوف

بلعت حسرتي وجاوبته...خوويه النار تاكل بكلبي عبن هذا ابو وليداتي احبببنه

واحسنه بخطر خوويه انت ما تعرف الصار جمره تاكل

هزيت راسي ممصدكه الصار مستحيل مستحييل

هيج المنذر يضيع هييج يلتفون عليه

كال...خوويه طبي جوه احنه نحلها

توسلته ببكاء...فدوه اروحلك بعد اخيتك خليني اروحن

هو خطيه فتح باب السياره وركبت بسرعه ساق البيت وثاب

واخذت الطريق كله ابجي واطفالي تبجي وياي...

همست...وين اهل العگل ركابة الخييل

وينك يصلف من بعدك ضعنه ولزمتنه الغمان...

انت الوحيد التكدر تسحل هل عار من عكاله...

وصلنه للبيت

نزلت من السياره باوعت علئ جاسم كتله...خوويه جاسم ضل هنا انه هسه اجي...

هو اصر يدخل وياي بس انه ما رضيت وخليت ودكيت الباب وحدي...

فتحتلي الباب مرة وثاب

لابسه ثوب اسود ومنگبه ...

بلعت ريكي كلتلها ...الشيخ موجود

كالت بتجبر...فووتي

دخلت شفتهن كلهن لابسات اسوود يخوفن

من شافني هجمن عليه بذاك الغلط والمسبه

اجه فاروق وكف بجبروت كلهن...اششش التفك حلكها اشك حلكها

باوع عليه كال فوتي الشيخ بديوانه

رجفن رجليه وحضنت طفلتي ولزمت الثاني

دخلت برعب شفته كاعد بااريحيه

والدله والفنجان كدامه ولحيته عاليه وسبحته يفر بيها

من شافني رفع راسه وركز بنظره عليه

مسحت دمعتي كتله بتوسل...ابوسن ايدك ترئ انه مالي ذن ليش تاخذون رجلي مني

هو رفع حاجبه وضحك بااستهزاء...اممم وشتردين

جاوبته بحزن....نذري

هو ضل يمسح علئ لحيته وانظاره تخترقني بفساد كال...اقري عليه الفاتحه

صرخت بجزع...ياله يووومك قبل يووومه والله والله اهجم العراق عليكم والله انتقم منكم

نذري يرجع يعني يرجع...

هو ضحك بخبث...اوووف لبوووه فدووه الحلكج

جريت نفس وابجي حييل بس دموعي ما اثرت لا بفاروق ولا بوثاب....

رجع كال...دموعج غاليه منورتي ميخالف التردينه يجرالج حتئ تعرفين معزتج عندي

فرحت ضحكت بفرح ممصدكه يعني راح يرجع نذري

جاوبته...ابوسن ايدك اصيرن خدامه فدوه اروحلك والله المنذر موش حاقد حتئ هو ما يدري بالسالفه هو موش حاقد...

هز راسه باسئ وكمل...اي بس عندي شرط واحد لا غير

صفنت عليه وعقدت حواجبي سالته..شنهي الشرط

ابتسم بخبث وكال...تطلكين قبل كلشي وتنطينه جهاله اعقد عليج واتزوجج وبعدها المنذر بأمان....

وغير هل كلام اعتبري المنذر بعداد الاموات والله واني وثاب مستحيل اتراجع واتنازل عن كلامي

الي احجي يتنفذ بالحرف الواحد ولا تخليني اهجمكم هحم

جانت كلماتها سهام تخترق صمامات كلبي والحيره زادت عندي الف...

يا اما اموت يا اما امووت وماكو حل وسط

ونلف حبل مشنقه علئ نحري وذبحني وثاب....

.............

وبعدها مغامرات منارس مستمره...

_

"اليوم نزلت بارت واحد والمفروض ما انزل احتراماً لهذا اليوم بس لخاطركم نزلت ".🌸

ولٱتنـسون ارأئڪــّم وتوقـعٰـاتڪم وتفاعلڪم 💜

@sa_rr1bot